‏1 خَاسْ ؤُشَا إِكّسْ فَاسْثُوسْ أَوَاڒْ، أَقَا إِتّْخصَّا أَذْ إِتّْوَاسّكّْ غَارْ إِطَالْيَا، ؤُشَا إِسلّمْ بُولُوسْ ذ شَا ن إِمحْبَاسْ نّغْنِي إِ يِيجّْ ن ڒْقبْطَانْ خْ مْيَا قَّارنْ أَسْ يُولِييُوسْ، ثُوغَا-ث زڭْ ؤُبَاطَايُونْ ن قَايْصَارْ. ‏2 ڒَامِي ننْوَا أَذْ نْبحَّارْ، ننْيَا ذڭْ إِجّْ ن ؤُغَارَّاپُو زِي أَذْرَامِيثِييُومْ، ثُوغَا إِڭُّورْ أَذْ إِكّْ خْ جّْوَايهْ إِ إِدْجَانْ خْ ثْمَا ن أَسِييَا، ؤُشَا نْرُوحْ. ثُوغَا أَكِيذْنغْ أَرِيسْثَارْخُوسْ، إِجّْ ن ورْيَازْ زِي ثِيسَّالُونِيكَا ذِي مَاسِيذُونِييَا. ‏3 ثِيوشَّا نّسْ نِيوضْ غَارْ صَايْذُونْ. يُولِييُوسْ ونِّي ثُوغَا إِدْجَانْ مْلِيحْ أَكْ-ذ بُولُوسْ، إِسَامْحْ أَسْ أَذْ إِرَاحْ غَارْ إِمدُّوكَّاڒْ نّسْ حِيمَا أَذْ خَاسْ سخَّارنْ. ^▪   ‏4 خنِّي نفّغْ سّنِّي، نْبحَّارْ ذڭْ ؤُدُّوڒِي ن قُوبْرُوسْ، مِينْزِي أَسمِّيضْ ثُوغَا إِشَّاثْ ذَايْنغْ ذڭْ ؤُغمْپُوبْ. ‏5 نژْوَا ڒبْحَارْ ن كِيلِيكِييَا ذ بَامْفِيلِييَا، ؤُشَا نِيوضْ غَارْ مِيرَا، إِشْثْ ن ثنْذِينْثْ ذِي لِيكِييَا.

‏6 ڒْقبْطَانْ خْ مْيَا يُوفَا ذِينْ إِجّْ ن ؤُغَارَّاپُو زِي إِسْكَانْذَارِييَّا، إِتّْرَاحْ غَارْ إِطَالْيَا، إِسّنْيَا أَنغْ ذَايسْ. ‏7 ؤُمِي أَطَّاسْ ن وُوسَّانْ وَارْ نْرُوحْ غَارْ زَّاثْ، نِيوضْ س ؤُغِيڒْ غَارْ كْنِيذُوسْ، مِينْزِي وَارْ ذ أَنغْ يجِّي ؤُسمِّيضْ أَذْ نْرَاحْ غَارْ زَّاثْ، خنِّي نْبحَّارْ ذڭْ ؤُدُّوڒِي ن كْرِيثَا زَّاثْ إِ سَالْمُونِي. ‏8 ڒَامِي ثُوغَا وَارْ نْزمَّارْ أَذْ ننْذهْ غَارْ زَّاثْ، نِيوضْ ڒَامِي نوْثَا دُّورَا ثمْغَارْ غَارْ إِجّْ ن ومْشَانْ ؤُمِي قَّارنْ ’ڒْمُويِّي أَصبْحَانْ‘، ونِّي إِدْجَانْ طَّارْفْ إِ ثنْذِينْثْ ن لَاسِييَّا.

‏9 نقِّيمْ أَطَّاسْ ن ڒْوقْثْ ذِينِّي أَڒْ د-إِعْذُو أَسّْ ن ؤُژُومِّي ن وُوذَاينْ. ؤُمِي إِذْوڒْ ؤُسَافَارْ ذِي ڒبْحَارْ يوْعَارْ، إِعْڒمْ أَسنْ بُولُوسْ،

‏10 إِنَّا: ”أَ إِرْيَازنْ، تّْوَاڒِيغْ أَسَافَارْ أَذْ يَاوِي ذْرُوشْثْ ذ ثْخسَّارْثْ أَطَّاسْ، مَاشِي مْغِيرْ إِ سّڒْعثْ ذ ؤُغَارَّاپُو وَاهَا، مَاشَا ؤُڒَا إِ ثُوذَارْثْ نّغْ.“

‏11 مَاشَا ڒْقبْطَانْ خْ مْيَا ثُوغَا إِسْڒَا كْثَارْ غَارْ ؤُمنْذَاهْ ن ثْغَارَّاپُوثْ ذ ڒْقبْطَانْ خْ مِينْ ثُوغَا إِتّسْڒَا غَارْ وَاوَاڒنْ ن بُولُوسْ.

