أَبَارّحْ ن يشُّو خْ قطُّو ن دُّونشْثْ
13
1 أَڒَامِي د-إِفّغْ زِي زَّاوشْثْ ثَامقّْرَانْثْ، إِنَّا أَسْ إِجّنْ زڭْ إِمحْضَارنْ نّسْ: ”أَ أَمْسغَّارْ، خْزَارْ، مَامّشْ دْجَانْ إِژْرَا أَيَا ذ ڒبْنِي أَيَا!“ ▪ 2 يَارَّا-د يشُّو، إِنَّا أَسْ: ”مَا ثژْرِيذْ ڒبْنِي أَيَا إِمْغَارنْ؟ وَارْ ذَا إِتّْغِيمِي ؤُڒَا ذ إِجّْ ن وژْرُو خْ وژْرُو نّغْنِي إِ وَارْ إِتّْنهْذِيمْ.“ ▪ 3 ڒَامِي ثُوغَا إِقِّيمْ خْ وذْرَارْ ن زِّيثُونْ قِيبَاتْشْ إِ زَّاوشْثْ ثَامقّْرَانْثْ، سّقْسَانْ ث بُوطْرُوسْ ذ يَاعْقُوبْ ذ يُوحَانَّا ذ أَنْذْرَاوُوسْ ڒَامِي ثنْ ثُوغَا وحّذْسنْ: ▪ 4 ”إِنِي أَنغْ مڒْمِي إِ غَا يِيڒِي مَانْ أَيَا، ؤُ مَانْ ڒعْڒَامثْ أَقَا ڭُّورْ أَذْ إِكمّڒْ مَارَّا أَيَا؟“ ▪ 5 إِبْذَا يشُّو إِقَّارْ أَسنْ: ”خْزَارمْ، حِيمَا وَارْ كنِّيوْ إِتّْغَارِّي حذْ. ▪
6 أَقَا أَطَّاسْ أَذْ د-أَسنْ س يِيسمْ إِنُو قَّارنْ: ’أَقَا ذ نشّْ!‘، ؤُشَا أَذْ غَارّنْ أَطَّاسْ. ▪ 7 مَاڒَا ثسْڒِيمْ خْ ڒْبَارُوضْ ذ ڒخْبَارْ ن ڒْبَارُوضْ، وَارْ تّْنخْڒِيعمْ شَا، مِينْزِي س ؤُغِيڒْ أَذْ يِيڒِي مَانْ أَيَا، مَاشَا وَارْ إِتِّيڒِي عَاذْ ذ أَنڭَّارْ. 8 مِينْزِي ڒْڭنْسْ أَذْ إِكَّارْ ضِيدّْ إِ ڒْڭنْسْ نّغْنِي ؤُ ثَاڭلْذِيثْ ضِيدّْ إِ ثْڭلْذِيثْ نّغْنِي. أَذْ إِڒِينْ إِنْهزَّانْ ن ثمُّورْثْ زڭْ ومْشَانْ غَارْ ومْشَانْ نّغْنِي ؤُشَا أَذْ يِيڒِي ڒَاژْ ذ ؤُغوُّوغْ. ثِيمسْڒَايِينْ-أَ ذ بدُّو ن ڒوْجعْ ن ثَارْوَا. ▪
9 خْزَارمْ غَارْ يِيخفْ نْومْ، مِينْزِي أَذْ كنِّيوْ سلّْمنْ إِ ثُوذْرِينْ ن شّْرعْ، أَذْ كنِّيوْ هتّْكنْ س ؤُركُّوضْ ذِي ثمْزِيذَاوِينْ نْسنْ، ؤُشَا أَذْ كنِّيوْ سِّيوْضنْ غَارْ إِجدْجِيذنْ ذ ڒْحُوكَّامْ خْ سِّيبّثْ إِنُو، ذ شّْهَاذثْ إِ نِيثْنِي. ▪
10 غَارْ ؤُمزْوَارْ إِتّْخصَّا أَذْ إِتّْوَابَارّحْ س ڒخْبَارْ أَصبْحَانْ ذِي مَارَّا ڒڭْنُوسْ.
