1 ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⵙⵉⵡⴻⵍ ⴰⴽ-ⴷ ⵉⴽⴻⵀⵀⴰⵏⴻⵏ, ⵉⵃⴻⵏⵊⵉⵔⴻⵏ ⵏ ⵀⴰⵔⵓⵏ, ⵓⵛⴰ ⵉⵏⵉ ⴰⵙⴻⵏ: ‘ⵓⵍⴰ ⴷ ⵉⵊⵊ ⵥⵥⴰⵢⵡⴻⵎ ⵡⴰⵔ ⵉⵙⵙⴻⵅⵎⵉⵊ ⵉⵅⴻⴼ ⵏⵏⴻⵙ ⵙ ⵉⵊⵊ ⵏ ⵓⵎⴻⵜⵜⵉⵏ ⵊⴰⵔ ⵍⴳⴻⵏⵙ ⵏⵏⴻⵙ. 2 ⵎⵖⵉⵔ ⵙ ⵔⴰⴵ ⵏⵏⴻⵙ ⵢⵓⴷⵙⴻⵏ, ⵙ ⵢⴻⵎⵎⴰⵙ ⵏⵉⵖ ⵙ ⴱⴰⴱⴰⵙ ⵏⵉⵖ ⵙ ⵎⵎⵉⵙ ⵏⵉⵖ ⵙ ⵢⴻⴵⵉⵙ ⵏⵉⵖ ⵙ ⵓⵎⴰⵙ. 3 ⵓⵍⴰ ⵙ ⵓⵎⴰⵙ ⵏⵏⵉ ⴷ ⵜⴰⵄⵥⴰⵔⵛⵜ, ⵓⵍⴰ ⴷ ⵍⴰⴵ ⵏⵏⴻⵙ ⵢⵓⴷⵙⴻⵏ ⵓ ⵡⴰⵔ ⵖⴰⵔⴻⵙ ⵜⵓⵖⵉ ⵡⴻⵔⵢⴰⵥ, ⴰⵇⴰ ⵥⵥⴰⵢⴻⵙ ⵉ ⵉⵥⴻⵎⵎⴰⵔ ⴰⴷ ⵉⵙⵙⴻⵅⵎⴻⵊ ⵉⵅⴻⴼ ⵏⵏⴻⵙ. 4 ⴱⴰⴱ ⵏ ⵜⴰⴷⴷⴰⵔⵜ ⵡⴰⵔ ⵉⵙⵙⵅⴻⵎⵎⴰⵊ ⵉⵅⴻⴼ ⵏⵏⴻⵙ ⵙ ⵍⴳⴻⵏⵙ ⵏⵏⴻⵙ ⴰⵍ ⵖⴰ ⵉⵙⵙⵄⵉⴵⵉ ⵉⵅⴻⴼ ⵏⵏⴻⵙ ⵥⵥⴰⵢⴻⵙ.

5 ⵡⴰⵔ ⵜⵜⴻⴳⴳⴻⵏ ⵛⴰ ⵏ ⵡⴻⵎⵛⴰⵏ ⵉⵇⵇⵓⵛⵛⴰⵔ ⵅ ⵉⵥⴻⴵⵉⴼ ⵏⵙⴻⵏ ⵓⵛⴰ ⵡⴰⵔ ⵜⵜⵃⴻⴼⴼⵉⵏ ⵟⵟⴰⵔⴼ ⵏ ⵜⵎⴰⵔⵜ ⵏⵙⴻⵏ ⵓ ⵡⴰⵔ ⵛⴰⵔⵔⴹⴻⵏ ⴰⵛⴰⵔⵔⴻⴹ ⴷⴻⴳ ⵡⴻⵢⵙⵓⵎ ⵏⵙⴻⵏ.

