‏1 ”إِسْرَايِيلْ، وَارْ فَارّحْ شَا نِيغْ أَذْ ثسْڒِيوْڒِيوذْ أَمْ ڒڭْنُوسْ. مَاغَارْ ثِيڭّْوجذْ خْ أَربِّي نّكْ أَمْ ثسّفْسذذْ إِخفْ نّكْ. ثتّخْسذْ ڒْمُونثْ ن إِشْثْ ن ثمْغَارْثْ ن فَارْقْ-شّْغڒْ ذِي مَارَّا إِنذْرَارْ ن ؤُسَارْوثْ ن إِمنْذِي. ‏2 أَنْذْرَارْ ذ ثْسِيرْثْ ن ؤُضِيڒْ وَارْ ذ أَسنْ سّشّنْ شَا ؤُ بِينُو ن جْذِيذْ أَذْ ت إِخيّبْ.

‏3 نِيثْنِي وَارْ تّْغِيمَانْ شَا ذِي ثمُّورْثْ ن سِيذِي. إِفْرَايِيمْ أَذْ د-إِذْوڒْ غَارْ مِيصْرَا ؤُ نِيثْنِي أَذْ شّنْ مِينْ إِخمْجنْ ذِي أَشُّورْ.

‏4 نِيثْنِي وَارْ سيّْبنْ شَا بِينُو إِ سِيذِي ؤُ ثِيغَارْصَا نْسنْ وَارْ خَاسْ أَرطَّانْثْ. أَذْ أَسنْ إِڒِينْثْ أَمْ وغْرُومْ ن يِينِّي إِشطّْننْ. مَارَّا إِنِّي ث إِشّنْ، أَذْ ذوْڒنْ خمْجنْ، مَاغَارْ أَغْرُومْ نْسنْ أَذْ يِيڒِي إِ ڒعْمَارْ نْسنْ، وَارْ د-إِتِّيسْ وَالُو ذِي ثَادَّارْثْ ن سِيذِي. ‏5 مِينْ إِ غَا ثڭّمْ خنِّي ذڭْ إِجّْ ن وَاسّْ ن ڒْعِيذْ إِتّْوَاڭّنْ، ذڭْ إِجّْ ن وَاسّْ ن ڒْعِيذْ إِ سِيذِي؟ ‏6 خْژَارْ، أَقَا نِيثْنِي تَّاڭّْوجنْ زِي سِّيبّثْ ن ؤُردّدْجْ. مِيصْرَا أَذْ ثنْ إِسّْمُونْ، مُوفْ أَذْ ثنْ ثنْضڒْ. إِرزَّازنْ أَذْ مژّْرنْ ذِي نُّوقَارْثْ نْسنْ، شْبَارْقْ أَكْ-ذ إِسنَّاننْ أَذْ إِطّفْ أَمْشَانْ ن إِقِيضَانْ نْسنْ. ^▫  

‏7 أَقَا ؤُسَّانْ ن ؤُجَارّبْ ؤُسِينْ-د، أَقَا ؤُسَّانْ ن لْعِيقَابْ ؤُسِينْ-د. نِيثْنِي أَذْ ث سّْننْ، إِنِّي ن إِسْرَائِيل. أَنَابِي ذ أَپُوهَاڒِي، أَرْيَازْ أَرُّوحَانِي ذ إِجّْ ن بُو-جْنُونْ زڭْ وَاطَّاسْ ن ڒْمُوعْصِييّثْ نّكْ ذ وَاطَّاسْ ن ڒعْذَاوثْ نّكْ. ‏8 إِفْرَايِيمْ إِصْوضْ أَكْ-ذ أَربِّي إِنُو. أَنَابِي إِتَّافْ إِجّْ ن ڒْفخْ ن ؤُنڭْمَارْ ذِي مَارَّا إِبْرِيذنْ نّسْ، ڒعْذَاوثْ ذِي ثَادَّارْثْ ن أَربِّي نّسْ. ‏9 أَقَا أَثنْ غَارْقنْ أَڒْ إِڒِي أَمشْنَاوْ ذڭْ وُوسَّانْ نِّي ن جِيبْعَا. نتَّا أَذْ إِعْقڒْ خْ ڒْمُوعْصِييّثْ نْسنْ ؤُ أَذْ إِخْڒفْ دّْنُوبْ نْسنْ.

