1 ⵉⵏⵏⴰ ⴷⴰⵡⵓⴷ ⴷⴻⴳ ⵡⵓⵍ ⵏⵏⴻⵙ: “ⵍⴻⵅⵅⵓ ⵄⴰⴷ ⵉⵊⵊ ⵏ ⵡⴰⵙⵙ ⵓⵛⴰ ⴰⴷ ⵜⵜⵡⴰⵏⵖⴻⵖ ⵅ ⵓⴼⵓⵙ ⵏ ⵛⴰⵡⵓⵍ. ⵡⴰⵔ ⵉⵇⵇⵉⵎ ⵃⴰⵛⴰ ⴰⴷ ⴰⵔⴻⵡⵍⴻⵖ ⴷⴻⵖⵢⴰ ⵖⴰⵔ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵎⴰⵃⴻⵏⴷ ⴰⴷ ⵉⵇⴹⴻⵄ ⵉ ⵛⴰⵡⵓⵍ ⵍⴰⵢⴰⵙ ⵥⵉ ⵊⵊⵉⵀⴻⵜ ⵉⵏⵓ ⵎⴰⵃⴻⵏⴷ ⴰⴷ ⵅⴰⴼⵉ ⵢⴰⵔⵥⵓ ⵄⴰⴷ ⴽⵜⴰⵔ ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵏ ⵉⵙⵔⴰⵉⵍ. ⴰⵎⵎⵓ ⵉ ⵖⴰ ⵏⴻⵊⵎⴻⵖ ⵉ ⵓⴼⵓⵙ ⵏⵏⴻⵙ.” 2 ⴷⴰⵡⵓⴷ ⵉⴽⴽⴰⵔ, ⵏⴻⵜⵜⴰ ⴷ ⵙⴻⵜⵜⴰ-ⵎⵢⴰ ⵏ ⵢⴻⵔⵢⴰⵥⴻⵏ ⵏⵏⵉ ⵜⵓⵖⴰ ⵖⴰⵔⴻⵙ ⵉⴵⴰⵏ, ⵄⴷⵓⵏ ⵖⴰⵔ ⵎⵎⵉⵙ ⵏ ⵎⴰⵄⵓⴽ, ⴰⵊⴻⴵⵉⴷ ⵏ ⵊⴰⵜ. 3 ⵉⵇⵇⵉⵎ ⴷⴰⵡⵓⴷ ⵖⴰⵔ ⴰⵅⵉⵙ, ⵏⴻⵜⵜⴰ ⴷ ⵢⴻⵔⵢⴰⵥⴻⵏ ⵏⵏⴻⵙ, ⴽⵓⵍ ⴰⵔⵢⴰⵥ ⴰⴽ-ⴷ ⵜⴰⴷⴷⴰⵔⵜ ⵏⵏⴻⵙ. ⴷⴰⵡⵓⴷ ⵉⵥⴷⴻⵖ ⴷⵉⵏ ⴰⴽ-ⴷ ⵜⵏⴰⵢⴻⵏ ⵏ ⵜⴻⵎⵖⴰⵔⵉⵏ ⵏⵏⴻⵙ, ⴰⵅⵉⵏⵓⵄⴰⵎ ⵥⵉ ⵢⴰⵥⵔⴰⵄⵉⵍ ⵓ ⴰⴱⵉⵊⴰⵢⵉⵍ, ⵜⴰⵎⵖⴰⵔⵜ ⵏ ⵏⴰⴱⴰⵍ, ⵥⵉ ⴽⴰⵔⵎⵉⵍ. 4 ⵓⵎⵉ ⵉⵜⵜⵡⴰⵏⵏⴰ ⵉ ⵛⴰⵡⵓⵍ, ⴰⵇⴰ ⴷⴰⵡⵓⴷ ⵢⴰⵔⵡⴻⵍ ⵖⴰⵔ ⵊⴰⵜ, ⵡⴰⵔ ⵢⴰⵔⵏⵉ ⵉⵇⵇⵉⵎ ⴰⴷ ⵅⴰⵙ ⵢⴰⵔⵥⵓ ⵄⴰⴷ ⴽⵜⴰⵔ.

