‏1 رُّوسُولْ ذ ثَاوْمَاثْ إِنِّي إِدْجَانْ ذِي يَاهُوذِييَّا سْڒِينْ بلِّي ؤُڒَا ذ ڒڭْنُوسْ قبْڒنْ وَاوَاڒْ ن أَربِّي. ‏2 ڒَامِي إِڭعّذْ شِيمْعُونْ غَارْ ؤُرْشَالِيمْ، مْشُوبّْشنْ أَكِيذسْ إِنِّي إِدْجَانْ زِي ثبْرِيذْثْ ن وخْثَانْ، ‏3 نَّانْ، بلِّي نتَّا يُوذفْ-د غَارْ إِوْذَانْ إِ وَارْ إِتّْوَاخثْننْ، إِشَّا أَكِيذْسنْ. ^▪  

‏4 مَاشَا شِيمْعُونْ إِقْضعْ ذَايْسنْ ڒْهَارْذْ، ؤُشَا إِبْذَا أَذْ أَسنْ إِعَاوذْ أَوَاڒْ إِضْفَارْ ؤُمَاسْ: ‏5 ”ڒَامِي ثُوغَا أَيِي ذِي ثنْذِينْثْ ن يَافَّا تّْژَادْجِيغْ، ژْرِيغْ ذڭْ إِشْثْ ن ثْمژْرِيوْثْ أَقَا إِشْثْ ن ڒْقشْعثْ أَمشْنَاوْ ثَاشْضَاضْثْ ن ثْشُوقّثْ ثَامقّْرَانْثْ إِتّْوَاطّْفنْ زِي أَربْعَا ن ثْغمُّورَا نّسْ ثتّْوَاسهْوَا-د زڭْ ؤُجنَّا، ثِيوضْ-د غَارِي. ^▪   ‏6 خْزَارغْ مْلِيحْ ؤُ ژْرِيغْ أَقَا ذَايسْ إِمُودَّارنْ ن ثمُّورْثْ س أَربْعَا ن إِضَارنْ ذ إِمُودَّارنْ إِنِّي إِتّْپُوعنْ خْ ثمُّورْثْ ؤُڒَا ذ إِجْضَاضْ ن ؤُجنَّا. ‏7 سْڒِيغْ أَوَارْنِي أَيِي إِشْثْ ن ثْمِيجَّا، ثنَّا أَيِي: ’أَ شِيمْعُونْ، كَّارْ، غَارْصْ، ثشّذْ!‘ ‏8 مَاشَا نشّْ نِّيغْ: ’لَّ، أَ سِيذِي، عمَّارْصْ وَارْ يُوذِيفْ عَاذْ غَارْ ؤُقمُّومْ إِنُو مِينْ وَارْ إِزْذِيڭنْ نِيغْ نِيغْ مِينْ إِدْجَانْ ذ ڒحْرَامْ.‘ ^▪   ‏9 ثنَّا خَافِي ثْمِيجَّا زڭْ ؤُجنَّا عَاوذْ: ’مِينْ إِسِّيزْذڭْ أَربِّي، وَارْ د ث ثتَّارِّيذْ شَا شكْ ذ ڒحْرَامْ!‘

‏10 مَانْ أَيَا إِمْسَارْ ثْڒَاثَا ن إِمُورنْ ؤُشَا خنِّي إِتّْوَاسْجْبذْ مَارَّا عَاوذْ غَارْ ؤُجنَّا.

‏11 ؤُ خْزَارْ، ڒخْذنِّي أَقَا ذِينْ ثْڒَاثَا ن يرْيَازنْ إِنِّي د-إِتّْوَاسّكّنْ زِي كُورْنِيلِييُوسْ زِي قَايْصَارِييَا، بدّنْ غَارْ ثوَّارْثْ ن ڒمْرَاحْ مَانِي ذ أَيِي ثُوغَا.