‏12 ؤُمِي ثُوغَا أَمْشَانْ ن ڒْمُويِّي وَارْ إِحْڒِي حِيمَا أَذْ سّعْذُونْ ڒْمشْثَا ذِينْ، إِبدّْ أَرَّايْ ن وزْينْ أَمقّْرَانْ نْسنْ أَذْ فّْغنْ سّنِّي، بَالَاكْ أَذْ أَوْضنْ غَارْ فِينِيكْسْ، إِجّْ ن ڒْمُويِّي ذِي كْرِيثَا، إِوَاڒَانْ لْجَانُوبْ ن ڒْغَارْبْ ذ شَّامَالْ ن سنّجْ ن ڒْغَارْبْ، حِيمَا أَذْ ذِينْ سّعْذُونْ ڒْمشْثَا.

‏13 ؤُمِي إِسَاهَا ؤُسمِّيضْ ن لْجَانُوبْ، ثُوغَا نِيثْنِي سِّيتِّيمنْ أَذْ أَوْضنْ أَمْ مَامّشْ ت خْسنْ، ؤُشَا بْذَانْ تّْشُوقَّانْ خْ طَّارْفْ ن ثْمَا ن كْرِيثَا.

‏14 مَاشَا شْوَايْثْ أَوَارْنِي مَانْ أَيَا، ثكَّارْ إِشْثْ ن ثْحَارْيَاضْثْ، قَّارنْ أَسْ ’تِّيفُونْ ن ؤُرُوكْلِيذُونْ‘. ^▫  

‏15 أَغَارَّاپُو إِتّْوَاكْسِي زَّايسْ س جّهْذْ، وَارْ إِزمَّارْ إِ ؤُسمِّيضْ. خنِّي نسْثوْطعْ ؤُشَا نتّْوَانْذهْ.

‏16 أَمْ نكَّا ذڭْ ؤُدُّوڒِي ن إِشْثْ ن ثڭْزِيرْثْ ذ ثَامژْيَانْثْ ؤُمِي قَّارنْ ’قَاوْذَا‘، س ؤُغِيڒْ إِ نمْنعْ ضْمَانْ ن ثْغَارَّاپُوثْ ن ؤُسلّكْ إِ إِدْجَانْ غَارْ ضفَّارْ ن ؤُغَارَّاپُو.

‏17 نسّْڭعّذْ إِ-ت، ؤُ نسّجْهذْ أَغَارَّاپُو أَمْ ث نبْيسْ سْوَادَّايْ س إِحزَّامنْ. مَاغَارْ ثُوغَا نڭّْوذْ أَذْ نمّنْضَارْ خْ إِشْثْ ن ڒْڭعّْذثْ ن إِجْذِي ذِي ڒبْحَارْ، نسّهْوَا-د ڒْبَاشّْ ؤُشَا نتّْوَانْذهْ س ؤُسمِّيضْ ؤُ أَمُّو إِ نْڒَاحْ.

‏18 ؤُشَا ؤُمِي ثَاحَارْيَاضْثْ ثْهَاجْ خَانغْ أَطَّاسْ، خنِّي ثِيوشَّا نّسْ ننْضَارْ سڒْعثْ نّغْ ذِي ڒبْحَارْ.

‏19 ذڭْ وَاسّْ وِيسّْ ثْڒَاثَا ننْضَارْ ڒقْشُوعْ ن ؤُغَارَّاپُو س إِفَاسّنْ نّغْ. ‏20 ڒَامِي ثَاحَارْيَاضْثْ ثقِّيمْ ثتّْصُوضْ أَطَّاسْ ن وُوسَّانْ، وَارْ ثْبِينْ ثْفُوشْثْ ڒَا ذ ثَازِيرِي ؤُڒَا ذ إِثْرَانْ، خنِّي نقْضعْ مَارَّا ڒَايَاسْ أَذْ ننْجمْ.

