‏1 زِي جِّيهثْ مِينْ ذ أَيِي ثُورِيمْ، أَقَا مْلِيحْ إِ بْنَاذمْ وَارْ إِتّْحِيذِي شَا ثَامْغَارْثْ. ‏2 مَاشَا زِي سِّيبّثْ ن فَارْقْ-شّْغڒْ، كُوڒْ أَرْيَازْ أَذْ يَاوِي ثَامْغَارْثْ نّسْ ؤُشَا كُوڒْ إِشْثْ ن ثمْغَارْثْ أَذْ ثَاوِي إِجّْ ن ورْيَازْ أَذْ ثذْوڒْ نّسْ. ‏3 أجّْ إِ ورْيَازْ أَذْ إِسّْشنْ إِ ثمْغَارْثْ نّسْ ثَايْرِي إِ ذ أَسْ د-يُوسِينْ، أَمُّو عَاوذْ ثَامْغَارْثْ إِ ورْيَازْ نّسْ. ^▪   ‏4 ثَامْغَارْثْ وَارْ ثتّْضبَّارِي شَا ذِي أَرِّيمثْ نّسْ، مَاشَا أَرْيَازْ نّسْ. ؤُشَا أَمُّو عَاوذْ أَرْيَازْ وَارْ إِتّْضبَّارِي شَا ذِي أَرِّيمثْ نّسْ، مَاشَا ثَامْغَارْثْ نّسْ. ‏5 وَارْ ث قطّْعمْ شَا خْ وَايَاوْيَا، مْغِيرْ مَاڒَا ثكّْسمْ ذڭْ وَاوَاڒْ شَا ن ؤُمُورْ حِيمَا أَذْ شغْڒمْ س ؤُژُومِّي ذ ثْژَادْجِيثْ، خنِّي مُونمْ عَاوذْ مَاحنْذْ أَذْ ثَاوْيمْ أَرِيقِّي إِ ڒمْرَاشْ، حِيمَا وَارْ كنِّيوْ إِتّْجَارِّيبْ شِّيطَانْ زِي سِّيبّثْ ن مژْرِي ن أَرِّيمثْ. ^▪   ‏6 قَّارغْ مَانْ أَيَا ذِي طّْوعْ ن يِينِّي إِضعْفنْ، وَارْ إِدْجِي س ڒُومُورْ. ‏7 خْسغْ عَاذْ مْلِيحْ مَاڒَا مَارَّا إِوْذَانْ أَذْ إِڒِينْ أَمشْنَاوْ نشّْ ذِي ثَازْذُوڭِي، مَاشَا كُوڒْ إِجّْ غَارسْ ثَاوْهِيبْثْ نّسْ زِي أَربِّي، إِجّنْ أَمُّو، ونّغْنِي أَمُّو. ^▪  

‏8 مَاشَا إِ ينِّي وَارْ إِمْڒِيشنْ ؤُ إِ ثِيجَّاڒْ قَّارغْ، أَقَا مْلِيحْ إِ نِيثْنِي مَاڒَا قِّيممْ أَمشْنَاوْ نشّْ. ‏9 مَاشَا مَاڒَا وَارْ زمَّارنْ أَذْ قِّيمنْ طّْفنْ ذِي مَانْ أَيَا، أجّْ إِ-ثنْ أَذْ مڒْشنْ، مِينْزِي ذ مَانْ أَيَا حْسنْ زڭْ وشْمَاضْ ن نّشْوثْ. ^▪  

‏10 مَاشَا إِ ينِّي يِيوْينْ إِشْثْ ن ثمْغَارْثْ، ؤُمُورغْ، وَارْ إِدْجِي ذ نشّْ، مَاشَا سِيذِي إِنُو، بلِّي ثَامْغَارْثْ وَارْ ثْبطِّي خْ ورْيَازْ. ^▪  

‏11 ؤُشَا مَاڒَا ثبْضَا، أَذْ ثقِّيمْ بْڒَا أَرْيَازْ، نِيغْ أَذْ ثمّسّصْڒحْ أَكْ-ذ ورْيَازْ نّسْ، ؤُشَا أَرْيَازْ وَارْ إِتّجِّي ثَامْغَارْثْ نّسْ.

