‏1 أَوَارْنِي أَيَا يِيوِي أَيِي عَاوذْ غَارْ وَاذَافْ ن ثَادَّارْثْ، ؤُ خْزَارْ، زِي سَاذُو ثَانبْذَاثْ ن ثَادَّارْثْ تّفّْغنْ وَامَانْ غَارْ شَّارْقْ، مِينْزِي أَغزْذِيسْ ن زَّاثْ ن ثَادَّارْثْ ثُوغَا-ث غَارْ شَّارْقْ، ؤُ ثُوغَا تَّازّْڒنْ هكّْوَانْ أَمَانْ زِي سْوَادَّايْ ن ؤُغزْذِيسْ أَزڒْمَاضْ ن ثَادَّارْثْ، غَارْ ؤُغزْذِيسْ ن لْجَانُوبْ ن ؤُعَالْطَارْ. ‏2 إِسُّوفّغْ أَيِي-د زڭْ ؤُكُولْوَارْ ن ڒبْنِي ن ثوَّارْثْ ن شَّامَالْ ؤُشَا إِنْذهْ أَيِي غَارْ ثبْرِيذْثْ نِّي غَارْ بَارَّا، جِّيهثْ ن ثوَّارْثْ ن بَارَّا، غَارْ ؤُكُولْوَارْ نِّي إِخزَّارنْ غَارْ شَّارْقْ، ؤُ خْزَارْ، أَمَانْ تَّازّْڒنْ زِي ثغْمَارْثْ ن زَّاثْ أَفُوسِي.

‏3 ؤُمِي د-إِفّغْ ورْيَازْ غَارْ شَّارْقْ، ثُوغَا غَارسْ أَفِيڒُو ن ڒعْبَارْ ذڭْ ؤُفُوسْ نّسْ ؤُشَا إِعْبَارْ أَڒفْ ن إِغَادْجنْ. إِسّژْوَا أَيِي خْ وَامَانْ ؤُشَا أَمَانْ إِوْضنْ أَڒْ ثِيشعْبِينْ. ‏4 إِعْبَارْ عَاوذْ أَڒفْ ن إِغَادْجنْ ؤُشَا إِسّژْوَا أَيِي خْ وَامَانْ ؤُشَا أَمَانْ إِوْضنْ أَڒْ  إِفَادّنْ. عَاوذْ إِعْبَارْ أَڒفْ ن إِغَادْجنْ ؤُشَا إِسّژْوَا أَيِي عَاذْ كْثَارْ ؤُشَا أَمَانْ إِوْضنْ أَڒْ ثِيجْعِينَّاثِينْ. ‏5 إِعْبَارْ ثْوَاڒَاثْ نّغْنِي أَڒفْ ن إِغَادْجنْ ؤُشَا أَمَانْ ذوْڒنْ ذ إِجّْ ن يغْزَارْ وَارْ زْمِيرغْ أَذْ ث ژْوِيغْ خْ إِضَارنْ، مَاغَارْ أَمَانْ ڭعّْذنْ أَڒَامِي ثُوغَا إِتّْخصَّا أَذْ إِعُومّْ بْنَاذمْ، أَقَا-ث ذ إِجّْ ن يغْزَارْ إِ وَارْ إِزمَّارْ حذْ أَذْ ث إِژْوَا خْ إِضَارنْ.

