‏1 ستَّا ن وُوسَّانْ قْبڒْ ڒْعِيذْ ن ثْغَارْصْثْ ن ؤُسعْذُو، يُوسَا-د يشُّو غَارْ بَايْثْ-عَانْيَا، مَانِي ثُوغَا إِدْجْ أَلِيعَازَارْ، ونِّي د-إِسّْنكَّارْ يشُّو زِي ثَادَّارْثْ ن إِمتِّيننْ. ^▪   ‏2 ؤُشَا ڭِّينْ أَسْ ذِينْ إِجّْ ن ؤُمنْسِي. مَارْثَا ثُوغَا ثْسخَّارْ ؤُ أَلِيعَازَارْ ثُوغَا ذ إِجّنْ زڭْ إِنوْجِيونْ إِنِّي ثُوغَا أَكِيذسْ. ‏3 ثكْسِي-د مَارْيَامْ إِجّْ ن ؤُغَارَّافْ ن ڒفْوَاحثْ ن صّنْبلْ ثصْفَا ثِيغْڒَا، ثذْهنْ إِضَارنْ ن يشُّو، خنِّي ثمْسحْ إِضَارنْ نّسْ س ؤُشُووَّافْ نّسْ. ثَادَّارْثْ ثشُّورْ س ڒفْوَاحثْ ن زّشْثْ ن وذْهَانْ. ‏4 إِجّنْ زڭْ إِمحْضَارنْ نّسْ ونِّي ؤُمِي قَّارنْ يَاهُوذَا إِسْخَارِييُوطِي ونِّي ث إِ غَا إِغْذَارنْ، إِنَّا: ‏5 ”مَايمِّي وَارْ ثمّنْزْ شَا ڒفْوَاحثْ-أَ ن صّنْبلْ س ثڒْثْ مْيَا ن ذِينَارْ، حِيمَا أَذْ ثمّوْشْ إِ إِمزْڒَاضْ؟“ ^▪   ‏6 نتَّا إِنَّا أَيَا، وَارْ إِدْجِي مِينْزِي شْقَانْ ث إِمزْڒَاضْ، مَاشَا مِينْزِي نتَّا ذ أَشفَّارْ، ثُوغَا غَارسْ سّنْذُوقْ ؤُشَا إِتّكّسْ زِي مِينْ ذَايسْ إِمَّارْسنْ. ^▪   ‏7 يشُّو إِنَّا: ”جّمْ ت، أَقَا ثْخمّڒْ إِ-ت إِ وَاسّْ ن ونْضڒْ إِنُو. ^▪   ‏8 مِينْزِي إِمزْڒَاضْ أَقَا أَثنْ ڒبْذَا أَكِيذْومْ، مَاشَا نشّْ وَارْ كِيذْومْ دْجِيغْ إِ ڒبْذَا.“ ^▪  

‏9 أَطَّاسْ ن ڒْغَاشِي ن وُوذَاينْ سّْننْ بلِّي يشُّو أَقَا-ث ذِينِّي ؤُشَا ؤُسِينْ-د، وَارْ إِدْجِي حَاشَا زِي سِّيبّثْ ن يشُّو، مَاشَا عَاوذْ حِيمَا أَذْ ژَترنْ أَلِيعَازَارْ ونِّي د-إِسّْنكَّارْ زِي ثَادَّارْثْ ن إِمتِّيننْ. ^▪  

‏10 مْشَاوَارنْ إِمقّْرَاننْ ن إِكهَّاننْ حِيمَا أَذْ نْغنْ ؤُڒَا ذ أَلِيعَازَارْ،

‏11 مِينْزِي أَطَّاسْ ن وُوذَاينْ فّْغنْ-د زِي سِّيبّثْ نّسْ ؤُشَا ؤُمْننْ ذِي يشُّو.

‏12 ثِيوشَّا نّسْ، ؤُمِي سْڒِينْ أَطَّاسْ ن ڒْغَاشِي إِنِّي د يُوسِينْ غَارْ ڒْعِيذْ بلِّي يشُّو يُوسَا-د غَارْ ؤُرْشَالِيمْ، ^▪  

‏13 كْسِينْ إِفثْوَانْ ن ثِينِي ؤُشَا فّْغنْ حِيمَا أَذْ ث ڒْقَانْ، ڒَاغَانْ:

”ؤُصَانَّا!