‏12 خنِّي إِ إِنّغْنِي، وَارْ ث قَّارغْ نشّْ، مَاشَا سِيذِي إِنُو: مَاڒَا إِجّْ ن ثوْمَاثْ غَارسْ ثَامْغَارْثْ وَارْ إِتِّيمْننْ، ؤُشَا نتَّاثْ ثقْبڒْ أَذْ ثزْذغْ أَكِيذسْ، وَارْ ت إِنطَّارْ شَا.

‏13 ؤُشَا مَاڒَا إِشْثْ ن ثمْغَارْثْ ثنِّي غَارْ إِدْجْ ورْيَازْ وَارْ يُومِيننْ، ؤُ نتَّا إِخْسْ أَذْ كِيذسْ إِزْذغْ، وَارْ ثْسمّحْ شَا نتَّاثْ ذڭْ ورْيَازْ نّسْ.

‏14 س مِينْزِي أَرْيَازْ وَارْ يُومِيننْ إِتّْوَاقدّسْ ذِي ثمْغَارْثْ ثنِّي يُومْننْ، ؤُڒَا ذ ثَامْغَارْثْ وَارْ يُومِيننْ ثتّْوَاقدّسْ ذڭْ ورْيَازْ ونِّي يُومْننْ، مَاڒَا مَامّشْ نّغْنِي أَذْ إِڒِينْ إِحنْجِيرنْ نْومْ ذ إِمنْڭَاسْ، مَاشَا ڒخُّو أَقَا نِيثْنِي ذ إِمزْذُوڭَا.

‏15 مَاشَا مَاڒَا ونِّي وَارْ إِتِّيمْننْ أَذْ إِدْجفْ، أجّْ إِ-ث أَذْ إِدْجفْ. خنِّي ثَاوْمَاثْ نِيغْ ثَاوتْشْمَاثْ وَارْ تّْوَاقّْننْ شَا ذِي ڒْحَارْ نِّي. أَقَا أَربِّي إِڒَاغَا أَنغْ-د غَارْ ڒهْنَا.

‏16 مِينْزِي مَانِيسْ ثسّْننْثْ كنِّينْثْ، أَ ثِيمْغَارِينْ، أَذْ ثسّْنجْممْ أَرْيَازْ نّمْ؟ نِيغْ مَانِيسْ ثسّْنمْ كنِّيوْ، أَ إِرْيَازنْ، أَذْ ثسّْنجْمذْ ثَامْغَارْثْ نّكْ؟ ^▪  

‏17 مَاشَا كُوڒْ إِجّْ أَمْ مَامّشْ إِ ذ أَسْ إِوْشَا سِيذِي، أَمْ مَامّشْ إِ ذ إِڒَاغَا أَربِّي إِ كُوڒْ إِجّْ، أجّْ إِ-ث أَذْ إِدَّارْ أَمُّو. أَمُّو إِ ؤُمُورغْ إِ مَارَّا ثِيمسْمُونِينْ.

‏18 مَاڒَا إِتّْوَاڒَاغَا إِ حذْ إِتّْوَاخثْننْ غَارْ ؤُمُونِي أَكْ-ذ لْمَاسِيحْ، وَانِيثَا وَارْ يَارزُّو أَذْ ث إِبْضڒْ، مَاڒَا إِتّْوَاڒَاغَا إِ حذْ بْڒَا أَخْثَانْ، وَانِيثَا وَارْ إِتّجِّي أَذْ إِتّْوَاخْثنْ إِخفْ نّسْ.