5 ⵓⵛⴰ ⵉⵏⵏⴰ ⴷⴰⵡⵓⴷ ⵉ ⴰⵅⵉⵛ: “ⵎⴰⵍⴰ ⵓⴼⵉⵖ ⵏⴻⵛⵛ ⵍⵅⴰⴹⴰⵔ ⴷⵉ ⵜⵉⵟⵟⴰⵡⵉⵏ ⵏⵏⴻⴽ, ⵅⴻⵏⵏⵉ ⴻⵡⵛ ⴰⵢⵉ ⵉⵊⵊ ⵏ ⵡⴻⵎⵛⴰⵏ ⴷⴻⴳ ⵉⵛⵜ ⵥⵉ ⵜⵏⴻⴷⴷⴰⵎ ⵏⵏⴻⴽ ⵏ ⵜⴻⵎⵎⵓⵔⵜ, ⵃⵉⵎⴰ ⵥⴻⵎⵎⴰⵔⵖ ⴰⴷ ⵥⴻⴷⵖⴻⵖ ⴷⵉⵏ. ⵎⴰⵢⴻⵎⵎⵉ ⵉ ⵖⴰⵔⴻⴽ ⵉ ⵖⴰ ⵉⵥⴷⴻⵖ ⵓⵎⵙⴻⵅⵅⴰⵔ ⵏⵏⴻⴽ ⴰⴽⵉⴷⴻⴽ ⴷⵉ ⵜⴻⵏⴷⵉⵏⵜ ⵏ ⵓⵊⴻⴵⵉⴷ?” 6 ⴷⴻⴳ ⵡⴰⵙⵙ ⵏⵏⵉ ⵉⵡⵛⴰ ⴰⵙ ⴰⵅⵉⵛ ⵜⴰⵏⴷⵉⵏⵜ ⵏ ⵚⵉⵇⵍⴰⵖ. ⵙ ⵓⵢⴻⵏⵏⵉ ⵜⵓⵖⴰ ⵜⴻⴵⴰ ⵚⵉⵇⵍⴰⵖ ⵏ ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ ⵖⴰⵔⴻⵙ ⴰⵍ ⴰⵙⵙ-ⴰ. 7 ⵓⵙⵙⴰⵏ ⵉ ⵉⴽⴽⴰ ⴷⴰⵡⵓⴷ ⴷⵉ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵜⵓⵖⴰ ⵉⵊⵊ ⵏ ⵓⵙⴻⴳⴳⵯⴰⵙ ⴷ ⴰⵔⴻⴱⵄⴰ ⵏ ⵉⵢⵓⵔⴻⵏ.

8 ⴷⴰⵡⵓⴷ ⵉⴼⴼⴻⵖ ⴰⴽ-ⴷ ⵉⵔⵢⴰⵥⴻⵏ ⵏⵏⴻⵙ ⵓ ⵏⵉⵜⵏⵉ ⴽⴻⵛⵛⴹⴻⵏ ⵉⵊⴰⵛⵓⵔⵉⵢⵢⴻⵏ ⴷ ⵉⵊⴰⵔⵥⵉⵢⵢⴻⵏ ⴷ ⵉⵄⴰⵎⴰⵍⵉⵇⵉⵢⵢⴻⵏ, ⵎⵉⵏⵥⵉ ⵉⵏⴰ ⵜⵓⵖⴰ ⵥⴻⴷⴷⵖⴻⵏ ⵥⴻⴳ ⵡⴻⵛⵃⴰⵍ ⵓⵢⴰ ⴷⵉ ⵜⴻⵎⵎⵓⵔⵜ ⵉ ⵉⴵⴰⵏ ⵖⴰⵔ ⵛⵓⵔ ⵖⴰⵔⴻⵙ ⴰⵍ ⵜⴰⵎⵎⵓⵔⵜ ⵏ ⵎⵉⵚⵔⴰ. 9 ⴷⴰⵡⵓⴷ ⵉⵡⵜⴰ ⵜⴰⵎⵎⵓⵔⵜ ⵓ ⵡⴰⵔ ⵉⵊⵊⵉ ⴰⴷ ⵉⴷⴷⴰⵔ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵥ ⵏⵉⵖ ⴷ ⵜⴰⵎⵖⴰⵔⵜ. ⵉⵟⵟⴻⴼ ⵄⴰⵡⴻⴷ ⵓⴵⵉ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵢⴻⵖⵢⴰⵍ ⴷ ⵉⵍⴻⵖⵎⴰⵏ ⴷ ⵡⴰⵔⵔⵓⴹ ⵓⵛⴰ ⵉⵄⵇⴻⴱ, ⵢⵓⵙⴰ-ⴷⴷ ⵖⴰⵔ ⴰⵅⵉⵛ.

