ⵉⵜⵜⵡⴰⴷⵀⴻⵏ ⵛⴰⵡⵓⵍ ⴷ ⴰⵊⴻⴵⵉⴷ
10
1 ⵓⵛⴰ ⵅⴰⵙ ⵉⴽⵙⵉ ⵛⴰⵎⵡⵉⵍ ⵜⴰⵥⵉⵢⵢⴰⵜ ⵏ ⵥⵥⴻⵛⵜ, ⵉⵙⴻⵢⵢⴻⴱ ⵉ-ⵜⵜ ⵅ ⵓⵥⴻⴵⵉⴼ ⵏⵏⴻⵙ, ⵉⵙⵙⵓⴷⴻⵎ ⵉ-ⵜ, ⵉⵏⵏⴰ: “ⵎⴰ ⵅⴻⵏⵏⵉ ⵙⵉⴷⵉ ⵡⴰⵔ ⵛⴻⴽ ⵉⴷⵀⵉⵏ ⴷ ⴰⵎⴻⵃⴹⴰⵢ ⵅ ⵍⵡⴰⵔⵜ ⵏⵏⴻⵙ? ■ 2 ⵅⵎⵉ ⵅⴰⴼⵉ ⵉ ⵖⴰ ⵜⵓⵢⵓⵔⴻⴷ ⴰⵙⵙ-ⴰ, ⴰⴷ ⵜⴰⴼⴻⴷ ⵖⴰⵔ ⵡⴻⵏⴹⴻⵍ ⵏ ⵔⴰⵃⵉⵍ ⴷⵉ ⵚⴰⵍⵚⴰⵃ ⴷⵉ ⵜⴻⵎⵎⵓⵔⵜ ⵏ ⴱⵉⵏⵢⴰⵎⵉⵏ ⵜⵏⴰⵢⴻⵏ ⵏ ⵢⴻⵔⵢⴰⵥⴻⵏ ⵓ ⵏⵉⵜⵏⵉ ⴰⴷ ⴰⵛ ⵉⵏⵉⵏ: ‘ⵜⵉⵖⵢⴰⵍ ⵉ ⵅ ⵜⵓⵖⴰ ⵜⴰⵔⴻⵥⵥⵓⴷ, ⵜⵜⵡⴰⴼⴻⵏⵜ ⵓⵛⴰ ⴱⴰⴱⴰⵛ ⵉⵙⵎⴻⵃ ⴷⵉ ⵜⵎⴻⵙⵍⴰⵛⵜ ⵏ ⵜⴻⵖⵢⴰⵍ, ⵎⴰⵛⴰ ⵏⴻⵜⵜⴰ ⴷⴰⵢⴻⵙ ⵍⴻⵅⵅⵓ ⴰⵎⵏⵓⵙ ⵅⴰⵡⴻⵎ, ⵉⵇⵇⴰⵔ: ⵎⵉⵏ ⵉ ⵖⴰ ⴳⴳⴻⵖ ⵅ ⵎⵎⵉ?’ ” 3 ⵙⵙⴻⵏⵏⵉ ⴰⴷ ⵜⴰⵔⵏⵉⴷ ⴰⴷ ⵜⵓⵢⵓⵔⴻⴷ ⵓⵛⴰ ⴰⴷ ⵜⴰⵡⴹⴻⴷ ⵖⴰⵔ ⵜⵛⴻⵊⵊⴰⵔⵜ ⵏ ⵢⵉⴳⴳ ⵏ ⵜⴰⴱⵓⵔ. ⴷⵉⵏⵏⵉ ⵉ ⵖⴰ ⵜⴻⵎⵎⴻⵍⵇⵉⴷ ⴰⴽ-ⴷ ⵜⵍⴰⵜⴰ ⵏ ⵢⴻⵔⵢⴰⵥⴻⵏ ⵏⵏⵉ ⵉⵜⵜⴳⴻⵄⵄⴰⴷⴻⵏ ⵖⴰⵔ ⵙⵉⴷⵉ ⵖⴰⵔ ⴱⴰⵢⵜ-ⵉⵍ. ⵉⵊⵊⴻⵏ ⵉⴳⴳⵓⵔ ⴰⴷ ⵢⴰⵔⴱⵓ ⵜⵍⴰⵜⴰ ⵏ ⵉⵖⴰⵢⴹⴻⵏ ⵉⵎⴻⵥⵢⴰⵏⴻⵏ, ⵉⵊⵊⴻⵏ ⵉⴳⴳⵓⵔ ⴰⴷ ⵢⴰⵔⴱⵓ ⵜⵍⴰⵜⴰ ⵏ ⵜⴻⵛⵏⵉⴼⵉⵏ ⵓ ⵉⵊⵊⴻⵏ ⵉⴳⴳⵓⵔ ⴰⴷ ⵢⴰⵔⴱⵓ ⵉⵊⵊ ⵏ ⵜⵅⴰⵏⵛⴻⵜ ⵏ ⴱⵉⵏⵓ. 4 ⵏⵉⵜⵏⵉ ⴰⴷ ⵙⵙⴻⵇⵙⴰⵏ ⵅ ⵓⵎⴻⴷⴷⵓⵔ ⵏⵏⴻⴽ ⵓⵛⴰ ⴰⴷ ⴰⵛ ⵡⵛⴻⵏ ⵜⵏⴰⵢⴻⵏ ⵏ ⵜⴻⵛⵏⵉⴼⵉⵏ ⵉ ⵖⴰ ⵜᵉⵟⵟⴼⴻⴷ ⵥⴻⴳ ⵓⴼⵓⵙ ⵏⵙⴻⵏ. ■ 5 ⴰⵡⴰⵔⵏⵉ ⴰⵙ ⴰⴷ ⴷⴷ-ⵜⴰⵙⴻⴷ ⵖⴰⵔ ⵜⴻⵏⴷⵉⵏⵜ ⵏ ⵊⵉⴱⵄⴰ ⵏ ⴰⵔⴻⴱⴱⵉ ⵎⴰⵏⵉ ⴱⴻⴷⴷⴻⵏⵜ ⵜⴻⵛⴱⴰⵔⵉⵏ ⵏ ⵜⵄⴻⵙⵙⴰⵙⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ⵅⵎⵉ ⴷⵉⵏⵏⵉ ⵉ ⵖⴰ ⵜⴰⵡⴹⴻⴷ ⵖⴰⵔ ⵜⴻⵏⴷⵉⵏⵜ, ⴰⴷ ⵉⵎⵙⴰⵔ ⴰⴷ ⵜⴻⵎⵎⴻⵍⵇⵉⴷ ⴰⴽ-ⴷ ⵉⵛⵜ ⵏ ⴽⵓⵍⴰ ⵏ ⵉⵏⴰⴱⵉⵢⵢⴻⵏ, ⵉⵏⵏⵉ ⴷⴷ-ⵉⵀⵡⴰⵏ ⵥⵉ ⵍⴳⴻⵄⵄⴷⴻⵜ, ⵓⵛⴰ ⵥⵥⴰⵜⵙⴻⵏ ⵍⵀⴰⵔⴱⴰ ⴷ ⵓⴱⴻⵏⴷⵉⵔ ⴷ ⵜⵥⴰⵎⴰⵔⵜ ⴷ ⵍⴳⴰⵎⴱⵔⵉ ⴰⵎ ⵜⵜⵏⴻⴱⴱⴰⵏ ⵏⵉⵜⵏⵉ. ■ 6 ⴰⴷ ⵅⴰⴽ ⴷⴷ-ⵉⵀⵡⴰ ⴰⵔⵔⵓⵃ ⵏ ⵙⵉⴷⵉ ⵓ ⵛⴻⴽ ⴰⴷ ⵜⵏⴻⴱⴱⴰⴷ ⴰⴽⵉⴷⵙⴻⵏ ⵓⵛⴰ ⴰⴷ ⵜⴷⴻⵡⵍⴻⴷ ⴷ ⵉⵊⵊ ⵏ ⴱⵏⴰⴷⴻⵎ ⵏⵏⴻⵖⵏⵉ. 