1 “ⵎⴰⵍⴰ ⵉⵅⴹⴰ ⵃⴻⴷ ⵓⵎⵉ ⵉⵙⵍⴰ ⴰⵀⴻⵊⵊⵉ ⵏ ⵉⵛⵜ ⵏ ⵏⵏⴻⵄⵍⴻⵜ ⵓⵛⴰ ⵏⴻⵜⵜⴰ ⴷ ⴰⵛⴻⵀⵀⴰⴷ ⵅⴰⵙ, ⵏⵉⵖ ⵉⵥⵔⴰ ⵉ-ⵜ ⵏⵉⵖ ⵉⵙⵙⴻⵏ ⵉ-ⵜ: ⵎⴰⵍⴰ ⵡⴰⵔ ⵅⴰⵙ ⵉⵇⵇⴰⵔ ⵡⴰⵍⵓ, ⵅⴻⵏⵏⵉ ⴰⴷ ⵢⴰⵔⴱⵓ ⵍⵎⵓⵄⵚⵉⵢⵢⴻⵜ ⵏⵏⴻⵙ. ^□  

2 ⵏⵉⵖ ⵎⴰⵍⴰ ⵃⴻⴷ ⵉⵃⴰⴷⴰ ⵎⵉⵏ ⵎⴰ ⵥⵉ ⵜⵎⴻⵙⵍⴰⵛⵜ ⵉⵅⴻⵎⵊⴻⵏ, ⵍⵅⴻⵛⴱⴻⵜ ⵏ ⵍⵎⴰⵍ ⵉⵅⵎⴻⵊ, ⵏⵉⵖ ⵍⵅⴻⵛⴱⴻⵜ ⵏ ⵍⴻⴱⵃⵉⵎⴻⵜ ⵉⵅⴻⵎⵊⴻⵏ, ⵏⵉⵖ ⵍⵅⴻⵛⴱⴻⵜ ⵏ ⵓⵎⵓⴷⴷⴰⵔ ⵉⵅⵎⴻⵊ ⵉⵜⵜⴱⵓⵄⴻⵏ, ⵓⵛⴰ ⵏⴻⵜⵜⴰ ⵡⴰⵔ ⵉⵙⵙⵉⵏ ⴰⵢⴰ , ⴰⵇⴰ ⵉⵅⵎⴻⵊ ⵓ ⴷⴰⵢⴻⵙ ⴰⵎⴰⵔⵡⴰⵙ. ^■  

3 ⵏⵉⵖ ⵎⴰⵍⴰ ⵉⵃⴰⴷⴰ ⵛⴰ ⵏ ⵍⴻⵅⵎⴻⵊ ⵏ ⴱⵏⴰⴷⴻⵎ, ⵎⵉⵏ ⵎⴰ ⵥⵉ ⵍⴻⵅⵎⴻⵊ ⵏⵏⴻⵙ ⵉ ⵥⵉ ⵉⴷⵡⴻⵍ ⵏⴻⵜⵜⴰ ⵉⵅⵎⴻⵊ, ⵎⴰⵍⴰ ⵜⴻⵏⵏⵓⴼⴼⴰⵔ ⵅⴰⵙ ⵓⵛⴰ ⵅⴻⵏⵏⵉ ⵉⵙⵙⴻⵏ ⵉⵜ, ⴰⵇⴰ ⴷⴰⵢⴻⵙ ⴰⵎⴰⵔⵡⴰⵙ.

4 ⵏⵉⵖ ⵎⴰⵍⴰ ⵃⴻⴷ ⵉⵥⵥⵓⴵ ⵙ ⵜⵛⴰⵔⴼⴰⵢⴻⵃ ⵏⵏⴻⵙ ⵎⴰⵃⴻⵏⴷ ⴰⴷ ⵉⴳⴳ ⵍⵖⴰⵔ ⵏⵉⵖ ⴰⴷ ⵉⴳⴳ ⵍⵅⴰⵔ, ⵏⵉⵖ ⵎⵉⵏ ⵎⴰ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⵉⵏⵟⴻⵇ ⴰⵎⴻⵏⵏⵉ ⵡⴰⵀⴰ ⵙ ⵉⵛⵜ ⵏ ⵜⵊⴰⴵⵉⵜ, ⵓⵛⴰ ⵜⵏⵓⴼⴼⴰⵔ ⵜⵎⴻⵙⵍⴰⵛⵜ ⵅⴰⵙ, ⵎⴰⵛⴰ ⵉⵙⵙⴻⵏ ⵉ-ⵜ ⴰⵡⴰⵔⵏⵉ ⵎⴰⵏ ⴰⵢⴰ, ⴰⵇⴰ ⵏⴻⵜⵜⴰ ⵉⵅⵎⴻⵊ ⵓ ⴷⴰⵢⴻⵙ ⴰⵎⴰⵔⵡⴰⵙ ⵅ ⵙⵙⵉⴱⴱⴻⵜ ⵏ ⵛⴰ ⵏ ⵉⵊⵊ ⵏ ⵥⵥⴰⵢⵙⴻⵏ.

