ⴱⵓⵄⴰⵥ ⵉⴼⴷⵉ ⵉⵢⵢⴰⵔ ⵏ ⴰⵍⵉⵎⵉⵍⵉⴽ ⵓⵛⴰ ⵉⵎⵍⴻⵛ ⴰⴽ-ⴷ ⵔⴰⵄⵓⵜ
4
1 ⴱⵓⵄⴰⵥ ⵉⴳⴻⵄⵄⴻⴷ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⵓⵛⴰ ⵉⵇⵇⵉⵎ ⴷⵉⵏⵏⵉ. ⵓ ⵅⵥⴰⵔ, ⵉⵄⴷⵓ-ⴷⴷ ⵓⵎⴻⴼⴷⵉ, ⵡⴻⵏⵏⵉ ⵅⴻⴼ ⵜⵓⵖⴰ ⵉⵙⵙⵉⵡⴻⵍ ⴱⵓⵄⴰⵥ. ⵅⴻⵏⵏⵉ ⵏⴻⵜⵜⴰ ⵉⵏⵏⴰ ⴰⵙ: “ⴰ ⵛⴻⴽ, ⴷⵉⵀⴰ, ⴰⵙ-ⴷⴷ ⵖⴰⵔ ⵟⵟⴰⵔⴼ ⵏ ⵡⴻⴱⵔⵉⴷ ⵓ ⵜⴻⵇⵇⵉⵎⴻⴷ ⴷⴰⵏⵉⵜⴰ!” ⵢⵓⵙⴰ-ⴷⴷ ⵖⴰⵔ ⵟⵟⴰⵔⴼ ⵏ ⵡⴻⴱⵔⵉⴷ ⵓⵛⴰ ⵉⵇⵇⵉⵎ. 2 ⵢⵉⵡⵉ-ⴷⴷ ⴱⵓⵄⴰⵥ ⵄⴻⵛⵔⴰ ⵏ ⵢⴻⵔⵢⴰⵥⴻⵏ ⵥⴻⴳ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ, ⵉⵏⵏⴰ: “ⵇⵉⵎⴻⵎ-ⴷⴷ ⴷⴰⵏⵉⵜⴰ!” ⵓⵛⴰ ⵇⵇⵉⵎⴻⵏ. 3 ⵅⴻⵏⵏⵉ ⵉⵏⵏⴰ ⵉ ⵓⵎⴻⴼⴷⵉ: “ⵏⴰⵄⵓⵎⵉ ⵜⴻⵏⵏⵉ ⴷⴷ-ⵉⵄⴻⵇⴱⴻⵏ ⵥⵉ ⵜⴻⵎⵎⵓⵔⵜ ⵏ ⵎⵓ’ⴰⴱ ⵜⴻⵅⵙ ⴰⴷ ⵜⴻⵥⵥⴻⵏⵥ ⵜⴰⴽⵉⵔⴰⵜ ⵏ ⵢⴻⵢⵢⴰⵔ ⵉ ⵜⵓⵖⴰ ⵖⴰⵔ ⵓⵎⴰⵜⵏⴻⵖ ⴰⵍⵉⵎⴰⵍⵉⴽ. 