‏1 أَوَارْنِي مَانْ أَيَا إِرُوحْ يشُّو غَارْ ؤُجمَّاضْ ن ڒبْحَارْ ن لْجَالِيلْ، ونِّي ؤُمِي قَّارنْ عَاوذْ ڒبْحَارْ ن\add* ثِيبِيرِييَاسْ. ‏2 إِضْفَارْ إِ-ث-إِ-د إِجّْ ن ڒْغَاشِي ذ أَمقّْرَانْ، مِينْزِي ژْرِينْ ڒعْڒَامَاثْ إِ إِڭَّا إِ إِمهْڒَاشْ. ‏3 ڒخْذنِّي إِڭعّذْ يشُّو غَارْ وذْرَارْ ؤُشَا إِقِّيمْ ذِينِّي أَكْ-ذ إِمحْضَارنْ نّسْ. ‏4 ثَاغَارْصْثْ ن ؤُسعْذُو، ڒْعِيذْ ن وُوذَاينْ، وَارْ ذ أَسْ إِقِّيمْ شَا. ^▪  

‏5 ڒخْذنِّي إِسّْڭعّذْ يشُّو ثِيطَّاوِينْ نّسْ ؤُشَا، ؤُمِي إِژْرَا إِجّْ ن ڒْغَاشِي ذ أَمقّْرَانْ يُوسَا-د غَارسْ، إِنَّا إِ فِيلِيبُّوسْ: ”مَانِيسْ إِ غَا نْسغْ أَغْرُومْ، حِيمَا أَذْ شّنْ إِنَا؟“ ^▪   ‏6 إِنَّا أَمُّو حِيمَا أَذْ ث إِجَارّبْ، مِينْزِي نتَّا إِسّنْ مِينْ غَا يڭّْ. ‏7 يَارَّا-د خَاسْ فِيلِيبُّوسْ: ”أَغْرُومْ س مِيثَاينْ ن ذِينَارْ وَارْ ثنْ إِتّْقذِّي حِيمَا أَذْ إِكْسِي كُوڒْ إِجّنْ زَّايْسنْ مْغِيرْ ذْرُوسْ وَاهَا.“ ‏8 إِجّنْ زڭْ إِمحْضَارنْ نّسْ، نتَّا ذ أَنْذْرَاوُوسْ، ؤُمَاسْ ن شِيمْعُونْ بُوطْرُوسْ، إِنَّا أَسْ: ‏9 ”أَقَا ذَا إِجّْ ن ؤُحنْجِيرْ غَارسْ خمْسَا ن ثشْنِيفِينْ ن إِمنْذِي ذ ثْنَاينْ ن إِسڒْمَانْ، مَاشَا مَانَاوْيَا إِ مَارَّا إِنَا؟“

‏10 يشُّو إِنَّا أَسنْ: ”سْغِيممْ إِوْذَانْ.“ ثُوغَا ذِينْ أَطَّاسْ ن ڒحْثِيشْ ذڭْ ومْشَانْ نِّي. س ؤُينِّي قِّيمنْ يرْيَازنْ، أَقَا أَثنْ ذِي خمْسَا-أَڒَافْ إِذْسنْ.

‏11 يشُّو إِكْسِي ثِيشْنِيفِينْ، ؤُ أَوَارْنِي إِقَاذَا، إِبْضَا إِ-ثنْثْ خْ ينِّي ذِينْ إِقِّيمنْ. إِبْضَا نتَّا أَمنِّي عَاوذْ إِسڒْمَانْ عْلَاحْسَابْ أَنشْثْ إِخْسنْ أَذْ شّنْ. ^▪  

‏12 ڒَامِي جِّيوْننْ، إِنَّا إِ إِمحْضَارنْ نّسْ: ”يْرُومْ إِڒقّْوَازْ إِشطّنْ، حِيمَا ؤُڒَا ذ إِشْثْ ن ڒْحَاجّثْ وَارْ ثتّْضيِّيعْ!“

‏13 يْرُونْ ثنْ خنِّي ؤُشَا عمَّارنْ ثنْعَاشْ ن ثْسُودْجَاثِينْ س إِڒقّْوَازْ نِّي إِشطّنْ غَارْ ينِّي إِشِّينْ زِي خمْسَا ن ثشْنِيفِينْ ن إِمنْذِي.

