‏1 مُوننْ غَارسْ إِفَارِيسِييّنْ ذ إِمْسڒْمَاذنْ ن إِذْلِيسنْ إِ د-يُوسِينْ زِي ؤُرْشَالِيمْ. ^▪   ‏2 ؤُمِي ژْرِينْ بلِّي شَا ن إِمحْضَارنْ نّسْ شِّينْ أَغْرُومْ بْڒَا مَا أَذْ سِّيرْذنْ إِفَاسّنْ نْسنْ، عيّْبنْ خَاسنْ. ‏3 مِينْزِي إِفَارِيسِييّنْ ذ وُوذَاينْ وَارْ تّتّنْ مْغِيرْ أَوَارْنِي ڒَامِي سِّيرِيذنْ إِفَاسّنْ س يِيجّْ ن ڒُوضُو مْلِيحْ، مِينْزِي تّطّْفنْ ذِي ثُوبَّارْثْ ن ڒجْذُوذْ. ‏4 ؤُ ڒَامِي د-ؤُسِينْ زِي سُّوقْ، وَارْ تّتّنْ مَاڒَا وَارْ سِّيرْذنْ ذ أَمزْوَارُو، ؤُ أَقَا ذِينْ أَطَّاسْ ن ثْمسْڒَايِينْ نّغْنِي قبْڒنْ ثنْثْ مَاحنْذْ أَذْ زَّايْسنْثْ طّْفنْ عْلَاحْسَابْ ثُوبَّارْثْ نْسنْ أَمْ ؤُسِيرْذْ ن ڒْكِيسَانْ ذ إِغَارَّافنْ ذ ثبْرِيقِينْ ن نّْحَاسْ ذ دُّورِي ن ڒشْثَاوَاثْ. ‏5 خنِّي سّقْسَانْ ث إِفَارِيسِييّنْ ذ إِمْسڒْمَاذنْ ن إِذْلِيسنْ: ”مَايمِّي وَارْ ضْفَارنْ إِمحْضَارنْ نّكْ ثُوبَّارْثْ ن ڒجْذُوذْ، مَاشَا تّتّنْ أَغْرُومْ أَمْ وَارْ سِّيرِيذنْ إِفَاسّنْ؟“ ‏6 يَارَّا-د، إِنَّا أَسنْ: ”نِيشَانْ إِنبَّا إِشَاعْيَا خَاومْ، أَ إِمْنَافْقنْ، أَمْ مَامّشْ ثُورَا:

’ڒْڭنْسْ-أَ إِشنّعْ أَيِي س إِينْشِيشنْ نّسْ،

مَاشَا ؤُڒْ نْسنْ إِڭّْوجْ خَافِي! ^▪  

‏7 مَاشَا نِيثْنِي شنّْعنْ أَيِي بَاطڒْ،

مِينْزِي سّڒْمَاذنْ ثِيغُورِيوِينْ ثِينِّي ذ ثِيوصَّا ن إِوْذَانْ.‘ ^▪  

‏8 ثجِّيمْ ثَاوْصيّثْ ن أَربِّي ، خنِّي ثطّْفمْ ذِي ثُوبَّارْثْ ن إِوْذَانْ أَمشْنَاوْ أَسِيرْذْ ن إِغَارَّافنْ ذ ڒْكِيسَانْ ؤُ أَطَّاسْ ن ثْمسْڒَايِينْ نّغْنِي أَمشْنَاوْ ثِينَا.“ ‏9 إِنَّا أَسنْ: ”نِيشَانْ أَقَا ثْبطّْڒمْ ثَاوْصيّثْ ن أَربِّي حِيمَا أَذْ ثقِّيمْ ثْبدّْ ثُوبَّارْثْ نْومْ.

‏10 مِينْزِي مُوسَا إِنَّا: ’وقَّارْ بَابَاشْ ذ يمَّاشْ!‘، ؤُ: ’ونِّي إِ غَا إِنعْڒنْ بَابَاسْ نِيغْ يمَّاسْ، إِتّْخصَّا أَذْ إِمّثْ.‘ ^▪  

‏11 مَاشَا كنِّيوْ ثقَّارمْ: ’مَاڒَا إِجّْ ن ورْيَازْ إِنَّا إِ بَابَاسْ نِيغْ إِ يمَّاسْ: مِينْ مَا ثْزمَّارمْ أَذْ زَّايِي ثسْثنْفْعمْ، أَقَا-ث ذ صّذْقثْ إِ أَربِّي!،

‏12 خنِّي وَارْ ث ثتّجِّيمْ قَاعْ أَذْ إِڭّْ شَا إِ بَابَاسْ ذ يمَّاسْ.