سّعْذْ ن ونِّي د-يُوسِينْ

س يِيسمْ ن سِيذِي،

أَجدْجِيذْ ن إِسْرَائِيل!“ ^▪  

‏14 يُوفَا يشُّو إِجّْ ن وسْنُوسْ ؤُشَا إِنْيَا خَاسْ، أَمْ مَامّشْ ثُورَا:

‏15 ”وَارْ تّڭّْوذْ شَا، أَ ثَايدْجِيثْ صِيهْيُونْ،

خْزَارْ، أَجدْجِيذْ نّمْ أَذْ د-يَاسْ،

إِقِّيمْ خْ وسْنُوسْ، أَحنْجِيرْ ن ثغْيُوتْشْ.“ ^▪  

‏16 إِمحْضَارنْ نّسْ وَارْ فْهِيمنْ شَا ثِيمسْڒَايِينْ-أَ ذڭْ ؤُمزْوَارُو. مَاشَا أَوَارْنِي ڒَامِي إِتّْوَاسُوعْڒَا يشُّو، ڒخْذنِّي عقْڒنْ بلِّي مَانْ أَيَا ثُورَا خَاسْ ؤُشَا بلِّي نِيثْنِي ڭِّينْ زَّايسْ مَانْ أَيَا.

‏17 ڒْغَاشِي إِ ثُوغَا إِدْجَانْ أَكِيذسْ ؤُمِي إِڒَاغَا-د خْ أَلِيعَازَارْ زڭْ ونْضڒْ، ثُوغَا إِشْهذْ أَقَا نتَّا إِسّْنكَّارْ إِ-ث-إِ-د زِي ثَادَّارْثْ ن إِمتِّيننْ.

‏18 س مَانْ أَيَا إِڒْقَا ث-إِ-د ڒْغَاشِي أَمقّْرَانْ، مِينْزِي نِيثْنِي سْڒِينْ بلِّي إِڭَّا ڒعْڒَامثْ-أَ.

‏19 إِفَارِيسِييّنْ خنِّي نَّانْ جَارْ أَسنْ: ”مَا ثتّْوَاڒَامْ مْلِيحْ بلِّي كنِّيوْ ثتَّاكّْوَاضمْ غَارْ وَالُو، خْزَارمْ، أَقَا قَاعْ دُّونشْثْ ثضْفَارْ إِ-ث-إِ-د.“ ^▪  

‏20 ثُوغَا ذِينْ شَا ن إِوْذَانْ زِي ڒڭْنُوسْ جَارْ أَسنْ، إِنِّي د-إِڭعّْذنْ غَارْ ؤُرْشَالِيمْ حِيمَا أَذْ عبْذنْ ذِي ڒْعِيذْ. ^▪   ‏21 إِنَا رُوحنْ غَارْ فِيلِيبُّوسْ، ونِّي زِي ثنْذِينْثْ ن بَايْثْصَايْذَا ذِي لْجَالِيلْ، سّقْسَانْ ث، نَّانْ: ”أَ سِيذِي، نخْسْ أَذْ نْژَارْ يشُّو.“ ^▪   ‏22 يُوسَا-د فِيلِيبُّوسْ، إِنَّا ت إِ أَنْذْرَاوُوسْ، أَنْذْرَاوُوسْ ذ فِيلِيبُّوسْ عَاوذْ نَّانْ ت إِ يشُّو. ‏23 يشُّو يَارَّا-د، إِنَّا أَسنْ: ”أَقَا ثِيوضْ-د ثْسَاعّثْ إِ ذِي إِ غَا إِتّْوَاسّْعُودْجْ مِّيسْ ن بْنَاذمْ. ^▪   ‏24 س ثِيذتّْ، س ثِيذتّْ، نشّْ أَذْ أَومْ إِنِيغْ: مَاڒَا وَارْ د-إِوْضِي ڒْحبّْ ن يِيرْذنْ ذِي ثمُّورْثْ، أَذْ إِمّثْ، خنِّي أَذْ إِقِّيمْ وحّْذسْ، مَاشَا مَاڒَا إِمُّوثْ، خنِّي أَذْ د-يَاوِي ڒْغِيدْجثْ أَطَّاسْ. ^▪   ‏25 ونِّي إِتّخْسنْ ثُوذَارْثْ نّسْ، أَذْ ت إِخْسَارْ ؤُ ونِّي إِ غَا إِشَارْهنْ ثُوذَارْثْ نّسْ ذِي دُّونشْثْ-أَ، أَذْ ت إِخمّڒْ إِ ثُوذَارْثْ إِتّْذُومَانْ. ^▪   ‏26 مَاڒَا شَا ن يِيجّنْ إِسخَّارْ أَيِي، أجّْ إِ-ث أَذْ أَيِي إِضْفَارْ. مَانِي إِ غَا إِڒِيغْ نشّْ، ذِينِّي إِ غَا يِيڒِي عَاوذْ ؤُمْسخَّارْ إِنُو. مَاڒَا شَا ن إِجّنْ إِخْذمْ أَيِي، أَذْ ث إِشنّعْ ثْبَابَاثْ. ^▪   ‏27 ڒخُّو ؤُڒْ إِنُو إِنّهْوڒْ، مِينْ غَا إِنِيغْ؟ أَ بَابَا، سنْجمْ أَيِي زِي ثْسَاعّثْ-أَ؟ مَاشَا خْ ؤُينِّي إِ د-ؤُسِيغْ غَارْ ثْسَاعّثْ-أَ. ^▪   ‏28 أَ ثَابَابَاثْ، سْعُودْجِي إِسمْ نّكْ.“ خنِّي ثُوسَا-د إِشْثْ ن ثْمِيجَّا زڭْ ؤُجنَّا: ”سْعُودْجغْ ث ؤُشَا أَذْ ث سْعُودْجغْ عَاوذْ!“ ‏29 ڒْغَاشِي إِ ثُوغَا إِبدّنْ ذِينْ إِسْڒَا إِ-ت، نَّانْ نِيثْنِي: ”أَقَا إِمْسَارْ وَاجَّاجْ.“ إِنّغْنِي نَّانْ: ”أَقَا إِسِّيوڒْ-د إِجّْ ن لْمَالَاكْ أَكِيذسْ.“