‏14 ڒَامِي ژْرِينْ إِوْذَانْ ڒعْڒَامثْ إِ إِڭَّا يشُّو، نَّانْ: ”وَا ذ ثِيذتّْ ذ أَنَابِي إِ إِڭُّورنْ أَذْ د-يَاسْ غَارْ دُّونشْثْ.“ ^▪  

‏15 ؤُمِي إِسّنْ يشُّو، بلِّي أَذْ د-أَسنْ نِيثْنِي، أَذْ ث طّْفنْ حِيمَا أَذْ ث ڭّنْ ذ أَجدْجِيذْ، خنِّي إِنّجْرَا غَارْ وذْرَارْ، حَاشَا نتَّا وحّْذسْ.

‏16 ڒَامِي د-ثوْضَا ثْمذِّيثْ، هْوَانْ-د إِمحْضَارنْ نّسْ غَارْ ڒبْحَارْ، ^▪  

‏17 ؤُ أَوَارْنِي ڒَامِي نْيِينْ ذِي ثْغَارَّاپُوثْ، قضْعنْ ڒبْحَارْ غَارْ كَافَارْنَاحُومْ. ثْقَارّبْ-د ثَادْجسْثْ ؤُ يشُّو ثُوغَا عَاذْ وَارْ غَارْسنْ د-يُوسِي.

‏18 ڒبْحَارْ إِنّهْوڒْ خَاسنْ مِينْزِي أَسمِّيضْ ثُوغَا إِتّْصُوضْ أَطَّاسْ.

‏19 أَڒَامِي ثُوغَا قدّْفنْ ڒْقدّْ ن عْڒَاحَاڒْ خمْسَا ؤُ-عِيشْرِينْ أَڒْ ثْڒَاثِينْ ’إِسْثَاذِييّنْ‘، عْڒَاحَاڒْ خمْسَا كِيلُومِيثْرْ، ژْرِينْ يشُّو إِڭُّورْ خْ ڒبْحَارْ، إِتّْقَارَّابْ-د غَارْ ثْغَارَّاپُوثْ، ؤُشَا ڭّْوذنْ. ^▫   ‏20 إِنَّا أَسنْ: ”أَقَا ذ نشّْ، وَارْ تّڭّْوذمْ شَا.“ ‏21 نِيثْنِي خْسنْ أَذْ ث سّْقبْڒنْ ذِي ثْغَارَّاپُوثْ ؤُشَا خنِّي ثِيوضْ-د ثْغَارَّاپُوثْ ذغْيَا غَارْ ڒْبَارّْ إِ غَارْ إِدْجْ تّْرَاحنْ.

‏22 ثِيوشَّا نّسْ إِژْرَا ڒْغَاشِي نِّي إِبدّْ خْ ؤُجمَّاضْ ن ڒبْحَارْ، بلِّي وَارْ ذِينْ ثُوغِي ؤُڒَا ذ إِشْثْ ن ثْغَارَّاپُوثْ نّغْنِيثْ مْغِيرْ إِشْثنْ، ثنِّي مَانِي ذَايسْ ؤُذْفنْ إِمحْضَارنْ نّسْ، ؤُ يشُّو وَارْ يُوذِيفْ شَا ذِي ثْغَارَّاپُوثْ أَكْ-ذ إِمحْضَارنْ نّسْ. ‏23 مَاشَا ؤُسِينْثْ-إِ-د ثْغَارُّوبَا نّغْنِي زِي ثِيبِيرِييَاسْ زَّاثْ إِ ومْشَانْ مَانِي شِّينْ أَغْرُومْ نِّي إِبَاركْ يشُّو. ‏24 ڒَامِي إِژْرَا ڒْغَاشِي بلِّي يشُّو وَارْ ذِينْ إِدْجِي عَاذْ ؤُڒَا ذ إِمحْضَارنْ نّسْ، ؤُذْفنْ ؤُڒَا ذ نِيثْنِي ذِي ثْغَارُّوبَا أَيَا ؤُشَا ؤُسِينْ-د غَارْ كَافَارْنَاحُومْ أَرزُّونْ خْ يشُّو.