‏6 نتَّا إِنَّا أَيِي: ”مَا ثژْرِيذْ ت، أَ مِّيسْ ن بْنَاذمْ؟“ خنِّي إِنْذهْ أَيِي ؤُشَا يَارَّا أَيِي غَارْ ثْمَا ن يغْزَارْ. ‏7 ؤُمِي د-ذوْڒغْ نشّْ، خْزَارْ، بدّنْثْ ذِينْ أَطَّاسْ ن ثْشجِّيرَا خْ ثْمَا ن يغْزَارْ، أَمْ غَارْ ثْمَا أَيَا أَمْ غَارْ ثْمَا نِّي. ^▪   ‏8 خنِّي إِنَّا أَيِي: ”أَمَانْ-أَ تَّازّْڒنْ غَارْ جِّيهثْ ن شَّارْقْ ؤُشَا هكّْوَانْ غَارْ ڒوْضَا ؤُشَا تَّاكّْوَاضنْ غَارْ ڒبْحَارْ إِمُّوثنْ. خنِّي تَّازْڒنْ ذِي ڒبْحَارْ ؤُشَا تّْوَاسْڭّنْفَانْ أَمَانْ عَاوذْ. ‏9 أَذْ إِمْسَارْ بلِّي كُوڒْ ڒعْمَارْ إِ ذِينْ إِتّنْهزَّانْ أَذْ إِدَّارْ، مَانِي مَا إِ د غَا يَاوضْ يغْزَارْ إِجهْذنْ نِّي. أَذْ ذِينْ إِڒِينْ إِسڒْمَانْ أَطَّاسْ، مِينْزِي أَمَانْ-أَ تَّازّْڒنْ ذِينِّي، ؤُشَا أَذْ تّْوَاسّْڭنْفَانْ وَامَانْ ن ڒبْحَارْ. مَانِي مَا إِ د غَا يَاسْ يغْزَارْ-أَ، أَذْ ذِينْ ثِيڒِي ثُوذَارْثْ.

‏10 أَذْ إِمْسَارْ بلِّي أَذْ إِڒِينْ إِيمَّارنْ ن إِسڒْمَانْ زِي عَايْنْ-جَاذْيِي أَڒْ عَايْنْ-عِيڭْلَايِيمْ. أَذْ ذِينْ إِڒِينْ إِمُوشَانْ إِ ؤُجفَّافْ ن ثْرَاشَّاوِينْ. أَسْڒمْ نْسنْ أَذْ يِيڒِي عْلَاحْسَابْ مَارْكَا نّسْ، أَمشْنَاوْ أَسْڒمْ ن ڒبْحَارْ أَمقّْرَانْ، أَطَّاسْ س وَاطَّاسْ،

‏11 مَاشَا ثِينْذَاثْ نّسْ ذ إِيڒْمَامنْ نّسْ وَارْ تّْوَاڭّنْفَانْ، أَذْ قِّيمنْ مدْجْحنْ.

‏12 غَارْ يغْزَارْ، خْ ثْمَا نّسْ، خْ ثْمَا أَيَا ؤُ خْ ثْمَا نِّي، أَذْ إِڒِينْ عْڒَامْ كُوڒْ ثِيشجِّيرَا، مَاحنْذْ أَذْ زَّايْسنْثْ شّنْ، ثِينِّي ؤُمِي ثَافَارْثْ نْسنْثْ وَارْ ثتِّيسْڒَاوْ ؤُ ڒْغِيدْجثْ نْسنْثْ وَارْ ث قطِّي شَا. كُوڒْ أَيُورْ أَذْ وْشنْثْ ڒْغِيدْجثْ ذ طّْرِي، مَاغَارْ أَمَانْ ن يغْزَارْ فّْغنْ-د زِي زَّاوشْثْ إِقدّْسنْ. ڒْغِيدْجثْ نْسنْثْ أَذْ ثِيڒِي إِ مَاشَّا ذ ثَافَارْثْ نْسنْثْ إِ ؤُڭنْفُو.“ ^▪  

‏13 ”أَمُّو إِ إِقَّارْ سِيذِي إِنُو، سِيذِي: وَا أَذْ يِيڒِي ذ أَيْمِيرْ إِ خْ إِ غَا ثوْشِيمْ ثَامُّورْثْ ذ ڒْوَارْثْ إِ ثنْعَاشْ ن ثْقبَّاڒْ ن إِسْرَائِيل. يُوسُوفْ أَذْ إِكْسِي ثْنَاينْ ن ثْسقَّارْ.

‏14 كنِّيوْ أَذْ ت ثْوَارْثمْ، إِجّْ أَمشْنَاوْ ونّغْنِي، إِ ؤُيَا سّْڭعّْذغْ أَفُوسْ إِنُو ؤُشَا جُّودْجغْ أَذْ ت وْشغْ إِ ڒجْذُوذْ نْومْ. ثَامُّورْثْ-أَ أَذْ ثِيڒِي ذ ثَاسْغَارْثْ نْومْ. ^▪  

‏15 وَا أَذْ يِيڒِي ذ أَيْمِيرْ ن ثمُّورْثْ: غَارْ ؤُغزْذِيسْ ن شَّامَالْ، زِي ڒبْحَارْ أَمقّْرَانْ خْ وبْرِيذْ غَارْ هِيثْلُونْ أَڒْ د-ثُوسِيذْ غَارْ صَاذَاذْ،