7 ⴰⴷ ⵉⵎⵙⴰⵔ ⵅⵎⵉ ⵖⴰⵔⴻⴽ ⵉ ⴷⴷ ⵖⴰ ⵢⴰⵙⴻⵏ ⵍⴻⵄⵍⴰⵎⴰⵜ-ⴰ, ⴰⵇⴰ ⴰⴷ ⵅⴰⴽ ⵢⵉⵍⵉ ⵃⵉⵎⴰ ⴰⴷ ⵜⴻⴳⴳⴻⴷ ⵎⵉⵏ ⵖⴰ ⵢⴰⴼ ⵓⴼⵓⵙ ⵏⵏⴻⴽ, ⵎⵉⵏⵥⵉ ⴰⵔⴻⴱⴱⵉ ⴰⵇⴰ-ⵜ ⴰⴽⵉⴷⴻⴽ. 8 ⴰⴷ ⴰⵢⵉ ⵜⵉⵥⵡⴰⵔⴻⴷ ⴰⴷ ⴷⴷ-ⵜⴻⵀⵡⵉⴷ ⵖⴰⵔ ⵊⵉⵍⵊⴰⵍ, ⵓ ⵅⵥⴰⵔ, ⵏⴻⵛⵛ ⴰⴷ ⴷⴷ-ⵀⵡⵉⵖ ⵖⴰⵔⴻⴽ ⵃⵉⵎⴰ ⴰⴷ ⴷⵉⵏ ⵙⵙⴳⴻⵄⵄⴷⴻⵖ ⵜⵉⵖⴰⵔⵚⴰ ⵏ ⵡⴻⵛⵎⴰⴹ ⴷ ⵜⵖⴰⵔⵚⴰ ⵏ ⵍⴻⵀⵏⴰ. ⵙⴻⴱⵄⴰ ⵏ ⵡⵓⵙⵙⴰⵏ ⵉ ⴷⵉⵏ ⵉ ⵖⴰ ⵜⵔⴰⵊⵉⴷ ⵖⴰⵔⴻⵙ ⴰⵍ ⴷⴷ ⵖⴰⵔⴻⴽ ⵉ ⵖⴰ ⵢⴰⵙⴻⵖ, ⴰⴷ ⴰⵛ ⴷⴷ-ⴱⴰⵔⵔⵃⴻⵖ ⵎⵉⵏ ⵖⴰ ⵜⴻⴳⴳⴻⴷ.” ■ 9 ⵓⵎⵉ ⵉⵙⵙⵏⴻⵇⵍⴻⴱ ⴰⵄⵔⵓⵔ ⵏⵏⴻⵙ ⵃⵉⵎⴰ ⴰⴷ ⵢⵓⵢⵓⵔ ⵅ ⵛⴰⵎⵡⵉⵍ, ⵉⵎⵙⴰⵔ ⴰⵇⴰ ⴰⵔⴻⴱⴱⵉ ⵉⴱⴻⴷⴷⴻⵍ ⵓⵍ ⵏⵏⴻⵙ ⴷⴻⴳ ⵉⵊⵊ ⵏ ⵡⵓⵍ ⵏⵏⴻⵖⵏⵉ. ⵎⴰⵔⵔⴰ ⵍⴻⵄⵍⴰⵎⴰⵜ-ⴰ ⵉⵎⵙⴰⵔⴻⵏ ⴷⴻⴳ ⵡⴰⵙⵙ ⵏⵏⵉ ⵙⵉⵎⴰⵏⵜ ⵏⵏⴻⵙ.