4 ⵏⴻⵛⵛ ⵅⴻⵎⵎⴻⵖ, ⵅⵙⴻⵖ ⴰⴷ ⵛⴻⴽ ⵅⴰⵙ ⵅⴻⴱⴱⴰⵔⴻⵖ ⵓⵛⴰ ⴰⴷ ⴰⵛ ⵉⵏⵉⵖ: ‘ⵙⴻⵖ ⵉ-ⵜⵜ ⵥⵥⴰⵜ ⵏ ⵉⵎⴻⵥⴷⴰⵖ ⵏ ⵜⴻⵏⴷⵉⵏⵜ ⵓ ⵥⵥⴰⵜ ⵏ ⵉⵎⵖⴰⵔⴻⵏ ⵏ ⵍⴳⴻⵏⵙ. ⵎⴰⵍⴰ ⵜⴻⵅⵙⴻⴷ ⴰⴷ ⵜⵜ ⵜⴻⴼⴷⵉⴷ, ⴼⴷⵉ ⵜⵜ ⵓ ⵎⴰⵍⴰ ⵡⴰⵔ ⵜⴻⵅⵙⴻⴷ ⴰⴷ ⵜⵜ ⵜⴻⴼⴷⵉⴷ, ⵉⵏⵉ ⴰⵢⵉ ⵜ ⵃⵉⵎⴰ ⴰⴷ ⵙⵙⵏⴻⵖ, ⵎⵉⵏⵥⵉ ⵡⴰⵔ ⴷⴰ ⵃⴻⴷ ⵉⵥⴻⵎⵎⴰⵔ ⴰⴷ ⵜⵜ ⵉⴼⴷⵉ ⵎⵖⵉⵔ ⵛⴻⴽ ⵏⵉⵖ ⴷ ⵏⴻⵛⵛ ⵓ ⵏⴻⵛⵛ ⵉ ⵉⴵⴰⵏ ⴰⵡⴰⵔⵏⵉ ⴰⵛ.’ ” ⵅⴻⵏⵏⵉ ⵉⵏⵏⴰ ⵏⴻⵜⵜⴰ: “ⵏⴻⵛⵛ ⴰⴷ ⵜⵜ ⴼⴷⵉⵖ.”□ 5 ⴱⵓⵄⴰⵥ ⵢⴰⵔⵏⵉ ⵉⵏⵏⴰ: “ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⵜⴻⵙⵖⴻⴷ ⵉⵢⵢⴰⵔ ⵥⴻⴳ ⵓⴼⵓⵙ ⵏ ⵏⴰⵄⵓⵎⵉ, ⵅⴻⵏⵏⵉ ⴰⴷ ⵜⴻⵙⵖⴻⴷ ⴰⴽⵉⴷⴻⵙ ⵓⵍⴰ ⴷ ⵔⴰⵄⵓⵜ, ⵜⴰⵎⵓ’ⴰⴱⴻⵛⵜ, ⵜⴰⵎⵖⴰⵔⵜ ⵏ ⵡⴻⵏⵏⵉ ⵉⵎⵎⵓⵜⴻⵏ, ⵃⵉⵎⴰ ⴰⴷ ⵜⴻⵃⴹⵉⴷ ⵉⵙⴻⵎ ⵏ ⵓⵎⴻⵜⵜⵉⵏ ⵅ ⵜⴻⵙⵖⴰⵔⵜ ⵏⵏⴻⵙ ⵏ ⵍⵡⴰⵔⵜ.” 6 ⵉⵏⵏⴰ ⵓⵎⴻⴼⴷⵉ: “ⵅⴻⵏⵏⵉ ⵏⴻⵛⵛ ⵡⴰⵔ ⵥⴻⵎⵎⴰⵔⴻⵖ ⴰⴷ ⵜⵜ ⴼⴷⵉⵖ, ⵃⵉⵎⴰ ⵡⴰⵔ ⵜⵜⴹⵉⵢⵢⵄⴻⵖ ⵜⴰⵙⵖⴰⵔⵜ ⵉⵏⵓ. ⴼⴷⵉ ⵜⵜ ⵛⴻⴽ ⵉ ⵢⵉⵅⴻⴼ ⵏⵏⴻⴽ ⵎⵉⵏ ⵅⴰⴼⵉ ⵎⴰⵃⴻⵏⴷ ⴰⴷ ⵜⵜ ⴼⴷⵉⵖ, ⵎⴰⵖⴰⵔ ⵏⴻⵛⵛ ⵡⴰⵔ ⵥⴻⵎⵎⴰⵔⵖ ⴰⴷ ⵜⵜ ⴼⴷⵉⵖ.”
