1 ⵓⵎⵉ ⵎⴰⵔⵔⴰ ⵉⵊⴻⴵⵉⴷⴻⵏ ⵏ ⵉⵎⵓⵔⵉⵢⵢⴻⵏ ⵉ ⵉⴵⴰⵏ ⵅ ⵜⵎⴰ ⵏ ⵍⵖⴰⵔⴱ ⵏ ⵍ'ⵓⵔⴷⵓⵏ ⴷ ⵎⴰⵔⵔⴰ ⵉⵊⴻⴵⵉⴷⴻⵏ ⵏ ⵉⴽⴻⵏⵄⴰⵏⵉⵢⵢⴻⵏ ⵉ ⵉⴵⴰⵏ ⵖⴰⵔ ⵍⴻⴱⵃⴰⵔ ⵙⵍⴰⵏ, ⴰⵇⴰ ⵙⵉⴷⵉ ⵉⵙⵙⵉⵥⴻⵖ ⴰⵎⴰⵏ ⵏ ⵍ'ⵓⵔⴷⵓⵏ ⵥⵥⴰⵜ ⵉ ⵡⵓⴷⴻⵎ ⵏ ⴰⵢⵜ ⵏ ⵉⵙⵔⴰⵉⵍ, ⴰⵍⴰⵎⵉ ⵏⴻⵥⵡⴰ ⵖⴰⵔ ⵓⵊⴻⵎⵎⴰⴹⵉⵏ, ⵅⴻⵏⵏⵉ ⵉⴼⵙⵉⵢ ⵡⵓⵍ ⵏⵙⴻⵏ ⵓ ⵡⴰⵔ ⴷⴰⵢⵙⴻⵏ ⵉⵇⵇⵉⵎ ⵛⴰ ⴰⵔⵔⵓⵃ ⵥⵥⴰⵜ ⵉ ⵡⵓⴷⴻⵎ ⵏ ⴰⵢⵜ ⵏ ⵉⵙⵔⴰⵉⵍ. 2 ⴷⵉ ⵍⵡⴻⵇⵜ ⵏⵏⵉ ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵢⴰⵛⵓⵡⴰ: “ⴻⴳⴳ ⵉ ⵢⵉⵅⴻⴼ ⵏⵏⴻⴽ ⵉⴼⴰⵔⵔⵉⵛⴻⵏ ⵏ ⵡⴻⵥⵔⵓ ⵓⵛⴰ ⵅⵜⴻⵏ ⵉ ⴰⵢⵜ ⵏ ⵉⵙⵔⴰⵉⵍ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ!” ^■   3 ⵅⴻⵏⵏⵉ ⵉⴳⴳⴰ ⵢⴰⵛⵓⵡⴰ ⵉⴼⴰⵔⵔⵉⵛⴻⵏ ⵏ ⵡⴻⵥⵔⵓ ⵉ ⵢⵉⵅⴻⴼ ⵏⵏⴻⵙ ⵓⵛⴰ ⵉⵅⵜⴻⵏ ⵉ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵊⵉⴱⵉⵄⴰ-ⵀⴰⵄⵔⴰⵍⵓⵜ, ⴰⵇⴰ-ⵜⵜ ⴷ ‘ⵜⴰⵡⵔⵉⵔⵜ ⵏ ⵍⴻⵄⴷⴰⵍⴻⵢⵢⴰⵜ ⵏ ⵡⴻⵅⵜⴰⵏ’. 4 ⵎⴰⵏ ⴰⵢⴰ ⴷ ⵍⴻⵙⴱⴰⴱ ⵉ ⵥⵉ ⵉ-ⵜⴻⵏ ⵉⵅⵜⴻⵏ ⵢⴰⵛⵓⵡⴰ: ⵎⴰⵔⵔⴰ ⵍⴳⴻⵏⵙ ⵉ ⵜⵓⵖⴰ ⴷⴷ-ⵉⴼⴼⵖⴻⵏ ⵥⵉ ⵎⵉⵚⵔⴰ, ⵎⴰⵔⵔⴰ ⵉⵡⴻⵜⵎⴰⵏ, ⵉⵅⵙ ⴰⴷ ⵢⵉⵏⵉ ⵎⴰⵔⵔⴰ ⵉⵄⴻⵙⴽⴰⵔⵉⵢⵢⴻⵏ ⵎⵎⵓⵜⴻⵏ ⴷⴻⴳ ⵡⴻⴱⵔⵉⴷ ⴷⵉ ⵍⴻⵅⵍⴰ ⴰⵡⴰⵔⵏⵉ ⵉ ⵡⵓⴼⴼⵓⵖ ⵏⵙⴻⵏ ⵥⵉ ⵎⵉⵚⵔⴰ. 