‏30 يَارَّا-د يشُّو، إِنَّا أَسنْ: ”ثْمِيجَّا أَيَا وَارْ ثدْجِي شَا ذِي طّْوعْ إِنُو مَاشَا ذِي طّْوعْ نْومْ. ^▪   ‏31 ڒخُّو أَذْ يِيڒِي ڒْحُوكْمْ خْ دُّونشْثْ-أَ. ڒخُّو أَذْ إِمّنْضَارْ ؤُمقّْرَانْ ن دُّونشْثْ-أَ غَارْ بَارَّا. ^▪   ‏32 ؤُ نشّْ، خْ مِينِّي إِ غَا تّْوَاسْڭعّْذغْ زِي ثمُّورْثْ، أَذْ غَارِي د-جبْذغْ مَارَّا.“ ^▪   ‏33 إِنَّا مَانْ أَيَا حِيمَا أَذْ إِسّْشنْ غَارْ مَانْ ڒْموْثْ إِ غَا إِمّثْ.

‏34 ڒْغَاشِي يَارَّا-د خَاسْ: ”نشِّينْ نسْڒَا زِي شَّارِيعَا أَقَا لْمَاسِيحْ أَذْ إِقِّيمْ إِ ڒبْذَا. إِ مَامّشْ ثقَّارذْ شكْ بلِّي إِتّْخصَّا إِ مِّيسْ ن بْنَاذمْ أَذْ إِتّْوَاسّْڭعّذْ؟ مِينْ إِعْنَا مِّيسْ-أَ ن بْنَاذمْ؟“ ^▪   ‏35 يشُّو إِنَّا أَسنْ: ”ثَافَاوْثْ أَذْ ثِيڒِي أَكِيذْومْ ذْرُوسْ ن ڒْوقْثْ عَاذْ. ؤُيُورمْ، ڒَامِي عَاذْ غَارْومْ ثَافَاوْثْ، حِيمَا وَارْ كنِّيوْ ثطّفْ ثَادْجسْثْ. ونِّي إِڭُّورنْ ذِي ثَادْجسْثْ، وَارْ إِسِّينْ مَانِي إِڭُّورْ. ^▪   ‏36 أَمْنمْ ذِي ثْفَاوْثْ مَاحنْذْ ثَافَاوْثْ عَاذْ أَقَا-ت غَارْومْ، حِيمَا كنِّيوْ أَذْ ثِيڒِيمْ ثَارْوَا ن ثْفَاوْثْ.“ أَمُّو إِ ثُوغَا إِسَّاوَاڒْ يشُّو، ڒخْذنِّي يُويُورْ ؤُشَا إِنُّوفَارْ زَّايْسنْ.

