‏1 ژْوَانْ خْ أَمْفِيپُولِيسْ ذ أَپُولُّونِييَا، إِوْضنْ غَارْ ثِيسَّالُونِيكَا مَانِي ثُوغَا إِشْثْ ن ثمْزِيذَا ن وُوذَاينْ. ‏2 بُولُوسْ يُوذفْ-د ذِينْ غَارْسنْ، أَمْ ثُوغَا ذ لْقَاعِيذَا نّسْ. ذِي ثْڒَاثَا ن وُوسَّانْ ن سّبْثْ إِسِّيوڒْ أَكِيذْسنْ زِي ثِيرَا إِقدّْسنْ. ‏3 إِفّسَّارْ ؤُ إِسّْبيّنْ أَسنْ أَمُّو: ”ثُوغَا إِتّْخصَّا إِ لْمَاسِيحْ أَذْ إِتّْوَاودّبْ ؤُ أَذْ د-إِكَّارْ زِي ثَادَّارْثْ ن إِمتِّيننْ. أَقَا نتَّا ذ يشُّو لْمَاسِيحْ مِينْ خفْ ذ أَومْ بَارّْحغْ.“ ^▪   ‏4 شَا زَّايْسنْ ؤُمْننْ، مُوننْ أَكْ-ذ بُولُوسْ ذ سِيلَاسْ، ؤُڒَا ذ إِجّْ ن ڒْغَاشِي ذ أَمقّْرَانْ زڭْ إِيُونَانِييّنْ إِنِّي إِتّڭّْوذنْ أَربِّي، ؤُڒَا ذ ثِيمْغَارِينْ إِشنْعنْ وَارْ إِدْجِي ذْرُوسْثْ زَّايْسنْثْ، ^▪  

‏5 مَاشَا ؤُذَاينْ ذوْڒنْ تَّاسْمنْ، نذْهنْ شَا ن يرْيَازنْ إِعفَّاننْ زڭْ إِبْرِيذنْ ن ثنْذِينْثْ، سّْڭعّْذنْ إِجّْ ن ڒْغَاشِي، سّْهَاجَانْ ثَانْذِينْثْ ؤُشَا سّكَّارَانْ ثنْ ضِيدّْ ن ثَادَّارْثْ ن يَاسُونْ، أَرْزُونْ أَذْ ثنْ ڭوّْذنْ زَّاثْ إِ إِوْذَانْ. ‏6 ؤُمِي وَارْ ثنْ ؤُفِينْ، جَارّنْ يَاسُونْ ذ شَا ن وَاوْمَاثنْ قِيبَاتْشْ إِ إِمْضبَّارنْ ن ثنْذِينْثْ، سْغُويُّونْ: ”إِنَا إِنِّي إِسّْغوّْغنْ ثَامُّورْثْ مَارَّا، أَقَا ؤُسِينْ-د عَاوذْ ذَا! ^▪   ‏7 يَاسُونْ إِسِّيذفْ إِ-ثنْ غَارسْ ذ إِنوْجِيونْ، وَاخَّا نِيثْنِي مَارَّا تّْعكّْسنْ ثِيوْصيَّاثْ ن قَايْصَارْ، قَّارنْ أَقَا ذَا أَجدْجِيذْ نّغْنِي، أَقَا-ث ذ يشُّو.“ ^▪   ‏8 سَّارجْفنْ إِمْضبَّارنْ ن ثنْذِينْثْ ذ ڒْڭنْسْ ؤُمِي سْڒِينْ أَيَا. ‏9 مَاشَا أَوَارْنِي ڒَامِي طّْفنْ ڒْعَارْپُونْ زِي يَاسُونْ ذ يِينّغْنِي، أَرْخُونْ أَسنْ.

‏10 ڒخْذنِّي سّكّنْ ثَاوْمَاثْ بُولُوسْ ذ سِيلَاسْ غَارْ بِيرِييَا س دْجِيڒثْ. ؤُمِي ذِينْ إِوْضنْ، رُوحنْ غَارْ ثمْزِيذَا ن وُوذَاينْ، ^▪  

‏11 مِينْزِي ؤُذَاينْ ذِينِّي ثُوغَا أَثنْ خَارْ زڭْ إِنِّي إِ يدْجَانْ ذِي ثِيسَّالُونِيكَا، مِينْزِي ثُوغَا خْسنْ أَذْ سْڒنْ إِ وَاوَاڒْ كُوڒْ أَسّْ، أَرزُّونْ أَذْ سّْننْ زڭْ إِذْلِيسنْ مَا ثِيمسْڒَايِينْ-أَ أَقَا ثنْثْ أَمنِّي. ^▪  

‏12 أَطَّاسْ زَّايْسنْ زڭْ وُوذَاينْ نِّي ؤُمْننْ، ؤُڒَا ذ أَطَّاسْ ن ثمْغَارِينْ ذ يرْيَازنْ زڭْ إِيُونَانِييّنْ.

