9
1 خنِّي إِصُوضْ ونِّي ذ وِيسّْ خمْسَا ذِي ڒْپُوقْ نّسْ، ؤُشَا ژْرِيغْ إِجّْ ن يثْرِي إِوْضَا-د زڭْ ؤُجنَّا خْ ثمُّورْثْ، ثمّوْشْ أَسْ ثَاسَارُوثْ ن ؤُقمُّومْ ن ثسْرَافْثْ يُودْجْغنْ. ▪ 2 ؤُشَا يَارْزمْ ثَاسْرَافْثْ ؤُشَا إِڭعّذْ-د دّخَّانْ زڭْ ؤُقمُّومْ ن ثسْرَافْثْ، أَمْ دّخَّانْ ن ثفْقُونْثْ ثَامقّْرَانْثْ يَارقّنْ، ؤُشَا ثْفُوشْثْ ذ ڒعْوِينْ بَارْشْننْ زِي دّخَّانْ ن ثسْرَافْثْ. 3 زِي دّخَّانْ فّْغنْ-د زَّايسْ إِپُورخْسنْ غَارْ ثمُّورْثْ، ثمّوْشْ أَسنْ صُّولْطَا أَمْ ثنِّي إِدْجَانْ غَارْ ثْغَارْضْمِيوِينْ ن ثمُّورْثْ. 4 إِتّْوَانَّا أَسنْ، مَاحنْذْ وَارْ جيّْحنْ ڒحْثِيشْ ن ثمُّورْثْ ؤُڒَا ذ قَاعْ أَغمُّويْ أَزِيزَا ذ قَاعْ ثَاشجَّارْثْ، مْغِيرْ إِوْذَانْ وَاهَا إِنِّي وَارْ غَارْ إِدْجِي ؤُشمِّيعْ ن أَربِّي خْ ثنْيَارْثْ نْسنْ. ▫ ▪ 5 ثمّوْشْ أَسنْ ثْزمَّارْ مَاحنْذْ وَارْ ثنْ نقّنْ، مَاشَا أَذْ ثنْ عدّْبنْ ڒْقدّْ ن خمْسَا ن إِيُورنْ، ؤُشَا أَعدّبْ نْسنْ أَمْ ؤُعدّبْ ن ثْغَارْضنْثْ خْمِي ثتّقّسْ إِ بْنَاذمْ. 6 ذڭْ وُوسَّانْ نِّي أَذْ أَرْزُونْ إِوْذَانْ خْ ڒْموْثْ، مَاشَا وَارْ ت تّطِّيفنْ، ؤُشَا أَذْ تَّارنْ أَذْ مّْثنْ، مَاشَا ڒْموْثْ أَذْ زَّايْسنْ ثَارْوڒْ. ▪ 7 إِپُورخْسنْ ڭِّينْ أَمْ إِيْسَانْ إِ إِوجْذنْ إِ ؤُمنْغِي، ؤُشَا غَارْسنْ خْ إِزدْجِيفنْ نْسنْ شَا أَمْ تَّاجَاثْ أَخْمِي ثنْثْ ڭِّينْ س وُورغْ، ؤُ إِغمْبَابْ نْسنْ أَمْ إِغمْبَابْ ن إِوْذَانْ، ▪ 8 ؤُشَا أَشُووَّافْ نْسنْ أَمْ ؤُشُووَّافْ ن ثمْغَارِينْ ؤُ ثِيغْمَاسْ نْسنْ أَمْ ثِينِّي ن وَايْرَاذنْ، 9 ؤُ ثُوغَا غَارْسنْ ثْشَابَّاثْ خْ إِذْمَارنْ نْسنْ أَمْ ؤُسڒْقِي ن وُوزَّاڒْ ؤُشَا دّْرِيزْ ن وَافْرِيونْ نْسنْ أَمْ دّْرِيزْ ن إِكَارُّوثنْ أَكْ-ذ وَاطَّاسْ ن إِيْسَانْ إِتّقْنُونُّوينْ غَارْ ؤُمنْغِي،
10 غَارْسنْ إِكنَّاسنْ أَمْ ينِّي ن ثْغَارْضْمِيوِينْ ؤُشَا ثُوغَا ذِينْ إِجّْ ن ؤُسنَّانْ ذڭْ إِكنَّاسنْ نْسنْ. ؤُشَا غَارْسنْ صُّولْطَا حِيمَا أَذْ سّهْوَانْ ذْرُوشْثْ خْ إِوْذَانْ، ڒْمِيجَاڒْ ن خمْسَا ن إِيُورنْ.
11 نِيثْنِي غَارْسنْ لْمَالَاكْ ن ثسْرَافْثْ ذ أَجدْجِيذْ خَاسنْ، قَّارنْ أَسْ س ثْعِيبْرَانِيثْ ’أَبَادُّو‘، س ثْرَامِيثْ ’شَارَا‘، ؤُ س ثْڭْرِيڭِيثْ ’أَپُولِّييُونْ‘، إِخْسْ أَذْ يِينِي ’أَمْكحَّاضْ‘.