10 ⵓⵎⵉ ⵉⵡⴹⴻⵏ ⵏⵉⵜⵏⵉ ⵖⴰⵔ ⵊⵉⴱⵄⴰ, ⴰⵇⴰ ⵉⵍⵇⴰ ⵉ-ⵜ ⵉⵊⵊ ⵏ ⴽⵓⵍⴰ ⵏ ⵉⵏⴰⴱⵉⵢⵢⴻⵏ ⵓⵛⴰ ⴰⵔⵔⵓⵃ ⵏ ⴰⵔⴻⴱⴱⵉ ⵉⵀⵡⴰ-ⴷⴷ ⵅⴰⵙ ⵓⵛⴰ ⵏⴻⵜⵜⴰ ⵉⵏⵏⴻⴱⴱⴰ ⴷⵉ ⵍⵡⴻⵙⵜ ⵏⵙⴻⵏ. ■
11 ⵓⵛⴰ ⵉⵎⵙⴰⵔ, ⴰⵇⴰ ⵎⴰⵔⵔⴰ ⵉⵏⵏⵉ ⵜⵓⵖⴰ ⵜ ⵉⵙⵙⵏⴻⵏ ⵉⴹⴻⵏⵏⴰⴹ ⴷ ⴼⴰⵔⵉⴹⴻⵏⵏⴰⴹ, ⵥⵔⵉⵏ, ⵜⵓⵖⴰ-ⵜ ⵉⵜⵜⵏⴻⴱⴱⴰ ⴰⴽ-ⴷ ⵉⵏⴰⴱⵉⵢⵢⴻⵏ, ⵓⵛⴰ ⵍⴳⴻⵏⵙ ⵉⵏⵏⴰ ⵊⴰⵔ ⴰⵙⴻⵏ: “ⵎⵉⵏ ⵢⵓⵖⵉⵏ ⵎⵎⵉⵙ ⵏ ⵇⵉⵛ? ⵎⴰ ⵓⵍⴰ ⴷ ⵛⴰⵡⵓⵍ ⵊⴰⵔ ⵉⵏⴰⴱⵉⵢⵢⴻⵏ?”
12 ⵉⵊⵊ ⵏ ⵡⴻⵔⵢⴰⵥ ⵙⵙⴻⵏⵏⵉ ⵢⴰⵔⵔⴰ-ⴷⴷ, ⵉⵏⵏⴰ: “ⵎⴰⵏ ⵡⴻⵏ ⵉⴵⴰⵏ ⴷ ⴱⴰⴱⴰⵜⵙⴻⵏ?” ⴰⵎⵎⵓ ⵉ ⵉⵇⵇⵉⵎ ⵡⴰⵡⴰⵍ-ⴰ ⵉⵜⵜⵡⴰⵙⵙⵏⴻⵏ: “ⵎⴰ ⵓⵍⴰ ⴷ ⵛⴰⵡⵓⵍ ⵊⴰⵔ ⵉⵏⴰⴱⵉⵢⵢⴻⵏ?” ■
13 ⵓⵎⵉ ⵉⵙⵙⴱⴻⴷⴷ ⵉⵜⵜⵏⴻⴱⴱⴰ, ⵢⵓⵙⴰ-ⴷⴷ ⵖⴰⵔ ⵍⴳⴻⵄⵄⴷⴻⵜ.
14 ⵄⵥⵉⵥⵉⵙ ⵏ ⵛⴰⵡⵓⵍ ⵉⵏⵏⴰ ⴰⵙ ⵓⵍⴰ ⵉ ⵓⵃⵓⴷⵔⵉ ⵏⵏⴻⵙ: “ⵎⴰⵏⵉ ⵜⵓⵖⴰ ⵜᵉⵜⵜⵔⴰⵀⴻⵎ ⴽⴻⵏⵏⵉⵡ?” ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⵙ: “ⵏⴰⵔⴻⵥⵥⵓ ⵅ ⵜⴻⵖⵢⴰⵍ. ⵅⴻⵏⵏⵉ ⵏⴻⵥⵔⴰ, ⴰⵇⴰ ⵏⵉⵜⴻⵏⵜⵉ ⵡⴰⵔ ⴷⵉⵏⵏⵉ ⴵⵉⵏⵜ, ⵏⵉⵡⴻⴹ ⵖⴰⵔ ⵛⴰⵎⵡⵉⵍ.”
