1 ⴷⴻⴳ ⵡⴰⵙⵙ ⵡⵉⵙⵙ ⵜⵎⴻⵏⵢⴰ ⵉⵎⵙⴰⵔ ⴰⵇⴰ ⵎⵓⵙⴰ ⵉⵍⴰⵖⴰ ⵉ ⵀⴰⵔⵓⵏ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵉⵎⵖⴰⵔⴻⵏ ⵏ ⵉⵙⵔⴰⵉⵍ 2 ⵓⵛⴰ ⵉⵏⵏⴰ ⵉ ⵀⴰⵔⵓⵏ: “ⴽⵙⵉ ⵖⴰⵔⴻⴽ ⵉⵊⵊ ⵏ ⵓⵢⴻⵏⴷⵓⵥ, ⴰⵎⴻⵥⵢⴰⵏ ⵏ ⵓⴼⵓⵏⴰⵙ, ⴰⵎ ⵜⵖⴰⵔⵚⵜ ⵏ ⴷⴷⴻⵏⴱ, ⵓⵍⴰ ⴷ ⵉⵊⵊ ⵏ ⵉⵛⴰⵔⵔⵉ ⴰⵎ ⵜⵖⴰⵔⵚⵜ ⵏ ⵡⴻⵛⵎⴰⴹ, ⴰⵇⴰ ⴰⴷ ⵉⵍⵉⵏ ⵛⵏⴰⵏ ⵇⴰⵄ, ⵓⵛⴰ ⴻⵊⵊ ⵉ-ⵜⴻⵏ ⴰⴷ ⴷⴷ-ⵇⴰⵔⵔⴱⴻⵏ ⵖⴰⵔ ⵡⵓⴷⴻⵎ ⵏ ⵙⵉⴷⵉ. ^□  ■   3 ⵙⵉⵡⴻⵍ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵉⵏⵉ: “ⴽⵙⵉⵎ ⵉⵊⵊ ⵏ ⵉⵖⴰⵢⴹ ⴰⵎ ⵜⵖⴰⵔⵚⵜ ⵏ ⴷⴷⴻⵏⴱ ⵓ ⴽⵙⵉ ⵉⵊⵊ ⵏ ⵓⵢⴻⵏⴷⵓⵥ ⴷ ⵉⵊⵊ ⵏ ⵢⴻⵥⵎⴰⵔ, ⴰⵇⴰ ⴰⴷ ⵉⵍⵉⵏ ⵛⵏⴰⵏ ⵇⴰⵄ ⵏ ⵉⵊⵊ ⵏ ⵓⵙⴻⴳⴳⵯⴰⵙ, ⵉ ⵜⵖⴰⵔⵚⵜ ⵏ ⵡⴻⵛⵎⴰⴹ, 4 ⵓⵛⴰ ⴽⵙⵉ ⵄⴰⵡⴻⴷ ⵉⵊⵊ ⵏ ⵓⴼⵓⵏⴰⵙ ⴷ ⵉⵊⵊ ⵏ ⵓⵛⴰⵔⵔⵉ ⴰⵎ ⵜⵖⴰⵔⵚⴰ ⵏ ⵍⴻⵀⵏⴰ, ⵎⴰⵃⴻⵏⴷ ⴰⴷ ⵜⴻⵏ ⵇⴻⴷⴷⵎⴻⵏ ⵉ ⵙⵉⴷⵉ, ⵓⵍⴰ ⴷ ⵉⵛⵜ ⵏ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵉⵅⴻⴵⴹⴻⵏ ⵙ ⵥⵥⴻⵛⵜ, ⵎⵉⵏⵥⵉ ⴰⵙⵙ-ⴰ ⴰⴷ ⴰⵡⴻⵎ-ⴷⴷ ⵉⴱⴰⵏ ⵙⵉⴷⵉ.”