11 خْمِي كنِّيوْ إِ غَا ڭّوّْذنْ حِيمَا أَذْ كنِّيوْ سلّْمنْ، وَارْ كسِّي س ومْنُوسْ قْبڒْ زِي مِينْ غَا ثِينِيمْ، وَارْ ذَايسْ ثْخَارِّيصمْ شَا، مَاشَا مِينْ مَا ذ أَومْ إِ غَا إِمّوْشنْ ذِي ثْسَاعّثْ نِّي، سِيوْڒمْ زَّايسْ، مِينْزِي وَارْ ثدْجِيمْ ذ كنِّيوْ إِ إِسَّاوَاڒنْ مَاشَا ذ أَرُّوحْ إِقدّْسنْ. ▪
12 ؤُمَاسْ أَذْ إِسلّمْ ؤُمَاسْ مَاحنْذْ أَذْ ث نْغنْ، ؤُ بَابَاسْ أَذْ إِسلّمْ مِّيسْ، ؤُشَا أَذْ ثكَّارْ ثَارَّاوْثْ خْ لْوَالِيذِينْ نّسْ ؤُشَا أَذْ ثنْ نْغنْ. ▪
13 أَذْ كنِّيوْ شَارْهنْ مَارَّا ذِي سِّيبّثْ ن يِيسمْ إِنُو، مَاشَا ونِّي إِ غَا إِصْبَارنْ أَڒْ أَنڭَّارْ، أَذْ إِتّْوَاسّنْجمْ. ▪
14 خْمِي إِ غَا ثْژَارمْ نّْعِي ن وَاريّبْ، مِينْ خفْ ثُوغَا إِسَّاوَاڒْ ؤُنَابِي ذَانِييَالْ، إِتّْبدَّا مَانِي وَارْ إِتّْخصَّا أَذْ إِبدّْ - ونِّي إِغْرِينْ أَذْ إِفْهمْ! - ڒخْذنِّي إِتّْخصَّا إِ ينِّي إِدْجَانْ ذِي يَاهُوذِييَّا أَذْ أَروْڒنْ غَارْ إِذُورَارْ، ▪
15 ؤُ ونِّي إِدْجَانْ خْ ثْزقَّا وَارْ د-إِهكّْوِي شَا غَارْ ثَادَّارْثْ ؤُ وَارْ إِتِّيذفْ شَا حِيمَا أَذْ إِكْسِي شَا زِي ثَادَّارْثْ نّسْ،
16 ؤُ ونِّي إِدْجَانْ ذڭْ إِيَّارْ وَارْ د-إِتّْعِيقِّيبْ شَا حِيمَا أَذْ إِكْسِي أَسڒْهَامْ نّسْ.
17 ؤُشْثْ خْ ثِينِّي إِدْجَانْ س دّيْسثْ ذ ثِينِّي إِسُّوطُوضنْ ذڭْ وُوسَّانْ نِّي!
18 ژَتدْجمْ حِيمَا وَارْ ثتِّيڒِي ثَاروْڒَا نْومْ ذِي ڒْمشْثَا،
19 مِينْزِي ذڭْ وُوسَّانْ نِّي أَذْ ذِينْ ثِيڒِي إِشْثْ ن ڒْمحْنثْ إِ وَارْ ثُوغِي أَمشْنَاوْ نتَّاثْ زڭْ وَامِي د-إِخْڒقْ أَربِّي دُّونشْثْ أَڒْ ڒخُّو ؤُشَا وَارْ ثتِّيڒِي عمَّارْصْ عَاوذْ. ▪ 20 مَاڒَا سِيذِي وَارْ إِسّمْژِي ؤُسَّانْ نِّي، وَارْ ثْنجّمْ ؤُڒَا ذ إِشْثْ ن دَّاثْ، مَاشَا ذِي طّْوعْ ن يِينِّي إِتّْوَافَارْزنْ إِنِّي إِ إِخْضَارْ نتَّا، أَقَا إِسّمْژِي ؤُسَّانْ نِّي.
21 خنِّي مَاڒَا إِنَّا أَومْ إِجّنْ: ’أَقَا لْمَاسِيحْ ذَا!‘، نِيغْ: ’أَقَا-ث ذِيهَا!‘، وَارْ ث تَّامْنمْ. ▪ 22 مِينْزِي أَذْ د-كَّارنْ إِمَاسِيحنْ إِسّْخَارِّيقنْ ذ إِنَابِييّنْ إِسّْخَارِّيقنْ، أَذْ ڭّنْ ڒعْڒَامَاثْ ذ ڒعْجَايبْ حِيمَا، مَاڒَا إِزمَّارْ، أَذْ غَارّنْ عَاذْ إِنِّي إِتّْوَافَارْزنْ. ▪ 23 كنِّيوْ مَاشَا، حْضَامْ، أَقَا مَارَّا نِّيغْ أَومْ ث قْبڒْ.
