‏1 ؤُمِي كمّْڒنْ وُوسَّانْ أَڒْ ڒْعِيذْ ن خمْسِينْ ن وُوسَّانْ، ثُوغَا أَثنْ مَارَّا جْمِيعْ مُوننْ. ^▪   ‏2 خْ إِشْثْ ن ڒْغفْڒثْ يُوسَا-د إِجّْ ن زّْهِيرْ زڭْ ؤُجنَّا، إِڭَّا أَخْمِي ذ أَسمِّيضْ إِجهْذنْ أَطَّاسْ، إِشُّورْ مَارَّا ثَادَّارْثْ مَانِي ثُوغَا قِّيمنْ. ‏3 ؤُشَا ضْحَارنْ أَسنْ-د إِڒْسَاونْ ن ثْمسِّي نِّي إِتّمْسبْضَانْ، أَرْسِينْ خْ كُوڒْ إِجّنْ زَّايْسنْ، ‏4 ؤُ مَارَّا نِيثْنِي ذوْڒنْ شُّورنْ س أَرُّوحْ إِقدّْسنْ، بْذَانْ أَذْ سِّيوْڒنْ س إِجّْ ن يِيڒسْ نّغْنِي أَمْ مَامّشْ ذ أَسنْ إِوْشَا أَرُّوحْ أَذْ زَّايْسنْ نطْقنْ. ^▪  

‏5 ثُوغَا إِتّْغِيمَانْ ذِينْ ذِي ؤُرْشَالِيمْ إِرْيَازنْ إِنِّي إِتّڭْوذنْ أَربِّي، ؤُذَاينْ زِي مَارَّا ڒڭْنُوسْ سَاذُو ؤُجنَّا. ‏6 ؤُمِي إِكَّارْ زّْهِيرْ-أَ، إِمُونْ مَارَّا ڒْڭنْسْ ذِينِّي ؤُشَا ثْبهْثنْ، مِينْزِي كُوڒْ إِجّْ ثُوغَا إِتّسْڒَا أَسنْ سَّاوَاڒنْ س يِيڒْسَاونْ نْسنْ. ‏7 ذهْشنْ، ثْبهْثنْ مَارَّا، نَّانْ جَارْ أَسنْ: ”مَا وَارْ دْجِينْ مَارَّا إِنَا إِنِّي ذِينْ إِسَّاوَاڒنْ ذ إِجَالِيلِييّنْ؟ ‏8 مَامّشْ ذ أَسنْ نسْڒَا نشِّينْ، كُوڒْ إِجّْ زَّايْنغْ س يِيڒسْ إِ زِي د-نثْوَاخْڒقْ؟ ‏9 إِبَارْثِييّنْ ذ إِمِيذِييّنْ ذ إِعِيلَامِييّنْ ذ إِمزْذَاغْ ن مِيسُوپُوثَامِييَا ذ يَاهُوذِييَّا ذ كَابَّاذُوكِييَا، إِنِّي د-يُوسِينْ زِي جِّيهثْ ن بُونْطُوسْ ؤُ ن أَسِييَا،

‏10 ؤُڒَا ذ إِنِّي زِي جّْوَايهْ ن فْرِيخِييَا، بَامْفِيلِييَا ذ مِيصْرَا ؤُ زِي جّْوَايهْ ن لِيبِييَا غَارْ قَايْرَاوَانْ ؤُڒَا ذ إِنِّي د-يُوسِينْ زِي رُومَا، أَمْ ؤُذَاينْ أَمْ إِبَارَّانِييّنْ،

‏11 زِي كْرِيثَا، ذ وَاعْرَابنْ، أَقَا نشِّينْ نسْڒَا أَسنْ سَّاوَاڒنْ س يِيڒسْ نّغْ خْ ڒعْجَايبْ إِمقّْرَاننْ ن أَربِّي!“

‏12 مَارَّا ثْبهْثنْ ؤُشَا نَّانْ إِجّْ إِ ونّغْنِي: ”مِينْ إِخْسْ أَذْ يِينِي مَانْ أَيَا؟“

‏13 مَاشَا إِنّغْنِي سْثْهزَّانْ زَّايْسنْ، نَّانْ: ”نِيثْنِي سْوِينْ بِينُو ن جْذِيذْ.“

‏14 أَوَارْنِي أَسْ إِكَّارْ شِيمْعُونْ بُوطْرُوسْ، أَكْ-ذ حِيطَاشْ ن رُّوسُولْ، ؤُشَا إِسّْڭعّذْ ثْمِيجَّا نّسْ، إِنَّا أَسنْ:

”كنِّيوْ، أَ إِرْيَازنْ ذ ؤُذَاينْ ؤُ مَارَّا إِمزْذَاغْ ن ؤُرْشَالِيمْ، إِتّْخصَّا أَذْ سْنمْ أَيَا. سْڒمْ غَارْ وَاوَاڒنْ إِنُو!

