‏1 أَوَارْنِي مَانْ أَيَا ژْرِيغْ أَربْعَا ن لْمَالَاكَاثْ بدّنْ غَارْ أَربْعَا ن ثْغمُّورَا ن ثمُّورْثْ، طّْفنْ أَربْعَا ن إِصمِّيضنْ ن ثمُّورْثْ، حِيمَا وَارْ إِتّْصُوضِي ؤُسمِّيضْ ڒَا خْ ڒْبَارّْ ڒَا خْ وَامَانْ ؤُڒَا خْ شَا ن ثْشجَّارْثْ. ^▫   ‏2 ؤُشَا ژْرِيغْ إِجّْ ن لْمَالَاكْ نّغْنِي يُوڒِي-د مَانِيسْ ذ ثْنقَّارْ ثْفُوشْثْ، أَقَا غَارسْ أَشمِّيعْ ن أَربِّي إِدَّارنْ ؤُشَا إِڒَاغَا س جّهْذْ إِ أَربْعَا ن لْمَالَاكَاثْ نِّي ؤُمِي ثمّوْشْ ثْزمَّارْ حِيمَا أَذْ سّخْسَارنْ ثَامُّورْثْ ذ ڒبْحَارْ، ‏3 إِنَّا: ”وَارْ تّْسخْسَارمْ ثَامُّورْثْ ؤُڒَا ذ أَمَانْ ؤُڒَا ذ ثِيشجِّيرَا أَڒْ غَا نڭّْ أَشمِّيعْ خْ ثنْيَارِينْ ن إِمْسخَّارنْ ن أَربِّي نّغْ.“

‏4 ؤُشَا سْڒِيغْ ڒْقدّْ ن يِينِّي إِتّْوَاشمّْعنْ، مْيَا ؤُ-أَربْعَا ؤُ-ربْعِينْ-أَڒفْ أَقَا تّْوَاشمّْعنْ زِي مَارَّا ثِيقبَّاڒْ ن إِسْرَائِيل: ^▪  

‏5 ثنْعَاشْ-أَڒفْ زِي ثقْبِيتْشْ ن يَاهُوذَا،

ثنْعَاشْ-أَڒفْ زِي ثقْبِيتْشْ ن رُوبِينْ،

ثنْعَاشْ-أَڒفْ زِي ثقْبِيتْشْ ن ڭَاذْ،

‏6 ثنْعَاشْ-أَڒفْ زِي ثقْبِيتْشْ ن أَشِيرْ،

ثنْعَاشْ-أَڒفْ زِي ثقْبِيتْشْ ن نَافْثَالِي،

ثنْعَاشْ-أَڒفْ زِي ثقْبِيتْشْ ن مَانَاسَّا،

‏7 ثنْعَاشْ-أَڒفْ زِي ثقْبِيتْشْ ن شِيمْعُونْ،

ثنْعَاشْ-أَڒفْ زِي ثقْبِيتْشْ ن لَاوِي،

ثنْعَاشْ-أَڒفْ زِي ثقْبِيتْشْ ن إِسَاكَّارْ،

‏8 ثنْعَاشْ-أَڒفْ زِي ثقْبِيتْشْ ن زِيپُولُونْ،

ثنْعَاشْ-أَڒفْ زِي ثقْبِيتْشْ ن يُوسُوفْ،

ثنْعَاشْ-أَڒفْ زِي ثقْبِيتْشْ ن بِينْيَامِينْ.