‏37 وَاخَّا ثُوغَا نتَّا إِتّڭّْ مَارَّا ڒعْڒَامَاثْ-أَ زَّاثْسنْ، وَاخَّا أَمنِّي نِيثْنِي وَارْ زَّايسْ ؤُمِيننْ، ‏38 حِيمَا أَذْ إِتّْوَاكمّڒْ وَاوَاڒْ ن ؤُنَابِي إِشَاعْيَا إِ إِنَّانْ:

”أَ سِيذِي، وِي يُومْننْ س ڒخْبَارْ نّغْ

ؤُ إِ ؤُمِي إِتّْوَاسَّارْڭبْ ؤُفُوسْ ن سِيذِي؟“ ^▪  

‏39 س ؤُينِّي وَارْ زمَّارنْ أَذْ أَمْننْ، مِينْزِي إِشَاعْيَا إِنَّا عَاوذْ:

‏40 ”نِيثْنِي سّْذَارْغْڒنْ ثِيطَّاوِينْ نْسنْ،

سّقْسحنْ ؤُڒَاونْ نْسنْ،

حِيمَا وَارْ ثتّْوِيڒِينْ س ثِيطَّاوِينْ نْسنْ،

وَارْ فهّْمنْ س وُوڒْ نْسنْ،

أَذْ ثُوبنْ ؤُشَا نشّْ أَذْ ثنْ سّْڭنْفِيغْ.“ ^▪  

‏41 إِنَّا إِشَاعْيَا أَمُّو، مِينْزِي إِژْرَا أَعُودْجِي نّسْ ؤُشَا ثُوغَا إِسَّاوَاڒْ خَاسْ. ^▪   ‏42 وَاخَّا أَمنِّي ؤُمْننْ زَّايسْ أَطَّاسْ ن إِمقّْرَاننْ ن ڒْڭنْسْ، مَاشَا س سِّيبّثْ ن إِفَارِيسِييّنْ، وَارْ زَّايسْ شهْذنْ شَا، حِيمَا وَارْ خَاسنْ تِّيژّْڒنْ زِي ثمْزِيذَا. ^▪   ‏43 مِينْزِي نِيثْنِي ثُوغَا خْسنْ أَعُودْجِي زڭْ إِوْذَانْ خْ ؤُعُودْجِي زِي أَربِّي. ^▪  

‏44 مَاشَا يشُّو إِڒَاغَا، إِنَّا: ”ونِّي ذَايِي إِتَّامْننْ، وَارْ ذَايِي إِتِّيمنْ شَا، مَاشَا ذڭْ ونِّي ذ أَيِي د-إِسّكّنْ. ‏45 ونِّي ذ أَيِي إِژْرِينْ، إِژْرَا ونِّي ذ أَيِي د-إِسّكّنْ. ^▪   ‏46 ؤُسِيغْ-د ذ ثَافَاوْثْ غَارْ دُّونشْثْ، حِيمَا كُوڒْ إِجّنْ ونِّي ذَايِي إِتَّامْننْ، وَارْ إِتّْغِيمِي شَا عَاذْ ذِي ثَادْجسْثْ. ^▪   ‏47 مَاڒَا شَا ن يِيجّنْ إِسْڒَا إِ وَاوَاڒنْ إِنُو، مَاشَا وَارْ ذَايْسنْ يطِّيفْ، نشّْ وَارْ خَاسْ حكّْمغْ شَا. نشّْ وَارْ د-ؤُسِيغْ شَا حِيمَا أَذْ حكْمغْ خْ دُّونشْثْ، مَاشَا حِيمَا أَذْ سّْنجْمغْ دُّونشْثْ. ^▪   ‏48 ونِّي ذ أَيِي إِسّحْقَارنْ ؤُشَا وَارْ إِقْبِيڒْ أَوَاڒنْ إِنُو، غَارسْ ونِّي خَاسْ إِ غَا إِحكْمنْ: أَوَاڒْ إِ نِّيغْ، أَذْ خَاسْ إِحْكمْ ذڭْ وَاسّْ أَنڭَّارُو. ^▪   ‏49 مِينْزِي نشّْ وَارْ سِّيوْڒغْ شَا زِي غَارِي، مَاشَا ثَابَابَاثْ ونِّي ذ أَيِي-د-إِسّكّنْ إِوْشَا أَيِي إِشْثْ ن ثوْصيّثْ خْ مِينْ غَا إِنِيغْ ذ مِينْ خفْ غَا سِّيوْڒغْ، ^▪   ‏50 ؤُ نشّْ سّْنغْ ثِيوصَّا نّسْ، أَقَا أَثنْثْ ذ ثُوذَارْثْ إِتّْذُومَانْ. س ؤُيَا، مِينْ سَّاوَاڒغْ، سَّاوَاڒغْ ث أَمْ مَامّشْ ذ أَيِي إِنَّا بَابَا.“