5 ⵎⵉⵏⵥⵉ ⵎⴰⵔⵔⴰ ⵍⴳⴻⵏⵙ ⵏⵏⵉ ⴷⴷ-ⵉⴼⴼⵖⴻⵏ, ⵜⵓⵖⴰ-ⵜ ⵉⵜⵜⵡⴰⵅⵜⴻⵏ, ⵎⴰⵛⴰ ⵎⴰⵔⵔⴰ ⵍⴳⴻⵏⵙ ⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⴷⴻⴳ ⵡⴻⴱⵔⵉⴷ ⴷⵉ ⵍⴻⵅⵍⴰ ⴰⵡⴰⵔⵏⵉ ⵉ ⵓⴼⴼⵓⵖ ⵏⵙⴻⵏ ⵥⵉ ⵎⵉⵚⵔⴰ, ⵏⵉⵜⵏⵉ ⵡⴰⵔ ⵜⵜⵡⴰⵅⴻⵜⵏⴻⵏ ⵛⴰ. 6 ⵎⵉⵏⵥⵉ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ ⴳⴳⵓⵔⴻⵏ ⴰⵢⵜ ⵏ ⵉⵙⵔⴰⵉⵍ ⴷⵉ ⵍⴻⵅⵍⴰ ⴰⵍⴰⵎⵉ ⵉⵜⵜⵡⴰⵀⴻⵍⵍⴻⴽ ⵍⴳⴻⵏⵙ ⵎⴰⵔⵔⴰ, ⵎⴰⵔⵔⴰ ⵉⵄⴻⵙⴽⴰⵔⵉⵢⵢⴻⵏ ⵉ ⵜⵓⵖⴰ ⴷⴷ-ⵉⴼⴼⵖⴻⵏ ⵥⵉ ⵎⵉⵚⵔⴰ, ⵉⵏⵏⵉ ⵜⵓⵖⴰ ⵡⴰⵔ ⵉⵙⵍⵉⵏ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ ⴷ ⵉⵏⵏⵉ ⵜⵓⵖⴰ ⵉⵊⵊⵓⴵ ⴰⵙⴻⵏ ⵙⵉⴷⵉ, ⵡⴰⵔ ⵜⴻⵏ ⵉⵜⵜⴻⵊⵊⵉ ⵛⴰ ⴰⴷ ⵥⴰⵔⴻⵏ ⵜⴰⵎⵎⵓⵔⵜ ⵏⵏⵉ ⵅ ⵜⵓⵖⴰ ⵉⵊⵊⵓⴵ ⵙⵉⴷⵉ ⵉ ⵉⴱⴰⴱⴰⵜⴻⵏ ⵏⵙⴻⵏ ⴰⴷ ⴰⵙⴻⵏ ⵜⵜ ⵉⵡⵛ, ⵉⵛⵜ ⵏ ⵜⴻⵎⵎⵓⵔⵜ ⵉⴼⴻⵢⵢⴹⴻⵏ ⵙ ⵓⵖⵉ ⴷ ⵜⴰⵎⵎⴻⵏⵜ. ^■   7 ⵉⵃⴻⵏⵊⵉⵔⴻⵏ ⵏⵙⴻⵏ ⵉⵏⵏⵉ ⵉⵙⵙⵏⴻⴽⴽⴰⵔ ⵏⴻⵜⵜⴰ ⴷⴻⴳ ⵡⴻⵎⵛⴰⵏ ⵏⵙⴻⵏ, ⴷ ⵉⵏⴰ ⴷ ⵉⵏⵏⵉ ⵜⵓⵖⴰ ⵉⵅⵜⴻⵏ ⵢⴰⵛⵓⵡⴰ, ⵎⵉⵏⵥⵉ ⵏⵉⵜⵏⵉ ⵖⴰⵔⵙⴻⵏ ⵄⴰⴷ ⵍⴻⵄⴷⴰⵍⵢⴻⵜ ⵎⵉⵏⵥⵉ ⵡⴰⵔ ⴷ ⴰⵙⴻⵏ ⵅⴻⵜⵏⴻⵏ ⴷⴻⴳ ⵡⴻⴱⵔⵉⴷ. 