15 ⵅⴻⵏⵏⵉ ⵉⵏⵏⴰ ⵄⴻⵎⵎⵉⵙ ⵏ ⵛⴰⵡⵓⵍ: “ⵉⵏⵉ ⴰⵢⵉ, ⵄⴰⴼⴰⴽ, ⵎⵉⵏ ⴷ ⴰⵡⴻⵎ ⵉⵏⵏⴰ ⵛⴰⵎⵡⵉⵍ?”
16 ⵛⴰⵡⵓⵍ ⵢⴰⵔⵔⴰ-ⴷⴷ ⵅ ⵄⵥⵉⵥⵉⵙ: “ⵏⴻⵜⵜⴰ ⵉⵏⵏⴰ ⴰⵏⴻⵖ ⵏⵉⵛⴰⵏ, ⴰⵇⴰ ⵜⵉⵖⵢⴰⵍ ⵜⵜⵡⴰⴼⴻⵏⵜ.” ⵜⴰⵎⴻⵙⵍⴰⵛⵜ ⵏ ⵜⴳⴻⵍⴷⴰ ⵎⴰⵛⴰ ⵉ ⵅ ⵜⵓⵖⴰ ⵉⵙⵙⵉⵡⴻⵍ ⵛⴰⵎⵡⵉⵍ, ⵡⴰⵔ ⴷ ⴰⵙ ⵜⵜ ⵉⵄⵉⵡⴻⴷ ⵛⴰ.
17 ⵛⴰⵎⵡⵉⵍ ⵉⵍⴰⵖⴰ-ⴷⴷ ⵉ ⵍⴳⴻⵏⵙ ⵖⴰⵔ ⵙⵉⴷⵉ ⴷⵉ ⵎⵉⵚⴼⴰ.
18 ⵏⴻⵜⵜⴰ ⵉⵏⵏⴰ ⵉ ⴰⵢⵜ ⵏ ⵉⵙⵔⴰⵉⵍ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⴰⵔⴻⴱⴱⵉ ⵏ ⵉⵙⵔⴰⵉⵍ: ‘ⵏⴻⵛⵛ ⵙⵙⵓⴼⵖⴻⵖ-ⴷⴷ ⵉⵙⵔⴰⵉⵍ ⵥⵉ ⵎⵉⵚⵔⴰ ⵓ ⴼⴻⴽⴽⴻⵖ ⴽⴻⵏⵏⵉⵡ ⵥⴻⴳ ⵓⴼⵓⵙ ⵏ ⵉⵎⵉⵚⵔⵉⵢⵢⴻⵏ ⵓ ⵥⴻⴳ ⵓⴼⵓⵙ ⵏ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵏⵏⵉ ⴽⴻⵏⵏⵉⵡ ⵉⵃⵚⴰⵔⴻⵏ.
