أَڭْرَاوْ ن رُّوسُولْ ذِي ؤُرْشَالِيمْ
15
1 هْوَانْ-د يرْيَازنْ زِي يَاهُوذِييَّا غَارْ أَنْثِييُوخِييَا ؤُشَا بْذَانْ سّڒْمَاذنْ إِ ثَاوْمَاثْ، نَّانْ: ”مَاڒَا وَارْ ثتّْوَاخثْنمْ عْلَاحْسَابْ شَّارِيعَا ن مُوسَا، وَارْ ثْزمَّارمْ أَذْ ثطّْفمْ ثُوذَارْثْ إِتّْذُومَانْ.“ ▪ 2 إِكَّارْ إِجّْ ن ؤُخَارْوضْ ذ ؤُنَاقشْ أَكِيذْسنْ زِي طَّارْفْ ن بُولُوسْ ذ بَارْنَابَا. إِمْسَارْ أَقَا بُولُوسْ ذ بَارْنَابَا ؤُ أَكِيذْسنْ عَاذْ إِجّنْ نّغْنِي رُوحنْ غَارْ رُّوسُولْ ذ إِمْغَارنْ ذِي ؤُرْشَالِيمْ زِي سِّيبّثْ ن ثْمسْڒَاشْثْ-أَ. ▫ ▪ 3 ثسّْقبّضْ ؤُ ثسّكّْ إِ-ثنْ ثْمسْمُونْثْ. نِيثْنِي شُوقّنْ ذِي مَارَّا فِينِيقِييَا ذ ثمُّورْثْ ن سَامَارْيَا ؤُشَا خبَّارنْ مَامّشْ ثُوبنْ إِنِّي إِدْجَانْ زِي ڒڭْنُوسْ، سّْفَارْحنْ مَارَّا ثَاوْمَاثْ أَطَّاسْ. 4 ڒَامِي إِوْضنْ غَارْ ؤُرْشَالِيمْ، ثَارحّبْ زَّايْسنْ ثْمسْمُونْثْ ذ رُّوسُولْ ذ إِمْغَارنْ ؤُ نِيثْنِي خبَّارنْ إِ-ثنْ س مَارَّا مِينْ زَّايْسنْ إِڭَّا أَربِّي.
5 مَاشَا شَا زِي ثبْرِيذْثْ ن إِفَارِيسِييّنْ إِنِّي إِذوْڒنْ ؤُمْننْ، كَّارنْ، نَّانْ: ”إِتّْخصَّا أَذْ ثنْ ثْخثْنمْ ؤُ أَذْ ثنْ ؤُمُورنْ أَذْ شبَّارنْ ذِي شَّارِيعَا ن مُوسَا.“
6 مُوننْ رُّوسُولْ ذ إِمْغَارنْ حِيمَا أَذْ مْشَاوَارنْ خْ ثْمسْڒَاشْثْ-أَ. 7 ڒَامِي إِكَّارْ إِجّْ ن ؤُخَارْوضْ ذ أَمقّْرَانْ، إِبدّْ شِيمْعُونْ، إِنَّا أَسنْ: ”أَ إِرْيَازنْ ثَاوْمَاثْ، كنِّيوْ ثسّْنمْ بلِّي أَطَّاسْ زڭْ وَامِي أَربِّي إِخْضَارْ أَقَا ڒڭْنُوسْ أَذْ سْڒنْ إِ وَاوَاڒْ ن ڒخْبَارْ أَصبْحَانْ س ؤُقمُّومْ إِنُو ؤُشَا أَذْ زَّايسْ أَمْننْ. ▪ 8 