‏21 ڒَامِي وَارْ زمَّارنْ أَذْ صْبَارنْ عَاذْ، إِبدّْ بُولُوسْ ذِي ڒْوسْثْ نْسنْ، إِنَّا: ”أَ إِرْيَازنْ، ثُوغَا إِتّْخصَّا أَومْ أَذْ غَارِي ثسْڒمْ، خنِّي وَارْ نفِّيغْ شَا زِي كْرِيثَا ؤُ وَارْ ذ أَنغْ ثْڒقّفْ ذْرُوشْثْ-أَ ذ ڒحْصَارثْ-أَ. ‏22 مَاشَا عَاوذْ ڒخُّو، أَذْ كنِّيوْ شجّْعغْ، مِينْزِي ؤُڒَا ذ إِجّْ زَّايْومْ وَارْ إِتّْودَّارِي شَا ثُوذَارْثْ نّسْ، مْغِيرْ أَغَارَّاپُو وَاهَا أَذْ إِغبَّاڒْ. ‏23 مِينْزِي إِبدّْ-د غَارِي دْجِيڒثْ-أَ إِجّْ ن لْمَالَاكْ ن أَربِّي ونِّي نشّْ نّسْ ؤُ ونِّي ؤُمِي عبّْذغْ. ‏24 نتَّا إِنَّا أَيِي: ”وَارْ تّڭّْوذْ شَا، أَ بُولُوسْ، مِينْزِي إِتّْخصَّا أَشْ أَذْ ثْبدّذْ قِيبَاتْشْ إِ قَايْصَارْ. خْزَارْ مَارَّا إِنِّي أَكِيذكْ إِتّْبحَّارنْ، أَقَا إِوْشَا أَشْ ثنْ أَربِّي.“ ‏25 س ؤُيَا ڭّمْ ثَارْيَاسْثْ، أَ إِرْيَازنْ، مِينْزِي تِّيقّغْ ذِي أَربِّي، بلِّي أَذْ ثفّغْ أَمُّو، أَمْ مَامّشْ ذ أَيِي إِنَّا. ‏26 مَاشَا س ؤُغِيڒْ إِتّْخصَّا أَذْ ننَّاغْ ذڭْ إِشْثْ ن ثڭْزِيرْثْ.“

‏27 أَوَارْنِي ڒَامِي نتّْوَاعَارنْ زِي سَّا غَارْ ذِيهَا ؤُ نسِّيحڒْ إِخفْ نّغْ ذِي ڒبْحَارْ ن أَذْرِييَانَا، إِتّْغِيڒْ أَسنْ إِ إِبحْرِييّنْ ذِي ڒْوسْثْ ن دْجِيڒثْ، أَقَا نْقَارّبْ-د غَارْ ڒْبَارّْ. ‏28 نِيثْنِي نْضَارنْ أَيْڒِيزِيمْ ذِي رَادْجَاغْ ن ڒبْحَارْ، عبَّارنْ عِيشْرِينْ ن ثِيذِّيوِينْ. ؤُمِي عْذُونْ شْوَايْثْ، عبَّارنْ نِيثْنِي خمّسْطَاشْ ن ثِيذِّيوِينْ. ^▫   ‏29 أَمْ نڭّْوذْ أَذْ نڒْقفْ إِمُوشَانْ ن سّدْجَاحْ، ننْضَارْ أَربْعَا ن إِيْڒِيزَامْ زِي ضفَّارْ ن ؤُغَارَّاپُو ؤُشَا تَّارنْ أَذْ د-يَاوضْ ؤُزِيڒْ.

‏30 ڒَامِي ثُوغَا إِبحْرِييّنْ خْسنْ أَذْ أَروْڒنْ زڭْ ؤُغَارَّاپُو، سّْضَارنْ ثَاغَارَّاپُوثْ ن ؤُسلّكْ غَارْ ڒبْحَارْ أَخْمِي خْسنْ أَذْ نْضَارنْ إِيْڒِيزَامْ غَارْ زَّاثْ ن ؤُغَارَّاپُو. ‏31 ؤُمِي إِژْرَا بُولُوسْ مَانْ أَيَا، إِنَّا إِ ڒْقبْطَانْ خْ مْيَا ؤُ إِ إِعسْكَارِييّنْ: ”مَاڒَا إِنَا وَارْ قِّيمنْ ذڭْ ؤُغَارَّاپُو، وَارْ ثْزمَّارمْ أَذْ تّْوَاسْنجْممْ.“ ‏32 خنِّي قسّنْ إِعسْكَارِييّنْ إِسغْوَانْ ن ثْغَارَّاپُوثْ ن ؤُسلّكْ ؤُشَا جِّينْ ت أَذْ ثْرُوحْ.