5 ⵅⴻⵏⵏⵉ ⴰⴷ ⵉⵎⵙⴰⵔ, ⵎⴰⵍⴰ ⴷⴰⵢⴻⵙ ⴰⵎⴰⵔⵡⴰⵙ ⴷⵉ ⵙⵙⵉⴱⴱⴻⵜ ⵏ ⵉⵛⵜⴻⵏ ⵥⵉ ⵜⵎⴻⵙⵍⴰⵢⵉⵏ-ⴰ, ⴰⴷ ⵉⵏⵄⴻⵎ ⵅ ⵎⵉⵏ ⵜⵓⵖⴰ ⵉⵅⴹⴰ, ^□   6 ⵓⵛⴰ ⵅ ⴷⴷⴻⵏⴱ ⵉ ⵉⴳⴳⴰ, ⴰⴷ ⵉⵇⴻⴷⴷⴻⵎ ⵉⵛⵜ ⵏ ⵜⴻⵡⵜⴻⵎⵜ ⵏ ⵡⵓⴵⵉ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ, ⵉⵛⵜ ⵏ ⵜⴻⵅⵙⵉ ⵏⵉⵖ ⵉⵛⵜ ⵏ ⵜⵖⴰⵢⴹⴻⵜ, ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ ⵉ ⵙⵉⴷⵉ, ⵓⵛⴰ ⴰⵎⵎⵓ ⵉ ⵅⴰⵙ ⵖⴰ ⵉⴼⴷⵉ ⵓⴽⴻⵀⵀⴰⵏ ⴷⴷⴻⵏⴱ ⵏⵏⴻⵙ. ^□  

7 ⵎⴰⵛⴰ ⵎⴰⵍⴰ ⴰⴼⵓⵙ ⵏⵏⴻⵙ ⵡⴰⵔ ⵖⴰⵔⴻⵙ ⵎⵉⵏ ⵉⵇⴻⴷⴷⴻⵏ ⵉ ⵢⵉⵊⵊ ⵥⴻⴳ ⵡⵓⴵⵉ, ⵅⴻⵏⵏⵉ ⴰⴷ ⵢⴰⵡⵉ ⵉ ⵙⵉⴷⵉ ⵉ ⵜⵖⴰⵔⵚⵜ ⵏ ⵓⵎⴰⵔⵡⴰⵙ ⵅ ⴷⴷⴻⵏⴱ ⵉ ⵉⴳⴳⴰ, ⵜⵏⴰⵢⴻⵏ ⵏ ⵜⴻⵊⵍⵉⵍⵍⵉⵃⵉⵏ ⵏⵉⵖ ⵜⵏⴰⵢⴻⵏ ⵏ ⵉⴷⴱⵉⵔⴻⵏ ⵉⵎⴻⵥⵢⴰⵏⴻⵏ, ⵉⵊⵊⴻⵏ ⵉ ⵜⵖⴰⵔⵚⵜ ⵏ ⴷⴷⴻⵏⴱ ⵓ ⵉⵊⵊⴻⵏ ⵉ ⵜⵖⴰⵔⵚⵜ ⵏ ⵡⴻⵛⵎⴰⴹ. ^■  

