‏1 ”أَسمْ-د، أَذْ د-نذْوڒْ غَارْ سِيذِي، مَاغَارْ نتَّا إِقزَّارْ ؤُ ڒخُّو أَذْ أَنغْ إِسّْڭنْفَا، نتَّا إِوْثَا ؤُ ڒخُّو أَذْ أَنغْ إِجْبَارْ. ‏2 أَوَارْنِي إِ ثْنَاينْ ن وُوسَّانْ أَذْ أَنغْ إِسّدَّارْ، ذڭْ وَاسّْ وِيسّْ ثْڒَاثَا أَذْ أَنغْ إِسّْنكَّارْ ؤُ نشِّينْ أَذْ ندَّارْ زَّاثْ إِ وُوذمْ نّسْ. ‏3 خنِّي أَذْ نسّنْ، أَذْ نضْفَارْ مَاحنْذْ أَذْ نسّنْ سِيذِي. ؤُفُوغْ نّسْ إِمْثنْ أَمْ ثُوفُّوثْ ن ڒفْجَارْ. أَذْ غَارْنغْ د-يَاسْ أَمْ ونْژَارْ، أَمْ ونْژَارْ ن أَرّْبِيعْ نِّي إِسَّارْضَابنْ ثَامُّورْثْ.“

‏4 مِينْ أَكِيذكْ غَا ڭّغْ، أَ إِفْرَايِيمْ، مِينْ أَكِيذكْ غَا ڭّغْ، أَ يَاهُوذَا. ثَامخْسِيوْثْ نْومْ إِشوَّارنْ ثتّڭّْ أَمشْنَاوْ أَسيْنُو غَارْ ثفُّوثْ ؤُ أَمشْنَاوْ نّْذَا إِڭعّْذنْ ؤُشَا خنِّي إِقطَّا. ‏5 س ؤُينِّي نشّْ قسّغْ ثنْ س ثْمِيجَّا ن إِنَابِييّنْ أَمْ س إِجّْ ن ؤُيڒْزِيمْ. نشّْ نْغِيغْ ثنْ س وَاوَاڒنْ ن ؤُقمُّومْ إِنُو. ڒْحُوكمْ خَاكْ أَمشْنَاوْ ثْفَاوْثْ إِنُّوفْسْڒنْ. ‏6 مِينْزِي تّخْسغْ ثَامخْسِيوْثْ إِشوَّارنْ، وَارْ إِدْجِي ثَاغَارْصْثْ، ؤُ ثُوسّْنَا ن سِيذِي تّخْسغْ ت خْ ثْغَارْصَا ن وشْمَاضْ.“ ^▪  

‏7 ”نِيثْنِي عدَّانْ خْ ڒْعَاهْذْ أَمْ أَذَامْ، ذِينِّي إِ ذ أَيِي غْذَارنْ. ^▪   ‏8 جِيلْعَاذْ ذ إِشْثْ ن ثنْذِينْثْ ن يِينِّي إِتّڭّنْ ڒْمُوعْصِييّثْ، ثشُّورْ س إِذَامّنْ. ‏9 أَمْ يِيجّْ ن بَانْذِييَّا ن إِخوَّاننْ نِّي إِتّْرَاجَانْ شَا ن يِيجّنْ، أَمُّو إِ ثدْجْ ثرْفِيقْثْ ن إِكهَّاننْ. نِيثْنِي نقّنْ ذڭْ وبْرِيذْ إِ د إِتَّاوْينْ غَارْ شَاكِيمْ، مَاغَارْ نِيثْنِي تّڭّنْ ڒفْضَايحْ وَاهَا.

‏10 نشّْ تّْوَاڒِيغْ مِينْ إِسّْنخْڒَاعنْ ذِي ثَادَّارْثْ ن إِسْرَائِيل، خْزَارْ، فَارْقْ-شّْغڒْ ن إِفْرَايِيمْ، إِسْرَائِيل ثسّخْمجْ إِخفْ نّسْ.

‏11 ؤُڒَا إِ شكْ، يَاهُوذَا، أَقَا ثمَّارْسْ إِشْثْ ن صَّابثْ خْمِي إِ د غَا سّْعقْبغْ إِمحْبَاسْ ن ڒْڭنْسْ إِنُو.“