‏13 مَاشَا، ؤُمِي ؤُذَاينْ ن ثِيسَّالُونِيكَا سّْننْ بلِّي بُولُوسْ ثُوغَا إِتّْبَارّحْ أَوَاڒْ ن أَربِّي عَاوذْ ذِي بِيرِييَا، ؤُسِينْ-د نِيثْنِي عَاوذْ ذِينْ مَاحنْذْ أَذْ سّْغوّْغنْ ؤُ أَذْ سّْخَاروْضنْ إِمزْذَاغْ ن ثنْذِينْثْ. ^▪  

‏14 خَاسْ ؤُشَا سّكّنْ وَاوْمَاثنْ بُولُوسْ ڒخْذنِّي غَارْ ڒبْحَارْ، مَاشَا سِيلَاسْ ذ ثِيمُوثِييُو قِّيمنْ ذِينْ.

‏15 إِنِّي إِسّْقبْضنْ بُولُوسْ، إِوْينْ ث غَارْ أَثِينَا. خنِّي، ؤُمِي ث جِّينْ، طّْفنْ زَّايسْ إِشْثْ ن ثبْرَاثْ إِ سِيلَاسْ ذ ثِيمُوثِييُو مَاحنْذْ نِيثْنِي أَذْ غَارسْ د-أَسنْ ذغْيَا. ^▪  

‏16 أَمْ ثنْ ثُوغَا إِتّْرَاجَا بُولُوسْ ذِي أَثِينَا، ثُوغَا أَرُّوحْ نّسْ إِخيّقْ ؤُمِي إِژْرَا ثَانْذِينْثْ ثشُّورْ س ڒخْيَاڒَاثْ ن لْ-أَصْنَامْ.

‏17 س ؤُينِّي ثُوغَا إِسَّاوَاڒْ ذِي ثمْزِيذَا أَكْ-ذ وُوذَاينْ ؤُڒَا أَكْ-ذ ينِّي إِتّڭّْوذنْ أَربِّي ؤُڒَا ذِي سُّوقْ كُوڒْ أَسّْ أَكْ-ذ إِنِّي إِ ثُوغَا إِتَّافْ ذِينِّي.

‏18 عَاذْ شَا ن إِفَايْلَاسُوفنْ زِي ثمْزِيذَا ن إِبِيكُورُوسْ ؤُ شَا نّغْنِي، قَّارنْ أَسْ إِسْثُووَاكِييّنْ، مْنَاقَاشنْ أَكِيذسْ. شَا زَّايْسنْ نَّانْ: ”مِينْ إِخْسْ أَذْ يِينِي وَانِيثَا س ڒْهَارْذْ-أَ قَاعْ؟“ مَاشَا إِنّغْنِي نَّانْ: ”إِضْهَارْ-د أَقَا-ث ذ أَمْبَارّحْ ن إِربِّيثنْ إِغْرِيبنْ، مِينْزِي ثُوغَا إِتّْبَارّحْ أَسنْ س يشُّو ذ ثْنُوكْرَا نّسْ زڭْ إِمتِّيننْ.

‏19 ؤُشَا إِوْينْ ث، نذْهنْ غَارْ إِجّْ ن ومْشَانْ قَّارنْ أَسْ أَرِييُوبَاڭُوسْ، نَّانْ: ”مَا إِعدّڒْ أَذْ نسّنْ مَانْ ثَاغُورِي ن جْذِيذْ إِ خفْ ثسَّاوَاڒذْ؟“، ‏20 مِينْزِي شكْ ثِيوْيذْ شَا ن ثْمسْڒَايِينْ ثِيغْرِيبِينْ إِ إِمزُّوغنْ نّغْ، ؤُ نشِّينْ نخْسْ أَذْ نسّنْ مِينْ إِخْسْ أَذْ يِينِي مَانْ أَيَا.“ ‏21 مَارَّا إِنِّي زِي أَثِينَا ذ مَارَّا إِبَارَّانِييّنْ إِنِّي ذِينْ إِقِّيمنْ، سّعْذُونْ ڒْوقْثْ مْغِيرْ حِيمَا أَذْ خبَّارنْ ؤُ حِيمَا أَذْ سْڒنْ إِشْثْ ن ڒْحَاجّثْ ن جْذِيذْ.