24 مَاشَا ذڭْ وُوسَّانْ نِّي أَوَارْنِي ڒْمحْنثْ نِّي أَذْ ثبَّارْشنْ ثْفُوشْثْ ؤُشَا ثَازِيرِي وَارْ ثتِّيشْ عَاذْ طّْيَا نّسْ، ▪ 25 إِثْرَانْ أَذْ د-وْضَانْ زڭْ ؤُجنَّا ؤُشَا صُّولَاطَاثْ إِ إِدْجَانْ ذڭْ إِجنْوَانْ أَذْ تّْوَانْهزّنْثْ. ▪ 26 خنِّي أَذْ ژَترنْ مِّيسْ ن بْنَاذمْ إِتَّاسْ-د ذڭْ إِسيْنُوثنْ س جّهْذْ ذ ؤُعُودْجِي أَمقّْرَانْ. ▪ 27 ڒخْذنِّي أَذْ إِسّكّْ لْمَالَاكَاثْ نّسْ ؤُشَا أَذْ إِيْرُو إِنِّي زَّايسْ إِتّْوَافَارْزنْ زِي أَربْعَا إِسمِّيضنْ زِي طَّارْفْ أَنڭَّارُو ن ثمُّورْثْ أَڒْ طَّارْفْ أَنڭَّارُو ن ؤُجنَّا.
28 ڒمْذمْ زڭْ وَارْثُو ن ثَازَارْثْ أَمتِّيڒْ-أَ: خْمِي إِ غَا ذوْڒنْ ڒفْرُوعْ نّسْ أَذْ د-أَرضْبنْ ؤُشَا ثِيفْرَايْ أَذْ د-فّْغنْثْ، خنِّي أَذْ ثسّْنمْ أَقَا أَنبْذُو يِيوضْ-د. ▪ 29 أَمُّو عَاوذْ ؤُڒَا ذ كنِّيوْ، خْمِي إِ غَا ثْژَارمْ ثِيمسْڒَايِينْ-أَ تّمْسَارَانْثْ، خنِّي سّْنمْ، أَقَا مَانْ أَيَا يُوذسْ-د خْ ثوَّارْثْ. 30 س ثِيذتّْ أَذْ أَومْ إِنِيغْ، جِّيڒْ-أَ وَارْ إِعدُّو شَا أَڒْ ذ غَا يِيڒِي مَانْ أَيَا مَارَّا. 31 أَجنَّا ذ ثمُّورْثْ أَذْ فْنَانْ، مَاشَا أَوَاڒنْ إِنُو وَارْ فنَّانْ عمَّارْصْ. ▪ 32 مَاشَا أَسّْ نِّي ذ ثْسَاعّثْ نِّي ؤُڒَا ذ إِجّْ وَارْ ث إِسِّينْ، ؤُڒَا ذ لْمَالَاكَاثْ إِنِّي إِدْجَانْ ذڭْ ؤُجنَّا، ؤُڒَا ذ ثَاممِّيثْ، مْغِيرْ ثَابَابَاثْ. ▪ 33 حْضَامْ، عسّمْ، ژَتدْجمْ، مِينْزِي وَارْ ثسِّينمْ شَا مڒْمِي د غَا ثَاوضْ ڒْوقْثْ نِّي. ▪
34 أَقَا-ث أَمشْنَاوْ إِجّْ ن بْنَاذمْ إِتّْخصَّا أَسْ أَذْ إِسَافَارْ، إِجَّا ثَادَّارْثْ نّسْ، إِوكّڒْ إِمْسخَّارنْ نّسْ س صُّولْطَا، إِوْشَا إِ كُوڒْ إِجّْ زَّايْسنْ ڒْخذْمثْ نّسْ، ؤُشَا إِعْڒمْ أَسْ إِ ؤُعسَّاسْ ن ثوَّارْثْ مَاحنْذْ أَذْ إِقِّيمْ أَذْ إِحْضَا. 35 إِوَا حْضَامْ خنِّي، مِينْزِي وَارْ ثسِّينمْ شَا مڒْمِي إِ د غَا يَاسْ بَابْ ن ثَادَّارْثْ، غَارْ ؤُعشِّي نِيغْ غَارْ وزْينْ ن دْجِيڒثْ نِيغْ غَارْ ؤُسْقُوقعْ ن ؤُيَاژِيضْ نِيغْ غَارْ ضّْبحْ زِيشْ، 36 حِيمَا وَارْ د-إِتِّيسْ ذغْيَا، أَذْ كنِّيوْ يَافْ ثتّطّْصمْ. 37 مِينْ ذ أَومْ قَّارغْ ڒخُّو، قَّارغْ ث إِ مَارَّا: قِّيممْ ثْفَاقمْ!“