‏1 خنِّي يَارَّا أَيِي عَاوذْ غَارْ ثوَّارْثْ ن بَارَّا ن زَّاوشْثْ إِقدّْسنْ نِّي إِخزَّارنْ غَارْ شَّارْقْ. ثُوغَا ثْبلّعْ. ‏2 إِنَّا أَيِي سِيذِي: ”ثَاوَّارْثْ-أَ أَذْ ثقِّيمْ ثْبلّعْ، وَارْ ثَارْزمْ شَا ؤُشَا ؤُڒَا ذ إِجّْ أَذْ زَّايسْ يَاذفْ، مِينْزِي سِيذِي، أَربِّي ن إِسْرَائِيل، يُوذفْ زَّايسْ، خْ ؤُيَا أَذْ ثقِّيمْ ثْبلّعْ. ‏3 ڒْحَاكمْ وَاهَا، ونِّي ذ ڒْحَاكمْ، أَذْ ذِينْ إِقِّيمْ حِيمَا أَذْ يشّْ أَغْرُومْ زَّاثْ إِ وُوذمْ ن سِيذِي. أَذْ يَاذفْ س ؤُكُولْوَارْ ن وسْقِيفْ ن ڒبْنِي ن ثوَّارْثْ ؤُشَا أَذْ إِفّغْ س ؤُكُولْوَارْ نّسْ.“

‏4 أَوَارْنِي أَسْ إِنْذهْ أَيِي جِّيهثْ ن ثوَّارْثْ ن شَّامَالْ، غَارْ زَّاثْ ن ثَادَّارْثْ. خزَّارغْ، ؤُشَا خْزَارْ، أَعُودْجِي ن سِيذِي إِشُّورْ ثَادَّارْثْ ن سِيذِي. خنِّي وْضِيغْ س ؤُغمْپُوبْ إِنُو غَارْ ثمُّورْثْ. ‏5 إِنَّا أَيِي سِيذِي: ”أَ مِّيسْ ن بْنَاذمْ، أڭّْ ؤُڒْ نّكْ، خْزَارْ س ثِيطَّاوِينْ نّكْ ؤُشَا سڒْ س إِمزُّوغنْ نّكْ مَارَّا مِينْ ذ أَشْ غَا سِّيوْڒغْ خْ مَارَّا ثِيوصَّا ن ثَادَّارْثْ ن سِيذِي ؤُ خْ مَارَّا إِزرْفَانْ نّسْ. أڭّْ ؤُڒْ نّكْ خْ ينِّي إِتَّاذْفنْ ثَادَّارْثْ ؤُ خْ مَارَّا إِنِّي إِتّفّْغنْ زِي زَّاوشْثْ إِقدّْسنْ، ‏6 ؤُشَا إِنِي إِ ينِّي إِتّْغوّْغنْ، إِ ثَادَّارْثْ ن إِسْرَائِيل: أَمُّو إِ إِقَّارْ سِيذِي إِنُو، سِيذِي: شْفَا مَارَّا جّْعَايفْ نْومْ، أَ ثَادَّارْثْ ن إِسْرَائِيل، ‏7 مَاغَارْ كنِّيوْ ثسِّيذْفمْ إِبَارَّانِييّنْ، إِنِّي وَارْ إِتّْوَاخثْننْ ن وُوڒْ ؤُ إِنِّي وَارْ إِتّْوَاخثْننْ ن أَرِّيمثْ، مَاحنْذْ أَذْ إِڒِينْ ذِي زَّاوشْثْ إِنُو إِقدّْسنْ ؤُ أَذْ سّْعِيدْجْثنْ أَمُّو ثَادَّارْثْ إِنُو، ڒَامِي كنِّيوْ ثِيوْيمْ أَغْرُومْ إِنُو، إِخْسْ أَذْ يِينِي ثَاذُونْثْ ذ إِذَامّنْ، ؤُ أَرْژِينْ نِيثْنِي ڒْعَاهْذْ إِنُو سنّجْ إِ مَارَّا جّْعَايفْ ن يِيخفْ نْومْ. ‏8 كنِّيوْ وَارْ ثحْضِيمْ أَحطُّو خْ مِينْ إِدْجَانْ إِقدّْسنْ إِ نشّْ ؤُشَا ثڭِّيمْ إِمحْضَاينْ إِ يِيخفْ نْومْ مَاحنْذْ أَذْ حْضَانْ خْ زَّاوشْثْ إِنُو إِقدّْسنْ.“