‏12 إِنَّا أَيِي أَرُّوحْ أَقَا إِتّْخصَّا أَذْ كِيسنْ رَاحغْ بْڒَا مَا أَذْ شكّغْ. ثُوغَا أَكِيذِي عَاذْ ستَّا ن ثَاوْمَاثْ إِنّغْنِي ؤُ نُوذفْ غَارْ ثَادَّارْثْ ن ورْيَازْ نِّي. ^▪  

‏13 نتَّا إِسَّارْڭبْ أَنغْ مَامّشْ إِژْرَا إِجّْ ن لْمَالَاكْ إِ إِبدّنْ ذِي ثَادَّارْثْ نّسْ، ونِّي ذ أَسْ إِنَّانْ: ’سكّْ إِجّْ ن ورْيَازْ غَارْ يَافَّا، ثْعَارْضذْ خْ شِيمْعُونْ ونِّي ؤُمِي تّْكنَّانْ بُوطْرُوسْ.

‏14 نتَّا أَذْ أَشْ إِسِّيوڒْ أَوَاڒنْ إِ زِي غَا ثتّْوَاسْنجْمذْ، شكْ ذ مَارَّا ثَادَّارْثْ نّكْ.‘

‏15 ؤُمِي سِّيوْڒغْ، إِهْوَا-د أَرُّوحْ إِقدّْسنْ خَاسنْ أَمْ مَامّشْ خَانغْ د-إِهْوَا عَاوذْ غَارْ ؤُمزْوَارُو.

‏16 تّْوَاسّْعقْڒغْ خْ وَاوَاڒْ ن سِيذِيثْنغْ، مَامّشْ إِنَّا: ’يُوحَانَّا ثُوغَا إِسّغْضَاصْ س وَامَانْ مَاشَا كنِّيوْ أَذْ تّْوَاسْغضْصمْ س أَرُّوحْ إِقدّْسنْ.‘ ^▪  

‏17 مَاڒَا أَربِّي إِوْشَا ثَاموْشِي أَيَا إِ ڒڭْنُوسْ نِّي يُومنْ ذِي سِيذِيثْنغْ يشُّو لْمَاسِيحْ أَمْ مَامّشْ ذ أَنغْ ت إِوْشَا، خنِّي مِينْ عْنِيغْ نشّْ مَاحنْذْ أَذْ سّْبدّغْ أَربِّي؟“ ^▪  

‏18 ؤُمِي سْڒِينْ أَوَاڒنْ-أَ، هدّْننْ، سّمْغَارنْ أَربِّي، نَّانْ: ”أَذْ ثَاغْ أَربِّي إِوْشَا ؤُڒَا إِ ڒڭْنُوسْ مَاحنْذْ أَذْ د-ذوْڒنْ أَذْ ثُوبنْ إِ ثُوذَارْثْ.“

‏19 إِنِّي إِتّْوَازُوزَّارنْ زِي سِّيبّثْ ن ڒحْصَارثْ إِ إِمْسَارنْ س سِّيبّثْ ن سْثِيفَانُوسْ، ژْوَانْ غَارْ فِينِيقِييَا ؤُ غَارْ جّْوَايهْ ن قُوبْرُوسْ ؤُ غَارْ أَنْثِييُوخِييَا أَمْ وَارْ سِّيوِيڒنْ أَكْ-ذ حذْ س وَاوَاڒْ مْغِيرْ أَكْ-ذ وُوذَاينْ وَاهَا. ^▪   ‏20 ثُوغَا ذِينْ جَارْ أَسنْ شَا ن يرْيَازنْ إِ إِدْجَانْ زِي قُوبْرُوسْ ؤُ زِي قَايْرَاوَانْ إِنِّي، أَڒَامِي د-ؤُسِينْ غَارْ أَنْثِييُوخِييَا، ثُوغَا إِسَّاوَاڒنْ أَكْ-ذ وُوذَاينْ إِنِّي ثُوغَا غَارْسنْ ڒْهَارْذْ ن إِيُونَانِييّنْ، بَارّْحنْ أَسنْ س سِيذِيثْنغْ يشُّو. ‏21 ثُوغَا أَفُوسْ ن سِيذِي أَكِيذْسنْ ؤُشَا أَطَّاسْ ؤُمْننْ، ذوْڒنْ-د غَارْ سِيذِي. ^▪  