8 ⴰⴷ ⵜⴻⵏ ⵢⴰⵡⵉ ⵖⴰⵔ ⵓⴽⴻⵀⵀⴰⵏ, ⵡⴻⵏⵏⵉ ⴷⴷ ⵖⴰ ⵉⵙⵙⵇⴰⵔⵔⴱⴻⵏ ⴷ ⴰⵎⴻⵥⵡⴰⵔⵓ ⵡⴻⵏⵏⵉ ⵉⴵⴰⵏ ⵉ ⵜⵖⴰⵔⵚⵜ ⵏ ⴷⴷⴻⵏⴱ ⵓⵛⴰ ⴰⴷ ⵉⴽⴽⴻⵙ ⴰⵥⴻⴵⵉⴼ ⵏⵏⴻⵙ ⵥⵉ ⵛⵡⴰⵢⵜ ⴰⵡⴰⵔⵏⵉ ⵢⵉⵔⵉ ⵏⵏⴻⵙ, ⵎⴰⵛⴰ ⵡⴰⵔ ⵜ ⵉⴱⴻⵟⵟⵉ ⵎⴰⵔⵔⴰ. ^■   9 ⴰⴷ ⵉⵔⵓⵛⵛ ⵛⵡⴰⵢⵜ ⵏ ⵉⴷⴰⵎⵎⴻⵏ ⵖⴰⵔ ⵓⵖⴻⵥⴷⵉⵙ ⵏ ⵓⵄⴰⵍⵟⴰⵔ ⵓⵛⴰ ⵎⵉⵏ ⵉⵛⴻⵟⵟⴻⵏ ⵥⴻⴳ ⵉⴷⴰⵎⵎⴻⵏ, ⴰⴷ ⵜ ⵉⵥⴻⵎⵎ ⵖⴰⵔ ⵓⴹⴰⵔ ⵏ ⵓⵄⴰⵍⵟⴰⵔ. ⴰⵇⴰ-ⵜⵜ ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ.

10 ⴰⴷ ⵉⵙⵙⴻⵡⵊⴻⴷ ⵡⴻⵏⵏⴻⵖⵏⵉ ⴰⵎ ⵜⵖⴰⵔⵚⵜ ⵏ ⵡⴻⵛⵎⴰⴹ ⵄⵍⴰⵃⵙⴰⴱ ⵍⴼⴰⵔⵉⴹⴰ ⵓⵛⴰ ⴰⴽⴻⵀⵀⴰⵏ ⴰⴷ ⵅⴰⵙ ⵉⴼⴷⵉ ⵅ ⴷⴷⴻⵏⴱ ⵏⵏⴻⵙ ⵉ ⵉⴳⴳⴰ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ.^■  

11 ⵎⴰⵍⴰ ⴰⴼⵓⵙ ⵏⵏⴻⵙ ⵡⴰⵔ ⵖⴰⵔⴻⵙ ⵎⵉⵏ ⵉⴽⴼⴰ ⵉ ⵜⵏⴰⵢⴻⵏ ⵏ ⵜⴻⵊⵍⵉⵍⵍⵉⵃⵉⵏ ⵏⵉⵖ ⵉ ⵜⵏⴰⵢⴻⵏ ⵏ ⵉⴷⴱⵉⵔⴻⵏ ⵉⵎⴻⵥⵢⴰⵏⴻⵏ, ⵅⴻⵏⵏⵉ ⵡⴻⵏⵏⵉ ⵉⵅⴹⴰⵏ, ⴰⴷ ⵢⴰⵡⵉ ⴰⵎ ⵜⴻⵡⵀⵉⴱⵜ ⵏⵏⴻⵙ ⵜⴰⵄⵛⴰⵔⵜ ⵏ ⵉⵊⵊ ⵏ ⵉⴼⴰ ⵏ ⵡⴰⵔⴻⵏ ⴰⵥⴷⴰⴷ ⴷ ⵜⴰⵡⵀⵉⴱⵜ ⵏ ⴷⴷⴻⵏⴱ. ⵡⴰⵔ ⵅⴰⵙ ⵉⵜⵜⴻⴳⴳ ⵥⵥⴻⵛⵜ ⵓⵍⴰ ⵡⴰⵔ ⵅⴰⵙ ⵉⵙⵙⵔⵓⵙⵉ ⵍⴻⴱⵅⵓⵔ, ⵎⵉⵏⵥⵉ ⴰⵇⴰ-ⵜⵜ ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ.

12 ⴰⴷ ⵜⵜ ⵢⴰⵡⵉ ⵖⴰⵔ ⵓⴽⴻⵀⵀⴰⵏ ⵓⵛⴰ ⴰⴽⴻⵀⵀⴰⵏ ⴰⴷ ⵥⵥⴰⵢⴻⵙ ⵉⴽⵙⵉ ⵉⵊⵊ ⵏ ⵡⵓⵔⵓ ⵉⵛⵛⵓⵔ ⵓⵛⴰ ⴰⴷ ⵉⵙⵙⴱⴻⵅⵅⴰⵔ ⴰⵢⴰ ⴰⵎ ⵍⵉⴷⴰⵔⴻⵜ ⴷⴰⵢⴻⵙ ⵅ ⵓⵄⴰⵍⵟⴰⵔ, ⵅ ⵜⴻⵡⵀⵉⴱⵉⵏ ⵏ ⵜⵎⴻⵙⵙⵉ ⵉ ⵙⵉⴷⵉ. ⴰⵇⴰ-ⵜⵜ ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ. ^■  

