سِيذِي أَذْ إِهْوَا خْ وذْرَارْ ن زِّيثُونْ
14
1 ”خْزَارثْ، أَذْ د-يَاسْ إِجّْ ن وَاسّْ إِ سِيذِي إِ ذِي إِ غَا ثتّْوَابْضَا ثْكشَّاضْثْ نّمْ ذِي ڒْوسْثْ نّمْ! 2 نشّْ أَذْ سّْمُونغْ مَارَّا ڒڭْنُوسْ إِ ؤُمنْغِي أَكْ-ذ ؤُرْشَالِيمْ. ثَانْذِينْثْ أَذْ ثتّْوَاطّفْ ؤُ ثُوذْرِينْ أَذْ تّْوَاكشّْضنْثْ ؤُ ثِيمْغَارِينْ أَذْ تّْوَافضْحنْثْ ؤُ أَزْينْ ن ثنْذِينْثْ أَذْ إِتّْوَانْذهْ غَارْ لْمنْفَا، مَاشَا مِينْ إِقِّيمنْ ن ڒْڭنْسْ وَارْ ڭُّورْ شَا أَذْ إِتّْوَاقْضعْ. ▪ 3 سِيذِي أَذْ إِفّغْ ؤُ نتَّا أَذْ إِمْنغْ أَكْ-ذ ڒڭْنُوسْ أَمْ مَامّشْ ثُوغَا إِتّْمنْغَا ڒبْذَا ذڭْ وَاسّْ ن ؤُمنْغِي. ▪ 4 ذڭْ وَاسّْ نِّي أَذْ بدّنْ إِضَارنْ نّسْ خْ وذْرَارْ ن زِّيثُونْ ونِّي قِيبَاتْشْ إِ ؤُرْشَالِيمْ، غَارْ شَّارْقْ. أَذْرَارْ ن زِّيثُونْ أَذْ إِتّْوَافدْجقْ ذِي ثْنَاينْ ن إِزِييْنَاثْ، غَارْ شَّارْقْ ؤُ غَارْ ڒْغَارْبْ، مَاحنْذْ أَذْ ذِينْ ثِيڒِي إِشْثْ ن ثغْزُورْثْ ذ ثَامقّْرَانْثْ. أَزْينْ ن وذْرَارْ أَذْ إِميّڒْ غَارْ شَّامَالْ ؤُ أَزْينْ نّغْنِي ن وذْرَارْ أَذْ إِميّڒْ غَارْ لْجَانُوبْ. 5 كنِّيوْ أَذْ ثَاروْڒمْ زِي هكّْوُو ن إِذُورَارْ إِنُو، مَاغَارْ ثَاغْزُورْثْ ن إِذُورَارْ أَذْ د-ثَاوضْ أَڒْ أَصَالْ ؤُ كنِّيوْ أَذْ ثَاروْڒمْ أَمْ مَامّشْ ثَاروْڒمْ كنِّيوْ زڭْ ونْهزِّي ن ثمُّورْثْ ذڭْ وُوسَّانْ ن عُوزِّييَا، أَجدْجِيذْ ن يَاهُوذَا، ؤُشَا سِيذِي، أَربِّي إِنُو، أَذْ د-يَاسْ ؤُ مَارَّا إِمْقدَّاسنْ أَكِيذكْ. ▪
6 ذڭْ وَاسّْ نِّي ڭُّورْ أَذْ إِمْسَارْ أَقَا وَارْ ثتِّيڒِي ثْفَاوْثْ، إِثْرَانْ إِتِّيسِّيقنْ أَذْ ثتّْوَاكمّْشنْ. 7 أَذْ يِيڒِي ذ إِجّْ ن وَاسّْ إِتّْوَافَارْزْ، أَذْ يِيڒِي إِتّْوَاسّنْ غَارْ سِيذِي. وَارْ إِدْجِي ذ أَسّْ ؤُڒَا ذ دْجِيڒثْ. أَذْ إِمْسَارْ غَارْ ڒْوقْثْ ن ؤُعشِّي أَذْ ثِيڒِي ثْفَاوْثْ.“ ▪
8 ذڭْ وَاسّْ نِّي أَذْ إِمْسَارْ أَقَا أَمَانْ إِدَّارنْ أَذْ د-فّْغنْ زِي ؤُرْشَالِيمْ، أَزْينْ زَّايْسنْ غَارْ ڒبْحَارْ أَشَارْقِي ؤُ أَزْينْ نّغْنِي غَارْ ڒبْحَارْ ن ڒْغَارْبِي. أَمُّو إِ غَا يِيڒِي ذڭْ ؤُنبْذُو ؤُ ذِي ثْڭَارْسْثْ. ▫ ▪ 9 سِيذِي أَذْ يِيڒِي ذ أَجدْجِيذْ خْ مَارَّا ثَامُّورْثْ.