7 ⴰⵎⵎⵓ ⵜⵓⵖⴰ ⵜⵜⴻⴳⴳⴻⵏ ⵉⵏⵏⵉ ⵏ ⵥⵎⴰⵏ ⵓⵎⵉ ⴳⴳⵉⵏ ⴰⴷ ⴱⴻⴷⴷⵍⴻⵏ ⵉⵢⵢⴰⵔ ⵊⴰⵔ ⴰⵙⴻⵏ ⵏⵉⵖ ⵓⵎⵉ ⵜ ⴼⴷⵉⵏ, ⴰⵇⴰ, ⵃⵉⵎⴰ ⴰⴷ ⵜⴻⵡⵛⴻⴷ ⵜⴰⵎⴻⵙⵍⴰⵛⵜ ⵥⵥⴰⵜ ⵉ ⵡⵓⴷⴻⵎ ⵏ ⵎⴰⵔⵔⴰ ⵉⵙⵔⴰⵉⵍ, ⴰⵇⴰ ⴰⵔⵢⴰⵥ ⵉⵜⵜⴻⴽⴽⴻⵙ ⵙⴰⵏⴷⴰⵍⴰ ⵏⵏⴻⵙ ⵓⵛⴰ ⵉⵜⵜⵉⵛ ⵉ-ⵜⵜ ⵉ ⵓⵎⵇⴰⵔⵔⴻⴱ ⵏⵏⴻⵙ. ⴷ ⵎⴰⵏ ⴰⵢⴰ ⵜⵓⵖⴰ ⵉⴵⴰⵏ ⴷⵉ ⵉⵙⵔⴰⵉⵍ. ■ 8 ⴰⵎⴻⴼⴷⵉ ⵉⵏⵏⴰ ⵉ ⴱⵓⵄⴰⵥ: “ⵙⴻⵖ ⵉ-ⵜ ⵉ ⵢⵉⵅⴻⴼ ⵏⵏⴻⴽ!” ⵓⵛⴰ ⵏⴻⵜⵜⴰ ⵉⴽⴽⴻⵙ ⵙⴰⵏⴷⴰⵍⴰ ⵏⵏⴻⵙ. 9 ⵅⴻⵏⵏⵉ ⴱⵓⵄⴰⵥ ⵉⵏⵏⴰ ⵉ ⵎⴰⵔⵔⴰ ⵉⵎⵖⴰⵔⴻⵏ ⵓ ⵉ ⵎⴰⵔⵔⴰ ⵍⴳⴻⵏⵙ: “ⴽⴻⵏⵏⵉⵡ ⴷ ⵍⴻⵛⵀⵓⴷ ⴷⴻⴳ ⵡⴰⵙⵙ-ⴰ, ⴰⵇⴰ ⵏⴻⵛⵛ, ⵎⴰⵔⵔⴰ ⵎⵉⵏ ⵉⴵⴰⵏ ⵏ ⴰⵍⵉⵎⴰⵍⵉⴽ ⵓ ⵎⴰⵔⵔⴰ ⵎⵉⵏ ⵉⴵⴰⵏ ⵏ ⴽⵉⵍⵢⵓⵏ ⵓ ⵏ ⵎⴰⵃⵍⵓⵏ, ⵙⵖⵉⵖ ⵜ ⵥⴻⴳ ⵓⴼⵓⵙ ⵏ ⵏⴰⵄⵓⵎⵉ.
10 ⵓⵍⴰ ⴷ ⵔⴰⵄⵓⵜ, ⵜⴰⵎⵓ’ⴰⴱⴻⵛⵜ, ⵜⴰⵎⵖⴰⵔⵜ ⵏ ⵎⴰⵃⵍⵓⵏ, ⵉⵡⵢⴻⵖ ⵜⵜ ⴷ ⵜⴰⵎⵖⴰⵔⵜ ⵃⵉⵎⴰ ⴰⴷ ⵉⵇⵇⵉⵎ ⵉⵙⴻⵎ ⵏ ⵡⴻⵏⵏⵉ ⵉⵎⵎⵓⵜⴻⵏ ⵅ ⵜⴻⵙⵖⴰⵔⵜ ⵏ ⵍⵡⴰⵔⵜ ⵏⵏⴻⵙ ⵎⴰⵃⴻⵏⴷ ⵉⵙⴻⵎ ⵏ ⵡⴻⵏⵏⵉ ⵉⵎⵎⵓⵜⴻⵏ ⵡⴰⵔ ⵉⵜⵜⴻⴽⴽⴻⵙ ⵊⴰⵔ ⴰⵢⵜⵎⴰⵛ ⵓ ⵥⵉ ⵜⴻⵡⵡⴰⵔⵜ ⵏ ⵡⴻⵎⵛⴰⵏ ⵏ ⵜⵥⴻⴷⴷⵉⵖⵜ ⵏⵏⴻⵙ. ⴷⴻⴳ ⵡⴰⵙⵙ-ⴰ ⴰⵇⴰ ⴽⴻⵏⵏⵉⵡ ⴷ ⵍⴻⵛⵀⵓⴷ.”