6 ⴰⴷ ⵉⵍⵉⵏ ⴷ ⵉⵎⵇⴻⴷⴷⴰⵙⴻⵏ ⵉ ⴰⵔⴻⴱⴱⵉ ⵏⵙⴻⵏ ⵓⵛⴰ ⵡⴰⵔ ⴼⴻⵟⵟⵃⴻⵏ ⵉⵙⴻⵎ ⵏ ⴰⵔⴻⴱⴱⵉ ⵏⵙⴻⵏ, ⵎⵉⵏⵥⵉ ⴰⵇⴰ ⴷ ⵏⵉⵜⵏⵉ ⵉ ⵉⵙⵙⵇⴰⵔⵔⴰⴱⴻⵏ ⵜⵉⵡⵀⵉⴱⵉⵏ ⵏ ⵜⵎⴻⵙⵙⵉ ⵖⴰⵔ ⴰⵔⴻⴱⴱⵉ, ⵜⵉⵏⵏⵉ ⴷ ⵎⴰⵛⵛⴰ ⵏ ⵜⴻⵡⵀⵉⴱⵜ ⵏ ⴰⵔⴻⴱⴱⵉ ⵏⵙⴻⵏ. ⵙ ⵓⵢⴰ ⴰⴷ ⵉⵍⵉⵏ ⴷ ⵉⵎⵇⴻⴷⴷⴰⵙⴻⵏ.

7 ⵡⴰⵔ ⵉⵄⴻⴷⴷⴻⵍ ⴰⴷ ⴰⵡⵢⴻⵏ ⵜⴰⵎⵖⴰⵔⵜ ⵏⵏⵉ ⵉⴵⴰⵏ ⴷ ⵍⴼⴰⵙⴷⴰ ⵏⵉⵖ ⵉⵛⵜⴻⵏ ⵜᵉⵜⵜⵡⴰⵖⵚⴻⴱ. ⵓⵍⴰ ⴷ ⵉⵛⵜ ⵏ ⵜⴻⵎⵖⴰⵔⵜ ⵏⵏⵉ ⵉⵜⵜⵡⴰⴵⴼⴻⵏ ⵥⴻⴳ ⵡⴻⵔⵢⴰⵥ ⵏⵏⴻⵙ, ⵡⴰⵔ ⵜⵜ ⵜⵜⵉⵡⵢⴻⵏ, ⵎⵉⵏⵥⵉ ⴰⴽⴻⵀⵀⴰⵏ ⵏⴻⵜⵜⴰ ⴷ ⴰⵎⵇⴻⴷⴷⴰⵙ ⵉ ⴰⵔⴻⴱⴱⵉ ⵏⵏⴻⵙ. 8 ⴰⴷ ⵜ ⵜⵃⴻⵙⴱⴻⴷ ⴷ ⴰⵎⵇⴻⴷⴷⴰⵙ ⵎⵉⵏⵥⵉ ⵏⴻⵜⵜⴰ ⵉⵙⵙⵇⴰⵔⵔⴰⴱ-ⴷⴷ ⵎⴰⵛⵛⴰ ⵏ ⵜⴻⵡⵀⵉⴱⵜ ⵏ ⴰⵔⴻⴱⴱⵉ ⵏⵏⴻⴽ. ⴰⴷ ⵢⵉⵍⵉ ⴷ ⴰⵎⵇⴻⴷⴷⴰⵙ ⵉ ⵛⴻⴽ, ⵎⵉⵏⵥⵉ ⵏⴻⵛⵛ ⴷ ⴰⵎⵇⴻⴷⴷⴰⵙ, ⵏⴻⵛⵛ ⴷ ⵙⵉⴷⵉ ⵡⴻⵏⵏⵉ ⴽⴻⵏⵏⵉⵡ ⵉⵙⵙⵇⴻⴷⴷⵙⴻⵏ. 9 ⵎⴰⵍⴰ ⵢⴻⴵⵉⵙ ⵏ ⵉⵊⵊ ⵏ ⵡⴻⵔⵢⴰⵥ ⵏⵏⵉ ⵉⴵⴰⵏ ⴷ ⴰⴽⴻⵀⵀⴰⵏ ⵜⴻⵏⵏⵉ ⵜⴻⵙⵙⴻⴼⴹⴻⵃ ⵉⵅⴻⴼ ⵏⵏⴻⵙ ⵙ ⴼⴰⵔⵇ-ⵛⵛⵖⴻⵍ ⵏⵏⴻⵙ, ⵅⴻⵏⵏⵉ ⴰⵇⴰ ⵜⴻⵙⵙⴻⴼⴹⴻⵃ ⴱⴰⴱⴰⵙ ⵓⵛⴰ ⵉⵜⵜⵅⴻⵚⵚⴰ ⴰⵙ ⴰⴷ ⵜᵉⵜⵜⵡⴰⵙⴻⵛⵎⴻⴹ ⵙ ⵜⵎⴻⵙⵙⵉ.

