‏1 ذڭْ ؤُسڭّْوَاسْ أَمزْوَارُو ن ذَارِييُوسْ، مِّيسْ ن أَحَاشْوِيرُوسْ، ونِّي زڭْ أَيْثْ ن مَاذَايْ، ونِّي إِذوْڒنْ ذ أَجدْجِيذْ خْ ثْڭلْذِيثْ ن إِكَالْذَانِييّنْ، ^▫   ‏2 ذڭْ ؤُسڭّْوَاسْ أَمزْوَارُو ن ثْڭلْذَا نّسْ إِبَانْ-أَيِي-د، إِ نشّْ ذَانِييَالْ، زڭْ إِذْلِيسنْ، بلِّي ڒْقدّْ ن إِسڭّْوُوسَا إِ خْ ثُوغَا إِسِّيوڒْ وَاوَاڒْ ن سِيذِي إِ ؤُنَابِي إِرْمِييَا، إِ ؤُكمّڒْ ن ڒْوقْثْ ن ڒْخِيرْبَاثْ ن ؤُرْشَالِيمْ، ثُوغَا-ث سبْعِينْ ن إِسڭّْوُوسَا. ‏3 نشّْ أَرِّيغْ أَغمْپُوبْ إِنُو غَارْ سِيذِي أَربِّي، حِيمَا أَذْ خَاسْ أَرْزُوغْ س ثْژَادْجِيثْ ذ ؤُزَاوڭْ، س ؤُژُومِّي ذڭْ وقْرَابْ ذ يِيغّضْ. ‏4 نشّْ ژُّودْجغْ إِ سِيذِي، أَربِّي إِنُو، ؤُ نعْمغْ دّْنُوبْ نّغْ، نِّيغْ

”أَ سِيذِي إِنُو، شكْ ذ أَربِّي أَمقّْرَانْ ذ إِسِّيڭّْوِيذنْ، ونِّي إِحطَّانْ ڒْعَاهْذْ نّسْ ذ ثْمخْسِيوْثْ نّسْ إِشوَّارنْ إِ يِينِّي ث إِتّخْسنْ ؤُ إِ يِينِّي إِحطَّانْ ثِيوصَّا نّسْ. ^▪   ‏5 نشِّينْ نخْضَا ؤُ نڭَّا ڒْمُوعْصِييّثْ ذ ڒْغَارْ ؤُ نْغوّغْ أَمْ نفّغْ زِي ثِيوصَّا ذ لْفَارَايِيضْ نّكْ. ^▪   ‏6 وَارْ نسْڒِي إِ إِمْسخَّارنْ نّكْ، إِنَابِييّنْ، إِنِّي ثُوغَا إِسَّاوَاڒنْ ذڭْ يِيسمْ نّكْ إِ إِجدْجِيذنْ نّغْ ذ ڒْحُوكَّامْ نّغْ ذ ڒجْذُوذْ نّغْ ؤُڒَا إِ مَارَّا  ڒْڭنْسْ ن ثمُّورْثْ.

‏7 شكْ، أَ سِيذِي إِنُو، غَاركْ ثَاسڭْذَا، مَاشَا نشِّينْ غَارْنغْ ڒحْيَا ذڭْ ؤُغمْپُوبْ، أَمْ مَامّشْ ثدْجْ أَسّْ-أَ، غَارْ إِرْيَازنْ ن يَاهُوذَا ذ إِمزْذَاغْ ن ؤُرْشَالِيمْ ذ مَارَّا إِسْرَائِيل، غَارْ ينِّي يُوذْسنْ ذ ينِّي إِڭّْوجنْ ذِي مَارَّا ثِيمُّورَا مَانِي خَاسنْ ثُوژّْڒذْ شكْ ذِي سِّيبّثْ ن ڒغْذَارْ نْسنْ إِ زِي شكْ غْضَارنْ. ‏8 أَ سِيذِي، ذَايْنغْ ڒحْيَا ذڭْ ؤُغمْپُوبْ نّغْ، أَقَا-ث ذڭْ إِجدْجِيذنْ نّغْ ذِي ڒْحُوكَّامْ نّغْ ذڭْ إِبَابَاثنْ نّغْ مَاغَارْ نشِّينْ نخْضَا أَكِيذكْ.