‏10 نشّْ ؤُفِيغْ إِسْرَائِيل أَمْ ؤُضِيڒْ ذِي ڒخْڒَا، ژْرِيغْ إِبَابَاثنْ نْومْ أَمْ إِمنْزَا ن وَارْثُو ذِي ثمْژِي نْسنْ. نِيثْنِي مَاشَا ؤُذْفنْ غَارْ بَاعْلْ-فَاغُورْ ؤُشَا وْشِينْ إِخفْ نْسنْ س ڒفْضِيحثْ إِ نتَّا ؤُشَا نِيثْنِي ذوْڒنْ ذ نّْعَاوَاثْ أَمْ ونِّي ثُوغَا تّخْسنْ. ^▪  

‏11 خْ ينِّي ن إِفْرَايِيمْ، أَقَا أَعُودْجِي نْسنْ أَذْ إِضُو أَمْ وجْضِيضْ، أَذْ يَاڭّْوجْ خْ وخْڒَاقْ ؤُ خْ ؤُعذِّيسْ ن يمَّاسْ ؤُ خْ ثْكسِّيثْ ن ثَارْوَا.

‏12 وَاخَّا نِيثْنِي سّْيَامنْ إِحنْجِيرنْ نْسنْ أَڒْ غَا مْغَارنْ، نشّْ أَذْ ثنْ أَرّغْ نْهْڒَا إِحنْجِيرنْ أَڒَامِي وَارْ ذِينْ إِقِّيمْ بْنَاذمْ. مَاغَارْ ؤُڒَا إِ نِيثْنِي س ثِيذتّْ، ؤُشْثْ، خْمِي خَاسنْ غَا حيّْذغْ.

‏13 أَخْمِي ژْرِيغْ صُورْ، أَمُّو إِ إِتّْوَاژُّو إِفْرَايِيمْ ذڭْ إِشْثْ ن جِّيهثْ أَرْضَانْ. ؤُ ڒخُّو إِتّْخصَّا إِ إِفْرَايِيمْ أَذْ إِسلّمْ ثَارْوَا نّسْ إِ ؤُنقَّامْ.

‏14 أوْشْ أَسنْ، أَ سِيذِي! مِينْ ذ أَسنْ إِ غَا ثوْشذْ؟ أوْشْ أَسنْ إِجّْ ن ؤُعذِّيسْ س وطُّووْ ن إِسيْمَانْ ذ يبَّاشْ يُوژْغنْ. ^▪  

‏15 مَارَّا ثَاعفَّانْثْ نْسنْ ثْعَارَّا ذِي جِيلْجَالْ، مَاغَارْ ذِينِّي شَارْهغْ ثنْ خْ ثْعفَّانْثْ ن ثْمڭَّا نْسنْ. نشّْ أَذْ خَاسنْ أَژّْڒغْ زِي ثَادَّارْثْ إِنُو. عمَّارْصْ عَاذْ أَذْ ثنْ خْسغْ، مَارَّا ڒْحُوكَّامْ نْسنْ ذ إِمْغوّْغنْ. ^▪  

‏16 إِفْرَايِيمْ إِتّْوَاوّثْ، إِژوْرَانْ نْسنْ ؤُژْغنْ، وَارْ تِّيرْونْ عَاذْ. وَاخَّا نِيثْنِي تَّارْونْ، نشّْ ڭُّورْ أَذْ نْغغْ إِمْعِيزَّانْ ن ؤُعذِّيسْ نْسنْ.

‏17 أَربِّي إِنُو أَذْ ثنْ إِنْضَارْ، مَاغَارْ نِيثْنِي وَارْ غَارسْ تّسْڒِينْ ؤُ نِيثْنِي أَذْ ذوْڒنْ ثتّْلِيعنْ جَارْ ڒڭْنُوسْ.“