1 ⵜⴰⵇⴻⴷⴷⵓⵃⵜ ⵉ ⴰⵢⵜ ⵏ ⵢⵓⵙⵓⴼ ⵜⴻⴽⴽⴰⵔ ⴰⵙ-ⴷⴷ ⵥⵉ ⵍ'ⵓⵔⴷⵓⵏ ⵖⴰⵔ ⴰⵔⵉⵃⴰ, ⵓⵛⴰ ⴰⵢⵎⵉⵔ ⵉⵜⵜⴻⴽⴽ ⵅ ⵜⵎⴰ ⵏ ⵛⵛⴰⵔⵇ ⵏ ⵡⴰⵎⴰⵏ ⵏ ⴰⵔⵉⵃⴰ, ⵅ ⵍⴻⵅⵍⴰ ⵏⵏⵉ ⴷⴷ-ⵉⵜⵜⴳⴻⵄⵄⴰⴷⴻⵏ ⵥⵉ ⴰⵔⵉⵃⴰ ⵅ ⵉⴷⵓⵔⴰⵔ ⵏ ⴱⴰⵢⵜ-ⵉⵍ 2 ⵓ ⵥⵉ ⴱⴰⵢⵜ-ⵉⵍ ⵉⵜⵜⴻⴼⴼⴻⵖ ⵖⴰⵔ ⵍⵓⵥ, ⵉⵜⵜⴻⴽⴽ ⵅ ⵜⴻⵎⵎⵓⵔⵜ ⵏ ⴰⵢⵜ ⵏ ⴰⵔⴽⵉⵜ ⵖⴰⵔ ⵄⴰⵟⴰⵔⵓⵜ 3 ⵓⵛⴰ ⵉⵀⴻⴽⴽⵡⴰ-ⴷⴷ ⵖⴰⵔ ⵍⵖⴰⵔⴱ ⵖⴰⵔ ⵜⴻⵎⵎⵓⵔⵜ ⵏ ⵉⴼⴰⵍⴰⵟⵉⵢⵢⴻⵏ ⵖⴰⵔⴻⵙ ⴰⵍ ⵜⴰⵎⵎⵓⵔⵜ ⵏ ⴱⴰⵢⵜ-ⵃⵓⵔⵓⵏ ⵏ ⵡⴰⴷⴷⴰⵢ ⵓ ⵖⴰⵔⴻⵙ ⴰⵍ ⵊⴰⵥⴰⵔ ⵓ ⵟⵟⵔⵓⴼⴰ ⵏⵏⴻⵙ ⵜⵜⴰⴽⴽⵡⴰⴹⴻⵏ ⴰⵍ ⵍⴻⴱⵃⴰⵔ.

4 ⵅⴻⵏⵏⵉ ⵟⵟⴼⴻⵏ ⵓⵍⴰ ⴷ ⴰⵢⵜ ⵏ ⵢⵓⵙⵓⴼ, ⵎⴰⵏⴰⵙⵙⴰ ⴷ ⵉⴼⵔⴰⵢⵉⵎ, ⵍⵡⴰⵔⵜ ⵏⵙⴻⵏ.