8 ⵓⵎⵉ ⴽⴻⵎⵎⵍⴻⵏ ⴰⴷ ⵅⵜⴻⵏ ⵎⴰⵔⵔⴰ ⵍⴳⴻⵏⵙ, ⵉⵎⵙⴰⵔ ⴱⴻⵍⵍⵉ ⵇⵇⵉⵎⴻⵏ ⴷⴻⴳ ⵡⴻⵎⵛⴰⵏ ⵏⵙⴻⵏ ⴷⵉ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ ⴰⵍⴰⵎⵉ ⴳⴳⴻⵏⴼⴰⵏ. 9 ⵙⵉⴷⵉ ⵉⵏⵏⴰ ⵉ ⵢⴰⵛⵓⵡⴰ: “ⴰⵙⵙ-ⴰ ⴰⵇⴰ ⴽⴽⵙⴻⵖ ⵅⴰⵡⴻⵎ ⵍⴻⴼⴹⵉⵃⴻⵜ ⵏ ⵎⵉⵚⵔⴰ.” ⵅ ⵓⵢⴻⵏⵏⵉ ⵇⵇⴰⵔⴻⵏ ⴰⵙ ⵉ ⵡⴻⵎⵛⴰⵏ ⵏⵏⵉ ⵊⵉⵍⵊⴰⵍ, ⴰⵍ ⴰⵙⵙ-ⴰ.

10 ⵡⵜⵉⵏ ⴰⵢⵜ ⵏ ⵉⵙⵔⴰⵉⵍ ⵉⵇⵉⴹⴰⵏ ⵏⵙⴻⵏ ⴷⵉ ⵊⵉⵍⵊⴰⵍ ⵓⵛⴰ ⵙⵙⵡⴻⵊⴷⴻⵏ ⵜⴰⵖⴰⵔⵚⵜ ⵏ ⵓⵙⴻⵄⴷⵓ ⴷⴻⴳ ⵡⴰⵙⵙ ⴰⵔⴱⴻⵄⵟⴰⵛ ⵏ ⵓⵢⵓⵔ ⵏⵏⵉ, ⴷⵉ ⴵⵉⵍⴻⵜ, ⴷⵉ ⵍⴻⵡⴹⴰⵜ ⵏ ⴰⵔⵉⵃⴰ. ^■  

11 ⵣⵉ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⵛⵛⵉⵏ ⴰⵖⵔⵓⵎ ⴱⵍⴰ ⴰⵏⵜⵓⵏ ⴷ ⵜⴻⵖⵡⴰⵡⵉⵏ ⵉⵛⴻⵏⴼⴻⵏ, ⵖⴰⵔ ⵜⵉⵡⴻⵛⵛⴰ ⴰⵡⴰⵔⵏⵉ ⵉ ⵜⴰⵖⴰⵔⵚⵜ ⵏ ⵓⵙⴻⵄⴷⵓ, ⴷⴻⴳ ⵡⴰⵙⵙ ⵏⵏⵉ ⵙⵉⵎⴰⵏⵜ ⵏⵏⴻⵙ. ^■  

12 ⵜⵉⵡⴻⵛⵛⴰ ⵏⵏⴻⵙ, ⴰⵡⴰⵔⵏⵉ ⵓⵎⵉ ⵜⵓⵖⴰ ⵛⵛⵉⵏ ⵥⵉ ⵍⵖⵉⴵⴻⵜ ⵏ ⵜⴻⵎⵎⵓⵔⵜ, ⵜⴻⵏⵏⴻⵇⴹⴻⵄ ‘ⵎⴰⵏⵏⴰ’. ⵙⵙⴻⵏⵏⵉ ⵡⴰⵔ ⵜⴻⵇⵇⵉⵎ ⵄⴰⴷ ‘ⵎⴰⵏⵏⴰ’ ⵉ ⴰⵢⵜ ⵏ ⵉⵙⵔⴰⵉⵍ. ⴷⴻⴳ ⵓⵙⴻⴳⴳⵯⴰⵙ ⵏⵏⵉ ⵛⵛⵉⵏ ⵥⵉ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⵏ ⴽⴻⵏⵄⴰⵏ.

