أَسْڭنْفِي ذڭْ وَاسّْ ن سّبْثْ
3
1 ؤُشَا يُوذفْ-د عَاوذْ غَارْ ثمْزِيذَا. ثُوغَا ذِينْ إِجّْ ن ورْيَازْ، أَفُوسْ نّسْ إِقُوشّحْ. ▪ 2 بْذَانْ حطَّانْ ث، مَا أَذْ ثَاغْ أَذْ ث إِسّْڭنْفَا ذِي سّبْثْ، حِيمَا زمَّارنْ أَذْ زَّايسْ شثْشَانْ. 3 إِنَّا أَسْ إِ ورْيَازْ ونِّي غَارْ إِدْجْ أَفُوسْ إِقُوشّحْ: ”بدّْ ذِي ڒْوسْثْ.“ 4 خنِّي إِنَّا أَسنْ: ”مَا إِحدْجڒْ ذِي سّبْثْ أَذْ إِتّْوَاڭّْ مِينْ إِشْنَانْ نِيغْ مِينْ إِدْجَانْ ذ أَعفَّانْ، أَذْ نسّنْجمْ إِجّْ ن ڒعْمَارْ نِيغْ أَذْ ث ننغْ؟“ مَاشَا نِيثْنِي سْقَارنْ. 5 إِخْزَارْ غَارْ ينِّي ذ أَسْ د-إِنّْضنْ س ثفْقحْثْ زِي سِّيبّثْ ن ڒقْسَاحثْ ن وُوڒَاونْ نْسنْ ؤُشَا إِنَّا إِ ورْيَازْ: ”سْوِيژّضْ أَفُوسْ نّكْ!“ إِسّْوِيژّضْ إِ-ث-إِ-د، إِذْوڒْ ؤُفُوسْ نّسْ إِصحّْ عَاوذْ. ▪ 6 ڒخْذنِّي فّْغنْ إِفَارِيسِييّنْ أَكْ-ذ شَا زِي ثَادَّارْثْ ن هِيرُوذُوسْ، ؤُشَا مّْشَاوَارنْ خَاسْ، مَامّشْ إِ غَا ڭّنْ أَذْ ث أَردّْدْجنْ. ▪ يشُّو إِسّْشنْ صُّولْطَا نّسْ خْ ڒَارْيَاحْ إِمنْڭَاسْ
7 إِفّغْ يشُّو أَكْ-ذ إِمحْضَارنْ نّسْ غَارْ ڒبْحَارْ، إِضْفَارْ إِ-ث-د ڒْغَاشِي أَطَّاسْ زِي لْجَالِيلْ، زِي يَاهُوذِييَّا، ▪ 8 زِي ؤُرْشَالِيمْ، زِي إِذُومِييَا ؤُ زڭْ ؤُجمَّاضْ ن لْ'ؤُرْذُونْ ؤُ زِي صُورْ ذ صَايْذُونْ، أَقَا إِجّْ ن ڒْغَاشِي ذ أَمقّْرَانْ. مِينْزِي سْڒِينْ مَارَّا مِينْ إِڭَّا، س ؤُينِّي غَارسْ د-ؤُسِينْ. 9 إِنَّا إِ إِمحْضَارنْ نّسْ مَاحنْذْ أَذْ أَوْينْ إِشْثْ ن ثْغَارَّاپُوثْ غَارسْ س سِّيبّثْ ن ڒْغَاشِي، حِيمَا وَارْ ث دّحّْسنْ.
10 مِينْزِي ثُوغَا إِسّْڭنْفَا أَطَّاسْ، أَڒَامِي خَاسْ وْضَانْ حِيمَا أَذْ ث أَوْضنْ أَذْ ث حَاذَانْ.
11 ؤُشَا ڒَارْيَاحْ إِمنْڭَاسْ، ڒَامِي ث ژْرِينْ، بنْذْقنْ خَاسْ، سْغُويّنْ، قَّارنْ: ”أَقَا شكْ ذ مِّيسْ ن أَربِّي.“
12 مَاشَا إِوصَّا ثنْ أَطَّاسْ حِيمَا وَارْ خَاسْ سُّوفُّوغنْ ڒخْبَارْ.
يشُّو إِخْضَارْ ثنْعَاشْ ن رُّوسُولْ نّسْ
13 خَاسْ ؤُشَا يُوڒِي غَارْ وذْرَارْ، إِڒَاغَا-د غَارسْ إِنِّي إِخْسْ، ؤُشَا ؤُسِينْ-د غَارسْ. ▪
14 إِڭَّا ثنْعَاشْ حِيمَا أَذْ كِيذسْ إِڒِينْ ؤُ حِيمَا أَذْ ثنْ إِسّكّْ مَاحنْذْ أَذْ بَارّْحنْ س ڒخْبَارْ أَصبْحَانْ
15 ؤُشَا مَاحنْذْ أَذْ غَارْسنْ ثِيڒِي صُّولْطَا خْ ؤُسْڭنْفِي ن ڒهْڒَاشْ ؤُ خْ ؤُسُوفّغْ ن ڒَارْيَاحْ إِعفَّاننْ.
16 شِيمْعُونْ إِڭَّا أَسْ بُوطْرُوسْ ذ إِسمْ،
17 ؤُ يَاعْقُوبْ مِّيسْ ن زَابْذِي ذ يُوحَانَّا ؤُمَاسْ ن يَاعْقُوبْ، إِسمَّا أَثنْ ’بُووَانِيرْجِيسْ‘، مِينْ إِخْسْ أَذْ يِينِي ’أَيْثْ ن وَاجَّاجْ‘،
18 ؤُ إِنّغْنِي إِسمَّا أَثنْ أَنْذْرَاوُوسْ ذ فِيلِيبُّوسْ ذ بَارْ-ثُولُومَاوُوسْ ذ مَاتَّا ذ ثُومَا ذ يَاعْقُوبْ، مِّيسْ ن حَالْفَا، ذ ثَادَّاوُوسْ ذ شِيمْعُونْ أَمْعسَّابْ
19 ذ يَاهُوذَا إِسْخَارِييُوطِي ونِّي ث إِ غَا إِغْذَارنْ.