‏13 أَمُّو ثْبطّْڒمْ أَوَاڒْ ن أَربِّي س ثُوبَّارْثْ نْومْ إِ ثتّْسلَّاممْ، ؤُ ثتّڭّمْ أَطَّاسْ ن ثْمسْڒَايِينْ أَمْ ثِينَا.“ ^▪  

‏14 ؤُمِي خَاسْ د-إِڒَاغَا مَارَّا ڒْغَاشِي عَاوذْ، إِنَّا أَسنْ: ”سْڒمْ-د غَارِي مَارَّا ؤُشَا فهْممْ! ^▪  

‏15 وَارْ ذِينْ ؤُڒَا ذ إِشْثْ ن ڒْحَاجّثْ إِ د-إِتَّاذْفنْ غَارْ بْنَاذمْ زِي بَارَّا ثْزمَّارْ أَذْ ث ثسّخْمجْ. مَاشَا مِينْ إِ د-إِتّفّْغنْ زِي بْنَاذمْ، أَقَا مَانْ أَيَا إِسّخْمَاجْ بْنَاذمْ. ^▪  

‏16 ونِّي غَارْ دْجَانْ إِمزُّوغنْ إِ ؤُسدْجِي، أجّْ إِ-ث أَذْ إِسڒْ.“

‏17 ؤُمِي د-يُوذفْ غَارْ ثَادَّارْثْ زِي ڒْغَاشِي، سّقْسَانْ ث إِمحْضَارنْ نّسْ خْ ؤُمذْيَا نِّي. ^▪  

‏18 إِنَّا أَسنْ: ”مَا كنِّيوْ عَاذْ بْڒَا ڒفْهَامثْ؟ مَا وَارْ ثفْهِيممْ شَا بلِّي مَارَّا مِينْ غَا يَاذْفنْ بْنَاذمْ زِي بَارَّا، وَارْ إِزمَّارْ أَذْ ث إِسّخْمجْ،

‏19 مِينْزِي مَانْ أَيَا وَارْ د-إِتِّيذفْ شَا غَارْ وُوڒْ نّسْ، مَاشَا غَارْ ؤُعذِّيسْ، خنِّي أَذْ إِفّغْ غَارْ ومْشَانْ نّسْ، أَمْ إِسِّيزْذڭْ مَارَّا مَاشَّا.“ ‏20 خنِّي إِنَّا: ”مِينْ إِ د-إِتّفّْغنْ زِي بْنَاذمْ ذ مَانْ أَيَا إِسّْخمَّاجْ بْنَاذمْ. ‏21 مِينْزِي زِي ذَاخڒْ، زڭْ وُوڒَاونْ ن إِوْذَانْ إِ د-إِتّفّْغنْ إِخَارِّيصنْ إِعفَّاننْ: زِّينَا، فَارْقْ-شّْغڒْ، ثُوكَّارْضَا، أَنْغَايْ، ^▪   ‏22 طّْمعْ، ڒْغَارْ، ثَاحْرَايْمشْثْ، أَفُوشّحْ، ثِيطّْ ثَاعفَّانْثْ، أَشقّفْ، ثُوفّثْ ذ ثُوبُّوهڒْيَا. ‏23 مَارَّا ثِيمسْڒَايِينْ-أَ ثِيعفَّانِينْ تّفّْغنْثْ-إِ-د زِي ذَاخڒْ ؤُشَا سّْخمَّاجنْثْ بْنَاذمْ.“