ⴱⵓⵄⴰⵣ ⵉⴼⴷⵉ ⵜⴰⵎⵎⵓⵔⵜ ⵓⵛⴰ ⵢⴰⵡⵉ ⵔⴰⵄⵓⵜ ⴷ ⵜⴻⵎⵖⴰⵔⵜ (ⵔⴰⵄⵓⵜ 4:9)
11 ⵎⴰⵔⵔⴰ ⵍⴳⴻⵏⵙ ⵏⵏⵉ ⵉⴵⴰⵏ ⴷⵉ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⴷ ⵉⵎⵖⴰⵔⴻⵏ ⵏⵏⴰⵏ: “ⵏⴻⵛⵛⵉⵏ ⴷ ⵍⴻⵛⵀⵓⴷ! ⵉⵍⵉ ⵙⵉⴷⵉ ⴰⴷ ⵢⴻⴳⴳ ⵜⴰⵎⵖⴰⵔⵜ ⵏⵏⵉ ⵉ ⴷ ⵖⴰ ⵢⴰⴷⴼⴻⵏ ⵜⴰⴷⴷⴰⵔⵜ ⵏⵏⴻⴽ ⴰⵎ ⵔⴰⵃⵉⵍ ⴷ ⵍⵉⵢⴰ, ⵜⵉⵏⵏⵉ ⵥⵥⴰⵢⵙⴻⵏⵜ ⵙ ⵜⵏⴰⵢⴻⵏ ⵜᵉⵜⵜⵡⴰⴳⴳ ⵜⴻⴷⴷⴰⵔⵜ ⵏ ⵉⵙⵔⴰⵉⵍ. ⴻⴳⴳ ⵙ ⵛⴹⴰⵔⴻⵜ ⴷⵉ ⵉⴼⵔⴰⵜⴰ ⵓⵛⴰ ⴰⴷ ⵉⵜⵜⵡⴰⴱⴰⵔⵔⴻⵃ ⵉⵙⴻⵎ ⵏⵏⴻⴽ ⴷⵉ ⴱⴰⵢⵜ-ⵍⴰⵃⵎ! □ ■
12 ⵜⴰⴷⴷⴰⵔⵜ ⵏⵏⴻⴽ ⵜⴻⴳⴳⴰ ⴰⵎ ⵜⴰⴷⴷⴰⵔⵜ ⵏ ⴼⴰⵔⵉⵚ, ⵡⴻⵏⵏⵉ ⵜⵓⵔⵓⵡ-ⴷⴷ ⵜⴰⵎⴰⵔ ⵉ ⵢⴰⵀⵓⴷⴰ, ⵥⴻⴳ ⵡⴰⵔⵔⴰⵡ ⵉ ⴷ ⴰⵛ ⵖⴰ ⵉⵡⵛ ⵙⵉⴷⵉ ⵥⵉ ⵜⵃⴻⵏⵊⵉⵔⵜ-ⴰ.” ■
13 ⴱⵓⵄⴰⵥ ⵢⵉⵡⵉ ⵔⴰⵄⵓⵜ ⵓⵛⴰ ⵏⴻⵜⵜⴰⵜ ⵜⴻⴷⵡⴻⵍ ⴷ ⵜⴰⵎⵖⴰⵔⵜ ⵏⵏⴻⵙ ⵓⵛⴰ ⵢⵓⴷⴻⴼ ⵅⴰⵙ ⵓⵛⴰ ⵙⵉⴷⵉ ⵉⵡⵛⴰ ⴰⵙ ⴰⴷ ⵜⴻⴽⵙⵉ ⵙ ⴷⴷⴻⵢⵙⴻⵜ ⵓⵛⴰ ⵜⵓⵔⵓⵡ-ⴷⴷ ⵉⵊⵊ ⵏ ⵓⵃⴻⵏⵊⵉⵔ.
14 ⵓⵛⴰ ⵏⵏⴰⵏⵜ ⵜⵉⵎⵖⴰⵔⵉⵏ ⵉ ⵏⴰⵄⵓⵎⵉ: “ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⵡⴻⵏⵏⵉ ⵡⴰⵔ ⵛⴻⵎ ⵉⵊⵊⵉⵏ ⴰⵙⵙ-ⴰ ⵏⵀⵍⴰ ⵉⵊⵊ ⵏ ⵓⵎⴻⴼⴷⵉ. ⵉⵍⵉ ⴰⴷ ⵉⵜⵜⵡⴰⴱⴰⵔⵔⴻⵃ ⵉⵙⴻⵎ ⵏⵏⴻⵙ ⴷⵉ ⵉⵙⵔⴰⵉⵍ!