‏22 إِكَّارْ-د بُولُوسْ، إِبدّْ ذِي ڒْوسْثْ ن أَرِييُوبَاڭُوسْ، إِنَّا: ”أَ إِرْيَازنْ ن أَثِينَا، ؤُفِيغْ بلِّي كنِّيوْ ثْشغْڒمْ ذڭْ وعْبَاذْ ن شّْوَاطنْ زِي كُوڒْ أَغزْذِيسْ. ‏23 مِينْزِي ؤُمِي نّْضغْ ذِي ثنْذِينْثْ نْومْ، ژْرِيغْ ثِيزَاوِييِّينْ نْومْ، ؤُفِيغْ عَاوذْ إِجّْ ن ؤُعَالْطَارْ زمّنْ خَاسْ: ’إِ أَربِّي إِ وَارْ إِتّْوَاسّْننْ‘. س ؤُينِّي ونِّي ثْعبّْذمْ كنِّيوْ، أَمْ وَارْ ث ثسِّينمْ، ذ وَا إِ زِي ذ أَومْ تّْبشَّارغْ. ‏24 مِينْزِي أَربِّي ونِّي د-يجِّينْ دُّونشْثْ ذ مَارَّا مِينْ ذَايسْ، ونِّي إِدْجَانْ ذ سِيذِي ن ؤُجنَّا ذ ثمُّورْثْ، وَارْ إِزدّغْ شَا ذِي ثُوذْرِينْ إِ إِتّْوَاڭّنْ س إِفَاسّنْ ن إِوْذَانْ، ^▪   ‏25 ؤُڒَا وَارْ خَاسْ إِتّْوَاسخَّارْ س إِفَاسّنْ ن إِوْذَانْ أَخْمِي نتَّا إِحْوَاجْ شَا، مِينْزِي نتَّا سِيمَانْثْ نّسْ إِوْشَا إِ مْكُوڒْ بْنَاذمْ ثُوذَارْثْ ذ نّفْسْ نّسْ. ^▪   ‏26 زڭْ إِذَامّنْ ن يِيجّنْ إِڭَّا مَارَّا ڒڭْنُوسْ ن بْنَاذمْ حِيمَا أَذْ زذْغنْ خْ وُوذمْ ن ثمُّورْثْ مَارَّا، ؤُ س ڒُومُورْ نّسْ إِحدّْ أَسنْ إِكُوذنْ ن ڒْوقْثْ ذ إِيْمِيرنْ ن ثْزذِّيغْثْ ن إِوْذَانْ، ^▪   ‏27 حِيمَا أَذْ أَرْزُونْ خْ أَربِّي ؤُ أَذْ زَّايسْ تَّارنْ، أَذْ ثَاغْ أَذْ ث أَفنْ س مَارَّا مِينْ زَّايسْ إِتّْوَاڭّنْ، مَاغَارْ نتَّا وَارْ إِڭّْوِيجْ شَا أَطَّاسْ خْ كُوڒْ إِجّنْ زَّايْنغْ. ‏28 مِينْزِي نشِّينْ ذَايسْ إِ ندَّارْ ؤُ ذَايسْ إِ نتّنْهزَّا، ؤُشَا، أَمْ مَامّشْ نَّانْ شَا ن إِمِيغِيسنْ نْومْ إِنِّي إِدْجَانْ جَارْ أَومْ: ’أَقَا نقَّارْسْ-د زَّايسْ نتَّا!‘ ‏29 س ؤُينِّي، أَمْ د-إِقَّارْسْ بْنَاذمْ زِي أَربِّي، إِتّْخصَّا وَارْ نْحسّبْ شَا بلِّي أَربِّي أَمشْنَاوْ ؤُرغْ ذ نُّوقَارْثْ ؤُڒَا أَمشْنَاوْ أَژْرُو إِ إِتّْوَاڭّنْ س لْفنّْ ؤُ زڭْ ؤُخَارَّاصْ ن بْنَاذمْ. ^▪   ‏30 أَربِّي خنِّي، إِجَّا أَذْ عْذُونْ إِكُوذنْ ن ؤُغكّْوِي، مَاشَا ذِي ڒْوقْثْ-أَ أَذْ يُومُورْ إِ مَارَّا إِوْذَانْ: ’إِتّْخصَّا إِ كُوڒْ  إِجّنْ ذِي كُوڒْ أَمْشَانْ أَذْ د-إِذْوڒْ غَارْ أَربِّي!‘ ^▪   ‏31 مِينْزِي نتَّا إِڭَّا إِجّْ ن وَاسّْ إِ ذِي إِ غَا إِحْكمْ خْ مَارَّا ثَامُّورْثْ س ڒْحقّْ س إِجّْ ن بْنَاذمْ إِ يِيخْضَارْ. نتَّا إِعيّنْ إِ-ث مَاحنْذْ مَارَّا أَذْ زَّايسْ يَامنْ، ڒَامِي ث-إِ-د-إِسّْنكَّارْ زِي ثَادَّارْثْ ن إِمتِّيننْ.“

‏32 ؤُمِي سْڒِينْ خْ ثْنُوكْرَا زِي ثَادَّارْثْ ن إِمتِّيننْ، بْذَانْ سْثْهزَّانْ س مَانَايَا، مَاشَا إِنّغْنِي نَّانْ: ”إِشْثْ ن ثْوَاڒَا نّغْنِي أَذْ زَّايكْ نْسڒْ كْثَارْ خْ مَانْ أَيَا.“ ‏33 أَمُّو إِفّغْ بُولُوسْ زِي ڒْوسْثْ نْسنْ. ‏34 شَا زَّايْسنْ ضْفَارنْ ث، ؤُمْننْ. جَارْ أَسنْ ذِييُونِيسِييُوسْ، ونِّي إِقِّيمنْ خْ أَرِييُوبَاڭُوسْ، ذ إِشْثْ ن ثمْغَارْثْ قَّارنْ أَسْ ذَامَارِيسْ ؤُ إِنّغْنِي أَكِيذْسنْ.