‏9 أَوَارْنِي مَانْ أَيَا أَقَا ژْرِيغْ إِجّْ ن ؤُبَارُّو ن ڒْغَاشِي أَمقّْرَانْ، إِ وَارْ إِزمَّارْ ؤُڒَا ذ إِجّْ أَذْ ث إِحْسبْ، زِي كُوڒْ ڒْڭنْسْ ؤُ زِي كُوڒْ ثَاقْبِيتْشْ ؤُ زِي مَارَّا شُّوعُوبْ ذ إِڒْسَاونْ. نِيثْنِي بدّنْ زَّاثْ إِ ڒْعَارْشْ ذ يزْمَارْ، أَرْضنْ ڒعْبَايَاثْ ثِيزِيرَارِينْ ذ ثِيشمْڒَاڒِينْ، ؤُشَا غَارْسنْ ثِيسضْوِينْ ن ثِينِي ذڭْ إِفَاسّنْ نْسنْ،

‏10 ؤُشَا تّْڒَاغَانْ س جّهْذْ:

”أَصْڒَاحْ إِتِّيڒِي إِ أَربِّي نّغْ،

ونِّي إِقِّيمنْ خْ ڒْعَارْشْ

ؤُ إِ يزْمَارْ.“

‏11 ؤُشَا مَارَّا نِيثْنِي، لْمَالَاكَاثْ إِنِّي د-إِنّْضنْ إِ ڒْعَارْشْ ذ إِمْغَارنْ ذ أَربْعَا ن إِمدَّارنْ، أَضَارنْ غَارْ ثمُّورْثْ س وُوذْمَاونْ نْسنْ قِيبَاتْشْ إِ ڒْعَارْشْ،

‏12 نَّانْ:

”أَمِينْ!

أَسمْغَارْ ذ ؤُعُودْجِي ذ ثِيغِيثْ ذ ؤُقَاذِي

ذ شَّانْ ذ جّهْذْ ذ ثْزمَّارْ

إِ أَربِّي نّغْ إِ ڒبْذَا قَاعْ.

أَمِينْ!“

‏13 خنِّي يَارَّا-د إِجّنْ زڭْ إِمْغَارنْ نِّي، إِنَّا أَيِي: ”مِينْ عْنَانْ إِنَا، إِنِّي يَارْضنْ ڒعْبَايَاثْ ثِيزِيرَارِينْ ذ ثِيشمْڒَاڒِينْ، مِينْ عْنَانْ ؤُ مَانِيسْ د-ؤُسِينْ؟“

‏14 نشّْ نِّيغْ أَسْ: ”أَ سِيذِي إِنُو، شكْ إِ إِسّْننْ.“ إِنَّا أَيِي: ”إِنَا أَقَا ؤُسِينْ-د زِي ڒْمحْنثْ ثَامقّْرَانْثْ. أَقَا نِيثْنِي صِيزْذِيڭنْ ڒعْبَايَاثْ نْسنْ ؤُشَا أَرِّينْ ثنْثْ ذ ثِيشمْڒَاڒِينْ ذڭْ إِذَامّنْ ن إِزْمَارْ.

‏15 س ؤُينِّي نِيثْنِي بدّنْ زَّاثْ إِ ڒْعَارْشْ ن أَربِّي ؤُشَا سخَّارنْ أَسْ أَسّْ ذ دْجِيڒثْ ذِي زَّاوشْثْ، ؤُشَا ونِّي إِقِّيمنْ خْ ڒْعَارْشْ أَذْ خَاسنْ إِوّثْ أَقِيضُونْ نّسْ.

‏16 وَارْ إِقِّيمْ عَاذْ أَذْ دْجَاژنْ نِيغْ أَذْ فَّاذنْ، وَارْ ثنْ ثتّْقذِّي ؤُڒَا ذ ثْفُوشْثْ ؤُڒَا ذ إِشْثْ ن جُّورّثْ ن ڒحْمُو، ^▪  

‏17 مِينْزِي إِزْمَارْ نِّي إِدْجَانْ ذِي ڒْوسْثْ ن ڒْعَارْشْ أَذْ ثنْ يَارْوسْ، أَذْ ثنْ إِنْذهْ غَارْ ثُوذَارْثْ ؤُ غَارْ ثَاڒَاوِينْ ن وَامَانْ، ؤُشَا نتَّا أَذْ أَسنْ إِمْسحْ كُوڒْ أَمطَّا زِي ثِيطَّاوِينْ نْسنْ.“ ^▪