13 ⴰⵎⵎⵓ ⵉ ⵅⴰⵙ ⵉ ⵖⴰ ⵉⴼⴷⵉ ⵓⴽⴻⵀⵀⴰⵏ ⵅ ⴷⴷⴻⵏⴱ ⵏⵏⴻⵙ ⵏⵏⵉ ⵉⴳⴳⴰ ⵥⵉ ⵊⵊⵉⵀⴻⵜ ⵏ ⵉⵛⵜⴻⵏ ⵥⵉ ⵜⵎⴻⵙⵍⴰⵢⵉⵏ-ⴰ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ. ⵎⵉⵏ ⵉⵛⴻⵟⵟⴻⵏ ⴰⴷ ⵢⵉⵍⵉ ⵉ ⵉⴽⴻⵀⵀⴰⵏⴻⵏ ⴰⵎ ⵎⴰⵎⵎⴻⵛ ⵜ ⵉⴳⴳⴰ ⵓⴽⴻⵀⵀⴰⵏ ⴰⴽ-ⴷ ⵜⴻⵡⵀⵉⴱⵜ ⵏ ⵍⵖⵉⴵⴻⵜ.” ^■  

14 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

15 “ⵎⴰⵍⴰ ⵃⴻⴷ ⵉⴳⴳⴰ ⵙ ⵍⴻⵖⴷⴰⵔ ⵓⵛⴰ ⵉⵅⴹⴰ ⵙ ⵓⵡⴻⴷⴷⴰⵔ ⴷⵉ ⵜⵎⴻⵙⵍⴰⵢⵉⵏ ⵉⵇⴻⴷⴷⵙⴻⵏ ⵏ ⵙⵉⴷⵉ, ⵉⵜⵜⵅⴻⵚⵚⴰ ⴰⴷ ⵢⴰⵡⵉ ⵉⵛⴰⵔⵔⵉ ⵉⵛⵏⴰⵏ ⵇⴰⵄ ⵥⴻⴳ ⵡⵓⴵⵉ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ ⵉ ⵙⵉⴷⵉ. ⴰⴷ ⵜⵉⵍⵉ ⵍⵇⵉⵎⴻⵜ ⵏⵏⴻⵙ ⵄⵍⴰⵃⵙⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⴷⴻⴳ ⵉⵛⵉⵇⵍⴻⵏ ⵏ ⵏⵏⵓⵇⴰⵔⵜ ⵄⵍⴰⵃⵙⴰⴱ ⴰⵛⵉⵇⵍ ⵏ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ. ⴰⵇⴰ-ⵜ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ. ^■  

16 ⵣⵉ ⵜⵎⴻⵙⵍⴰⵢⵉⵏ ⵉⵇⴻⴷⴷⵙⴻⵏ ⴰⴷ ⵢⴰⵔⵔ ⴷⵉ ⵎⵉⵏ ⴷⵉ ⵉⵅⴹⴰ ⵇⴱⴻⵍ, ⵓⵛⴰ ⴰⴷ ⴷⴰⵢⴻⵙ ⵢⴰⵔⵏⵉ ⵍⵅⵓⵎⵓⵙ. ⵓⵛⴰ ⴰⴷ ⵉⵡⵛ ⵎⴰⵏ ⴰⵢⴰ ⵉ ⵓⴽⴻⵀⵀⴰⵏ ⵓⵛⴰ ⴰⴽⴻⵀⵀⴰⵏ ⴰⴷ ⵅⴰⵙ ⵉⴼⴷⵉ ⵙ ⵉⵛⴰⵔⵔⵉ ⵏ ⵜⵖⴰⵔⵚⵜ ⵏ ⵓⵎⴰⵔⵡⴰⵙ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ.