13 ⵓⵎⵉ ⵜⵓⵖⴰ ⵉⴵⴰ ⵢⴰⵛⵓⵡⴰ ⵥⵥⴰⵜ ⵉ ⴰⵔⵉⵃⴰ, ⵉⵙⵙⴳⴻⵄⵄⴻⴷ ⵜⵉⵟⵟⴰⵡⵉⵏ ⵏⵏⴻⵙ, ⵓⵛⴰ ⵅⵥⴰⵔ, ⵜⵓⵖⴰ ⵉⵊⵊ ⵏ ⵡⴻⵔⵢⴰⵥ ⵉⴱⴻⴷⴷ ⵥⵥⴰⵜⴻⵙ, ⵖⴰⵔⴻⵙ ⵙⵙⵉⴼ ⵏⵏⴻⵙ ⴷⴻⴳ ⵓⴼⵓⵙ ⵏⵏⴻⵙ. ⵢⴰⵛⵓⵡⴰ ⵉⵔⵓⵃ ⵖⴰⵔⴻⵙ ⵉⵏⵏⴰ ⴰⵙ: “ⵛⴻⴽ ⵎⴰ ⵥⵥⴰⵢⵏⴻⵖ ⵏⵉⵖ ⵥⴻⴳ ⵉⵖⵔⵉⵎⴻⵏ ⵏⵏⴻⵖ?” ^■  

14 ⵏⴻⵜⵜⴰ ⵢⴰⵔⵔⴰ-ⴷⴷ: “ⵍⵍⴰ, ⵎⵉⵏⵥⵉ ⵏⴻⵛⵛ ⴷ ⴰⴽⵓⵎⴰⵏⴷⴰⵔ ⴰⵎⴻⵇⵇⵔⴰⵏ ⵏ ⵍⵄⴻⵙⴽⴰⵔ ⵏ ⵙⵉⴷⵉ. ⵏⴻⵛⵛ ⵍⴻⵅⵅⵓ ⵉ ⴷⴷ-ⵓⵙⵉⵖ!” ⵓⵛⴰ ⵉⵡⴹⴰ ⵢⴰⵛⵓⵡⴰ ⵅ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵜⴻⵎⵎⵓⵔⵜ ⵓⵛⴰ ⵉⵖⵏⴻⵙ, ⵉⵏⵏⴰ ⴰⵙ: “ⵎⵉⵏ ⵉⵏⵏⴰ ⵙⵉⴷⵉ ⵉⵏⵓ ⵉ ⵓⵎⵙⴻⵅⵅⴰⵔ ⵏⵏⴻⵙ?”

15 ⵅⴻⵏⵏⵉ ⵉⵏⵏⴰ ⴰⴽⵓⵎⴰⵏⴷⴰⵔ ⴰⵎⴻⵇⵇⵔⴰⵏ ⵏ ⵍⵄⴻⵙⴽⴰⵔ ⵏ ⵙⵉⴷⵉ ⵉ ⵢⴰⵛⵓⵡⴰ: “ⴽⴽⴻⵙ ⵜⵉⵙⵉⵍⴰ ⵏⵏⴻⴽ ⵥⴻⴳ ⵉⴹⴰⵔⴻⵏ ⵏⵏⴻⴽ, ⵎⵉⵏⵥⵉ ⴰⵎⵛⴰⵏ ⵎⴰⵏⵉ ⵜⴱⴻⴷⴷⴻⴷ ⴷ ⴰⵎⵇⴻⴷⴷⴰⵙ ⵉ ⵉⴵⴰ.” ⵓⵛⴰ ⴰⵎⴻⵏⵏⵉ ⵉ ⵉⴳⴳⴰ ⵢⴰⵛⵓⵡⴰ.