‏24 إِكَّارْ سّنِّي ؤُشَا إِرُوحْ غَارْ ثمُّورْثْ ن صُورْ ذ صَايْذُونْ. ڒَامِي د-يُوذفْ غَارْ إِشْثْ ن ثَادَّارْثْ، وَارْ إِخْسْ أَذْ ث إِسّنْ حذْ، وَاخَّا أَمنِّي وَارْ إِزمَّارْ أَذْ إِنُّوفَارْ. ^▪   ‏25 مِينْزِي إِشْثْ ن ثْمطُّوثْ، غَارسْ يدْجِيسْ ذَايسْ إِجّْ ن ڒَارْيَاحْ ذ أَمنْڭُوسْ، ثسْڒَا خَاسْ ذغْيَا، ؤُشَا ثُوسَا-د غَارسْ، ثوْضَا أَسْ غَارْ إِضَارنْ نّسْ. ‏26 ثُوغَا ثَامْغَارْثْ-أَ ذ إِشْثْ ن ثْبَارَّانِيثْ زِي ثمُّورْثْ ن سُورِييَا ذ فِينِيقِييَا. ؤُشَا ثْزَاوْڭْ إِ-ث مَاحنْذْ أَذْ إِسُّوفّغْ شِّيطَانْ زڭْ يدْجِيسْ. ‏27 مَاشَا يشُّو إِنَّا أَسْ: ”أجّْ إِحنْجِيرنْ أَمزْوَارْ أَذْ جِّيوْننْ، مِينْزِي وَارْ إِڒِيقْ أَذْ إِتّْوَاكّسْ وغْرُومْ ن إِحنْجِيرنْ أَذْ إِمّنْضَارْ إِ يِيطَانْ.“ ‏28 مَاشَا نتَّاثْ ثَارَّا-د، ثنَّا أَسْ: ”وَاهْ، أَ سِيذِي، ؤُڒَا ذ إِطَانْ تّتّنْ إِڒقّْوَازْ ن إِحنْجِيرنْ سَاذُو طَّابْڒَا.“ ‏29 إِنَّا أَسْ يشُّو: ”خْ سِّيبّثْ ن وَاوَاڒْ-أَ إِ ثنِّيذْ، ؤُيُورْ! أَقَا شِّيطَانْ إِفّغْ زڭْ يدْجِيمْ.“ ‏30 ڒَامِي د-ثُوسَا غَارْ ثَادَّارْثْ نّسْ، ثُوفَا يدْجِيسْ ثزّڒْ ذِي قَامَا ؤُ شِّيطَانْ إِتّْوَاسُّوفّغْ زَّايسْ.

‏31 أَوَارْنِي ڒَامِي د-إِفّغْ عَاوذْ زِي ثمُّورْثْ ن صُورْ ذ صَايْذُونْ، إِشُوقّْ ذِي ڒْوسْثْ ن ثمُّورْثْ ن ذِيكَاپُولِيسْ ؤُشَا يِيوضْ غَارْ ڒبْحَارْ ن لْجَالِيلْ. ^▪   ‏32 إِوْينْ-د غَارسْ إِجّْ ن ؤُذهْشُورْ، إِوْعَارْ خَاسْ أَذْ إِسِّيوڒْ، ؤُشَا تَّارنْ زَّايسْ أَذْ خَاسْ إِسَّارْسْ أَفُوسْ نّسْ. ^▪   ‏33 إِسِّيڭّْوجْ إِ-ث زِي ڒْغَاشِي غَارْ إِجّْ ن ؤُغزْذِيسْ ؤُشَا إِڭَّا أَسْ إِضوْضَانْ ذڭْ إِمزُّوغنْ نّسْ، إِسُّوسفْ ؤُشَا إِحَاذَا إِڒسْ نّسْ. ‏34 خنِّي إِخْزَارْ غَارْ ؤُجنَّا، إِسّْقِينْفذْ، إِنَّا أَسْ: ”نُورْزمْ!“ ‏35 ڒخْذنِّي نُّورْزْمنْ إِمزُّوغنْ نّسْ ؤُشَا ثفْسِي ثسْغُونْثْ ن يِيڒسْ نّسْ، إِبْذَا إِسَّاوَاڒْ نِيشَانْ. ‏36 إِعْڒمْ أَسنْ وَارْ ث قَّارنْ إِ حذْ، مَاشَا مشْحَاڒْ مَا ثنْ يُومُورْ أَمُّو، وَاخَّا أَمنِّي ثُوغَا سُّوفُّوغنْ خَاسْ ڒخْبَارْ مَاهُو. ‏37 ؤُشَا ثْبهْثنْ س ؤُنخْڒِيعْ أَڒَامِي نَّانْ: ”مَارَّا إِڭَّا إِ-ث مْلِيحْ! يَارَّا إِذهْشَارْ تّسْڒَانْ ذ إِڭْنَاونْ سَّاوَاڒنْ.“ ^▪