أَربِّي، ونِّي إِسّْننْ مِينْ إِدْجَانْ ذڭْ وُوڒَاونْ، إِشْهذْ خَاسنْ أَمْ ذ أَسنْ إِوْشَا أَرُّوحْ إِقدّْسنْ أَمشْنَاوْ إِ نشِّينْ. ▪ 9 نتَّا وَارْ إِتّڭّْ بُو ڒْفَارْزْ جَارْ نشِّينْ ذ نِيثْنِي، أَمْ إِسِّيزْذڭْ ؤُڒَاونْ نْسنْ س لِيمَانْ. ▪
10 إِوَا ڒخُّو، مَايمِّي ثتّْجَارَّابمْ عَاذْ أَربِّي ؤُ ثتّڭّمْ إِجّْ ن ؤُزَايْڒُو خْ إِرَاونْ ن إِمحْضَارنْ إِ وَارْ زمَّارنْ ڒجْذُوذْ نّغْ ؤُڒَا ذ نشِّينْ أَذْ ث نَارْپُو؟ ▪
11 مَاشَا س أَرْضَا ن سِيذِيثْنغْ يشُّو لْمَاسِيحْ نُومنْ أَقَا أَذْ نطّفْ ثُوذَارْثْ أَمشْنَاوْ نِيثْنِي.“ ▪
12 إِسْقَارْ ڒْغَاشِي، نِيثْنِي سْڒَانْ إِ بَارْنَابَا ذ بُولُوسْ تّْعَاوَاذنْ خْ ڒعْڒَامَاثْ ذ ڒعْجَايبْ ثِيمقّْرَانِينْ إِ زَّايْسنْ إِڭَّا أَربِّي جَارْ ڒڭْنُوسْ.
13 ؤُمِي قِّيمنْ سْقَارنْ، إِكَّارْ يَاعْقُوبْ، إِنَّا: ”أَ إِرْيَازنْ ثَاوْمَاثْ، سْڒمْ-د غَارِي.
14 شِيمْعُونْ إِخبَّارْ مَامّشْ ثُوغَا إِڭَّا أَربِّي ذڭْ ؤُمزْوَارْ حِيمَا أَذْ إِخْذَارْ إِجّْ ن ڒْڭنْسْ زِي ڒڭْنُوسْ إِ يِيسمْ نّسْ.
15 مَانْ أَيَا إِتَّاسْ-د أَكْ-ذ وَاوَاڒنْ ن إِنَابِييّنْ أَمشْنَاوْ مَامّشْ ثُورَا:
16 ’أَوَارْنِي مَانْ أَيَا أَذْ د-عقْبغْ
ؤُشَا أَذْ سّْبدّغْ عَاوذْ ثَازذِّيغْثْ إِوْضَانْ ن ذَاوُوذْ
ؤُ مِينْ زَّايسْ يَاردّْدْجنْ أَذْ ث أَرقّْعغْ
ؤُشَا أَذْ ت سّْڭعّْذغْ عَاوذْ،
17 حِيمَا مِينْ إِقِّيمنْ ن إِوْذَانْ أَذْ أَرْزُونْ خْ سِيذِي،
ؤُڒَا ذ مَارَّا ڒڭْنُوسْ إِ خفْ إِتّْوَاڒَاغَانْ س يِيسمْ إِنُو،
أَمُّو إِ إِقَّارْ سِيذِي ونِّي إِڭِّينْ مَارَّا أَيَا.‘ ▪
18 ڒخْذَايمْ ن أَربِّي أَقَا تّْوَاسّْننْثْ زِي ڒبْذَا.