‏9 غَارْ سِيذِي إِنُو، أَربِّي نّغْ، أَرّحْمثْ ذ وغْفَارْ وَاخَّا نشِّينْ نْغوّغْ خَاسْ. ^▪  

‏10 وَارْ نسْڒِي إِ ثْمِيجَّا ن سِيذِي، أَربِّي نّغْ، مَاحنْذْ أَذْ نُويُورْ ذِي لْقَاوَانِينْ نّسْ نِّي إِ ذ أَنغْ إِوْشَا س ؤُفُوسْ ن إِمْسخَّارنْ نّسْ، إِنَابِييّنْ.

‏11 مَارَّا إِسْرَائِيل ثُوغَا إِتّْعدَّا خْ شَّارِيعَا نّكْ ؤُ إِتّفّغْ زڭْ وبْرِيذْ مَاحنْذْ وَارْ إِتّسْڒِي إِ ثْمِيجَّا نّكْ. ؤُ أَمُّو إِ خَانغْ ثتّْوَازدْجعْ نّعْڒثْ إِ إِتّْوَاضمْننْ س ثْجَادْجِيثْ إِ إِتّْوَارِينْ ذِي شَّارِيعَا ن مُوسَا، أَمْسخَّارْ ن أَربِّي، مِينْزِي نشِّينْ نخْضَا أَكِيذسْ. ^▪  

‏12 نتَّا إِڭَّا أَوَاڒنْ نّسْ تّْبدَّانْ، أَوَاڒنْ نِّي إِسِّيوڒْ أَكِيذْنغْ ؤُ أَكْ-ذ ڒْقُوضَاثْ نّغْ نِّي ثُوغَا إِ خَانغْ إِحكّْمنْ، أَمْ ذَايْنغْ إِڭَّا إِجّْ ن ڒْغَارْ ذ أَمقّْرَانْ إِ وَارْ إِمْسَارنْ عمَّارْصْ سَاذُو ؤُجنَّا، أَمشْنَاوْ مِينْ إِڭَّا إِ ؤُرْشَالِيمْ.

‏13 أَمْ مَامّشْ ثُورَا ذِي شَّارِيعَا ن مُوسَا، أَمُّو يُوسَا-د خَانغْ مَارَّا ڒْغَارْ نِّي، ؤُ نشِّينْ خنِّي وَارْ نْزَاوڭْ شَا زَّاثْ إِ وُوذمْ ن سِيذِي، أَربِّي نّغْ، مَاحنْذْ أَذْ نْحيّذْ خْ ڒْمُوعْصِييّثْ نّغْ ؤُ مَاحنْذْ أَذْ نَارْزُو أَذْ نفْهمْ ثِيذتّْ نّكْ.

‏14 سِيذِي إِحْضَا ڒْغَارْ ؤُشَا إِسَّارْسْ إِ-ث-إِ-د خَانغْ، مَاغَارْ سِيذِي، أَربِّي نّغْ ذ أَمْسڭّذْ ذِي مَارَّا ڒفْعَايڒْ نّسْ نِّي إِڭَّا ؤُمِي وَارْ نسْڒِي غَارْ ثْمِيجَّا نّسْ.

‏15 ؤُ ڒخُّو، أَ سِيذِي، أَربِّي نّغْ، ونِّي إِسُّوفّْغنْ ڒْڭنْسْ نّكْ زِي ثمُّورْثْ ن مِيصْرَا س يِيجّْ ن ؤُفُوسْ إِجهْذنْ ؤُ ونِّي إِڭِّينْ إِ يِيخفْ نّسْ إِجّْ ن يِيسمْ، أَمْ مَامّشْ إِدْجْ أَڒْ أَسّْ-أَ. نشِّينْ نخْضَا ؤُ نڭَّا ڒْغَارْ. ^▪  

