‏1 ؤُمِي إِعْذُو سّبْثْ، ثسْغَا مَارْيَامْ ن مَاجْذَالَا ذ مَارْيَامْ، يمَّاسْ ن يَاعْقُوبْ، ذ سَالُومِي ڒعْطُورْ حِيمَا أَذْ ث ذهْننْثْ. ^▪   ‏2 غَارْ ضّْبحْ زِيشْ ذڭْ وَاسّْ أَمزْوَارْ ن سِيمَانَا إِوْضنْثْ-إِ-د غَارْ ونْضڒْ أَڒَامِي د-ثنْقَارْ ثْفُوشْثْ. ‏3 نَّانْثْ جَارْ أَسنْثْ: ”وِي ذ أَنغْ إِ غَا إِسّقْنُونّْينْ ثَاصْضَارْثْ نِّي إِدْجَانْ خْ وَاذَافْ ن ونْضڒْ؟“ ‏4 ڒَامِي خْزَارنْثْ، ژْرِينْثْ أَقَا ثَاصْضَارْثْ ثتّْوَاسّقْنُونِّي زڭْ ونْضڒْ، وَاخَّا ثُوغَا ثمْغَارْ أَطَّاسْ. ‏5 ڒَامِي ؤُذْفنْثْ غَارْ ونْضڒْ، ژْرِينْثْ إِجّْ ن ؤُبْڒِيغْ إِقِّيمْ غَارْ ؤُغزْذِيسْ أَفُوسِي، يَارْضْ أَرُّوضْ ذ أَشمْڒَاڒْ ذ أَزِيرَارْ ؤُشَا نِيثنْثِي نّْخڒْعنْثْ. ^▪   ‏6 مَاشَا نتَّا إِنَّا أَسنْثْ: ”وَارْ تّْنخْڒِيعنْثْ شَا! كنِّينْثْ ثَارزُّونْثْ خْ يشُّو نَّاصِيرِي ونِّي إِتّْوَاصلّْبنْ. أَقَا نتَّا إِكَّارْ، وَارْ ذَا إِدْجِي، خْزَارنْثْ، أَقَا أَمْشَانْ مَانِي ث سَّارْسنْ. ^▪   ‏7 مَاشَا رُوحنْثْ، إِنِينْثْ إِ إِمحْضَارنْ نّسْ ؤُڒَا إِ بُوطْرُوسْ، أَقَا أَذْ أَومْ إِزْوَارْ غَارْ لْجَالِيلْ. ذِينِّي أَذْ ث ثْژَارمْ أَمْ مَامّشْ ثُوغَا إِ ذ أَومْ إِنَّا.“ ^▪   ‏8 فّْغنْثْ ذغْيَا ؤُشَا أَروْڒنْثْ زڭْ ونْضڒْ، مِينْزِي ثْقبْسْ إِ-ثنْثْ ثَارْجِيجِيثْ ذ دّهْشَانْ ؤُشَا وَارْ ث نِّينْثْ إِ حذْ، مِينْزِي ثُوغَا ڭّْوذنْثْ. ^▪  

‏9 ڒَامِي د-إِكَّارْ نتَّا زِيشْ ذڭْ وَاسّْ أَمزْوَارْ ن سِيمَانَا، إِضْهَارْ-د ذ أَمزْوَارُو إِ مَارْيَامْ ن مَاجْذَالَا ثنِّي زِي ثُوغَا إِسُّوفّغْ سبْعَا ن شّْوَاطنْ. ^▪  

‏10 ثَانِيثَا ثْرُوحْ ؤُشَا ثْخبَّارْ أَيَا إِ ينِّي ثُوغَا أَكِيذسْ إِدْجَانْ، إِنِّي ثُوغَا إِشضْننْ ؤُ تّْرُونْ.