‏25 ڒَامِي ث ؤُفِينْ خْ ؤُجمَّاضْ ن ڒبْحَارْ، نَّانْ أَسْ: ”أَ أَمْسڒْمَاذْ نّغْ، مڒْمِي د-ثُوسِيذْ ذَا؟“ ‏26 يشُّو يَارَّا-د خَاسنْ، إِنَّا: ”س ثِيذتّْ، س ثِيذتّْ، نشّْ أَذْ أَومْ إِنِيغْ: كنِّيوْ ثَارزُّومْ خَافِي، وَارْ إِدْجِي ؤُمِي ثژْرِيمْ ڒعْڒَامَاثْ، مَاشَا ؤُمِي ثشِّيمْ أَغْرُومْ ؤُشَا ثجِّيوْنمْ. ‏27 وَارْ تّْخذْممْ إِ مَاشَّا إِخسَّارنْ، مَاشَا إِ مَاشَّا إِتّْغِيمَانْ إِ ثُوذَارْثْ إِتّْذُومَانْ، ثنِّي ذ أَومْ إِ غَا إِوْشْ مِّيسْ ن بْنَاذمْ، مِينْزِي أَربِّي، ثَابَابَاثْ، إِسَّارْسْ طَّابعْ نّسْ خَاسْ.“ ^▪   ‏28 نَّانْ أَسْ: ”مِينْ إِ غَا نڭّْ، حِيمَا أَذْ نْزمَّارْ أَذْ نڭّْ ڒخْذَايمْ ن أَربِّي؟“ ‏29 يَارَّا-د يشُّو، إِنَّا أَسنْ: ”ثَا ذ ڒْخذْمثْ ن أَربِّي، مَاحنْذْ أَذْ ثَامْنمْ ذڭْ ونِّي د-إِسّكّْ نتَّا.“ ^▪   ‏30 خَاسْ ؤُشَا نَّانْ أَسْ: ”مَانْ ڒعْڒَامثْ إِ غَا ثڭّذْ خنِّي حِيمَا أَذْ ث نْژَارْ ؤُشَا أَذْ زَّايكْ نَامنْ؟ مَانْ ڒْخذْمثْ إِ غَا ثڭّذْ؟ ^▪   ‏31 ڒجْذُوذْ نّغْ شِّينْ ’مَانَّا‘ ذِي ڒخْڒَا أَمْ مَامّشْ ثُورَا: ’نتَّا إِوْشَا أَسنْ-د أَغْرُومْ زڭْ ؤُجنَّا حِيمَا أَذْ ث شّنْ‘.“ ^▪  