15 ⴰⴷ ⵖⴰⵔⵡⴻⵎ ⵢⵉⵍⵉ ⴰⵎ ⵡⴻⵏⵏⵉ ⴷⴷ-ⵉⵙⵙⴼⴰⵇⴻⵏ ⵍⴻⵄⵎⴰⵔ ⵏⵏⴻⵎ ⵓⵛⴰ ⴰⴷ ⵛⴻⵎ ⵉⵚⵓⵏ ⵅ ⵜⴻⵡⵙⴰⵔ ⵏⵏⴻⵎ, ⵎⴰⵖⴰⵔ ⵜⴰⵙⵍⵉⴼⵜ ⵏⵏⴻⵎ, ⵜⴻⵏⵏⵉ ⵛⴻⵎ ⵉⵜⵜⴻⵅⵙⴻⵏ, ⵜⵓⵔⵓⵡ ⵉ-ⵜ-ⵉ-ⴷⴷ, ⴰⵇⴰ ⵏⴻⵜⵜⴰⵜ ⵜⴻⵃⵍⴰ ⵅ ⵙⴻⴱⵄⴰ ⵏ ⵉⵃⴻⵏⵊⵉⵔⴻⵏ.”
16 ⵏⴰⵄⵓⵎⵉ ⵜⴻⴽⵙⵉ ⴰⵃⴻⵏⵊⵉⵔ, ⵜⴻⵙⵙⴰⵔⵙ ⵉ-ⵜ ⵅ ⵉⴷⵎⴰⵔⴻⵏ ⵏⵏⴻⵙ ⵓ ⵜⴻⴷⵡⴻⵍ ⵜⴻⵙⵙⵢⴰⵎ ⵉ-ⵜ.
17 ⵜⴰⵊⵊⴰⵔⵉⵏ ⵡⵛⵉⵏⵜ ⴰⵙ ⵉⵊⵊ ⵏ ⵢⵉⵙⴻⵎ, ⵏⵏⴰⵏⵜ: “ⵉ ⵏⴰⵄⵓⵎⵉ ⵉⵜⵜⵡⴰⵔⵡⵓⵡ ⴰⵙ-ⴷⴷ ⵉⵊⵊ ⵏ ⵓⵃⴻⵏⵊⵉⵔ!”, ⵓ ⴳⴳⵉⵏ ⴰⵙ ⵄⵓⴱⵉⴷ. ⵏⴻⵜⵜⴰ ⴷ ⴱⴰⴱⴰⵙ ⵏ ⵢⴰⵙⵙⴰ, ⴱⴰⴱⴰⵙ ⵏ ⴷⴰⵡⵓⴷ.
ⵍⴻⵊⴷⵓⴷ ⵏ ⴷⴰⵡⵓⴷ
18 ⵉⵏⴰ ⴷ ⵉⵏⵏⵉ ⴷⴷ-ⵉⵜⵜⵡⴰⵔⵡⴻⵏ ⵥⵉ ⴼⴰⵔⵉⵚ: ⴼⴰⵔⵉⵚ ⵉⵊⵊⴰ-ⴷⴷ ⵃⴰⵚⵔⵓⵏ, ■
19 ⵃⴰⵚⵔⵓⵏ ⵉⵊⵊⴰ-ⴷⴷ ⵔⴰⵎ, ⵔⴰⵎ ⵉⵊⵊⴰ-ⴷⴷ ⵄⴰⵎⵎⵉⵏⴰⴷⴰⴱ,
20 ⵄⴰⵎⵎⵉⵏⴰⴷⴰⴱ ⵉⵊⵊⴰ-ⴷⴷ ⵏⴰⵃⵛⵓⵏ, ⵏⴰⵃⵛⵓⵏ ⵉⵊⵊⴰ-ⴷⴷ ⵙⴰⵍⵎⵓⵏ,
21 ⵙⴰⵍⵎⵓⵏ ⵉⵊⵊⴰ-ⴷⴷ ⴱⵓⵄⴰⵥ, ⴱⵓⵄⴰⵥ ⵉⵊⵊⴰ-ⴷⴷ ⵄⵓⴱⵉⴷ,
22 ⵄⵓⴱⵉⴷ ⵉⵊⵊⴰ-ⴷⴷ ⵢⴰⵙⵙⴰ ⴷ ⵢⴰⵙⵙⴰ ⵉⵊⵊⴰ-ⴷⴷ ⴷⴰⵡⵓⴷ.