5 ⴰⵢⵎⵉⵔ ⵏ ⴰⵢⵜ ⵏ ⵉⴼⵔⴰⵢⵉⵎ, ⵄⵍⴰⵃⵙⴰⴱ ⵍⴰⴵⴰⵜ ⵏⵙⴻⵏ, ⴷ ⵡⴰ. ⴰⵢⵎⵉⵔ ⵏ ⵜⴻⵙⵖⴰⵔⵜ ⵏⵙⴻⵏ ⵉⴱⴻⴷⴷⴰ ⵖⴰⵔ ⵛⵛⴰⵔⵇ ⵏ ⵄⴰⵟⴰⵔⵓⵜ-ⴰⴷⴰⵔ ⵓⵛⴰ ⵉⴳⴳⵓⵔ ⵖⴰⵔⴻⵙ ⴰⵍ ⴱⴰⵢⵜ-ⵃⵓⵔⵓⵏ ⵏ ⵏⵏⴻⵊ 6 ⵓⵛⴰ ⵉⴳⴳⵓⵔ ⵖⴰⵔ ⵍⵖⴰⵔⴱ ⵖⴰⵔ ⵓⵖⴻⵥⴷⵉⵙ ⵏ ⵛⵛⴰⵎⴰⵍ ⵏ ⵎⵉⴽⵎⴰⵜⴰ ⵓⵛⴰ ⵉⵜⵜⴻⴼⵔⵉⵖ ⵡⴻⵢⵎⵉⵔ ⵖⴰⵔ ⵛⵛⴰⵔⵇ ⵖⴰⵔ ⵜⴰ’ⴰⵏⴰⵜ-ⵛⵉⵍⵓ ⵓ ⵅⴻⵏⵏⵉ ⵉⵜⵜⴻⴽⴽ ⵅⴰⵙ ⵅ ⵓⵖⴻⵥⴷⵉⵙ ⵏⵏⴻⵙ ⵏ ⵛⵛⴰⵔⵇ ⵖⴰⵔ ⵢⴰⵏⵓⵃⴰ 7 ⵓ ⵥⵉ ⵢⴰⵏⵓⵃⴰ ⵉⵀⴻⴽⴽⵡⴰ ⵖⴰⵔ ⵄⴰⵟⴰⵔⵓⵜ ⴷ ⵏⴰⵄⴰⵔⴰⵜ ⵓⵛⴰ ⵄⵍⴰⵢⴻⵏ ⵉⵏⴻⵃⵃⴻⴷ ⴰⵔⵉⵃⴰ ⵓ ⵅⴻⵏⵏⵉ ⵉⵜⵜⴻⴼⴼⴻⵖ ⵖⴰⵔ ⵍ'ⵓⵔⴷⵓⵏ. 8 ⵣⵉ ⵜⴰⴼⴼⵓⵃ ⵉⵄⴻⴷⴷⵓ ⵡⴻⵢⵎⵉⵔ ⵖⴰⵔ ⵍⵖⴰⵔⴱ ⵖⴰⵔ ⵜⵉⵖⵥⴰⵔⵜ ⵏ ⵇⴰⵏⴰ ⵓⵛⴰ ⵟⵟⵔⵓⴼⴰ ⵏⵏⴻⵙ ⵜⵜⴰⴽⴽⵡⴰⴹⴻⵏ ⴰⵍ ⵍⴻⴱⵃⴰⵔ. ⵜⴰ ⴷ ⵜⴰⵙⵖⴰⵔⵜ ⵏ ⵜⴻⵇⴱⵉⵞ ⵏ ⴰⵢⵜ ⵏ ⵉⴼⵔⴰⵢⵉⵎ, ⵄⵍⴰⵃⵙⴰⴱ ⵍⴰⴵⴰⵜ ⵏⵙⴻⵏ.

9 ⵜⵉⵏⴻⴷⴷⴰⵎ ⵉ ⵉⵜⵜⵡⴰⵃⵓⵥⴻⵏ ⵉ ⴰⵢⵜ ⵏ ⵉⴼⵔⴰⵢⵉⵎ ⴰⵇⴰ ⴰⵜⴻⵏⵜ ⴷⵉ ⵍⵡⴻⵙⵜ ⵏ ⵜⴻⵙⵖⴰⵔⵜ ⵏ ⵎⴰⵏⴰⵙⵙⴰ, ⵎⴰⵔⵔⴰ ⵜⵉⵏⴻⴷⴷⴰⵎ ⴰⴽ-ⴷ ⵍⴻⴷⵛⵓⵔ ⵏⵙⴻⵏⵜ.

10 ⵡⴰⵔ ⵓⵥⵥⵉⵍⴻⵏ ⵛⴰ ⵅ ⵉⴽⴻⵏⵄⴰⵏⵉⵢⵢⴻⵏ ⵏⵏⵉ ⵜⵓⵖⴰ ⵉⵥⴻⴷⴷⵖⴻⵏ ⴷⵉ ⵊⴰⵥⴰⵔ ⵥⵉ ⵜⴻⵙⵖⴰⵔⵜ ⵏⵙⴻⵏ. ⴰⵎⵎⵓ ⵥⴻⴷⴷⵖⴻⵏ ⵉⴽⴻⵏⵄⴰⵏⵉⵢⵢⴻⵏ ⵄⴰⴷ ⴷⵉ ⵍⵡⴻⵙⵜ ⵏ ⵉⴼⵔⴰⵢⵉⵎⵉⵢⵢⴻⵏ ⴰⵍ ⴰⵙⵙ-ⴰ. ⵜⴻⵜⵜⵡⴰⴳⴳ ⵅⴰⵙⴻⵏ ⵎⴰⵛⴰ ⵍⵊⵉⵥⵢⴰ ⵏ ⵜⵙⴻⵅⵅⴰⵔⵜ.