‏1 أَمْ ثُوغَا سَّاوَاڒنْ أَكْ-ذ ڒْڭنْسْ، خشّنْ-د خَاسنْ إِكهَّاننْ أَكْ-ذ إِمقّْرَاننْ خْ زَّاوشْثْ ثَامقّْرَانْثْ ذ إِصَاذُوقِييّنْ، ‏2 مِينْزِي ثُوغَا خيّْقنْ خَاسنْ مَاغَارْ نِيثْنِي ثُوغَا سّڒْمَاذنْ ڒْڭنْسْ ؤُ تّْبَارّْحنْ ثَانُوكْرَا زِي ثَادَّارْثْ ن إِمتِّيننْ س لْمَاسِيحْ. ‏3 سَّارْسنْ خَاسنْ إِفَاسّنْ ؤُشَا حبّْسنْ ثنْ أَڒْ ثِيوشَّا نّسْ، مِينْزِي ثُوغَا ثوْضَا-د ثْمذِّيثْ. ‏4 أَطَّاسْ زڭْ إِنِّي إِسْڒِينْ أَوَاڒْ-أَ ؤُمْننْ ؤُ ڒْقدّْ ن يرْيَازنْ يِيوضْ-د عْڒَاحَاڒْ خمْسَا-أَڒفْ.

‏5 ثِيوشَّا نّسْ مُوننْ إِمقّْرَاننْ ذ إِمْغَارنْ ذ إِمْسڒْمَاذنْ ن إِذْلِيسنْ ذِي ؤُرْشَالِيمْ، ‏6 ؤُڒَا ذ حَانَّانْ، أَرَّايْسْ ن إِكهَّاننْ، ذ قَايَافَا ذ يُوحَانَّا ذ أَلِيكْسَانْذِيرْ ؤُ مَارَّا إِنِّي ثُوغَا د-إِقَّارْصنْ زِي ڒَادْجْ ن أَرَّايْسْ ن إِكهَّاننْ. ‏7 ؤُمِي ثنْ سّْبدّنْ ذِي ڒْوسْثْ، سّقْسَانْ ثنْ: ”س مَانْ جّهْذْ نِيغْ س مَانْ إِسمْ إِ ثڭِّيمْ أَيَا؟“ ^▪   ‏8 ڒخْذنِّي إِنَّا أَسنْ شِيمْعُونْ بُوطْرُوسْ إِشُّورنْ س أَرُّوحْ إِقدّْسنْ: ”سْڒمْ، أَ إِمقّْرَاننْ ن ڒْڭنْسْ ذ إِمْغَارنْ ن ثَادَّارْثْ ن إِسْرَائِيل! ‏9 مَاڒَا أَسّْ-أَ نتّْوَاحْكمْ زَّايْومْ خْ لْمُوعْجِيزَا إِ إِتّْوَاڭّنْ إِ يِيجّْ ن ؤُمهْڒُوشْ، س مِينْ زِي إِذْوڒْ ورْيَازْ-أَ إِڭّنْفَا،

‏10 إِتّْخصَّا أَذْ ثسّْنمْ كنِّيوْ ذ مَارَّا ڒْڭنْسْ ن إِسْرَائِيل بلِّي أَرْيَازْ وَانِيثَا إِبدّْ زَّاثْومْ إِصحّْ س يِيسمْ ن يشُّو لْمَاسِيحْ نَّاصِيرِي، ونِّي ثْصلّْبمْ، مَاشَا ونِّي د-إِسّْنكَّارْ أَربِّي زِي ثَادَّارْثْ ن إِمتِّيننْ، وَاهْ أَقَا زَّايسْ إِبدّْ أَرْيَازْ-أَ زَّاثْومْ إِسحّْ.

‏11 ذ وَا ذ أَژْرُو نِّي ثمّنْضَارمْ كنِّيوْ، أَ إِبنَّاينْ، مَاشَا نتَّا أَقَا إِذْوڒْ ذ أَژْرُو أَزدْجِيفْ ن ثغْمَارْثْ. ^▪  

‏12 ڒفْذِييّثْ وَارْ إِدْجِي س إِجّنْ بْنَاذمْ نّغْنِي، مِينْزِي وَارْ ذِينْ إِسمْ نّغْنِي سَاذُو ؤُجنَّا إِ زِي غَا نطّفْ ثُوذَارْثْ.“ ^▪  

‏13 ڒَامِي سْڒِينْ أَوَاڒنْ ن شِيمْعُونْ ذ يُوحَانَّا إِنِّي إِسِّيوْڒنْ نِيثْنِي س بْطَايْطَايْ، ؤُشَا ؤُفِينْ بلِّي نِيثْنِي وَارْ دْجِينْ ذ إِمُوسْنَاونْ ن وذْلِيسْ نِيغْ ذ إِوْذَانْ إِنِّي إِڒمْذنْ أَطَّاسْ، أَقَا ثْبهْثنْ ؤُشَا عقْڒنْ بلِّي نِيثْنِي ثُوغَا أَثنْ أَكْ-ذ يشُّو.