‏22 إِكَّا-د ڒخْبَارْ خَاسنْ خْ إِمزُّوغنْ ن ثْمسْمُونْثْ ذِي ؤُرْشَالِيمْ. نِيثْنِي سّكّنْ بَارْنَابَا غَارْ أَنْثِييُوخِييَا. ‏23 أَڒَامِي د-يِيوضْ ذِينْ، إِژْرَا أَرْضَا ن أَربِّي، إِفَارْحْ ؤُشَا إِعْڒمْ أَسنْ حِيمَا أَذْ قِّيمنْ تّْشبَّارنْ ذِي سِيذِيثْنغْ س مَارَّا ؤُڒْ نْسنْ. ^▪   ‏24 مِينْزِي ثُوغَا-ث ذ أَرْيَازْ إِسڭّذْ، إِشُّورْ س أَرُّوحْ إِقدّْسنْ ذ لْ-إِيمَانْ، ؤُشَا إِجّْ ن ؤُبَارُّو ذ أَمقّْرَانْ ن إِوْذَانْ إِمَّارْنِي-د غَارْ سِيذِيثْنغْ. ^▪   ‏25 خنِّي إِرُوحْ غَارْ ثَارْسُوسْ حِيمَا أَذْ يَارْزُو خْ شَاوُولْ، ^▪   ‏26 ؤُشَا أَڒَامِي ث يُوفَا، يِيوِي إِ-ث أَكِيذسْ غَارْ أَنْثِييُوخِييَا. ؤُشَا إِمْسَارْ أَقَا نِيثْنِي مُوننْ ذِي ثْمسْمُونْثْ أَسڭّْوَاسْ إِكْمڒْ ؤُشَا سّْڒمْذنْ إِجّْ ن ڒْغَاشِي ذ أَمقّْرَانْ. زِي  ڒْوقْثْ نِّي تّْوَاسمَّانْ إِمحْضَارنْ ذ ’إِمَاسِيحِييّنْ‘ إِ ؤُمُورْ أَمزْوَارُو. ^▫  

‏27 ذڭْ وُوسَّانْ نِّي هْوَانْ-د شَا ن إِنَابِييّنْ زِي ؤُرْشَالِيمْ غَارْ ذِينْ. ‏28 ؤُشَا إِكَّارْ إِجّْ ن زَّايْسنْ قَّارنْ أَسْ أَغَاپُوسْ، إِعْڒمْ أَسنْ س أَرُّوحْ بلِّي إِجّْ ن ڒَاژْ إِمْغَارْ أَذْ يكّْ خْ مَارَّا ثَامُّورْثْ ؤُ بلِّي ڒَاژْ-أَ أَذْ يِيڒِي ذڭْ وُوسَّانْ ن قَايْصَارْ كْلُوذِييُوسْ. ^▪   ‏29 خنِّي ڭِّينْ إِمحْضَارنْ أَقَا كُوڒْ إِجّْ زَّايْسنْ أَذْ إِڭّْ شَا ن ثْوِيزَا غَارْ ؤُغزْذِيسْ عْلَاحْسَابْ ثِيزمَّارْ نّسْ إِ ثْسخَّارْثْ ن وَاوْمَاثنْ إِ إِزدّْغنْ ذِي يَاهُوذِييَّا. ‏30 ؤُشَا أَمنِّي إِ ڭِّينْ نِيثْنِي، ؤُشَا سّكّنْ ث ذِينْ غَارْ إِمْغَارنْ س ؤُفُوسْ ن بَارْنَابَا ذ شَاوُولْ. ^▪