‏32 إِنَّا أَسنْ يشُّو: ”س ثِيذتّْ، س ثِيذتّْ، نشّْ أَذْ أَومْ إِنِيغْ: وَارْ إِدْجِي ذ مُوسَا إِ ذ أَومْ إِوْشِينْ أَغْرُومْ زڭْ ؤُجنَّا، مَاشَا بَابَا إِتِّيشْ أَومْ أَغْرُومْ ن ثِيذتّْ زڭْ ؤُجنَّا. ‏33 مِينْزِي أَغْرُومْ ن أَربِّي ذ نتَّا ونِّي د-إِهكّْوَانْ زڭْ ؤُجنَّا ؤُشَا إِتِّيشْ ثُوذَارْثْ إِ دُّونشْثْ.“ ‏34 نَّانْ أَسْ: ”أَ سِيذِيثْنغْ، أوْشْ أَنغْ-د ڒبْذَا أَغْرُومْ-أَ.“ ‏35 يشُّو إِنَّا أَسنْ: ”نشّْ ذ أَغْرُومْ إِدَّارنْ. ونِّي غَارِي د غَا يَاسنْ، وَارْ إِتّْڒِيژْ عمَّارْصْ ؤُ ونِّي ذَايِي إِ غَا يَامْننْ وَارْ إِتّْفِيذِي عمَّارْصْ. ^▪   ‏36 مَاشَا نشّْ نِّيغْ أَومْ، وَاخَّا كنِّيوْ ثژْرِيمْ أَيِي، وَارْ ثُومِينمْ شَا. ‏37 كُوڒْ إِجّْ إِ ذ أَيِي غَا إِوْشْ بَابَا، أَذْ غَارِي د-يَاسْ ؤُ ونِّي غَارِي د غَا يَاسنْ، وَارْ ث سُّوفُّوغغْ شَا غَارْ بَارَّا. ‏38 مِينْزِي نشّْ هْوِيغْ-د زڭْ ؤُجنَّا، وَارْ إِدْجِي شَا حِيمَا أَذْ ڭّغْ مِينْ خْسغْ نشّْ، مَاشَا حِيمَا أَذْ ڭّغْ مِينْ إِخْسْ ونِّي ذ أَيِي د-إِسّكّنْ. ^▪   ‏39 ذ مَانْ أَيَا مِينْ إِخْسْ ونِّي ذ أَيِي د-إِسّكّنْ، أَقَا نشّْ وَارْ سّْودَّارغْ ؤُڒَا ذ إِجّنْ زڭْ ينِّي ذ أَيِي إِوْشَا، مَاشَا أَذْ ث-إِ-د-سّْنكَّارغْ ذڭْ وَاسّْ أَنڭَّارُو. ^▪   ‏40 ذ مَانْ أَيَا مِينْ إِخْسْ بَابَا ونِّي ذ أَيِي د-إِسّكّنْ، أَقَا كُوڒْ إِجّْ ونِّي إِ غَا إِژَارنْ ثَاممِّيثْ ؤُشَا أَذْ ذَايسْ يَامنْ، أَذْ غَارسْ ثِيڒِي ثُوذَارْثْ إِتّْذُومَانْ ؤُشَا أَذْ ث-إِ-د-سّْنكَّارغْ ذڭْ وَاسّْ أَنڭَّارُو.“ ^▪  

‏41 ؤُذَاينْ شثْشَانْ زَّايسْ، مِينْزِي إِنَّا: ”نشّْ ذ أَغْرُومْ إِ د-إِهْوَانْ زڭْ ؤُجنَّا.“ ‏42 نَّانْ: ”مَا ذ وَانِيثَا وَارْ إِدْجِي بُو ذ يشُّو، مِّيسْ ن يُوسُوفْ، نشِّينْ نسّنْ بَابَاسْ ذ يمَّاسْ؟ مَامّشْ إِ غَا يِينِي: ’نشّْ هْوِيغْ-د زڭْ ؤُجنَّا؟‘ “ ^▪   ‏43 يشُّو يَارَّا-د خَاسنْ، إِنَّا: ”وَارْ تّْشثْشَامْ شَا جَارْ أَومْ. ‏44 وَارْ إِزمَّارْ ؤُڒَا ذ إِجّْ أَذْ غَارِي د-يَاسْ، مْغِيرْ مَاڒَا إِجبْذْ إِ-ث-إِ-د ثْبَابَاثْ ونِّي ذ أَيِي د-إِسّكّنْ ؤُشَا نشّْ أَذْ ث-إِ-د-سّْنكَّارغْ ذڭْ وَاسّْ أَنڭَّارُو. ^▪   ‏45 أَقَا ثُورَا ذڭْ إِذْلِيسنْ ن إِنَابِييّنْ: ’نِيثْنِي مَارَّا أَذْ تّْوَاسْڒمْذنْ زِي أَربِّي!‘ س ؤُينِّي كُوڒْ إِجّْ ونِّي ذ أَسْ إِسْڒِينْ زِي ثْبَابَاثْ ؤُ إِڒْمذْ إِ-ث زَّايسْ، أَذْ غَارِي د-يَاسْ. ^▪   ‏46 ؤُڒَا ذ إِجّْ وَارْ إِژْرِي ثَابَابَاثْ، مْغِيرْ ونِّي إِدْجَانْ زِي أَربِّي ذ نتَّا إِ إِژْرِينْ ثَابَابَاثْ. ^▪   ‏47 س ثِيذتّْ، س ثِيذتّْ، نشّْ أَذْ أَومْ إِنِيغْ: ونِّي ذَايِي إِتَّامْننْ، أَذْ غَارسْ ثِيڒِي ثُوذَارْثْ إِتّْذُومَانْ. ^▪   ‏48 نشّْ ذ أَغْرُومْ إِدَّارنْ. ‏49 ڒجْذُوذْ نْومْ شِّينْ ’مَانَّا‘ ذِي ڒخْڒَا ؤُشَا مُّوثنْ. ^▪   ‏50 مَاشَا مَانْ أَيَا ذ أَغْرُومْ إِ د-إِهْوَانْ زڭْ ؤُجنَّا، حِيمَا بْنَاذمْ أَذْ زَّايسْ يشّْ، وَارْ إِتّْمتِّي شَا. ‏51 نشّْ ذ أَغْرُومْ إِدَّارنْ إِ د-إِهْوَانْ زڭْ ؤُجنَّا. مَاڒَا إِجّنْ إِشَّا زڭْ وغْرُومْ-أَ، أَذْ إِدَّارْ إِ ڒبْذَا. أَغْرُومْ نِّي إِ غَا وْشغْ نشّْ، نتَّا ذ دَّاثْ إِنُو إِ غَا وْشغْ إِ ثُوذَارْثْ ن دُّونشْثْ.“ ^▪  