‏14 نِيثْنِي ژْرِينْ بْنَاذمْ إِ ثُوغَا ذ أَنعْضَابْ ؤُشَا إِذْوڒْ إِڭّنْفَا، إِبدّْ أَكِيذْسنْ، ؤُشَا وَارْ ؤُفِينْ مِينْ غَا إِنِينْ خْ مَانْ أَيَا.

‏15 ؤُ أَوَارْنِي ڒَامِي ؤُمَارنْ مَاحنْذْ أَذْ ثنْ سُّوفّْغنْ بَارَّا إِ لْمحْكَامَا نْسنْ، ؤُمِي قَّارنْ ’سُونْهِيذْرِينْ‘، مْشَاوَارنْ أَكْ-ذ وَايَاوْيَا، نَّانْ:

‏16 ”مِينْ إِ غَا نڭّْ س إِرْيَازنْ-أَ؟ مِينْزِي أَقَا إِبَانْ-د مْلِيحْ إِ مَارَّا إِمزْذَاغْ ن ؤُرْشَالِيمْ بلِّي ڒعْڒَامثْ ثمْسَارْ س ؤُفُوسْ نْسنْ، وَارْ نْزمَّارْ أَذْ ت ننْكَارْ. ^▪  

‏17 مَاشَا حِيمَا وَارْ إِتّْوَابَارّحْ ڒخْبَارْ-أَ كْثَارْ جَارْ ويْذُوذْ، أجّْ أَنغْ أَذْ ثنْ نسِّيڭّْوذْ حِيمَا وَارْ سِّيوِيڒنْ عمَّارْصْ عَاوذْ ذڭْ يِيسمْ-أَ ؤُڒَا أَكْ-ذ إِجّْ ن بْنَاذمْ.“

‏18 خَاسْ ؤُشَا ڒَاغَانْ-د خَاسنْ، ؤُمُورنْ ثنْ مَاحنْذْ وَارْ سِّيوِيڒنْ وَارْ سّڒْمِيذنْ عمَّارْصْ عَاذْ ذڭْ يِيسمْ ن يشُّو.

‏19 مَاشَا شِيمْعُونْ بُوطْرُوسْ ذ يُوحَانَّا أَرِّينْ-د خَاسنْ، نَّانْ أَسنْ: ”حكْممْ كنِّيوْ، مَا إِحِيقّْ زَّاثْ إِ أَربِّي مَاحنْذْ أَذْ نْسڒْ كْثَارْ إِ كنِّيوْ خْ أَربِّي، ^▪   ‏20 مِينْزِي وَارْ نْزمَّارْ أَذْ نقِّيمْ وَارْ نسِّيوِيڒْ خْ مِينْ نژْرَا ؤُ خْ مِينْ نسْڒَا.“ ‏21 مَاشَا نِيثْنِي سِّيڭّْوذنْ ثنْ عَاذْ كْثَارْ، خنِّي جِّينْ ثنْ أَذْ رَاحنْ، أَڒَامِي وَارْ ؤُفِينْ مِينْ زِي ثنْ إِ غَا عَاقْبنْ زِي سِّيبّثْ ن إِوْذَانْ، مِينْزِي مَارَّا إِوْذَانْ ثُوغَا سّمْغَارَانْ ذِي أَربِّي خْ مِينْ إِمْسَارنْ، ^▪   ‏22 مِينْزِي أَرْيَازْ إِ ذَايسْ إِتّْوَاڭّْ ڒعْڒَامثْ-أَ ن ؤُڭنْفِي، ثُوغَا غَارسْ كْثَارْ زِي أَربْعِينْ ن إِسڭّْوُوسَا.

‏23 أَوَارْنِي ڒَامِي ذ أَسنْ أَرْخُونْ، رُوحنْ نِيثْنِي غَارْ أَيْثْمَاثْسنْ ؤُشَا خبَّارنْ ثنْ س مَارَّا مِينْ ذ أَسنْ نَّانْ إِمقّْرَاننْ ن إِكهَّاننْ ذ إِمْغَارنْ ن ڒْڭنْسْ. ^▪   ‏24 ؤُمِي سْڒِينْ أَيَا، سّْڭعّْذنْ ثْمِيجَّا نْسنْ غَارْ أَربِّي س ذْمَامْ ذ إِجّنْ، نَّانْ: ”أَ سِيذِي، شكْ ذ أَربِّي ونِّي إِڭِّينْ أَجنَّا ذ ثمُّورْثْ ذ ڒبْحُورْ ذ مَارَّا مِينْ ذَايسْ، ^▪   ‏25 شكْ ذ ونِّي إِنَّانْ س ؤُقمُّومْ ن ؤُمْسخَّارْ نّكْ ذَاوُوذْ:

’مَايمِّي غوّْغنْ ڒڭْنُوسْ

ؤُ مَايمِّي خَارّْصنْ ڒڭْنُوسْ ذِي مِينْ إِخْوَانْ؟ ^▪  

‏26 أَقَا كَّارنْ إِجدْجِيذنْ ن دُّونشْثْ،

ؤُشَا إِنِّي غَارْسنْ إِدْجْ صُّولْطَا مّْشَاوَارنْ

ضِيدّْ ن سِيذِي ؤُ ضِيدّْ ن لْمَاسِيحْ نّسْ.‘ ^▪  

‏27 مِينْزِي س ثِيذتّْ أَقَا هِيرُوذُوسْ ذ بُونْطِييُوسْ بِيلَاطُوسْ ذ ڒڭْنُوسْ ذ إِبَارُّوثنْ ن إِسْرَائِيل مُوننْ خْ مِّيشْ أَمْقدَّاسْ نّكْ يشُّو ونِّي ؤُمِي ثْمسْحذْ، ^▪   ‏28 حِيمَا أَذْ ڭّنْ مَارَّا مِينْ ثُوغَا إِزْوَارْ إِنيّشْ ؤُفُوسْ نّكْ ذ شّْوَارْ نّكْ أَذْ يِيڒِي. ‏29 ڒخُّو، أَ سِيذِي، خْزَارْ غَارْ ؤُسِيڭّْوذْ نْسنْ ؤُشَا أوْشْ إِ إِمْسخَّارنْ نّكْ حِيمَا أَذْ سِّيوْڒنْ س وَاوَاڒْ نّكْ س ثَارْيَاسْثْ، ‏30 أَمْ ثسّْوِيژّْضذْ أَفُوسْ نّكْ إِ ؤُسْڭنْفِي ؤُ حِيمَا أَذْ ثڭّذْ ثِيمڭَّا جهْذنْثْ ذ ڒعْڒَامَاثْ ذ ڒعْجَايبْ ذڭْ يِيسمْ ن مِّيشْ أَمْقدَّاسْ يشُّو.“ ^▪   ‏31 أَوَارْنِي ڒَامِي كمّْڒنْ ثَاژَادْجِيثْ ذ ثْكسِّيثْ س ڒْمعْرُوفْ، إِنْهزّْ ومْشَانْ إِ ذِي ثُوغَا مُوننْ، ؤُ مَارَّا ذوْڒنْ شُّورنْ س أَرُّوحْ إِقدّْسنْ، سَّاوَاڒنْ س وَاوَاڒْ ن أَربِّي س ثرْيَاسْثْ. ^▪  

‏32 ڒْغَاشِي ن يِينِّي يُومْننْ ثُوغَا س ڒعْمَارْ ذ ؤُخَارّصْ ذ إِجّنْ ؤُشَا ؤُڒَا ذ إِجّْ وَارْ إِقَّارْ بلِّي مِينْ ثُوغَا غَارسْ أَقَا إِ نتَّا وحّْذسْ، مَاشَا نِيثْنِي شَارْشنْ ذِي كُوڒْشِي جَارْ أَسنْ. ^▪   ‏33 ثُوغَا رُّوسُولْ شهّْذنْ س يِيجّْ ن جّهْذْ إِمْغَارْ خْ ثْنُوكْرَا ن يشُّو لْمَاسِيحْ ؤُشَا يِيوضْ-د أَرْضَا إِمْغَارْ خْ مَارَّا نِيثْنِي. ^▫   ‏34 وَارْ ثُوغِي جَارْ أَسنْ ؤُڒَا ذ إِجّْ ذَايسْ ڒخْصصْ، مِينْزِي مَارَّا إِنِّي غَارْ إِدْجْ إِيَّارنْ نِيغْ ثُوذْرِينْ زّْنُوزَانْ ثنْ، ؤُشَا تَّاوْينْ-د تَّامَانْ ن مِينْ زّْنُوزَانْ، ‏35 سّْرُوسَانْ ث غَارْ إِضَارنْ ن رُّوسُولْ. نِيثْنِي بْضَانْ زَّايسْ إِ كُوڒْ إِجّْ عْلَاحْسَابْ مِينْ ثُوغَا إِحْوَاجْ. ^▪  

‏36 يُوسُوفْ ونِّي ؤُمِي ڒَاغَانْ رُّوسُولْ بَارْ-نَابَاس، مِينْ إِخْسْ أَذْ يِينِي ’مِّيسْ ن ؤُفوّجْ‘، نتَّا زِي ثقْبِيتْشْ ن لَاوِي، إِخْڒقْ-د ذِي قُوبْرُوسْ، ‏37 ثُوغَا غَارسْ إِجّْ ن إِيَّارْ، إِزّنْزْ إِ-ث ؤُشَا يِيوِي-د ثْمنْيَاثْ، إِسَّارْسْ إِ-ثنْثْ غَارْ إِضَارنْ ن رُّوسُولْ.