‏9 ”أَمُّو إِ إِقَّارْ سِيذِي إِنُو، سِيذِي: ؤُڒَا ذ إِجّْ ن ڒْبَارَّانِي نِّي وَارْ إِتّْوَاخثْننْ ؤُڒْ نّسْ ؤُ وَارْ إِتّْوَاخثْننْ أَيْسُومْ نّسْ، أَذْ يَاذفْ غَارْ زَّاوشْثْ إِنُو إِقدّْسنْ. أَمُّو إِ غَا يِيڒِي إِ كُوڒْ ڒْبَارَّانِي نِّي إِدْجَانْ ذِي ڒْوسْثْ ن أَيْثْ ن إِسْرَائِيل.

‏10 إِلَاوِييّنْ نِّي يَاڭّْوجنْ خَافِي أَطَّاسْ، ؤُمِي زَّايِي إِودَّارْ إِسْرَائِيل، فّْغنْ زڭْ وبْرِيذْ أَوَارْنِي إِميْضَا نْسنْ ن لْ-أَصْنَامْ. أَقَا نِيثْنِي أَذْ أَرْپُونْ ڒْمُوعْصِييّثْ نْسنْ.

‏11 أَذْ حْضَانْ ذِي زَّاوشْثْ إِنُو إِقدّْسنْ غَارْ ڒبْنِييَّاثْ ن ثوَّارْثْ ن ثَادَّارْثْ ؤُشَا أَذْ سخَّارنْ عَاوذْ ذِي ثَادَّارْثْ. نِيثْنِي أَذْ غَارْصنْ ثَاغَارْصْثْ ن وشْمَاضْ ذ ثْغَارْصْثْ إِ ڒْڭنْسْ ؤُشَا أَذْ بدّنْ زَّاثْ إِ وُوذمْ ن ڒْڭنْسْ مَاحنْذْ أَذْ أَسنْ سخَّارنْ.

‏12 ؤُمِي ثُوغَا تّْسخَّارنْ زَّاثْ إِ وُوذمْ ن إِميْضَا نْسنْ ن لْ-أَصْنَامْ ؤُ ؤُمِي ثنْ ثُوغَا ذ إِشْثْ ن سِّيبّثْ إِ د-يِيوْينْ ڒْمُوعْصِييّثْ إِ ثَادَّارْثْ ن إِسْرَائِيل، سّْڭعّْذغْ نشّْ أَفُوسْ إِنُو خَاسنْ ؤُ نِيثْنِي أَذْ أَرْپُونْ ڒْمُوعْصِييّثْ نْسنْ!، أَمُّو إِ إِقَّارْ سِيذِي إِنُو، سِيذِي.

‏13 وَارْ إِعدّڒْ أَذْ غَارِي د-قَارّْبنْ مَاحنْذْ أَذْ أَيِي إِڒِينْ ذ إِكهَّاننْ ؤُ مَاحنْذْ أَذْ د-قَارّْبنْ غَارْ مَارَّا ثِيمسْڒَايِينْ إِقدّْسنْ إِنُو، غَارْ ثْمسْڒَايِينْ إِقدّْسنْ قَاعْ. نِيثْنِي أَذْ أَرْپُونْ ڒفْذِيحثْ نْسنْ ذ جّْعَايفْ إِ ڭِّينْ.

‏14 أَذْ ثنْ ڭّغْ مَاحنْذْ أَذْ حْضَانْ خْ ثْسخَّارْثْ ذِي ثَادَّارْثْ، خْ مَارَّا ڒْخذْمثْ نّسْ ؤُ خْ مَارَّا مِينْ إِتّْخصَّا أَذْ ذَايسْ إِتّْوَاڭّْ.

‏15 مَاشَا إِكهَّاننْ إِلَاوِييّنْ، أَيْثْ ن صَاذُوقْ، إِنِّي إِحْضَانْ أَحطُّو ن زَّاوشْثْ إِنُو إِقدّْسنْ، خْمِي خَافِي غَا يَاڭّْوجنْ أَيْثْ ن إِسْرَائِيل، أَذْ غَارِي د-قَارّْبنْ مَاحنْذْ أَذْ أَيِي سخَّارنْ. نِيثْنِي أَذْ بدّنْ زَّاثْ إِ وُوذمْ إِنُو مَاحنْذْ أَذْ غَارِي د-أَوْينْ ثَاذُونْثْ ذ إِذَامّنْ، أَمُّو إِ إِقَّارْ سِيذِي إِنُو، سِيذِي.