‏52 ؤُذَاينْ مّنْغنْ جَارْ أَسنْ، نَّانْ: ”مَامّشْ إِ غَا يڭّْ وَانِيثَا أَذْ أَنغْ إِوْشْ دَّاثْ نّسْ حِيمَا أَذْ ث نشّْ؟“ ^▪   ‏53 إِنَّا أَسنْ يشُّو: ”س ثِيذتّْ، س ثِيذتّْ، نشّْ أَذْ أَومْ إِنِيغْ: مَاڒَا وَارْ ثشِّيمْ شَا دَّاثْ ن مِّيسْ ن بْنَاذمْ ؤُ وَارْ ثسْوِيمْ إِذَامّنْ نّسْ، وَارْ غَارْومْ بُو ثُوذَارْثْ ذڭْ إِخفْ نْومْ. ‏54 ونِّي إِ غَا إِشّنْ دَّاثْ إِنُو ؤُشَا أَذْ إِسُو إِذَامّنْ إِنُو، أَذْ غَارسْ ثِيڒِي ثُوذَارْثْ إِتّْذُومَانْ ؤُ نشّْ أَذْ ث-إِ-د-سّْنكَّارغْ ذڭْ وَاسّْ أَنڭَّارُو. ^▪   ‏55 مِينْزِي دَّاثْ إِنُو ذ مَاشَّا ذ ثِيذتّْ ؤُشَا إِذَامّنْ إِنُو ذ ثِيسِّيثْ ذ ثِيذتّْ. ‏56 ونِّي إِ غَا إِشّنْ دَّاثْ إِنُو ؤُشَا أَذْ إِسُو إِذَامّنْ إِنُو، أَذْ ذَايِي إِقِّيمْ ؤُ نشّْ ذَايسْ. ‏57 أَمْ مَامّشْ ذ أَيِي د-إِسّكّْ ثْبَابَاثْ إِدَّارنْ ؤُشَا نشّْ دَّارغْ زِي ثْبَابَاثْ، أَمُّو عَاوذْ ونِّي زَّايِي إِ غَا إِشّنْ أَذْ زَّايِي إِدَّارْ. ‏58 وَا ذ أَغْرُومْ إِ د-إِهْوَانْ زڭْ ؤُجنَّا. وَارْ إِدْجِي شَا أَمشْنَاوْ مَامّشْ شِّينْ ڒجْذُوذْ ’مَانَّا‘ ؤُشَا مُّوثنْ. ونِّي إِ غَا إِشّنْ أَغْرُومْ-أَ، أَذْ إِدَّارْ إِ ڒبْذَا.“ ^▪   ‏59 إِنَّا مَانْ أَيَا ذِي ثمْزِيذَا أَمْ ثُوغَا إِسّڒْمَاذْ ذِي كَافَارْنَاحُومْ.