‏19 أَخْثَانْ ذ وَالُو ؤُ بْڒَا أَخْثَانْ ذ وَالُو، مَاشَا أَحطُّو ن ثْوصَّا ن أَربِّي. ‏20 أجّْ كُوڒْ إِجّنْ أَذْ إِقِّيمْ ذِي ثْڒَاغِيثْ إِ زِي د-إِتّْوَاڒَاغَا. ^▪   ‏21 مَاڒَا ثُوغَا شكْ ثتّْوَاڒَاغِيذْ-د ذ أَمْسخَّارْ، وَارْ ثسّْحِيسِّيفذْ شَا إِ مَانْ أَيَا، مَاشَا عَاوذْ مَاڒَا ثْزمَّارذْ أَذْ ثتّْوَاصَاڒْحذْ، إِخْضَارْ إِ-ث سِيمَانْثْ نّشْ مَاحنْذْ أَذْ ثْسخَّارذْ. ‏22 مِينْزِي ونِّي إِتّْوَاڒَاغَانْ ذِي سِيذِيثْنغْ أَمْ ثُوغَا-ث ذ أَمْسخَّارْ، أَقَا-ث ذ أَحُورِّي ن أَربِّي، أَمْ مَامّشْ ونِّي إِتّْوَاڒَاغَانْ ذ أَحُورِّي، أَقَا-ث ذ أَمْسخَّارْ ن لْمَاسِيحْ. ‏23 أَقَا ثمّسْغمْ-د س تَّامَانْ، خنِّي وَارْ إِعدّڒْ أَذْ ثِيڒِيمْ عَاذْ ذ إِمْسخَّارنْ ن إِوْذَانْ. ^▪   ‏24 أَ أَيْثْمَا، أجّْ كُوڒْ إِجّنْ أَذْ إِسِيغِي ذڭْ وبْرِيذْ ن أَربِّي إِ ذِي ذ أَسْ د-إِتّْوَاڒَاغَا.

‏25 ذڭْ وَازَّايْ ن ثعْزَارِييِّينْ، أَقَا وَارْ غَارِي بُو ڒُومُورْ ن أَربِّي، مَاشَا أَذْ وْشغْ أَرَّايْ إِنُو، أَمشْنَاوْ وِي يِيوْضنْ س أَرْضَا ن أَربِّي حِيمَا أَذْ يِيڒِي ذ أَمْثِيقِّي. ‏26 إِتّْغِيڒْ أَيِي مْلِيحْ إِ ڒغْبنْ إِ إِدْجَانْ ذِي ڒْوقْثْ-أَ، بلِّي أَقَا إِشْنَا إِ بْنَاذمْ أَذْ يِيڒِي أَمُّو. ‏27 مَا ثْڒصْقذْ ذِي ثمْغَارْثْ؟ وَارْ أَرزُّو شَا ذڭْ ودْجَافْ. مَا ثدْجْفذْ؟ وَارْ أَرزُّو شَا خْ ثمْغَارْثْ. ‏28 مَاشَا مَاڒَا ثِيوْيذْ ثَامْغَارْثْ، وَارْ ثڭُّورذْ شَا أَذْ ثخْضِيذْ، ؤُشَا مَاڒَا ثَاعْزَارشْثْ ثذْوڒْ غَارْ ورْيَازْ، نتَّاثْ وَارْ ثْخطِّي شَا. مَاشَا أَمشْنَاوْ إِنَا، ثتّْرَاجَا ثنْ ڒْمحْنثْ ذِي أَرِّيمثْ، ؤُشَا خْسغْ أَذْ ت خَاومْ كّْسغْ.

‏29 ذ مَانْ أَيَا إِ قَّارغْ، أَ أَيْثْمَا، أَقَا ڒْحَاڒْ إِمْژِي. س ؤُينِّي إِنِّي غَارْ إِدْجْ ثمْغَارْثْ، أجّْ إِ-ثنْ أَذْ إِڒِينْ أَخْمِي وَارْ غَارْسنْ ثدْجِي، ‏30 إِنِّي إِتّْرُونْ أَخْمِي وَارْ تّْرُونْ، ؤُ إِنِّي إِفَارّْحنْ أَخْمِي وَارْ فْرِيحنْ، ؤُ إِنِّي إِسَّاغنْ أَخْمِي وَارْ ملّْكنْ، ‏31 ؤُ إِنِّي إِسْثنْفَاعنْ زِي دُّونشْثْ-أَ، إِتّْخصَّا وَارْ تَّاڭّْوِيجنْ خْ ؤُسْثنْفعْ إِ د-إِتّْڒِيقنْ، مِينْزِي ؤُذمْ ن دُّونشْثْ أَذْ إِعْذُو. ^▪  

‏32 س ؤُينِّي خْسغْ أَذْ ثِيڒِيمْ بْڒَا أَمْنُوسْ، مَاغَارْ ونِّي وَارْ غَارسْ ثدْجِي ثمْغَارْثْ، أَذْ إِخَارّصْ ذِي ثْمسْڒَايِينْ ن سِيذسْ ذ مَامّشْ إِ غَا يَارْضَا سِيذسْ. ^▪   ‏33 مَاشَا ونِّي غَارْ ثدْجْ ثمْغَارْثْ، أَذْ إِكْسِي س ومْنُوسْ إِ ثْمسْڒَايِينْ ن دُّونشْثْ-أَ ؤُ مَامّشْ إِ غَا يَارْضَا ثَامْغَارْثْ نّسْ.