‏15 إِوْذَانْ-أَ وَارْ سْشَارنْ شَا أَمْ مَامّشْ ذ أَومْ إِتّْغِيڒْ، مِينْزِي أَقَا-ت ذ ثَاسَاعّثْ ذ ثْڒَاثَا ن وَاسّْ.

‏16 مَاشَا أَيَا مِينْ إِتّْوَانَّانْ زڭْ ؤُنَابِي يُووِيلْ:

‏17 أَذْ يِيڒِي ذڭْ وُوسَّانْ إِنڭُّورَا، إِقَّارْ أَربِّي،

أَقَا أَذْ فَارّْغغْ أَرُّوحْ إِنُو خْ مَارَّا إِوْذَانْ،

أَذْ نبَّانْ إِحنْجِيرنْ ذ ثْحنْجِيرِينْ نْومْ،

إِبْڒِيغنْ نْومْ أَذْ ثْوَاڒَانْ ثِيمژْرَا،

ؤُشَا إِمقّْرَاننْ نْومْ أَذْ أَرْجَانْ ثِيرْجَا. ^▪  

‏18 ؤُڒَا خْ إِمْسخَّارنْ إِنُو ؤُ خْ ثِييَّا إِنُو

أَذْ فَارّْغغْ أَرُّوحْ إِنُو ذڭْ وُوسَّانْ نِّي،

ؤُشَا أَذْ نبَّانْ.

‏19 أَذْ وْشغْ لْمُوعْجِيزَاثْ ذڭْ ؤُجنَّا

ؤُڒَا ذ ڒعْڒَامَاثْ خْ ثمُّورْثْ:

إِذَامّنْ ذ ثْمسِّي ذ ڒفْوَارْ ن دّخَّانْ.

‏20 أَذْ ثذْوڒْ ثْفُوشْثْ غَارْ ثَادْجسْثْ،

ذ ثْزِيرِي غَارْ إِذَامّنْ،

قْبڒْ د غَا يَاسْ وَاسّْ إِمْغَارنْ إِعُودْجنْ ن سِيذِي.

‏21 ؤُشَا أَذْ يِيڒِي،

أَقَا مَارَّا وِي إِ غَا إِڒَاغَانْ خْ يِيسمْ ن سِيذِي،

أَذْ إِدَّارْ!‘ ^▪  

‏22 أَ إِرْيَازنْ، أَيْثْ ن إِسْرَائِيل، سْڒمْ أَوَاڒنْ-أَ: يشُّو نَّاصِيرِي، أَقَا-ث ذ بْنَاذمْ إِ ذ أَومْ د-إِتّْوَاسْشَاننْ زِي أَربِّي س ثْمڭَّا ثِيمقّْرَانِينْ ذ ڒعْڒَامَاثْ ذ لْمُوعْجِيزَاثْ إِ يڭَّا أَربِّي س ؤُفُوسْ نّسْ ذِي ڒْوسْثْ نْومْ، أَمْ مَامّشْ ثسّْنمْ كنِّيوْ، ‏23 أَقَا وَانِيثَا ذ إِجّنْ، ونِّي زَّايسْ إِتّْوَاحُوزنْ إِ مَانْ أَيَا عْلَاحْسَابْ ثُوسّْنَا ن أَربِّي قْبڒْ ؤُ عْلَاحْسَابْ ڒْخَاضَارْ نّسْ، أَقَا ثْسلّْممْ ث ذڭْ إِفَاسّنْ ن إِعفَّاننْ ؤُ ثْصلّْبمْ ث ؤُ ثنْغِيمْ ث. ^▪   ‏24 مَاشَا إِسّْنكَّارْ إِ-ث-إِ-د أَربِّي ؤُشَا إِسَّارْخُو إِسغْوَانْ ن ڒَاخَارْثْ، مَاغَارْ وَارْ إِزمَّارْ أَذْ إِتّْوَاطّفْ ذِي ڒَاخَارْثْ. ^▪   ‏25 مِينْزِي ذَاوُوذْ إِنَّا خَاسْ:

’ثُوغَا تّْوَاڒِيغْ سِيذِي زَّاثِي ذِي كُوڒْ أَمُورْ،

أَقَا-ث خْ يفُّوسْ إِنُو،

حِيمَا وَارْ تّْميِّيڒغْ. ^▪  

‏26 س ؤُينِّي إِفَارْحْ ؤُڒْ إِنُو ؤُشَا إِڒسْ إِنُو إِسْڒِيوْڒِيوْ،

وَاهْ، ؤُڒَا ذ أَرِّيمثْ إِنُو أَذْ ثَاريّحْ س ؤُسِيثمْ،

‏27 مِينْزِي وَارْ ثتّجِّيذْ ڒعْمَارْ إِنُو ذِي ڒَاخَارْثْ،

ؤُڒَا وَارْ ثتّجِّيذْ أَمْسِيزْذڭْ نّكْ أَذْ إِكِيشُّو.

‏28 شكْ ثسّشْنذْ أَيِي أَبْرِيذْ ن ثُوذَارْثْ،

شكْ أَذْ أَيِي ثشُّورذْ، أَ ڒفْرَاحثْ، س لْحَاضَارْ نّكْ.‘ ^▪  

‏29 أَ إِرْيَازنْ ثَاوْمَاثْ، أَقَا ثعْذڒْ أَيِي أَذْ أَومْ سِّيوْڒغْ س بْطَايْطَايْ خْ جذِّيثْنغْ ذَاوُوذْ، ونِّي أَقَا إِمُّوثْ، إِتّْوَانْضڒْ، ؤُشَا أَنْضڒْ نّسْ أَقَا-ث غَارْنغْ أَڒْ أَسّْ-أَ. ^▪   ‏30 مَاغَارْ نتَّا ثُوغَا ذ أَنَابِي، إِسّنْ بلِّي أَربِّي إِجِّيدْجْ أَسْ س إِشْثْ ن ثْجَادْجِيثْ:

’أَذْ سّْغِيمغْ إِجّنْ زِي ڒْغِيدْجثْ ن ثْعذِّيسْثْ نّكْ

خْ ڒْكُورْسِي ن ڒْعَارْشْ نّسْ.‘ ^▪  

‏31 أَمُّو ثُوغَا نتَّا إِزْوَارْ إِژْرَا ؤُشَا إِسِّيوڒْ خْ ثْنُوكْرَا ن لْمَاسِيحْ بلِّي وَارْ إِتّْوَاجِّي شَا ذِي ڒَاخَارْثْ ؤُ وَارْ ثتّْكِيشِّيوْ أَرِّيمثْ نّسْ. ^▪   ‏32 يشُّو وَانِيثَا أَقَا إِسّْنكَّارْ إِ-ث-إِ-د أَربِّي ؤُ نشِّينْ مَارَّا ذ ڒشْهُوذْ نّسْ. ^▪   ‏33 نتَّا إِتّْوَاسّْڭعّذْ أَڒْ أَفُوسْ أَفُوسِي ن أَربِّي ؤُشَا إِطّفْ لْوَاعْذْ ن أَرُّوحْ إِقدّْسنْ زِي ثْبَابَاثْ. أَقَا إِفَارّغْ ثَاوْهِيبْثْ-أَ ڒخُّو أَمْ مَامّشْ ثتّْوَاڒَامْ ؤُ ثتّسْڒَامْ. ^▪   ‏34 ذَاوُوذْ مَاشَا وَارْ إِڭعّذْ شَا غَارْ إِجنْوَانْ، مَاغَارْ إِنَّا:

’سِيذِي إِنَّا إِ سِيذِي إِنُو:

قِّيمْ خْ يفُّوسْ إِنُو، ^▪  

‏35 أَڒْ ذ غَا ڭّغْ ڒْعذْيَانْ نّكْ

ذ ثَانبْذَاثْ سَاذُو إِضَارنْ نّكْ.‘ ^▪  

‏36 أَذْ ثسّنْ مَارَّا ثَادَّارْثْ ن إِسْرَائِيل نِيشَانْ، بلِّي أَربِّي إِڭَّا يشُّو وَانِيثَا، ونِّي ثْصلّْبمْ كنِّيوْ، ذ سِيذِي ذ لْمَاسِيحْ.“