‏16 نِيثْنِي أَذْ أَذْفنْ غَارْ زَّاوشْثْ إِنُو إِقدّْسنْ ؤُشَا أَذْ د-قَارّْبنْ غَارْ طَّابْڒَا إِنُو مَاحنْذْ أَذْ أَيِي سخَّارنْ ؤُ أَذْ حْضَانْ ثَاسخَّارْثْ إِنُو.

‏17 أَذْ يِيڒِي خْمِي إِ غَا يَاذْفنْ غَارْ ڒبْنِييَّاثْ ن ثوَّارْثْ ن ڒمْرَاحْ ن ذَاخڒْ، أَذْ أَرْضنْ أَرُّوضْ ن ڒقْطنْ. وَارْ إِعدّڒْ أَذْ أَرْضنْ شَا ن ثَاضُوفْثْ خْمِي إِ غَا سخَّارنْ ذِي ڒبْنِييَّاثْ ن ثوَّارْثْ ن ڒمْرَاحْ ن ذَاخڒْ ؤُ غَارْ ذَاخڒْ نّسْ.

‏18 أَرژَّاثْ ن ڒقْطنْ أَذْ إِڒِينْ خْ إِزدْجِيفنْ نْسنْ ؤُ سّْرَاوڒْ نْ ڒقْطنْ أَذْ إِڒِينْ خْ ثجْعِينَّاثِينْ نْسنْ، وَارْ بيْسنْ شَا مِينْ زِي غَا سُّوفّْغنْ ثِيذِي.