‏16 أَ سِيذِي إِنُو، زِي سِّيبّثْ ن ثْسڭْذَا نّكْ، سْحيّذْ أَغْضَابْ نّكْ ذ وسْعَارْ نّكْ خْ ثنْذِينْثْ نّكْ ؤُرْشَالِيمْ، خْ وذْرَارْ نّكْ إِقدّْسنْ. مَاغَارْ زِي سِّيبّثْ ن دّْنُوبْ نّغْ ذ ڒْمُوعْصِييّثْ ن إِبَابَاثنْ نّغْ ثذْوڒْ  ؤُرْشَالِيمْ ذ ڒْڭنْسْ نّكْ ذ ڒْعَارْ إِ مَارَّا إِنِّي ذ أَنغْ د-إِنّْضنْ.

‏17 ؤُ ڒخُّو، أَ أَربِّي نّغْ، سڒْ غَارْ ثْژَادْجِيثْ ن ؤُمْسخَّارْ نّكْ ؤُ غَارْ ؤُزَاوڭْ نّسْ، أجّْ ؤُذمْ نّكْ أَذْ يڭّْ ثَافَاوْثْ خْ زَّاوشْثْ نّكْ إِقدّْسنْ، ثنِّي إِذوْڒنْ ذ ڒْخَارْبثْ، ذِي طّْوعْ ن سِيذِي إِنُو.

‏18 أوْشْ أَمزُّوغْ نّكْ، أَ أَربِّي، سڒْ. أَرْزمْ ثِيطَّاوِينْ نّكْ ؤُ خْزَارْ ڒْخِيرْبَاثْ ذ ثنْذِينْثْ نِّي إِتّْوَاڒَاغَانْ س يِيسمْ نّكْ، مِينْزِي نشِّينْ وَارْ نوْضِي زَّاثْ إِ وُوذمْ نّكْ مَاحنْذْ أَذْ نْزَاوڭْ خْ ؤُسْذَاهدْجِي ن ثْسڭْذَا نّغْ، مَاشَا خْ ؤُسْذَاهدْجِي ن أَرَّاحْمثْ نّكْ ثَامقّْرَانْثْ.

‏19 أَ سِيذِي إِنُو، سڒْ! أَ سِيذِي إِنُو، غْفَارْ! أَ سِيذِي إِنُو، حْضَا ؤُشَا أڭّْ، وَارْ ثْعطَّاڒْ شَا، ذِي طّْوعْ ن يِيخفْ نّكْ، أَ أَربِّي إِنُو، مَاغَارْ ثَانْذِينْثْ نّكْ ذ ڒْڭنْسْ نّكْ تّْوَاڒَاغَانْ س يِيسمْ نّكْ.“

‏20 أَمْ ثُوغَا سَّاوَاڒغْ عَاذْ ؤُ تّْژَادْجِيغْ ؤُ نعّْمغْ س دّْنُوبْ إِنُو ذ دّْنُوبْ ن ڒْڭنْسْ إِنُو إِسْرَائِيل ؤُ تّْزدْجْعغْ أَزَاوڭْ إِنُو زَّاثْ إِ وُوذمْ ن سِيذِي، أَربِّي إِنُو، ذِي طّْوعْ ن وذْرَارْ إِقدّْسنْ ن أَربِّي إِنُو، ‏21 أَمْ ثُوغَا سَّاوَاڒغْ عَاذْ أَمُّو، تّْژَادْجِيغْ، يُوسَا-د ورْيَازْ جِيبْرِيلْ نِّي ژْرِيغْ ذڭْ ؤُمزْوَارُو ذِي ثْمژْرِيوْثْ، إِضْوَا-د زڭْ ؤُجنَّا غَارِي ؤُشَا إِحَاذَا أَيِي غَارْ ڒْوقْثْ ن ثْغَارْصْثْ ن ثْمذِّيثْ. ^▫   ‏22 نتَّا إِسّفْهمْ ؤُ إِسِّيوڒْ أَكِيذِي، إِنَّا: ”ذَانِييَالْ، نشّْ فّْغغْ-د غَارْ ڒْوقْثْ-أَ مَاحنْذْ أَذْ شكْ سَّارْڭْبغْ خْ ڒْمعْنَا. ‏23 غَارْ ؤُمزْوَارُو ن ؤُزَاوڭْ نّكْ إِفّغْ-د يِيجّْ ن وَاوَاڒْ ؤُ نشّْ ؤُسِيغْ-د حِيمَا أَذْ أَشْ ث نِّيغْ، مَاغَارْ شكْ ذ إِجّْ ن ورْيَازْ إِعِيزّنْ أَطَّاسْ. فْهمْ أَوَاڒْ-أَ ؤُ أَرْزُو ڒفْهَامثْ ذِي ثْمژْرِيوْثْ-أَ.