17 ⵎⴰⵍⴰ ⵉⵅⴹⴰ ⵃⴻⴷ ⵓⵛⴰ ⵉⴳⴳⴰ ⵎⵉⵏ ⵉⴼⴼⵖⴻⵏ ⵥⵉ ⵎⵉⵏ ⵎⴰ ⵥⵉ ⵜⵡⴻⵚⵚⴰ ⵏ ⵙⵉⴷⵉ, ⵎⵉⵏ ⵡⴰⵔ ⵉⵜⵜⵅⴻⵚⵚⴰ ⴰⴷ ⵢⴻⴳⴳ, ⵓⵛⴰ ⵜⵓⵖⴰ ⵜⵏⵓⴼⴼⴰⵔ ⵅⴰⵙ, ⴰⴷ ⴷⴰⵢⴻⵙ ⵢⵉⵍⵉ ⵓⵎⴰⵔⵡⴰⵙ ⵓⵛⴰ ⴰⴷ ⵢⴰⵔⴱⵓ ⵍⵎⵓⵄⵚⵉⵢⵢⴻⵜ ⵏⵏⴻⵙ.

18 ⴰⴷ ⵢⴰⵡⵉ ⵉⵛⴰⵔⵔⵉ ⵉⵛⵏⴰⵏ ⵇⴰⵄ ⵥⴻⴳ ⵡⵓⴵⵉ ⵖⴰⵔ ⵓⴽⴻⵀⵀⴰⵏ ⵉ ⵜⵖⴰⵔⵚⵜ ⵏ ⵓⵎⴰⵔⵡⴰⵙ, ⴰⴷ ⵜⵉⵍⵉ ⵍⵇⵉⵎⴻⵜ ⵏⵏⴻⵙ ⵄⵍⴰⵃⵙⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⵓⵛⴰ ⴰⴷ ⵅⴰⵙ ⵉⴼⴷⵉ ⵓⴽⴻⵀⵀⴰⵏ ⵉ ⵓⵡⴻⴷⴷⴰⵔ ⵉ ⴷⵉ ⵉⵡⴻⴷⴷⴰⵔ ⴰⵎ ⵡⴰⵔ ⵜ ⵉⵙⵙⵉⵏ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ.

19 ⴰⵇⴰ-ⵜ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ. ⵙ ⵜⵉⴷⴻⵜⵜ ⵜⵓⵖⴰ ⴷⴰⵢⴻⵙ ⴰⵎⴰⵔⵡⴰⵙ ⵥⵥⴰⵜ ⵉ ⵙⵉⴷⵉ.”