‏19 خْمِي إِ غَا فّْغنْ غَارْ ڒمْرَاحْ ن بَارَّا، غَارْ ڒمْرَاحْ ن بَارَّا غَارْ ڒْڭنْسْ، خنِّي أَذْ كّْسنْ أَرُّوضْ نْسنْ إِ ذِي سخَّارنْ، ؤُشَا أَذْ ث سَّارْسنْ ذڭْ إِخَّامنْ إِقدّْسنْ. أَوَارْنِي أَسْ أَذْ أَرْضنْ أَرُّوضْ نّغْنِي حِيمَا وَارْ سّْقدَّاسنْ ڒْڭنْسْ س وَارُّوذْ نْسنْ. ‏20 وَارْ سّْقُوشَّارنْ أَزدْجِيفْ نْسنْ ؤُ وَارْ تّجِّينْ ثِيجطَّايِينْ نْسنْ أَذْ أَيْڒنْثْ أَمنِّي وَاهَا. نِيثْنِي أَذْ قسّنْ أَشوَّافْ ن ؤُزدْجِيفْ نْسنْ مْلِيحْ. ‏21 وَارْ إِعدّڒْ ؤُڒَا إِ يِيجّْ ن ؤُكهَّانْ أَذْ إِسُو بِينُو، خْمِي إِ غَا يَاذفْ غَارْ ڒمْرَاهْ ن ذَاخڒْ. ‏22 وَارْ ذ أَسنْ إِعدّڒْ إِ إِكهَّاننْ مَاحنْذْ أَذْ أَوْينْ إِشْثْ ن ثَاجَّاتْشْ نِيغْ إِشْثْ ن ثْنُوڒُوفْثْ ذ ثَامْغَارْثْ إِ يِيخفْ نْسنْ. إِعدّڒْ مَاحنْذْ أَذْ أَوْينْ مْغِيرْ ثِيعْزُورَايْ زِي زَّارِيعثْ ن ثَادَّارْثْ ن إِسْرَائِيل، نِيغْ إِشْثْ ن ثَاجَّاتْشْ ثنِّي ذ ثَاجَّاتْشْ ن إِجّْ ن ؤُكهَّانْ. ^▪   ‏23 أَذْ سّْڒمْذنْ ڒْڭنْسْ إِنُو ڒْفَارْقْ جَارْ مِينْ إِدْجَانْ إِقدّْسنْ ذ مِينْ وَارْ إِدْجِينْ إِقدّْسنْ ؤُشَا أَذْ ثنْ سَّارڭْبنْ ڒْفَارْزْ جَارْ مِينْ إِخمْجنْ ذ مِينْ إِزْذِيڭنْ. ‏24 ذڭْ ؤُمْشُوبّشْ أَذْ كَّارنْ حِيمَا أَذْ شَارّْعنْ. أَذْ ثنْ حَاكْمنْ عْلَاحْسَابْ لْفَارَايِيضْ إِنُو. نِيثْنِي أَذْ حْضَانْ ثِيوصَّا إِنُو ذ لْفَارَايِيضْ إِنُو ذِي مَارَّا ڒعْيُوذَاثْ إِنُو إِتّْوَاڭّنْ، ؤُشَا أَذْ سّْقدّْسنْ ؤُسَّانْ إِنُو ن سّبْثْ. ‏25 وَارْ إِعدّڒْ أَذْ رحّْڭنْ غَارْ إِجّْ ن بْنَاذمْ إِمُّوثنْ أَڒَامِي إِ غَا سّْخمْجنْ إِخفْ نْسنْ. إِعدّڒْ وَاهَا أَذْ سّْخمْجنْ إِخفْ نْسنْ مْغِيرْ إِ بَابَاثْسنْ نِيغْ إِ يمَّاثْسنْ نِيغْ إِ مِّيثْسنْ نِيغْ إِ يدْجِيثْسنْ نِيغْ إِ ؤُمَاثْسنْ نِيغْ إِ ؤُتْشْمَاثْسنْ نِّي وَارْ إِمْڒِيشنْ عمَّارْصْ. ‏26 أَوَارْنِي إِ ؤُسِيزْذڭْ نّسْ إِتّْخصَّا أَسنْ أَذْ حسّْبنْ سبْعَا ن وُوسَّانْ إِ نتَّا. ‏27 ذڭْ وَاسّْ نِّي إِ غَا يَاذفْ غَارْ ؤُقدَّاسْ، غَارْ ڒمْرَاحْ ن ذَاخڒْ، مَاحنْذْ أَذْ إِسخَّارْ ذڭْ ؤُقدَّاسْ، إِتّْخصَّا أَسْ أَذْ د-إِسّْقَارّبْ ثَاغَارْصْثْ ن دّنْبْ!، أَمُّو إِ إِقَّارْ سِيذِي إِنُو، سِيذِي.

‏28 وَا أَذْ يِيڒِي ذ ڒْوَارْثْ نْسنْ: نشّْ ذ ڒْوَارْثْ نْسنْ. وَارْ ذ أَسنْ ثتِّيشِيمْ ؤُڒَا ذ إِجّْ ن وَاڭْڒَا ن ثمُّورْثْ ذِي إِسْرَائِيل: نشّْ ذ أَڭْڒَا نْسنْ. ^▪   ‏29 إِعدّڒْ أَذْ شّنْ ثَاوْهِيبْثْ ن ڒْغِيدْجثْ ذ ثْغَارْصْثْ ن دّنْبْ ذ ثْغَارْصْثْ ن ؤُمَارْوَاسْ. مَارَّا مِينْ إِتّْوَاحَارّْمنْ ذِي إِسْرَائِيل أَذْ أَسنْ يِيڒِي. ‏30 مُومُّو ن ثْمنْزُوثْ ن مَارَّا، ؤُ مَارَّا ثَاوْهِيبْثْ ن ؤُسْڭعّذْ، زِي مَارَّا ثِيوْهِيبِينْ نْومْ ن ؤُسْڭعّذْ، أَذْ يِيڒِي إِ إِكهَّاننْ. ثَامزْوَارُوثْ ن وَارشْثِي نْومْ أَذْ ت ثوْشذْ إِ ؤُكهَّانْ حِيمَا أَذْ ثَارْسَا لْبَارَاكَا خْ ثَادَّارْثْ نّكْ. ^▪   ‏31 ؤُڒَا ذ إِشْثْ ن ڒْخشْبثْ نِيغْ مِينْ إِتّْوَاشَارّْڭنْ ن إِجْضَاضْ نِيغْ نْ ڒبْحَايمْ، وَارْ إِعدّڒْ أَذْ ث شّنْ إِكهَّاننْ.“ ^▪