‏16 خنِّي حَامَاثْ، بَايْرُوثَا، سِيبْرَايِيمْ نِّي يدْجْ جَارْ ويْمِيرْ ن ثمُّورْثْ ن ذِيمَاشْقْ ذ ويْمِيرْ ن ثمُّورْثْ ن حَامَاثْ، خنِّي غَارْ حَاصْرْ-هَاثِيخُونْ نِّي يدْجْ غَارْ ويْمِيرْ ن حَاوْرَانْ.

‏17 زِي ڒبْحَارْ أَذْ د-إِفّغْ ويْمِيرْ غَارْ حَاسْرْ-عَايْنُونْ، خْ ؤُغزْذِيسْ ن ويْمِيرْ ن ذِيمَاشْقْ ؤُشَا خنِّي غَارْ شَّامَالْ، غَارْ شَّامَالْ ؤُ خْ ؤُغزْذِيسْ ن ويْمِيرْ ن حَامَاثْ. وَا أَذْ يِيڒِي ذ أَغزْذِيسْ ن شَّامَالْ.

‏18 أَغزْذِيسْ ن شَّارْقْ إِتّكّْ زِي جَارْ حَاوْرَانْ ذ ذِيمَاشْقْ ؤُ زِي جَارْ جِيلْعَاذْ ذ ثمُّورْثْ ن إِسْرَائِيل خْ لْ'ؤُرْذُونْ. كنِّيوْ أَذْ ث ثْعبَّارمْ زڭْ ويْمِيرْ أَڒْ ڒبْحَارْ ن شَّارْقْ. وَا أَذْ يِيڒِي ذ أَغزْذِيسْ ن شَّارْقْ.

‏19 أَغزْذِيسْ ن لْجَانُوبْ، أَقَا-ث غَارْ لْجَانُوبْ زِي ثَامَارْ أَڒْ أَمَانْ ن مَارِيپُوثْ-قَاذَاشْ، ؤُشَا إِتّكّْ خْ ثغْزُورْثْ ن ثغْزَارْثْ ن مِيصْرَا أَڒْ ڒبْحَارْ أَمقّْرَانْ. وَا أَذْ يِيڒِي ذ أَغزْذِيسْ ن لْجَانُوبْ غَارْ لْجَانُوبْ.

‏20 أَغزْذِيسْ ن ڒْغَارْبْ ذ ڒبْحَارْ أَمقّْرَانْ، زڭْ ويْمِيرْ نِّي إِدْجَانْ غَارْ لْجَانُوبْ غَارسْ أَڒْ أَرنْذَاذْ ن وبْرِيذْ غَارْ حَامَاثْ، وَا أَذْ يِيڒِي ذ أَغزْذِيسْ ن لْغَارْبْ.

‏21 أَذْ ثبْضَامْ ثَامُّورْثْ-أَ جَارْ أَومْ عْلَاحْسَابْ ثِيقبَّاڒْ ن إِسْرَائِيل. ‏22 كنِّيوْ أَذْ ت جّنْ ذ ڒْوَارْثْ إِ كنِّيوْ ؤُ إِ إِبَارَّانِييّنْ ذِي ڒْوسْثْ نْومْ، إِنِّي ؤُرْونْ إِحنْجِيرنْ ذِي ڒْوسْثْ نْومْ. نِيثْنِي أَذْ أَومْ إِڒِينْ أَمْ ينِّي د-إِتّْوَاخڒْقنْ ذِي ثمُّورْثْ جَارْ أَيْثْ ن إِسْرَائِيل. أَذْ أَسنْ ثِيڒِي ثَاسْغَارْثْ أَكِيذْومْ ذِي ڒْوسْثْ ن ثْقبَّاڒْ ن إِسْرَائِيل. ‏23 غَارْ ثقْبِيتْشْ إِ غَارْ إِ غَا إِزْذغْ أَمْ ؤُبَارَّانِي، ذِينْ أَذْ أَسْ ثوْشمْ ثَاسْغَارْثْ نّسْ! أَمُّو إِ غَا ثِيڒِي، إِقَّارْ سِيذِي إِنُو، سِيذِي.“