‏1 ”إِفْرَايِيمْ إِتّنّضْ أَيِي س ؤُخَارِّيقْ ؤُ ثَادَّارْثْ ن إِسْرَائِيل س ڒْغشّْ، مَاشَا يَاهُوذَا إِتّثْلِيعْ عَاذْ أَكْ-ذ أَربِّي ؤُ أَكْ-ذ ؤُمْقدَّاسْ أَمقّْرَانْ ذ أَمْثِيقِّي. ‏2 إِفْرَايِيمْ ذ إِجّْ ن ؤُمكْسَا يُويُورْ أَوَارْنِي إِ ؤُسمِّيضْ. أَسّْ مَارَّا يَارنِّي إِخَارِّيقنْ ذ ؤُردّدْجْ. نِيثْنِي تّڭّنْ إِجّْ ن ڒْعَاهْذْ أَكْ-ذ أَشُّورْ ؤُشَا تَّاوْينْ زّشْثْ غَارْ مِيصْرَا.

‏3 سِيذِي غَارسْ إِجّْ ن ؤُمْشُوبّشْ أَكْ-ذ يَاهُوذَا ؤُ نتَّا أَذْ إِڭّْ س يَاعْقُوبْ عْلَاحْسَابْ إِبْرِيذنْ نّسْ، أَذْ ث إِخدْجصْ أَمْ مَامّشْ ثِيمڭَّا نّسْ. ‏4 ذڭْ ؤُعذِّيسْ ن يمَّاسْ إِطّفْ ؤُمَاسْ غَارْ ؤُنِيرْزْ ؤُ ڒَامِي ثُوغَا ذ أَرْيَازْ إِجْهذْ إِمّْعَاڒَا أَكْ-ذ أَربِّي. ^▪   ‏5 نتَّا ثُوغَا إِمْنغْ أَكْ-ذ لْمَالَاكْ ؤُشَا إِغْڒبْ. إِرُو، إِحشّمْ إِ-ث. يُوفَا إِ-ث ذِي بَايْثْ-إِلْ ؤُ ذِينِّي إِسِّيوڒْ نتَّا أَكِيذْنغْ. ^▪   ‏6 سِيذِي، أَربِّي ن ڒْعسْكَارَاثْ، سِيذِي ذ إِسمْ نّسْ إِ ڒِيذَارثْ. ‏7 ذْوڒْ غَارْ أَربِّي نّكْ، حْضَا ثَامخْسِيوْثْ إِشوَّارنْ ذ ڒْحقّْ، ؤُ سِيثِيمْ ڒبْذَا إِ أَربِّي نّكْ.

‏8 كنْعَانْ غَارسْ إِجّْ ن ڒْمِيزَانْ إِغشّْ ذڭْ ؤُفُوسْ نّسْ، إِتّعْجِيبْ أَسْ أَذْ إِبعّجْ. ‏9 مَاشَا إِفْرَايِيمْ إِقَّارْ: ’نشّْ ذوْڒغْ ذ بُو-وَاڭْڒَا، يَارْوغْ إِشْثْ ن ڒكْسِيبثْ ذ ثَامقّْرَانْثْ إِ يِيخفْ إِنُو. ذِي مَارَّا ڒْخذْمثْ إِنُو وَارْ ذَايِي تِّيفنْ شَا ڒْمُوعْصِييّثْ نِّي إِدْجَانْ ذ دّنْبْ.‘

‏10 نشّْ ذ سِيذِي، أَربِّي نّكْ، زڭْ وَامِي ثفّْغمْ كنِّيوْ زِي ثمُّورْثْ ن مِيصْرَا. نشّْ أَذْ شكْ جّغْ أَذْ ثْزذْغذْ ذڭْ إِقِيضَانْ أَمْ ذڭْ وُوسَّانْ ن ثْمسْمُونْثْ ذِي ڒخْڒَا. ^▪  

‏11 نشّْ سِّيوْڒغْ غَارْ إِنَابِييّنْ ؤُ نشّْ أَذْ أَرْنِيغْ ثِيمژْرِيوِينْ أَطَّاسْ ؤُ س ؤُفُوسْ ن إِنَابِييّنْ أَذْ وْشغْ ڒمْثُوڒْ.

‏12 مَاڒَا ثُوغَا جِيلْعَاذْ ذ ڒْمُوعْصِييّثْ، خنِّي ذوْڒنْ نِيثْنِي خْوَانْ قَاعْ ذِي جِيلْعَاذْ. أَقَا قدّْمنْ ذِينْ إِفُونَاسنْ. ؤُڒَا ذ إِعَالْطَارنْ نْسنْ ذوْڒنْ ذ إِعُورِّيشنْ ن إِژْرَا ذِي ڒخْضُوضْ ن إِيَّارنْ. ^▪  

‏13 يَاعْقُوبْ يَارْوڒْ غَارْ جّْوَايهْ ن أَرَامْ ؤُ إِسْرَائِيل ثُوغَا إِتّْسخَّارْ خْ يِيشْثْ ن ثمْغَارْثْ ؤُ يَارْوسْ ثَاحِيمَارْثْ ذِي طّْوعْ ن يِيشْثْ ن ثمْغَارْثْ. ^▪  

‏14 س يِيجّْ ن ؤُنَابِي إِسّْڭعّذْ سِيذِي إِسْرَائِيل زِي مِيصْرَا ؤُ س يِيجّْ ن ؤُنَابِي يَارْوسْ إِ-ث.

‏15 إِفْرَايِيمْ ثُوغَا إِسْعَارْ إِ-ث أَطَّاسْ. س ؤُينِّي أَذْ يجّْ سِيذِي إِذَامّنْ نّسْ أَذْ خَاسْ د-أَسنْ ؤُ سِيذِي نّسْ أَذْ أَسْ إِخدْجصْ ڒْحڭْرَا نّسْ.“