‏37 ڒَامِي سْڒِينْ مَانْ أَيَا، ثُوذفْ أَسنْ ذڭْ وُوڒْ نْسنْ ذَاخڒْ، نَّانْ إِ شِيمْعُونْ ؤُ إِ رُّوسُولْ نّغْنِي: ”مِينْ إِ غَا نڭّْ، أَ ثَاوْمَاثْ؟“ ^▫  ▪   ‏38 إِنَّا أَسنْ شِيمْعُونْ: ”ثُوبمْ، أجّْ كُوڒْ إِجّنْ زَّايْومْ أَذْ إِتّْوَاسغْضصْ س يِيسمْ ن سِيذِي يشُّو إِ وغْفَارْ ن دّْنُوبْ، ؤُشَا أَذْ ثْقبْڒمْ ثَاوْهِيبْثْ ن أَرُّوحْ إِقدّْسنْ. ‏39 مِينْزِي لْوَاعْذْ إِ كنِّيوْ ؤُ إِ ثَارْوَا نْومْ ؤُ إِ مَارَّا إِنِّي إِدْجَانْ غَارْ ڒَاڭّْوَاجْ، إِنِّي خْ إِ ذ غَا إِڒَاغَا أَربِّي نّغْ.“ ^▪   ‏40 ؤُشَا س وَاوَاڒنْ نّغْنِي أَطَّاسْ ثُوغَا إِسّقْنعْ ؤُ إِعْڒمْ أَسنْ، إِنَّا: ”نجْممْ زِي ثَاصِيڒثْ-أَ إِفَارْغنْ.“ ‏41 ثُوغَا جَارْ أَسنْ إِنِّي إِوجْذنْ أَذْ قبْڒنْ أَوَاڒْ نّسْ ؤُشَا تّْوَاسّْغضْصنْ نِيثْنِي. مَّارْنِينْ-د ذڭْ وَاسّْ نِّي عْڒَاحَاڒْ ثڒْثْ-أَڒَافْ ن ڒعْمُورْ.

‏42 نِيثْنِي قِّيمنْ صْبَارنْ ذِي ثْغُورِي ن رُّوسُولْ ؤُ شَارّْشنْ ذِي ثْژَادْجِيثْ ؤُ ذِي ثَارژِّيثْ ن وغْرُومْ.

‏43 كُوڒْ إِجّنْ ثُوذفْ إِ-ث ثِيڭّْوُوذِي ؤُشَا مْسَارنْثْ لْمُوعْجِيزَاثْ ذ ڒعْڒَامَاثْ أَطَّاسْ س إِفَاسّنْ ن رُّوسُولْ ذِي ؤُرْشَالِيمْ. ^▪   ‏44 مَارَّا إِنِّي يُومْننْ ثُوغَا أَثنْ مُوننْ جْمِيعْ، ثُوغَا غَارْسنْ كُوڒْشِي إِشَارْشْ. ^▪   ‏45 إِنِّي غَارْ إِدْجْ وَاڭْڒَا ثُوغَا زّْنُوزَانْ مَانْ أَيَا، ؤُشَا بطَّانْ عْلَاحْسَابْ مِينْ إِحْذَاجْ كُوڒْ إِجّْ. ^▪   ‏46 ثُوغَا تّْمُوننْ كُوڒْ أَسّْ ذِي زَّاوشْثْ ثَامقّْرَانْثْ س ذْمَامْ ذ إِجّنْ، تَّارژَّانْ أَغْرُومْ ذِي ثُوذْرِينْ، تّتّنْ جْمِيعْ س ڒفْرَاحثْ ؤُ س وُوڒْ إِصْفَا، ^▪   ‏47 أَمْ سّمْغَارَانْ ذِي أَربِّي ؤُ ثُوغَا تّْوَاسّْعِيزّنْ غَارْ مَارَّا إِوْذَانْ. كُوڒْ أَسّْ ثُوغَا سِيذِيثْنغْ يَارنِّي غَارْ ثْمسْمُونْثْ إِنِّي إِوْضنْ غَارْ ثُوذَارْثْ. ^▪