‏11 ڒَامِي إِنَا سْڒِينْ بلِّي نتَّا أَقَا إِدَّارْ ؤُشَا إِبَانْ أَسنْثْ، وَارْ زَّايْسنْثْ ؤُمِيننْ.

‏12 أَوَارْنِي أَيَا إِبَانْ-د س يِيجّْ ن وَادُّوذْ نّغْنِي إِ ثْنَاينْ زَّايْسنْ ؤُمِي ثُوغَا ڭُّورنْ نِيثْنِي غَارْ إِجّْ ن ذْشَارْ. ^▪  

‏13 ؤُڒَا ذ إِنَا رُوحنْ عَاوذْ ؤُشَا خبَّارنْ إِنّغْنِي، مَاشَا وَارْ ثنْ ؤُمِيننْ.

‏14 ڒخْذنِّي إِبَانْ-د إِ حِيطَاشْ أَڒَامِي ثُوغَا قِّيمنْ غَارْ طَّابْڒَا ؤُشَا إِعَايَارْ إِ-ثنْ مِينْزِي وَارْ ؤُمِيننْ ؤُ مِينْزِي سّْقسْحنْ ؤُڒَاونْ نْسنْ، مِينْزِي وَارْ ؤُمِيننْ زڭْ إِنِّي ث إِژْرِينْ أَوَارْنِي ڒَامِي د-إِتّْوَاسّْنكَّارْ نتَّا. ^▪  

‏15 إِنَّا أَسنْ: ”رُوحمْ غَارْ دُّونشْثْ مَارَّا، بَارّْحمْ س ڒخْبَارْ أَصبْحَانْ ذِي مَارَّا مِينْ د-يجَّا أَربِّي. ^▪  

‏16 ونِّي إِ غَا يَامْننْ ؤُشَا أَذْ إِتّْوَاسّغْضصْ، أَقَا أَذْ إِدَّارْ، مَاشَا ونِّي وَارْ يُومِيننْ، أَذْ إِتّْوَاحَاسبْ. ^▪  

‏17 ثِينَا ذ ڒعْڒَامَاثْ إِ غَا إِضْفَارنْ إِنِّي إِ غَا يَامْننْ: أَقَا نِيثْنِي أَذْ سُّوفّْغنْ شّْوَاطنْ س يِيسمْ إِنُو ؤُشَا أَذْ سِّيوْڒنْ س إِڒْسَاونْ ن جْذِيذْ، ^▪  

‏18 أَذْ كْسِينْ إِفِيغْرَانْ س إِفَاسّنْ نْسنْ ؤُ مَاڒَا سْوِينْ مِينْ إِنقّنْ، وَارْ ثنْ إِضَّارِّي شَا مَانْ أَيَا ؤُشَا أَذْ سَّارْسنْ إِفَاسّنْ نْسنْ خْ إِمهْڒَاشْ، خنِّي أَذْ ڭّنْفَانْ.“ ^▪  

‏19 أَوَارْنِي ڒَامِي كِيذْسنْ إِسِّيوڒْ، إِمّكْسِي سِيذِيثْنغْ يشُّو غَارْ ؤُجنَّا ؤُشَا إِسّْغِيمْ إِخفْ نّسْ خْ ؤُفُوسِي ن أَربِّي. ^▪   ‏20 مَاشَا نِيثْنِي فّْغنْ ؤُشَا بَارّْحنْ ذِي كُوڒْ أَمْشَانْ ؤُ سِيذِيثْنغْ ثُوغَا إِخدّمْ أَكِيذْسنْ ؤُشَا إِسَّارْسْ ڒْخطْ نّسْ خْ وَاوَاڒنْ نْسنْ س ڒعْڒَامَاثْ إِ ث-إِ-د إِضفَّارنْ. أَمِينْ.

أَنڭَّارْ ن ڒخْبَارْ أَصبْحَانْ إِقدّْسنْ أَمْ مَامّشْ ث إِبَارّحْ مَارْكُوسْ. ^▪