5 ⵅⴻⵏⵏⵉ ⴰⵡⵢⴻⵏ ⵎⵉⵏ ⵅⴻⴼ ⵉⵡⴻⵚⵚⴰ ⵎⵓⵙⴰ ⵖⴰⵔ ⵥⵥⴰⵜ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵓⵛⴰ ⵜⴰⵎⴻⵙⵎⵓⵏⵜ ⵜⵇⴰⵔⵔⴻⴱ-ⴷⴷ ⵓⵛⴰ ⴱⴻⴷⴷⴻⵏ ⵏⵉⵜⵏⵉ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ.

6 ⵓⵛⴰ ⵎⵓⵙⴰ ⵉⵏⵏⴰ: “ⴷ ⵎⴰⵏ ⴰⵢⴰ ⵎⵉⵏ ⵅⴻⴼ ⵉⵡⴻⵚⵚⴰ ⵙⵉⴷⵉ ⵎⴰⵃⴻⵏⴷ ⴰⴷ ⵜ ⵜⴻⴳⴳⴻⵎ ⵓⵛⴰ ⵅⴻⵏⵏⵉ ⴰⴷ ⴰⵡⴻⵎ ⴷⴷ-ⵉⴱⴰⵏ ⵓⵄⵓⴵⵉ ⵏ ⵙⵉⴷⵉ.”

7 ⵉⵏⵏⴰ ⵎⵓⵙⴰ ⵉ ⵀⴰⵔⵓⵏ: “ⵇⴰⵔⵔⴻⴱ-ⴷⴷ ⵖⴰⵔ ⵓⵄⴰⵍⵟⴰⵔ ⵓⵛⴰ ⵙⴻⵡⵊⴻⴷ ⵜⴰⵖⴰⵔⵚⵜ ⵏⵏⴻⴽ ⵏ ⴷⴷⴻⵏⴱ ⴷ ⵜⵖⴰⵔⵚⵜ ⵏⵏⴻⴽ ⵏ ⵡⴻⵛⵎⴰⴹ ⵓⵛⴰ ⴻⴳⴳ ⴰⵚⵍⴰⵃ ⵅ ⵢⵉⵅⴻⴼ ⵏⵏⴻⴽ ⵓ ⵅ ⵍⴳⴻⵏⵙ. ⴰⵡⴰⵔⵏⵉ ⴰⵙ ⵙⴻⵡⵊⴻⴷ ⵜⴰⵡⵀⵉⴱⵜ ⵏ ⵍⴳⴻⵏⵙ ⵓⵛⴰ ⵙⴻⵚⵍⴻⵃ ⵉ-ⵜⴻⵏ ⴰⵎ ⵎⴰⵎⵎⴻⵛ ⵜ ⵉⵡⴻⵚⵚⴰ ⵙⵉⴷⵉ.” ^■   8 ⵅⴻⵏⵏⵉ ⵉⵇⴰⵔⵔⴻⴱ-ⴷⴷ ⵀⴰⵔⵓⵏ ⵖⴰⵔ ⵓⵄⴰⵍⵟⴰⵔ ⵓⵛⴰ ⵉⵖⴰⵔⵚ ⵉ ⵓⵢⴻⵏⴷⵓⵥ ⵏ ⵜⵖⴰⵔⵚⵜ ⵏ ⴷⴷⴻⵏⴱ ⵉ ⵉⴵⴰⵏ ⵉ ⵢⵉⵅⴻⴼ ⵏⵏⴻⵙ. 9 ⵜⴰⵔⵡⴰ ⵏ ⵀⴰⵔⵓⵏ ⵉⵡⵢⴻⵏ ⴰⵙ-ⴷⴷ ⵉⴷⴰⵎⵎⴻⵏ ⵓⵛⴰ ⵏⴻⵜⵜⴰ ⵉⵙⵙⵓⴼ ⴰⴹⴰⴹ ⵏⵏⴻⵙ ⴷⴻⴳ ⵉⴷⴰⵎⵎⴻⵏ ⵓⵛⴰ ⵉⴳⴳⴰ ⵉ-ⵜⴻⵏ ⵅ ⵡⴰⵛⵛⴰⵡⴻⵏ ⵏ ⵓⵄⴰⵍⵟⴰⵔ. ⵎⵉⵏ ⵉⵛⴻⵟⵟⴻⵏ ⵏ ⵉⴷⴰⵎⵎⴻⵏ ⵉⵙⴻⵢⵢⴻⴱ ⵉ-ⵜⴻⵏ ⵖⴰⵔ ⵓⴹⴰⵔ ⵏ ⵓⵄⴰⵍⵟⴰⵔ.