ذڭْ وَاسّْ نِّي أَذْ يِيڒِي نتَّا ذ أَينِّي ن سِيذِي ؤُ إِسمْ نّسْ ذ أَينِّي ن يِيسمْ.
10 مَارَّا ثَامُّورْثْ أَذْ ثذْوڒْ أَمْ ڒوْضَا، زِي جَابْعَا أَڒْ رِيمُّونْ، غَارْ جِّيهثْ ن لْجَانُوبْ ن ؤُرْشَالِيمْ. ثَانْذِينْثْ أَذْ ثتّْوَاسْڭعّذْ ؤُ أَذْ ذَايسْ زذْغنْ إِوْذَانْ ذڭْ ومْشَانْ نّسْ، زِي ثوَّارْثْ ن بِينْيَامِينْ أَڒْ أَمْشَانْ ن ثوَّارْثْ إِ ذِينْ ثُوغَا زِيشْ، أَڒْ ثَاوَّارْثْ ن ثغْمَارْثْ، ؤُ زِي لْپُورْجْ ن حَانَانِييِيلْ أَڒْ ثِيسَارِينْ ن وحْرَايْ ن دِّيڒشْثْ ن ؤُجدْجِيذْ.
11 نِيثْنِي أَذْ ذَايسْ زذْغنْ ؤُ وَارْ ثتِّيڒِي عَاذْ نّعْڒثْ، مِينْزِي ؤُرْشَالِيمْ أَذْ إِزْذغْ ذِي ڒَامَانْ.“
12 ”ثَا أَذْ ثِيڒِي ذ ثِيشْثِي إِ زِي غَا إِوّثْ سِيذِي مَارَّا ڒڭْنُوسْ نِّي إِمّنْغنْ أَكْ-ذ ؤُرْشَالِيمْ: نتَّا أَذْ يَارّْ أَرِّيمثْ ن كُوڒْ بْنَاذمْ أَذْ إِكِّيشُّو أَمْ نتَّا عَاذْ إِبدّْ خْ إِضَارنْ نّسْ ؤُ ثِيطَّاوِينْ نّسْ أَذْ كِّيشّْونْثْ ذڭْ إِخُوبَاشْ نْسنْ ؤُ إِڒسْ نّسْ أَذْ إِكِّيشُّو ذڭْ ؤُقمُّومْ نّسْ. ▫
13 ذڭْ وَاسّْ نِّي ڭُّورْ أَذْ إِمْسَارْ أَقَا إِجّْ ن ؤُمْخَارْوضْ ذ أَمقّْرَانْ زِي سِيذِي أَذْ إِذْوڒْ جَارْ أَسنْ أَڒَامِي إِ غَا إِطّفْ كُوڒْ إِجّْ أَفُوسْ ن ؤُمْقَارّبْ نّسْ ؤُ خنِّي أَفُوسْ ن كُوڒْ إِجّنْ أَذْ إِنّقْڒبْ ضِيدّْ إِ ؤُفُوسْ ن ؤُمْقَارّبْ نّسْ.
14 عَاذْ أَذْ إِمْنغْ يَاهُوذَا ذِي ؤُرْشَالِيمْ ؤُشَا أَذْ تّْوَاسْمُوننْ وَاڭْڒَا ن مَارَّا ڒڭْنُوسْ إِ ذ أَسْ د-إِنّْضنْ: ؤُرغْ ذ نُّوقَارْثْ ذ وَارُّوضْ أَطَّاسْ س وَاطَّاسْ.