10 ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ ⵊⴰⵔ ⴰⵢⵜⵎⴰⵙ, ⵡⴻⵏⵏⵉ ⵅ ⵓⵥⴻⴵⵉⴼ ⵏⵏⴻⵙ ⵜᵉⵜⵜⵡⴰⴼⴰⵔⵔⴻⵖ ⵥⵥⴻⵛⵜ ⵉ ⵡⴻⴷⵀⴰⵏ ⵓ ⵡⴻⵏⵏⵉ ⵉⵜⵜⵡⴰⵍⴻⵇⵇⵎⴻⵏ ⵎⴰⵃⴻⵏⴷ ⴰⴷ ⵢⴰⵔⴹ ⴰⵔⵔⵓⴹ ⵏ ⵓⴽⴻⵀⵀⴰⵏ, ⵏⴻⵜⵜⴰ ⵡⴰⵔ ⵉⵥⴻⵎⵎⴰⵔ ⴰⴷ ⵉⴹⵍⴻⵇ ⵉ ⵓⵛⴻⵡⵡⴰⴼ ⵅ ⵓⵥⴻⴵⵉⴼ ⵏⵏⴻⵙ ⵏⵉⵖ ⴰⴷ ⵉⵛⴰⵔⵔⴻⴳ ⴰⵔⵔⵓⴹ ⵏⵏⴻⵙ.

11 ⵡⴰⵔ ⵉⵥⴻⵎⵎⴰⵔ ⴰⴷ ⴷⴷ-ⵉⵇⴰⵔⵔⴻⴱ ⵖⴰⵔ ⵉⵛⵜ ⵏ ⵍⵅⴻⵛⴱⴻⵜ ⵓⵍⴰ ⵡⴰⵔ ⵉⵥⴻⵎⵎⴰⵔ ⴰⴷ ⵉⵙⵙⴻⵅⵎⴻⵊ ⵉⵅⴻⴼ ⵏⵏⴻⵙ ⵙ ⴱⴰⴱⴰⵙ ⴷ ⵢⴻⵎⵎⴰⵙ.

12 ⵡⴰⵔ ⵉⵜⵜⴻⴼⴼⴻⵖ ⵥⵉ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⵃⵉⵎⴰ ⵡⴰⵔ ⵉⵙⵙⵄⵉⴵⵉ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⵏ ⴰⵔⴻⴱⴱⵉ, ⵎⵉⵏⵥⵉ ⵜⴰⵎⵔⵉⵙⵜ ⵏ ⵥⵥⴻⵛⵜ ⵏ ⵡⴻⴷⵀⴰⵏ ⵏ ⴰⵔⴻⴱⴱⵉ ⵏⵏⴻⵙ ⴰⵇⴰ-ⵜⵜ ⵅⴰⵙ. ⵏⴻⵛⵛ ⴷ ⵙⵉⴷⵉ!

13 ⴰⴷ ⵢⴰⵡⵉ ⵉⵛⵜ ⵏ ⵜⴻⵄⵥⴰⵔⴻⵛⵜ ⴷ ⵜⴰⵎⵖⴰⵔⵜ.