10 ⵓ ⴰⵅⵉⵛ ⵉⵏⵏⴰ: “ⵎⴰⵏⵉ ⵜⵔⵓⵃⴻⵎ ⴰⵙⵙ-ⴰ ⴰⴷ ⵜⴽⴻⵛⵛⴹⴻⵎ?” ⵉⵏⵏⴰ ⴷⴰⵡⵓⴷ: “ⵖⴰⵔ ⵍⵊⴰⵏⵓⴱ ⵏ ⵢⴰⵀⵓⴷⴰ ⵓ ⵖⴰⵔ ⵍⵊⴰⵏⵓⴱ ⵏ ⵜⴻⵎⵎⵓⵔⵜ ⵏ ⵉⵢⴰⵔⵃⴰⵎⵉⵜⵉⵍⵉⵢⵢⴻⵏ ⵓ ⵖⴰⵔ ⵍⵊⴰⵏⵓⴱ ⵏ ⵜⴻⵎⵎⵓⵔⵜ ⵏ ⵉⵇⵉⵏⵉⵢⵢⴻⵏ.”

11 ⵡⴰⵔ ⵉⵊⵊⵉ ⴷⴰⵡⵓⴷ ⴰⴷ ⵉⴷⴷⴰⵔ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵥ ⵏⵉⵖ ⵓⵍⴰ ⴷ ⵉⵛⵜ ⵏ ⵜⴻⵎⵖⴰⵔⵜ ⵃⵉⵎⴰ ⴰⴷ ⴷⴷ-ⵢⴰⵙ ⵖⴰⵔ ⵊⴰⵜ. ⵉⵏⵏⴰ: “ⵃⵉⵎⴰ ⵏⵉⵜⵏⵉ ⵡⴰⵔ ⵅⴰⵏⴻⵖ ⵜⵜⵄⵉⵡⵉⴷⴻⵏ ⵡⴰⵍⵓ, ⴰⴷ ⵉⵏⵉⵏ: ‘ⵜⴰ ⵉ ⵉⴳⴳⴰ ⴷⴰⵡⵓⴷ!’ ” ⴰⵎⵎⵓ ⵉ ⵉⵇⵇⵉⵎ ⵉⵜⵜⴻⴳⴳ ⴷⵉ ⵎⴰⵔⵔⴰ ⵓⵙⵙⴰⵏ ⵉ ⵉⴽⴽⴰ ⴷⵉ ⵊⵊⵡⴰⵢⴻⵀ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ.

12 ⴰⵅⵉⵛ ⵉⵜⵜⵉⵇⵇ ⴷⵉ ⴷⴰⵡⵓⴷ, ⵉⵏⵏⴰ: “ⵙ ⵜⵉⴷⴻⵜⵜ ⵏⴻⵜⵜⴰ ⵉⵙⵙⴰⵔⵥⴻⴳ ⵉⵅⴻⴼ ⵏⵏⴻⵙ ⵖⴰⵔ ⵍⴳⴻⵏⵙ ⵏⵏⴻⵙ, ⵖⴰⵔ ⵉⵙⵔⴰⵉⵍ, ⵓⵛⴰ ⵅ ⵓⵢⴻⵏⵏⵉ ⴰⵇⴰ ⵏⴻⵜⵜⴰ ⵉ ⵍⴻⴱⴷⴰ ⴰⴷ ⵢⵉⵍⵉ ⴷ ⴰⵎⵙⴻⵅⵅⴰⵔ ⵉⵏⵓ.”