19 س ؤُينِّي تّْوَاڒِيغْ إِشُووَّارْ وَارْ نسّضْقِيڒْ شَا خْ ينِّي د-إِذَاكّْوَاڒنْ غَارْ أَربِّي زِي ڒڭْنُوسْ، 20 مَاشَا أَذْ أَسنْ نَارِي حِيمَا أَذْ بعّْذنْ خْ ثخْمُوجِي زِي ثْغَارْصَا إِ لْ-أَصْنَامْ ؤُ خْ فَارْقْ-شّْغڒْ ؤُ خْ جِّييْفَاثْ ؤُ خْ إِذَامّنْ. ▪ 21 مِينْزِي مُوسَا غَارسْ زڭْ وشْحَاڒْ ؤُيَا ذِي كُوڒْ ثَانْذِينْثْ إِمْخطَّابنْ ذِي ثمْزِيذَاوِينْ، إِنِّي زَّايسْ إِتّْبَارّْحنْ كُوڒْ أَسّْ ن سّبْثْ.“
ثَابْرَاثْ زِي ؤُرْشَالِيمْ غَارْ ثْمسْمُونْثْ ذِي أَنْثِييُوخِييَا
22 خنِّي إِخْضَارنْ رُّوسُولْ ذ إِمْغَارنْ أَكْ-ذ مَارَّا ثَامسْمُونْثْ إِرْيَازنْ زِي ڒْوسْثْ نْسنْ ؤُشَا سّكّنْ يَاهُوذَا، ؤُمِي قَّارنْ عَاوذْ بَارْسَابَاسْ، ذ سِيلَاسْ أَكْ-ذ بُولُوسْ ذ بَارْنَابَا غَارْ أَنْثِييُوخِييَا. إِرْيَازنْ-أَ ثُوغَا أَثنْ ذ إِمقّْرَاننْ جَارْ ثَاوْمَاثْ. 23 ؤُرِينْ س ؤُفُوسْ نْسنْ أَمُّو:
”رُّوسُولْ ذ إِمْغَارنْ ذ ثَاوْمَاثْ.
إِ ثَاوْمَاثْ إِنِّي إِدْجَانْ ذِي أَنْثِييُوخِييَا ذ سُورِييَا ذ كِيلِيكِييَا، إِ ثَاوْمَاثْ إِ إِدْجَانْ زِي ڒڭْنُوسْ. سْڒَامْ خَاومْ!
24 نسْڒَا بلِّي شَا ن يِينِّي د-يُوسِينْ زِي ڒْوسْثْ نّغْ، صذْعنْ كنِّيوْ س وَاوَاڒنْ نْسنْ، سّنْهزّنْ ثَانفْسشْثْ نْومْ، قَّارنْ: ’إِتّْخصَّا أَذْ ثتّْوَاخثْنمْ ؤُ أَذْ ثطّْفمْ ذِي شَّارِيعَا!‘، ؤُمِي نشِّينْ وَارْ ذ أَسنْ نُومُورْ س مَانْ أَيَا. ▪ 25 س ؤُيَا نمْشَاوَارْ أَوَارْنِي ڒَامِي نْمُونْ مَارَّا، ؤُشَا نْفَارْزْ شَا ن يرْيَازنْ حِيمَا أَذْ ثنْ نسّكّْ غَارْومْ-د أَكْ-ذ إِمْعِيزّنْ نّغْ بَارْنَابَا ذ بُولُوسْ. 26 نِيثْنِي ذ إِرْيَازنْ إِنِّي إِطّوّْعنْ ثُوذَارْثْ نْسنْ إِ يِيسمْ ن سِيذِيثْنغْ يشُّو لْمَاسِيحْ. ▪ 27 نسّكّْ-د أَكِيذْسنْ يَاهُوذَا ذ سِيلَاسْ، إِنِّي كنِّيوْ إِ غَا إِخبَّارنْ مَانْ أَيَا عَاوذْ س ؤُقمُّومْ نْسنْ. 28 مِينْزِي أَقَا-ث ذِي ڒْخَاضَارْ ن أَرُّوحْ إِقدّْسنْ ؤُ ذِي ڒْخَاضَارْ نّغْ، حِيمَا وَارْ خَاومْ نسّضْقِيڒْ شَا سنّجْ إِ ثِيمسْڒَايِينْ ثِينِّي لَاپُودَّا زَّايْسنْثْ، 29 أَقَا أَذْ ثَاڭّْوجمْ خْ مِينْ وهّْبنْ ذ ثَاغَارْصْثْ إِ لْ-أَصْنَامْ ؤُڒَا خْ إِذَامّنْ ؤُڒَا خْ جِّييْفَاثْ ؤُڒَا خْ فَارْقْ-شّْغڒْ. مَاڒَا ثحْضَامْ إِخفْ نْومْ زِي مَانْ أَيَا، أَذْ ثڭّمْ مْلِيحْ. إِڒِيمْ ذ إِمْثِيقَّانْ ذِي سِيذِيثْنغْ.“ ▪