10 ⵉⵙⵙⴱⴻⵅⵅⴰⵔ ⵜⴰⴷⵓⵏⵜ ⴷ ⵜⵉⵥⵥⴰⵍ ⴷ ⵎⵉⵏ ⵢⵓⵢⵍⴻⵏ ⵖⴰⵔ ⵜⵙⴰ ⵏ ⵜⵖⴰⵔⵚⵜ ⵏ ⴷⴷⴻⵏⴱ ⵅ ⵓⵄⴰⵍⵟⴰⵔ ⴰⵎ ⵎⴰⵎⵎⴻⵛ ⵜ ⵢⵓⵎⵓⵔ ⵙⵉⴷⵉ ⵉ ⵎⵓⵙⴰ. ^□  

11 ⵉⵙⵙⴻⵛⵎⴻⴹ ⴰⵢⵙⵓⵎ ⴷ ⵢⵉⵍⴻⵎ ⵙ ⵜⵎⴻⵙⵙⵉ ⴱⴰⵔⵔⴰ ⵉ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ.

12 ⵉⵖⴰⵔⵚ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵓⵛⴰ ⵉⵃⴻⵏⵊⵉⵔⴻⵏ ⵏ ⵀⴰⵔⵓⵏ ⵇⴻⴷⴷⵎⴻⵏ ⴰⵙ ⵉⴷⴰⵎⵎⴻⵏ ⵓⵛⴰ ⵏⴻⵜⵜⴰ ⵉⵥⴻⴵⴻⵄ ⵜⴻⵏ ⵅ ⵓⵄⴰⵍⵟⴰⵔ ⵖⴰⵔ ⵎⴰⵔⵔⴰ ⵉⵖⴻⵥⴷⵉⵙⴻⵏ ⵏⵏⴻⵙ.

13 ⵅⴻⵏⵏⵉ ⵇⴻⴷⴷⵎⴻⵏ ⴰⵙ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵉ ⵜⵜⵡⴰⴱⴹⴰⵏ ⴷ ⵉⵛⴻⴵⵉⵇⴻⵏ, ⵓⵍⴰ ⴷ ⴰⵥⴻⴵⵉⴼ, ⵓⵛⴰ ⵏⴻⵜⵜⴰ ⵉⵙⵙⴱⴻⵅⵅⴰⵔ ⵉ-ⵜⵜ ⵅ ⵓⵄⴰⵍⵟⴰⵔ.

14 ⵉⵙⵙⵉⵔⴷ ⴰⴷⴰⵏ ⴷ ⵉⴹⴰⵔⴻⵏ ⵓⵛⴰ ⵉⵙⵙⴱⴻⵅⵅⴰⵔ ⵉ-ⵜⴻⵏ ⵅ ⵜⵖⴰⵔⵚⵜ ⵏ ⵡⴻⵛⵎⴰⴹ ⵉ ⵉⴵⴰⵏ ⵅ ⵓⵄⴰⵍⵟⴰⵔ.