‏34 أَقَا ذِينْ إِجّْ ن ڒْفَارْقْ جَارْ ثمْغَارْثْ ذ ثعْزَارشْثْ. ثنِّي وَارْ غَارْ إِدْجِي ورْيَازْ عمَّارْصْ، أَذْ ثْخَارّصْ ذِي سِيذسْ، حِيمَا أَذْ ثِيڒِي ثْقدّسْ أَمْ ذِي أَرِّيمثْ أَمْ ذِي أَرُّوحْ، مَاشَا ثنِّي غَارْ ثدْجْ ورْيَازْ، أَذْ ثْخَارّصْ ذِي ثْمسْڒَايِينْ ن دُّونشْثْ، إِ مَامّشْ إِ غَا ثَارْضَا أَرْيَازْ نّسْ. ‏35 ذڭَّا قَّارغْ أَومْ-د إِ ثِيزِي نْومْ، وَارْ إِدْجِي حِيمَا أَذْ أَومْ ڭّغْ ثَاخْشفْثْ، مَاشَا نِّيغْ ث حِيمَا أَذْ ثقِّيمنْ ذ إِمْثِيقَّانْ إِ سِيذِيثْومْ خْ إِجّْ ن وبْرِيذْ ذ أَصبْحَانْ، أَمْ وَارْ ثْسڒْهِيمْ أَكْ-ذ دُّونشْثْ.

‏36 مَاشَا مَاڒَا حذْ إِخَارّصْ بلِّي أَقَا سْثْهزَّانْ زَّايسْ زِي سِّيبّثْ ن يدْجِيسْ ثَاعْزَارشْثْ ثنِّي خْ عْذُونْ وُوسَّانْ ن ثمْژِي نّسْ، ؤُشَا وَارْ ت إِسّمْڒشْ عَاذْ إِ ورْيَازْ، ؤُشَا إِتّْغِيڒْ أَسْ نِيشَانْ أَذْ ت إِسّمْڒشْ، نتَّا وَارْ إِخْضِي شَا. أجّْ إِ-ت أَذْ ثتّْوَاسّمْڒشْ. ‏37 مَاشَا وِي إِدْجَانْ نِيشَانْ ذڭْ وُوڒْ نّسْ، بْڒَا مَا يُوشَا س ؤُزِييَّارْ، ؤُشَا غَارسْ صُّولْطَا خْ يِيخفْ نّسْ، إِكّسْ ذڭْ وُوڒْ نّسْ أَذْ يجّْ ثَاعْزَارشْثْ نّسْ ثصْفَا، مْلِيحْ إِ يڭَّا. ‏38 س ؤُينِّي، ونِّي إِسّْمڒْشنْ يدْجِيسْ ثَاعْزَارشْثْ إِڭَّا مْلِيحْ، ؤُ ونِّي وَارْ إِسّْمدْجِيشنْ يدْجِيسْ ثَاعْزَارشْثْ، إِڭَّا مْلِيحْ أَطَّاسْ.

‏39 ثَامْغَارْثْ ثقّنْ غَارْ ورْيَازْ نّسْ س شَّارِيعَا مِينْ غَا يكّْ ورْيَازْ نّسْ إِدَّارْ، مَاشَا مَاڒَا أَرْيَازْ نّسْ إِمُّوثْ، أَقَا-ت ثْسَارّحْ زَّايسْ، ثْزمَّارْ أَذْ ثمْڒشْ أَكْ-ذ وِي ثخْسْ، مَاشَا ذِي سِيذِيثْنغْ وَاهَا. ^▪   ‏40 مَاشَا نشّْ غَارِي، أَقَا نتَّاثْ أَذْ ثتّْوَابَاركْ كْثَارْ مَاڒَا ثقِّيمْ أَمنِّي. ؤُ أَقَا نشّْ تّْوَاڒِيغْ أَرُّوحْ ن أَربِّي إِخدّمْ عَاوذْ ذَايِي. ^▪