14 ⵡⴰⵔ ⵉⵜⵜⵉⵡⵉ ⵜⴰⵊⵊⴰⵞ ⵏⵉⵖ ⵜⴰⵏⴻⴵⴰⴼⵜ ⵏⵉⵖ ⵜⴻⵏⵏⵉ ⵉⵜⵜⵡⴰⵖⴻⵚⴱⴻⵏ ⴷ ⵜⴰⵎⵖⴰⵔⵜ, ⵎⴰⵛⴰ ⴰⴷ ⵢⴰⵡⵉ ⵉⵛⵜ ⵏ ⵜⴻⵄⵥⴰⵔⴻⵛⵜ ⵥⵉ ⵍⴳⴻⵏⵙ ⵏⵏⴻⵙ ⴷ ⵜⴰⵎⵖⴰⵔⵜ.

15 ⵡⴰⵔ ⵉⵙⵙⵄⵉⴵⵉ ⵥⵥⴰⵔⵉⵄⴻⵜ ⵏⵏⴻⵙ ⵊⴰⵔ ⵍⴳⴻⵏⵙ ⵏⵏⴻⵙ, ⵎⵉⵏⵥⵉ ⵏⴻⵛⵛ ⴷ ⵙⵉⴷⵉ, ⵡⴻⵏⵏⵉ ⵜ ⵉⵙⵙⵇⴻⴷⴷⵙⴻⵏ.”

16 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

17 “ⵙⵉⵡⴻⵍ ⴰⴽ-ⴷ ⵀⴰⵔⵓⵏ, ⵉⵏⵉ: ‘ⵓⵍⴰ ⴷ ⵉⵊⵊ ⵥⵉ ⵥⵥⴰⵔⵉⵄⴻⵜ ⵏⵏⴻⴽ, ⴷⵉ ⵎⴰⵔⵔⴰ ⵊⵊⵉⵍⴰⵜ ⵏⵙⴻⵏ, ⵉ ⴷⵉ ⵉⴵⴰ ⵛⴰ ⵏ ⵓⵏⴻⵄⴹⴰⴱ, ⴰⴷ ⴷⴷ-ⵉⵇⴰⵔⵔⴻⴱ ⵃⵉⵎⴰ ⴰⴷ ⴷⴷ-ⵉⵙⵙⵇⴰⵔⵔⴻⴱ ⵎⴰⵛⵛⴰ ⵏ ⵜⴻⵡⵀⵉⴱⵜ ⵏ ⴰⵔⴻⴱⴱⵉ ⵏⵏⴻⵙ.

18 ⵎⵉⵏⵥⵉ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵥ ⵡⴰⵔ ⴷⴷ-ⵉⵜⵜⵇⴰⵔⵔⵉⴱ ⵛⴰ ⵙ ⵢⵉⵊⵊ ⵏ ⵍⵄⵉⴱ, ⵎⴰ ⴷ ⴰⴷⴰⵔⵖⴰⵍ ⵉ ⵉⴵⴰ ⵏⵉⵖ ⴷ ⴰⵇⵉⴹⴰⵔ ⵏⵉⵖ ⵙ ⵛⴰ ⵡⴰⵔ ⵉⵃⵍⵉ ⵏⵉⵖ ⵖⴰⵔⴻⵙ ⵚⵚⵉⴼⴻⵜ ⵜⴼⴰⵔⵖ