30 إِنِّي د-إِتّْوَاسّكّنْ إِوْضنْ غَارْ أَنْثِييُوخِييَا ؤُشَا سّْمُوننْ مَارَّا إِوْذَانْ، وْشِينْ أَسنْ ثَابْرَاثْ. 31 ڒَامِي ت غْرِينْ، فَارْحنْ نِيثْنِي، تّْوَاسّْفوّْجنْ. 32 س وَاوَاڒنْ أَطَّاسْ سّْجهْذنْ ثَاوْمَاثْ ؤُشَا سّْمثْننْ إِنِّي إِدْجَانْ أَكْ-ذ يَاهُوذَا ذ سِيلَاسْ، مَاغَارْ ؤُڒَا ذ نِيثْنِي ثُوغَا أَثنْ ذ إِنَابِييّنْ. 33 أَوَارْنِي ڒَامِي قِّيمنْ ذِينِّي أَطَّاسْ ن ڒْوقْثْ، سّْقبْضنْ ثنْ وَاوْمَاثنْ س ڒهْنَا حِيمَا أَذْ د-ذوْڒنْ غَارْ رُّوسُولْ. 34 مَاشَا سِيلَاسْ ثُوغَا إِخْسْ أَذْ إِقِّيمْ ذِينِّي.
35 بُولُوسْ ذ بَارْنَابَا قِّيمنْ ذِي أَنْثِييُوخِييَا، سّْغَارَانْ تّْبَارّْحنْ س وَاوَاڒْ ن أَربِّي أَكْ-ذ وَاطَّاسْ إِنّغْنِي.
أَمْسبْضِي ن بُولُوسْ ذ بَارْنَابَا
36 أَوَارْنِي شَا ن وُوسَّانْ إِنَّا بُولُوسْ إِ بَارْنَابَا: ”أجّْ أَنغْ أَذْ نعْقبْ غَارْ ثَاوْمَاثْ ذِي كُوڒْ ثَانْذِينْثْ مَانِي ثُوغَا نتّْبَارّحْ س وَاوَاڒْ ن أَربِّي، أَذْ نَارْڭبْ مَامّشْ إِ غَا إِفّغْ ؤُمدُّورْ نْسنْ.“ 37 بَارْنَابَا ثُوغَا إِخْسْ أَذْ كِيسنْ إِنْذهْ يُوحَانَّا ونِّي إِتّْكنَّانْ مَارْكُوسْ، ▪ 38 مَاشَا بُولُوسْ ثُوغَا وَارْ إِخْسْ أَذْ ث يِيوِي مِينْزِي مَارْكُوسْ إِسْمحْ ذَايْسنْ ؤُمِي ثُوغَا-ثنْ ذِي بَامْفِيلِييَا ؤُ مِينْزِي وَارْ كِيسنْ إِرُوحْ غَارْ ڒْخذْمثْ. 39 إِكَّارْ إِجّْ ن ؤُمْشُوبّشْ ذ أَمقّْرَانْ جَارْ أَسنْ أَڒَامِي مّْسبْضَانْ إِجّنْ خْ ونّغْنِي. بَارْنَابَا يِيوِي مَارْكُوسْ أَكِيذسْ ؤُشَا إِبحَّارْ غَارْ ثڭْزِيرْثْ ن قُوبْرُوسْ. 40 مَاشَا بُولُوسْ إِخْضَارْ سِيلَاسْ ؤُشَا إِفّغْ، أَوَارْنِي ڒَامِي سلّْمنْ ث وَاوْمَاثنْ غَارْ أَرْضَا ن أَربِّي. 41 إِشُوقّْ ذِي سُورِييَا ذ كِيلِيسِييَا، إِتّْشجَّاعْ ثِيمسْمُونِينْ.