‏24 تّْوَاڭّنْثْ سبْعِينْ ن سِيمَانَاثْ خْ ڒْڭنْسْ نّكْ ؤُ خْ ثنْذِينْثْ نّكْ إِقدّْسنْ، حِيمَا أَذْ ثتّْوَاسْبدّْ تَّاعدُّو ؤُ أَذْ إِتّْوَاشمّعْ دّنْبْ ؤُ أَذْ ثتّْوَاصْڒحْ ڒْمُوعْصِييّثْ ؤُ حِيمَا أَذْ ثتّْوَاوِي ثْسڭْذَا ؤُ حِيمَا أَذْ ثتّْوَاشمّعْ ثْمژْرِيوْثْ ذ ؤُنَابِي ؤُ حِيمَا أَذْ إِتّْوَاذْهنْ أَقْذَاسْ ن ؤُقدّسْ. ‏25 سّنْ ؤُ فْهمْ، أَقَا زڭْ وَامِي د-إِفّغْ وَاوَاڒْ حِيمَا أَذْ عذْڒنْ ؤُ أَذْ بْنَانْ ؤُرْشَالِيمْ عَاوذْ غَارسْ أَڒْ أَمذْهُونْ، مِينْ إِخْسْ أَذْ يِينِي لْمَاسِيحْ، ڒْحَاكمْ، أَقَا سبْعَا ن سِيمَانَاثْ ؤُ عَاذْ ثْنَاينْ ؤُ-ستِّينْ ن سِيمَانَاثْ. أَذْ ثتّْوَابْنَا ؤُرْشَالِيمْ عَاوذْ أَكْ-ذ وَازَّايْ ذ ڒْحِيضْ ذڭْ إِكُوذنْ يوْعَارنْ.

‏26 أَوَارْنِي إِ ثْنَاينْ ؤُ-ستِّينْ ن سِيمَانَاثْ نِّي أَذْ إِتّْوَاكّسْ ؤُمذْهُونْ ؤُ وَارْ غَارسْ إِتِّيڒِي وَالُو. ؤُ ثَانْذِينْثْ ذ زَّاوشْثْ إِقدّْسنْ أَذْ تّْوَاردّْدْجنْثْ س يِيجّْ ن  ڒْڭنْسْ ن إِجّْ نْ ڒْحَاكمْ ونِّي إِ د غَا يَاسنْ ؤُ ثَانڭَّارُوثْ نّسْ أَذْ ثِيڒِي ذِي سّحْڒثْ ؤُشَا أَذْ ذِينْ يِيڒِي ؤُمنْغِي غَارسْ أَڒْ أَنڭَّارْ، أَردّدْجْ نِّي أَقَا يُورَا أَذْ يِيڒِي. ‏27 نتَّا أَذْ إِڭّْ إِجّْ ن ڒْعَاهْذْ أَكْ-ذ وَاطَّاسْ س ؤُغِيڒْ ؤُ ذڭْ وزْينْ ن سِيمَانَا أَذْ إِسّْبدّْ ثَاغَارْصْثْ ذ ثوْهِيبْثْ ن ڒْغِيدْجثْ ؤُ خْ وَافْرِيوْ ن نّْعَاوَاثْ أَذْ د-يَاسْ إِجّْ ن ؤُمْثحَّايْ غَارسْ أَڒْ غَا إِتّْوَافَارّغْ ڒحْكَامْ إِ يُورِينْ خْ ونِّي إِتّْوَاثحَّانْ. ^▫  ▪