15 أَمُّو إِ غَا ثِيڒِي عَاوذْ ثشْثِي ن ؤُيِيسْ ذ ؤُسَارْذُونْ ذ وڒْغمْ ذ يغْيَاڒْ ذ مَارَّا ڒْمَاڒْ نِّي إِدْجَانْ ذِي ڒْعسْكَارَاثْ، أَقَا ثِيشْثِي أَيَا أَذْ ثنْ ثڒْقفْ.“
16 ”أَذْ إِمْسَارْ أَقَا مَارَّا إِنِّي إِقِّيمنْ زِي مَارَّا ڒڭْنُوسْ نِّي د-يُوسِينْ غَارْ ؤُرْشَالِيمْ، أَذْ ڭعّْذنْ زڭْ ؤُسڭّْوَاسْ أَڒْ أَسڭّْوَاسْ حِيمَا أَذْ سجْذنْ إِ ؤُجدْجِيذْ، إِ سِيذِي ن ڒْعسْكَارَاثْ، ؤُ حِيمَا أَذْ عيّْذنْ ڒْعِيذْ ن إِعُوشُّوثنْ. ▪
17 أَذْ إِمْسَارْ بلِّي مَانْ ونْ زِي ڒَادْجَاثْ ن ثمُّورْثْ وَارْ د-إِتّْڭِيعِّيذْ شَا غَارْ ؤُرْشَالِيمْ حِيمَا أَذْ إِسْجذْ إِ ؤُجدْجِيذْ، إِ سِيذِي ن ڒْعسْكَارَاثْ، أَقَا وَارْ خَاسْ إِوطِّي شَا ونْژَارْ.
18 مَاڒَا ڒَادْجْ ن مِيصْرَا وَارْ د-إِڭعّذْ ؤُ وَارْ د-ثُوسِي شَا، خنِّي وَارْ خَاسنْ إِشِّيثْ ونْژَارْ. ثَا أَذْ ثِيڒِي ذ ثِيشْثِي إِ زِي غَا إِڒْقفْ سِيذِي ڒڭْنُوسْ نِّي وَارْ ذِينْ إِتّْڭِيعِّيذنْ شَا حِيمَا أَذْ عيّْذنْ فِيشْثَا ن ڒْعِيذْ ن إِعُوشُّوثنْ.
19 ثَا ڭُّورْ أَذْ ثِيڒِي ذ ثِيشْثِي إِ دّْنُوبْ ن مِيصْرَا ؤُڒَا ذ ثِيشْثِي إِ مَارَّا ڒڭْنُوسْ، إِنِّي وَارْ ذِينْ إِتّْڭعّذنْ، حِيمَا أَذْ عيّْذنْ ڒْعِيذْ ن إِعُوشُّوثنْ.“
20 ”ذڭْ وَاسّْ نِّي ڭُّورْ أَذْ يِيڒِي خْ ثْنَاقُوسِينْ ن ييْسَانْ ’ذ أَمْقدَّاسْ إِ سِيذِي!‘ تّْنَاجَارْ ذِي ثَادَّارْثْ ن سِيذِي أَذْ إِڒِينْ أَمْ طَّاوْيَاثْ إِ ؤُرُوشِّي زَّاثْ إِ ؤُعَالْطَارْ. 21 مَارَّا تّْنَاجَارْ ذِي ؤُرْشَالِيمْ ؤُ ذِي يَاهُوذَا أَذْ إِڒِينْ قدّْسنْ إِ سِيذِي ن ڒْعسْكَارَاثْ ؤُ مَارَّا إِنِّي إِ د غَا يَاسنْ حِيمَا أَذْ قدّْمنْ ثِيوْهِيبِينْ، أَذْ زَّايْسنْثْ كْسِينْ ؤُ أَذْ ذَايْسنْثْ سّْننّنْ.
ذڭْ وَاسّْ نِّي وَارْ ذِينْ إِتِّيڒِي ؤُڒَا ذ إِجّْ ن ؤُكنْعَانِي ذِي ثَادَّارْثْ ن سِيذِي ن ڒْعسْكَارَاثْ.“ ▪