15 ⴰⵡⴰⵔⵏⵉ ⴰⵙ ⵉⵙⵙⵇⴰⵔⵔⴻⴱ-ⴷⴷ ⵜⴰⵡⵀⵉⴱⵜ ⵏ ⵍⴳⴻⵏⵙ. ⵏⴻⵜⵜⴰ ⵉⴽⵙⵉ ⴰⵎⵢⴰⵏ ⵏ ⵜⵖⴰⵔⵚⵜ ⵏ ⴷⴷⴻⵏⴱ ⵉ ⵍⴳⴻⵏⵙ ⵓⵛⴰ ⵉⵖⴰⵔⵚ ⴰⵙ ⵓⵛⴰ ⵉⵙⵙⴻⵡⵊⴻⴷ ⵉ-ⵜ ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ ⴰⵎⴻⵛⵏⴰⵡ ⵉⵛⴰⵔⵔⵉ ⴰⵎⴻⵥⵡⴰⵔⵓ. ^■  

16 ⵉⵙⵙⵇⴰⵔⵔⴻⴱ-ⴷⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵓⵛⴰ ⵉⵙⵙⴻⵡⵊⴻⴷ ⵉ-ⵜⵜ ⵄⵍⴰⵃⵙⴰⴱ ⵍⴼⴰⵔⵉⴹⴰ.

17 ⵉⵙⵙⵇⴰⵔⵔⴻⴱ-ⴷⴷ ⵜⴰⵡⵀⵉⴱⵜ ⵏ ⵍⵖⵉⴵⴻⵜ ⵓⵛⴰ ⵉⴽⵙⵉ ⵥⵥⴰⵢⴻⵙ ⵉⵊⵊ ⵏ ⵡⵓⵔⵓ ⵉⵛⵛⵓⵔ ⵓⵛⴰ ⵉⵙⵙⴱⴻⵅⵅⴰⵔ ⴰⵢⴰ ⵅ ⵓⵄⴰⵍⵟⴰⵔ, ⵥⵥⴰⵜ ⵉ ⵜⵖⴰⵔⵚⵜ ⵏ ⵡⴻⵛⵎⴰⴹ ⵏ ⵚⵚⴱⴻⵃ. ^■  

18 ⵉⵖⴰⵔⵚ ⵄⴰⵡⴻⴷ ⵉ ⵓⴼⵓⵏⴰⵙ ⵓ ⵉ ⵢⵉⵛⴰⵔⵔⵉ ⵏ ⵜⴰⵖⴰⵔⵚⵜ ⵏ ⵍⴻⵀⵏⴰ ⴷⵉ ⵟⵟⵡⴻⵄ ⵏ ⵍⴳⴻⵏⵙ, ⵓⵛⴰ ⵉⵃⴻⵏⵊⵉⵔⴻⵏ ⵏ ⵀⴰⵔⵓⵏ ⵇⴻⴷⴷⵎⴻⵏ ⴰⵙ ⵉⴷⴰⵎⵎⴻⵏ ⵓⵛⴰ ⵉⵥⴻⴵⴻⵄ ⵉ-ⵜⴻⵏ ⵅ ⵓⵄⴰⵍⵟⴰⵔ ⵖⴰⵔ ⵎⴰⵔⵔⴰ ⵉⵖⴻⵥⴷⵉⵙⴻⵏ ⵏⵏⴻⵙ.