‏33 أَڒَامِي د-إِقَارّبْ أَذْ إِصْبحْ ڒْحَاڒْ، إِزِييَّارْ إِ-ثنْ بُولُوسْ مَارَّا حِيمَا أَذْ شّنْ، إِنَّا: ”أَرْبعْطَاشْ ن وُوسَّانْ أَقَا وَارْ ثشِّيمْ وَالُو زِي سِّيبّثْ ن لْخَاطَارْ. ‏34 س ؤُينِّي شجّْعغْ كنِّيوْ أَذْ ثشّمْ مِينْزِي مَانْ أَيَا أَذْ كنِّيوْ إِنْفعْ إِ ؤُسنْجمْ نْومْ، مِينْزِي وَارْ إِوطِّي ؤُڒَا ذ إِجّْ ن ؤُژطُّو ن ؤُشُووَّافْ ن ؤُزدْجِيفْ ن ؤُڒَا ذ إِجّنْ زَّايْومْ.“ ^▪   ‏35 أَوَارْنِي ڒَامِي إِنَّا أَيَا، إِكْسِي أَغْرُومْ، إِشكَّارْ أَربِّي قِيبَاتْشْ إِ مَارَّا، يَارْژَا إِ-ث، إِبْذَا أَذْ إِشّْ. ^▪   ‏36 مَارَّا تّْوَاشجّْعنْ ؤُ كْسِينْ مَاشَّا. ‏37 ثُوغَا أَنغْ ذڭْ ؤُغَارَّاپُو ذِي مِيثَاينْ ؤُ-ستَّا ؤُ-سبْعِينْ ن يرْيَازنْ. ‏38 ڒَامِي جِّيوْننْ س مَاشَّا، بْذَانْ سّفْسَاسنْ أَغَارَّاپُو، نْضَارنْ إِرْذنْ ذِي ڒبْحَارْ.

‏39 أَڒَامِي إِصْبحْ ڒْحَاڒْ، ثُوغَا إِبحْرِييّنْ وَارْ سِّيننْ ثَامُّورْثْ نِّي، مَاشَا ژْرِينْ إِجّْ ن ؤُمسْرُوقْ ن ڒبْحَارْ غَارْ ثْمَا نّسْ ؤُشَا مْشَاوَارنْ، مَا نْزمَّارْ أَذْ ذِينْ نْعَارْنْ أَغَارَّاپُو. ‏40 ؤُمِي قضْونْ إِيْڒِيزَامْ، جِّينْ ثنْ ذِي ڒبْحَارْ، فسْينْ إِشدَّانْ ن ڒمْقَاذفْ، سّْڭعّْذنْ ڒْبَاشّْ ن زَّاثْ إِ ؤُسمِّيضْ إِتّْصُوضنْ، وجّْهنْ غَارْ ثْمَا ن ڒْبَارّْ. ‏41 مَاشَا أَغَارَّاپُو إِوْثَا إِجّْ ن ؤُعَارِّيشْ ن يجْذِي مَانِي إِدْجْ ڒبْحَارْ غَارْ ثْنَاينْ ن إِغزْذِيسنْ ؤُشَا نُّوغنْ س ؤُغَارَّاپُو. يَارْسَا زَّاثْ ن ؤُغَارَّاپُو خْ ؤُعَارِّيشْ ن يجْذِي، وَارْ إِزمَّارْ أَذْ إِنْهزّْ، مَاشَا ضفَّارْ ن ؤُغَارَّاپُو إِتّْوَاجْبذْ س جّهْذْ ن ڒمْوَاجْ. ^▪  

‏42 ثُوغَا نوَّانْ إِعسْكَارِييّنْ أَذْ نْغنْ إِمحْبَاسْ حِيمَا وَارْ إِتّْعُومِّي حذْ مَاحنْذْ أَذْ يَارْوڒْ. ‏43 مَاشَا ڒْقبْطَانْ خْ مْيَا ونِّي ثُوغَا إِخْسْ أَذْ إِسّنْجمْ بُولُوسْ، إِسّْبدّْ إِ-ثنْ، يُومُورْ بلِّي إِنِّي إِزمَّارنْ أَذْ عُومّنْ أَذْ نْضَارنْ إِخفْ نْسنْ ذ أَمزْوَارُو مَاحنْذْ أَذْ أَوْضنْ غَارْ ڒْبَارّْ. ‏44 وِي إِقِّيمنْ، إِجَّا إِ-ثنْ أَذْ ژْوَانْ خْ ثْفرْوِينْ ؤُ خْ إِزيْنَانْ ن إِكشُّوضنْ ن ؤُغَارَّاپُو، ؤُشَا أَمُّو إِ إِوْضنْ مَارَّا غَارْ ڒْبَارّْ، تّْوَاسّْنجْمنْ.