19 ⴽⴻⵏⵏⵉⵡ ⵎⴰⵛⴰ ⵜⴻⵏⴹⴰⵔⴻⵎ ⵙⵉⴷⵉ ⵏⵡⴻⵎ ⴰⵙⵙ-ⴰ, ⵡⴻⵏⵏⵉ ⵜⵓⵖⴰ ⴽⴻⵏⵏⵉⵡ ⵉⴼⴻⴽⴽⴻⵏ ⵥⵉ ⵎⴰⵔⵔⴰ ⵥⵥⵄⴰⴼ ⵏⵡⴻⵎ ⵓ ⵥⵉ ⵎⴰⵔⵔⴰ ⵍⴻⵃⵚⴰⵔⴰⵜ. ⴽⴻⵏⵏⵉⵡ ⵜⴻⵏⵏⴰⵎ ⴰⵙ: ⴻⴳⴳ ⵉⵊⵊ ⵏ ⵓⵊⴻⴵⵉⴷ ⵅⴰⵏⴻⵖ! ⵅⴻⵏⵏⵉ ⵍⴻⵅⵅⵓ, ⴱⴻⴷⴷⴻⵎ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵄⵍⴰⵃⵙⴰⴱ ⵜⵉⵇⴻⴱⴱⴰⵍ ⵏⵡⴻⵎ ⴷ ⵍⵓⵍⵓⴼ ⵏⵡⴻⵎ!’ ” ■ 20 ⵛⴰⵎⵡⵉⵍ ⵉⵊⵊⴰ ⵎⴰⵔⵔⴰ ⵜⵉⵇⴻⴱⴱⴰⵍ ⵏ ⵉⵙⵔⴰⵉⵍ ⴰⴷ ⴷⴷ-ⵇⴰⵔⵔⴱⴻⵏⵜ ⵓⵛⴰ ⵜⴰⵇⴱⵉⵞ ⵏ ⴱⵉⵏⵢⴰⵎⵉⵏ ⵜᵉⵜⵜⵡⴰⴽⴽⴻⵙ ⵥⵥⴰⵢⵙⴻⵏⵜ ■ 21 ⵅⴰⵙ ⵓⵛⴰ ⵜⴻⵙⵙⵇⴰⵔⵔⴻⴱ-ⴷⴷ ⵜⴻⵇⴱⵉⵞ ⵏ ⴱⵉⵏⵢⴰⵎⵉⵏ ⵄⵍⴰⵃⵙⴰⴱ ⵍⴰⴵⴰⵜ ⵏⵏⴻⵙ ⵓⵛⴰ ⵜᵉⵜⵜⵡⴰⴽⴽⴻⵙ ⵥⵥⴰⵢⴻⵙ ⵍⴰⴵ ⵏ ⵎⴰⵜⵔⵉ ⵓ ⵅⴻⵏⵏⵉ ⵉⵜⵜⵡⴰⴽⴽⴻⵙ ⵥⵥⴰⵢⴻⵙ ⵛⴰⵡⵓⵍ, ⵎⵎⵉⵙ ⵏ ⵇⵉⵛ. ⴰⵔⵥⵓⵏ ⵅⴰⵙ, ⵎⴰⵛⴰ ⵡⴰⵔ ⵥⴻⵎⵎⴰⵔⴻⵏ ⴰⴷ ⵜ ⴰⴼⴻⵏ. 22 ⵏⵉⵜⵏⵉ ⵙⵙⴻⵇⵙⴰⵏ ⵙⵉⴷⵉ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉⵜ: “ⵎⴰ ⴷⴷ-ⵢⵓⵙⴰ ⴷⴰⵏⵉⵜⴰ ⵛⴰ ⵏ ⵉⵊⵊ ⵏⵏⴻⵖⵏⵉ?” ⵙⵉⴷⵉ ⵢⴰⵔⵔⴰ-ⴷⴷ: “ⵅⵥⴰⵔ, ⵏⴻⵜⵜⴰ ⵉⴼⴼⴰⵔ ⵊⴰⵔ ⵖⴰⵔ ⵍⴻⵇⵛⵓⵄ ⵏ ⵓⵙⴰⴼⴰⵔ.” 23 ⵏⵉⵜⵏⵉ ⵓⵥⵥⵍⴻⵏ ⴷⵉⵏ, ⵉⵡⵢⴻⵏ ⵜ-ⵉ-ⴷⴷ ⵙⵙⴻⵏⵏⵉ. ⵓⵎⵉ ⴷⴷ-ⵢⵓⵙⴰ ⵏⴻⵜⵜⴰ ⵉⴱⴻⴷⴷ ⵊⴰⵔ ⵍⴳⴻⵏⵙ, ⵢⵓⵊⴰⵔ ⵏⴻⵜⵜⴰ ⵎⴰⵔⵔⴰ ⵍⴳⴻⵏⵙ ⵙ ⵜⵉⴷⴷⵉ ⵏ ⵓⵥⴻⴵⵉⴼ. ■ 24 ⵉⵏⵏⴰ ⵛⴰⵎⵡⵉⵍ ⵉ ⵎⴰⵔⵔⴰ ⵍⴳⴻⵏⵙ: “ⵎⴰ ⵜⴻⵥⵔⵉⵎ ⵍⴻⵅⵅⵓ ⵎⴰⵏ ⵡⴻⵏ ⵉⴼⴰⵔⵥ ⵙⵉⴷⵉ? ⵓⵍⴰ ⴷ ⵉⵊⵊⴻⵏ ⵥⵉ ⵍⴳⴻⵏⵙ ⵡⴰⵔ ⴷⴰⵢⴻⵙ ⵢⴰⵔⵡⵉⵙ.” ⵓⵛⴰ ⵉⵙⵍⵉⵡⵍⴻⵡ ⵎⴰⵔⵔⴰ ⵍⴳⴻⵏⵙ, ⵏⵉⵜⵏⵉ ⵏⵏⴰⵏ: “ⵜⵓⴷⴰⵔⵜ ⵉ ⵓⵊⴻⴵⵉⴷ!”