19 ⵅ ⵜⴰⴷⵓⵏⵜ ⵏ ⵓⴼⵓⵏⴰⵙ ⵓ ⵏ ⵉⵛⴰⵔⵔⵉ: ⴰⵏⴻⵡⵡⴰⵔ ⵙ ⵜⴰⴷⵓⵏⵜ ⵏⵏⴻⵙ ⴷ ⵎⵉⵏ ⵉⴷⵍⵉⵏ ⴰⴹⴰⵏ ⴷ ⵜⵉⵥⵥⴰⵍ ⴷ ⵎⵉⵏ ⵢⵓⵢⵍⴻⵏ ⵖⴰⵔ ⵜⵙⴰ, 20 ⴰⵇⴰ ⵙⵙⴰⵔⵙⴻⵏ ⵜⴰⴷⵓⵏⵜ ⵏⵏⵉ ⵅ ⵉⴷⵎⴰⵔⴻⵏ ⵓⵛⴰ ⵏⴻⵜⵜⴰ ⵉⵙⵙⴱⴻⵅⵅⴰⵔ ⵜⴰⴷⵓⵏⵜ ⵅ ⵓⵄⴰⵍⵟⴰⵔ 21 ⵓⵛⴰ ⵉⵙⵙⴻⵏⵀⴻⵥⵥ ⵀⴰⵔⵓⵏ ⵉⴷⵎⴰⵔⴻⵏ ⴷ ⵓⵛⴻⴽⵔⵓⴷ ⴰⴼⵓⵙⵉ ⴰⵎⴻⵛⵏⴰⵡ ⵉⵛⵜ ⵏ ⵜⴻⵡⵀⵉⴱⵜ ⵏ ⵡⴻⵏⵀⴻⵥⵥⵉ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵎ ⵎⴰⵎⵎⴻⵛ ⵜ ⵉⵡⴻⵚⵚⴰ ⵎⵓⵙⴰ. ^■  

22 ⵅⴻⵏⵏⵉ ⵉⵙⵙⴳⴻⵄⵄⴻⴷ ⵀⴰⵔⵓⵏ ⵉⴼⴰⵙⵙⴻⵏ ⵏⵏⴻⵙ ⵖⴰⵔ ⵍⴳⴻⵏⵙ ⵓⵛⴰ ⵉⴱⴰⵔⴻⴽ ⵉ-ⵜⴻⵏ ⵓⵛⴰ ⵉⵀⵡⴰ ⴰⵡⴰⵔⵏⵉ ⵍⴰⵎⵉ ⵉⵇⴻⴷⴷⴻⵎ ⵜⴰⵖⴰⵔⵚⵜ ⵏ ⴷⴷⴻⵏⴱ ⴷ ⵜⵖⴰⵔⵚⵜ ⵏ ⵡⴻⵛⵎⴰⴹ ⴷ ⵜⵖⴰⵔⵚⵜ ⵏ ⵍⴻⵀⵏⴰ. 23 ⵓⵛⴰ ⵢⵓⴷⴻⴼ ⵎⵓⵙⴰ ⴰⴽ-ⴷ ⵀⴰⵔⵓⵏ ⵖⴰⵔ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵓⵛⴰ ⵏⵉⵜⵏⵉ ⴼⴼⵖⴻⵏ ⵥⵥⴰⵢⴻⵙ ⵄⴰⵡⴻⴷ ⵓⵛⴰ ⴱⴰⵔⴽⴻⵏ ⵍⴳⴻⵏⵙ ⵓⵛⴰ ⵉⴱⴰⵏ-ⴷⴷ ⵓⵄⵓⴵⵉ ⵏ ⵙⵉⴷⵉ ⵉ ⵎⴰⵔⵔⴰ ⵍⴳⴻⵏⵙ 24 ⵓⵛⴰ ⵜⴻⴼⴼⴻⵖ-ⴷⴷ ⵜⵎⴻⵙⵙⵉ ⵥⵉ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵜⴻⵛⵛⴰ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵅ ⵓⵄⴰⵍⵟⴰⵔ ⵓⵍⴰ ⴷ ⵜⴰⴷⵓⵏⵜ. ⵓⵎⵉ ⵉⵥⵔⴰ ⵍⴳⴻⵏⵙ ⵎⴰⵏ ⴰⵢⴰ, ⵙⵍⵉⵡⴻⵍⵡⴻⵏ ⵓⵛⴰ ⵡⴹⴰⵏ ⵖⴰⵔ ⵜⴻⵎⵎⵓⵔⵜ ⵅ ⵓⵖⴻⵎⴱⵓⴱ ⵏⵙⴻⵏ. ^■