12 ؤُشْثْ ثَامزْوَارُوثْ ثعْذُو، أَوَارْنِي مَانْ أَيَا أَذْ د-أَسنْثْ عَاذْ ثْنَاينْ ن ڒوْجعْ. ▪
13 أَوَارْنِي مَانْ أَيَا إِصُوضْ لْمَالَاكْ وِيسّْ ستَّا، ؤُشَا سْڒِيغْ ثْمِيجَّا إِ د-يُوسِينْ زِي أَربْعَا ن وَاشَّاونْ ن ؤُعَالْطَارْ ن وُورغْ إِ إِبدّنْ قِيبَاتْشْ إِ أَربِّي،
14 ثنَّا إِ لْمَالَاكْ وِيسّْ ستَّا إِ غَارْ إِدْجْ ؤُيِيشّْ ن إِشَارِّي: ”فْسِييْ إِ أَربْعَا ن لْمَالَاكَاثْ نِّي إِشَارْفنْ طَّارْفْ ن يغْزَارْ أَمقّْرَانْ، لْفُورَاطْ.“
15 ؤُشَا أَرْخُونْ أَسنْ إِ أَربْعَا ن لْمَالَاكَاثْ نِّي ثُوغَا إِوجْذنْ ذِينِّي غَارْ وَاسّْ ذ ؤُيُورْ ذ ؤُسڭّْوَاسْ، حِيمَا أَذْ نْغنْ إِشْثْ ن تُّوڒُوثْ ن إِوْذَانْ.
16 ثُوغَا ڒْقدّْ نْسنْ ثْيُويَا ن عشْرَا-أَڒَافْ س عشْرَا ن ڒُوڒُوفْ ن إِمْنَاينْ، إِنِّي إِندّْهنْ إِيْسَانْ، ؤُشَا سْڒِيغْ مشْحَاڒْ ذِي دْجَانْ. ▫
17 أَمُّو إِ ژْرِيغْ إِيْسَانْ ذ ينِّي خَاسنْ إِنْيِينْ ذِي ثْمژْرِيوْثْ-أَ: ثُوغَا سّْذُورُوينْ إِذْمَارنْ نْسنْ س وُوزَّاڒْ ذ أَزڭّْوَاغْ أَمْ ثْمسِّي ذ وزْبَايْبِي أَمْ وژْرُو ن خَالْسِيذُونْ ذ ووْرَاغْ أَمْ ڒشْبَاريّثْ ؤُشَا إِزدْجِيفنْ ن إِيْسَانْ نِّي أَمْ إِزدْجِيفنْ ن وَايْرَاذنْ ؤُشَا زڭْ إِقمُّومنْ نْسنْ ثفّغْ-د زَّايْسنْ ثْمسِّي ذ دّخَّانْ ذ ڒشْبَاريّثْ.
18 أَقَا إِشْثْ ن تُّوڒُوثْ ن إِوْذَانْ ثتّْوَانغْ س ثْڒَاثَا أَيَا ن جّْرَايحْ: س ثْمسِّي ذ دّخَّانْ ذ ڒشْبَاريّثْ إِ د-إِتّفّْغنْ زڭْ إِقمُّومنْ نْسنْ.
19 مِينْزِي صُّولْطَا نْسنْ أَقَا-ت ذڭْ إِقمُّومنْ ذ إِكنَّاسنْ نْسنْ، مِينْزِي إِكنَّاسنْ نْسنْ ڭِّينْ أَمْ إِفِيغْرَانْ نِّي غَارْ إِدْجْ إِزدْجِيفنْ، ؤُشَا تّْجيّْحنْ زَّايْسنْ إِوْذَانْ.
20 إِوْذَانْ إِقِّيمنْ، إِنِّي وَارْ إِتّْوَانْغنْ شَا س جّْرَايحْ-أَ، وَارْ ثُوبنْ شَا زِي ڒخْذَايمْ ن إِفَاسّنْ نْسنْ أَڒَامِي وَارْ عبّْذنْ عَاذْ شّْوَاطنْ ذ لْ-أَصْنَامْ ن وُورغْ ذ نُّوقَارْثْ ذ نّْحَاسْ ذ وژْرُو ذ ؤُكشُّوضْ، إِنِّي وَارْ إِتّْوِيڒِينْ، وَارْ إِتّسْڒِينْ، وَارْ إِڭُّورنْ، ▪ 21 ؤُشَا نِيثْنِي وَارْ ثُوبنْ شَا زڭْ ونْغَايْ نْسنْ، ڒَا زِي ثْسحَّارْثْ نْسنْ، ؤُڒَا زِي فَارْقْ-شّْغڒْ نْسنْ.