‏60 أَطَّاسْ ن إِمحْضَارنْ نّسْ، ؤُمِي سْڒِينْ مَانْ أَيَا، نَّانْ: ”أَوَاڒْ-أَ إِقْسحْ. وِي إِزمَّارنْ أَذْ أَسْ إِسڒْ؟“ ‏61 مَاشَا يشُّو إِسّنْ ذڭْ إِخفْ نّسْ، أَقَا إِمحْضَارنْ نّسْ شثْشَانْ خْ مَانْ أَيَا، ؤُشَا إِنَّا أَسنْ: ”مَا مَانْ أَيَا ذ ڒفْضِيحثْ إِ كنِّيوْ؟ ‏62 إِ مَامّشْ مَاڒَا ثژْرِيمْ مِّيسْ ن بْنَاذمْ إِتّْڭعَّاذْ غَارْ مَانِي إِڒَا إِدْجْ قْبڒْ؟ ^▪   ‏63 أَرُّوحْ ذ نتَّا إِسّدَّارنْ. دَّاثْ وَارْ إِنفّعْ إِ وَالُو. أَوَاڒنْ إِ ذ أَومْ نِّيغْ أَقَا أَثنْ ذ أَرُّوحْ ذ ثُوذَارْثْ. ^▪   ‏64 مَاشَا أَقَا ذِينْ شَا جَارْ أَومْ إِنِّي وَارْ يُومِيننْ.“ مِينْزِي يشُّو إِسّنْ زڭْ ؤُمزْوَارُو مَانْ ينْ إِدْجَانْ إِنِّي وَارْ يُومِيننْ ؤُ مَانْ ونْ ث إِ غَا إِغْذَارنْ. ^▪   ‏65 إِنَّا أَسنْ: ”س ؤُينِّي نِّيغْ أَومْ: وَارْ إِزمَّارْ ؤُڒَا ذ إِجّْ أَذْ غَارِي د-يَاسْ مْغِيرْ مَاڒَا ثمّوْشْ أَسْ زِي بَابَا.“ ^▪  

‏66 زِي ڒْوقْثْ نِّي ذوْڒنْ أَطَّاسْ زڭْ إِمحْضَارنْ نّسْ غَارْ ضفَّارْ، وَارْ قِّيمنْ شَا ڭُّورنْ أَكِيذسْ. ‏67 إِنَّا يشُّو إِ ثنْعَاشْ: ”مَا ؤُڒَا ذ كنِّيوْ ثخْسمْ أَذْ ثُويُورمْ؟“ ‏68 شِيمْعُونْ بُوطْرُوسْ يَارَّا-د خَاسْ، إِنَّا: ”أَ سِيذِي، وِي غَارْ إِ غَا نْرَاحْ؟ شكْ غَاركْ أَوَاڒنْ ن ثُوذَارْثْ إِتّْذُومَانْ، ^▪   ‏69 ؤُ نشِّينْ نُومنْ ؤُ نسّنْ أَقَا شكْ ذ لْمَاسِيحْ، مِّيسْ ن أَربِّي إِدَّارنْ.“ ^▪  

‏70 يشُّو يَارَّا-د خَاسنْ: ”مَا وَارْ إِدْجِي ذ نشّْ إِ كنِّيوْ د-إِخْضَارنْ ذ ثنْعَاشْ؟ ؤُشَا إِجّنْ زَّايْومْ ذ شِّيطَانْ.“ ^▪   ‏71 إِنَّا مَانْ أَيَا خْ يَاهُوذَا، مِّيسْ ن شِيمْعُونْ إِسْخَارِييُوطِي، مِينْزِي وَانِيثَا ثُوغَا إِخْسْ أَذْ ث إِسلّمْ. نتَّا ذ إِجّنْ زِي ثنْعَاشْ.