20 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

21 “ⵎⴰⵍⴰ ⵉⵅⴹⴰ ⵃⴻⴷ ⵓⵛⴰ ⵉⵖⴷⴰⵔ ⵙⵉⴷⵉ ⴰⵎ ⵉⵙⵙⵅⴰⵔⵔⵉⵇ ⵅ ⵓⵎⵇⴰⵔⵔⴻⴱ ⵏⵏⴻⵙ ⵅ ⵎⵉⵏ ⴷ ⴰⵙ ⵉⵎⵎⴻⵡⵛⴻⵏ ⵎⴰⵃⴻⵏⴷ ⴰⴷ ⵜ ⵉⵃⴹⴰ, ⵏⵉⵖ ⵅ ⵎⵉⵏ ⵊⵊⵉⵏ ⴷⴻⴳ ⵓⴼⵓⵙ ⵏⵏⴻⵙ, ⵏⵉⵖ ⵅ ⵎⵉⵏ ⵅⴰⵙ ⵢⵓⵛⴰⵔⴻⵏ, ⵏⵉⵖ ⵉⴳⴳⴰ ⵛⴰ ⵏ ⵓⴱⴻⵄⵄⴻⵊ ⵉ ⵓⵎⵇⴰⵔⵔⴻⴱ ⵏⵏⴻⵙ, 22 ⵏⵉⵖ ⵜⵓⵖⴰ ⵉⵙⵙⵅⴰⵔⵔⵉⵇ ⵅ ⵛⴰ ⵎⵉⵏ ⵉⵡⴻⴷⴷⴰⵔⴻⵏ ⵉ ⵛⴰ ⵏ ⵢⵉⵊⵊⴻⵏ ⵓ ⵉⵜⵜⵡⴰⴼ ⵥⵥⴰⵢⴻⵙ, ⵓⵛⴰ ⵅⴻⵏⵏⵉ ⵏⴻⵜⵜⴰ ⵉⵊⵊⵓⴵ ⵥⵓⵔ ⵅ ⵉⵛⵜⴻⵏ ⵥⵉ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⵏⵏⵉ ⵉⵜⵜⴻⴳⴳ ⴱⵏⴰⴷⴻⵎ ⴰⵍⴰⵎⵉ ⵉⵅⴻⵟⵟⴰ ⵙ ⵎⴰⵏ ⴰⵢⴰ, ^■   23 ⵅⴻⵏⵏⵉ ⴰⴷ ⵉⵎⵙⴰⵔ, ⵓⵎⵉ ⵉⵅⴹⴰ ⵓⵛⴰ ⵉⴷⵡⴻⵍ ⴷⴰⵢⴻⵙ ⵓⵎⴰⵔⵡⴰⵙ, ⴰⵇⴰ ⵏⴻⵜⵜⴰ ⴰⴷ ⴷⴷ-ⵢⴰⵔⵔ ⵜⵓⵛⴻⴼⴼⴰⵔⵜ ⵏⵏⵉ ⵢⵓⵛⴰⵔ, ⵏⵉⵖ ⵎⵉⵏ ⵉⵜⵜⵡⴰⴽⴽⵙⴻⵏ ⵙ ⵓⵖⵉⵍ ⵏⵏⵉ ⵉⴽⵙⵉ ⵏⴻⵜⵜⴰ ⵙ ⵓⵖⵉⵍ, ⵏⵉⵖ ⵎⵉⵏ ⵜⵓⵖⴰ ⵉⵃⴹⴰ ⵏⵏⵉ ⴷ ⴰⵙ ⵉⵎⵎⴻⵡⵛⴻⵏ ⵎⴰⵃⴻⵏⴷ ⴰⴷ ⵜⵜ ⵉⵃⴹⴰ, ⵏⵉⵖ ⵎⵉⵏ ⵉⵡⴻⴷⴷⴰⵔⴻⵏ ⵏⵏⵉ ⵉ ⵖⴰ ⵢⴰⴼ ⵏⴻⵜⵜⴰ, 24 ⵏⵉⵖ ⵎⴰⵔⵔⴰ ⵎⵉⵏ ⵅⴻⴼ ⵉⵊⵊⵓⴵ ⵥⵓⵔ ⴰⴷ ⴷⴷ-ⵢⴰⵔⵔ ⵍⵇⵉⵎⴻⵜ ⵏⵏⴻⵙ ⵜⵎⵓⵏ ⵓⵛⴰ ⴰⴷ ⵢⴰⵔⵏⵉ ⵍⵅⵓⵎⵓⵙ ⵓⵛⴰ ⴰⴷ ⵜ ⵉⵡⵛ ⵉ ⵡⴻⵏⵏⵉ ⵓⵎⵉ ⴷⴷ-ⵜⵓⵙⴰ ⴷⴻⴳ ⵡⴰⵙⵙ ⵏ ⵜⵖⴰⵔⵚⵜ ⵏⵏⴻⵙ ⵏ ⵓⵎⴰⵔⵡⴰⵙ.

25 ⵏⴻⵜⵜⴰ ⴰⴷ ⵢⴰⵡⵉ ⵜⴰⵖⴰⵔⵚⵜ ⵏⵏⴻⵙ ⵏ ⵓⵎⴰⵔⵡⴰⵙ ⵖⴰⵔ ⵙⵉⴷⵉ, ⵉⵊⵊ ⵏ ⵉⵛⴰⵔⵔⵉ ⵉⵛⵏⴰⵏ ⵇⴰⵄ ⵥⴻⴳ ⵡⵓⴵⵉ, ⵡⴻⵏⵏⵉ ⵍⵇⵉⵎⴻⵜ ⵏⵏⴻⵙ ⴰⴷ ⵜⵉⵍⵉ ⵄⵍⴰⵃⵙⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⵓⵛⴰ ⴰⴷ ⵜⵉⵍⵉ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ, ⵓⵛⴰ ⴰⴷ ⵜ ⵢⴰⵡⵉ ⵖⴰⵔ ⵓⴽⴻⵀⵀⴰⵏ. 26 ⵅⴻⵏⵏⵉ ⴰⴷ ⵅⴰⵙ ⵉⴼⴷⵉ ⵓⴽⴻⵀⵀⴰⵏ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵓⵛⴰ ⴳⴳⵓⵔ ⴰⴷ ⴰⵙ ⵉⵜⵜⵡⴰⵖⴼⴰⵔ ⵅ ⵎⵉⵏ ⵉⴳⴳⴰ, ⵎⴰⵍⴰ ⵉⴷⵡⴻⵍ ⴷⴰⵢⴻⵙ ⴰⵎⴰⵔⵡⴰⵙ ⵙ ⵉⵛⵜ ⵏ ⵜⵎⴻⵙⵍⴰⵛⵜ ⵥⵉ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ.”