يشُّو ذ بعَالْزَاپُوبْ
20 ؤُسِينْ-د غَارْ ثَادَّارْثْ ؤُشَا إِنّيْرُو ذِينْ عَاوذْ ڒْغَاشِي، أَڒَامِي وَارْ ؤُفِينْ ثَاوَّارْثْ خْ مَاشَّا ن وغْرُومْ. ▪ 21 ؤُمِي سْڒِينْ ڒْوَاشُونْ نّسْ مَانْ أَيَا، فّْغنْ-د، حِيمَا أَذْ ث طّْفنْ، مِينْزِي نَّانْ: ”أَقَا إِبُّوهْڒِي.“ 22 مَاشَا إِمْسڒْمَاذنْ ن إِذْلِيسنْ إِنِّي د-إِهْوَانْ زِي ؤُرْشَالِيمْ نَّانْ: ”أَقَا ذَايسْ ’بعَالْزَاپُوبْ‘!“ ؤُشَا نَّانْ عَاوذْ ”س ؤُمقّْرَانْ ن ڒَارْيَاحْ إِعفَّاننْ إِسُّوفُّوغْ ڒَارْيَاحْ إِعفَّاننْ.“ ▪ 23 إِڒَاغَا أَسنْ-د ؤُشَا إِسِّيوڒْ أَكِيذْسنْ س إِمذْيَا: ”مَامّشْ إِزمَّارْ شِّيطَانْ أَذْ إِسُّوفّغْ شِّيطَانْ؟ ▪ 24 مَاڒَا ثمْسبْضَا إِشْثْ ن ثْڭلْذِيثْ خْ يِيخفْ نّسْ، وَارْ ثْزمَّارْ ثْڭلْذِيثْ نِّي أَذْ ثْبدّْ. 25 مَاڒَا ثمْسبْضَا إِشْثْ ن ثَادَّارْثْ خْ يِيخفْ نّسْ، وَارْ ثْزمَّارْ ثَادَّارْثْ نِّي أَذْ ثْبدّْ. 26 مَاڒَا إِكَّارْ شِّيطَانْ ضِيدّْ إِ يِيخفْ نّسْ، خنِّي وَارْ إِتِّيڒِي ذ إِجّنْ، ؤُشَا وَارْ إِزمَّارْ أَذْ إِبدّْ، مَاشَا أَذْ يِيڒِي مَانْ أَيَا ذ أَنڭَّارْ نّسْ. 27 وَارْ إِزمَّارْ حذْ أَذْ يَاذفْ ثَادَّارْثْ ن ونِّي إِجهْذنْ مَاحنْذْ أَذْ أَسْ يَاشَارْ ڒقْشُوعْ نّسْ، مَاڒَا وَارْ إِشَارْفْ ونِّي إِجهْذنْ أَمزْوَارْ، خنِّي أَذْ إِكشّضْ ثَادَّارْثْ نّسْ. ▪ 28 س ثِيذتّْ، نشّْ أَذْ أَومْ إِنِيغْ بلِّي أَذْ أَسنْ تّْوَاغْفَارنْ إِ ثَارْوَا ن بْنَاذمْ مَارَّا دّْنُوبْ نْسنْ ؤُڒَا ذ أَشقّفْ إِ زِي غَا شقّْفنْ ذِي أَربِّي، ▪ 29 مَاشَا ونِّي إِ غَا إِشقّْفنْ ذِي أَرُّوحْ إِقدّْسنْ وَارْ غَارسْ بُو وغْفَارْ قَاعْ، مَاشَا أَقَا خَاسْ ڒْحُوكْمْ إِتّْذُومَانْ.“ ▪ 30 مِينْزِي نِيثْنِي نَّانْ: ”أَقَا ذَايسْ ڒَارْيَاحْ أَمنْڭُوسْ.“
يمَّاسْ ذ أَيْثْمَاسْ ن يشُّو
31 ڒخْذنِّي ؤُسِينْ-د أَيْثْمَاسْ ذ يمَّاسْ، بدّنْ بَارَّا إِ ثَادَّارْثْ، ؤُشَا سّكّنْ-د غَارسْ، ڒَاغَانْ أَسْ-د. ▪ 32 مَاشَا ڒْغَاشِي قِّيمنْ نّْضنْ أَسْ-د، نَّانْ أَسْ: ”خْزَارْ، يمَّاشْ ذ أَيْثْمَاشْ أَقَا أَثنْ ذِي بَارَّا، أَرزُّونْ خَاكْ.“ 33 يَارَّا-د خَاسنْ، إِنَّا: ”مَانْ ثنْ إِ إِدْجَانْ ذ يمَّا ؤُ مَانْ ينْ إِ إِدْجَانْ ذ أَيْثْمَا؟“ 34 ؤُشَا إِخْزَارْ غَارْ ينِّي إِقِّيمنْ إِ ذ أَسْ د-إِنّْضنْ، إِنَّا: ”خْزَارْ، أَقَا يمَّا ذ أَيْثْمَا، 35 مِينْزِي ونِّي إِتّڭّنْ مِينْ إِخْسْ أَربِّي ذ نتَّا ذ ؤُمَا ذ ؤُتْشْمَا ذ يمَّا.“ ▪