25 ⵛⴰⵎⵡⵉⵍ ⵉⵙⵙⵛⴻⵏ ⵉ ⵍⴳⴻⵏⵙ ⵍⵃⴻⵇⵇ ⵏ ⵜⴳⴻⵍⴷⴰ, ⵢⵓⵔⴰ ⵉ-ⵜ ⴷⴻⴳ ⵉⵊⵊ ⵏ ⵡⴻⴷⵍⵉⵙ ⵓⵛⴰ ⵉⵙⵙⴰⵔⵙ ⵉ-ⵜ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ⵅⴻⵏⵏⵉ ⵢⴰⵔⵅⵓ ⵛⴰⵎⵡⵉⵍ ⵉ ⵎⴰⵔⵔⴰ ⵍⴳⴻⵏⵙ, ⴽⵓⵍ ⵉⵊⵊ ⵖⴰⵔ ⵜⴰⴷⴷⴰⵔⵜ ⵏⵏⴻⵙ. 26 ⵓⵍⴰ ⴷ ⵛⴰⵡⵓⵍ ⵢⵓⵢⵓⵔ ⵖⴰⵔ ⵜⴰⴷⴷⴰⵔⵜ ⵏⵏⴻⵙ ⵖⴰⵔ ⵊⵉⴱⵄⴰ ⵓⵛⴰ ⵉⵔⵓⵃ ⴰⴽⵉⴷⴻⵙ ⵡⴻⵥⵢⴻⵏ ⵏ ⵍⵄⴻⵙⴽⴰⵔ ⵏⵏⵉ ⵜⵓⵖⴰ ⵉⵃⴰⴷⴰ ⵙⵉⴷⵉ ⵓⵍ ⵏⵙⴻⵏ. ■ 27 ⵎⴰⵛⴰ ⴰⵢⵜ ⵉ ⵡⴰⵔ ⵉⵙⴻⴽⴽⵡⵉⵏ ⵏⵏⴰⵏ: “ⵎⴰⵎⵎⴻⵛ ⵉ ⴷ ⴰⵏⴻⵖ ⵖⴰ ⵉⴼⴻⴽⴽ ⵡⴻⵔⵢⴰⵥ-ⴰ?” ⵓ ⵏⵉⵜⵏⵉ ⵙⵙⴻⵃⵇⴰⵔⴻⵏ ⵜ ⵓ ⵡⴰⵔ ⴷ ⴰⵙ ⴷⴷ-ⵉⵡⵢⴻⵏ ⵛⴰ ⵜⴰⵔⵥⴻⴼⵜ. ⵏⴻⵜⵜⴰ ⵎⴰⵛⴰ ⵉⴳⴳⴰ ⴰⵅⵎⵉ ⵡⴰⵔ ⵉⵜⵜⴻⵙⵍⵉ. ■