19 ⵏⵉⵖ ⵉⵊⵊ ⵏ ⵡⴻⵔⵢⴰⵥ ⵢⴰⵔⵥ ⴰⵙ ⵓⴹⴰⵔ ⵏⵉⵖ ⴰⴼⵓⵙ 20 ⵏⵉⵖ ⴱⵓ-ⵜⴻⵄⵔⵓⵔⵜ ⵏⵉⵖ ⵃⴻⴷ ⵢⴰⵍⵡⴻⵙ ⴷⵉ ⵛⴰ ⵏ ⵢⵉⵊⵊ ⵏ ⵜⵜⴻⵊⵊⴰⵍ ⵏⵉⵖ ⵙ ⵉⵛⵜ ⵏ ⵜⵉⵟⵟ ⵜⵓⴼⴼ ⵏⵉⵖ ⵙ ⵊⴷⴰⵎ ⵏⵉⵖ ⵙ ⵉⵛⵜ ⵏ ⵛⵛⴰⵎⴻⵜ ⵜⴻⵅⵚⴰⵔ ⵏⵉⵖ ⵙ ⵉⵇⴻⴵⴰⵍⴻⵏ ⵉⴷⴳⴻⴷⴳⴻⵏ. 21 ⵡⴰⵔ ⵉⵄⴻⴷⴷⴻⵍ ⵉ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵥ ⵥⵉ ⵥⵥⴰⵔⵉⵄⴻⵜ ⵏ ⵓⴽⴻⵀⵀⴰⵏ ⵀⴰⵔⵓⵏ, ⵡⴻⵏⵏⵉ ⴷⵉ ⵉⴵⴰ ⵛⴰ ⵏ ⵍⵄⵉⴱ, ⴰⴷ ⴷⴷ-ⵉⵍⵃⴻⵎ ⵎⴰⵃⴻⵏⴷ ⴰⴷ ⴷⴷ-ⵉⵙⵙⵇⴰⵔⵔⴻⴱ ⵜⵉⵡⵀⵉⴱⵉⵏ ⵏ ⵜⵎⴻⵙⵙⵉ ⵏ ⵙⵉⴷⵉ. ⴰⵇⴰ ⴷⴰⵢⴻⵙ ⴰⵏⴻⵄⴹⴰⴱ, ⵡⴰⵔ ⵉⵥⴻⵎⵎⴰⵔ ⴰⴷ ⵉⴼⴼⴻⵖ ⵎⴰⵃⴻⵏⴷ ⴰⴷ ⴷⴷ-ⵉⵙⵙⵇⴰⵔⵔⴻⴱ ⵎⴰⵛⵛⴰ ⵏ ⵜⴻⵡⵀⵉⴱⵜ ⵏ ⴰⵔⴻⴱⴱⵉ ⵏⵏⴻⵙ. 22 ⵣⵉ ⵎⴰⵛⵛⴰ ⵏ ⵜⴻⵡⵀⵉⴱⵜ ⵏ ⴰⵔⴻⴱⴱⵉ ⵏⵏⴻⵙ ⵉⵄⴻⴷⴷⴻⵍ ⴰⴷ ⵥⵥⴰⵢⴻⵙ ⵢⴻⵛⵛ, ⵥⵉ ⵎⵉⵏ ⵉⴵⴰⵏ ⵉⵇⴻⴷⴷⵙⴻⵏ ⵇⴰⵄ ⵓⵍⴰ ⵥⵉ ⵎⵉⵏ ⵉⵇⴻⴷⴷⵙⴻⵏ. 23 ⵎⴰⵛⴰ ⵡⴰⵔ ⵉⵄⴻⴷⴷⴻⵍ ⴰⴷ ⴷⴷ-ⵉⵇⴰⵔⵔⴻⴱ ⵖⴰⵔ ⵓⵍⴻⵃⵃⴰⴼ ⵓⵍⴰ ⵖⴰⵔ ⵓⵄⴰⵍⵟⴰⵔ, ⵎⵉⵏⵥⵉ ⴷⴰⵢⴻⵙ ⵉⵛⵜ ⵏ ⵓⵏⴻⵄⴹⴰⴱ, ⵃⵉⵎⴰ ⵡⴰⵔ ⵉⵙⵙⵄⵉⴵⵉ ⵜⵉⵥⴰⵡⵉⵢⵢⵉⵏ ⵉⵇⴻⴷⴷⵙⴻⵏ ⵉⵏⵓ, ⵎⵉⵏⵥⵉ ⵏⴻⵛⵛ ⴷ ⵙⵉⴷⵉ ⵡⴻⵏⵏⵉ ⵜⴻⵏ ⵉⵙⵙⵇⴻⴷⴷⵙⴻⵏ.”

24 ⴰⵎⵎⵓ ⵉ ⵉⵙⵙⵉⵡⴻⵍ ⵎⵓⵙⴰ ⴰⴽ-ⴷ ⵀⴰⵔⵓⵏ ⵓ ⴰⴽ-ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⵓ ⴰⴽ-ⴷ ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ.