‏1 نتَّا إِسُّوفّغْ أَيِي-د بَارَّا غَارْ ڒمْرَاحْ ن بَارَّا نِّي إِدْجَانْ غَارْ شَّامَالْ. نتَّا إِنْذهْ أَيِي غَارْ ڒبْنِي ن إِخَّامْأنْ نِّي إِدْجَانْ غَارْ شَّامَالْ، زَّاثْ إِ ڒمْرَاحْ إِتّْوَاعزْڒنْ ؤُ غَارْ ؤُغزْذِيسْ ن ڒبْنِي، ‏2 غَارْ ؤُغزْذِيسْ نّسْ ذ أَزِيرَارْ ن مْيَا ن إِغَادْجنْ، غَارْ وَاذَافْ ن شَّامَالْ. ثِيرُو نّسْ ثُوغَا-ت خمْسِينْ ن إِغَادْجنْ. ‏3 ثُوغَا ڒبْنِي زَّاثْ إِ تَّاسِيعْ ن عِيشْرِينْ ن إِغَادْجنْ ن ڒمْرَاحْ ن ذَاخڒْ ؤُ قِيبَاتْشْ إِ زّلِّيجْ ن ڒمْرَاحْ ن بَارَّا. إِجّْ ن ڒْفُوقِي أَكْ-ذ إِخَّامنْ ثُوغَا إِسنّذْ خْ ڒْفُوقِي نّغْنِي، ؤُشَا أَقَا ذِينْ ثْڒَاثَا ن ڒْفُوقِيثْ.

‏4 زَّاثْ ن إِخَّامنْ ثُوغَا ذِينْ إِجّْ ن ؤُكُولْوَارْ أَذْ أَيسْ ثُويُورذْ، س إِشْثْ ن ثِيرُو ن عشْرَا ن إِغَادْجنْ، غَارْ ؤُغزْذِيسْ ن ڒبْنِي ن إِخَامّنْ غَارْ ذَاخڒْ، إِشْثْ ن ثبْرِيذْثْ ن مْيَا ن إِغَادْجنْ. ثِيوُّورَا ن وَاذَافْ نْسنْ ثُوغَا أَثنْثْ غَارْ شَّامَالْ. ‏5 إِخَّامنْ ن سنّجْ ثُوغَا أَثنْ حْصَارنْ، مَاغَارْ ڒفْوَاقِي كّْسنْ كْثَارْ تَّاسِيعْ زَّايْسنْ خْ يخَّامنْ ن وَادَّايْ ؤُ خْ يخَّامنْ غَارْ ڒْوسْثْ ن ڒُوعْڒَا ن ڒبْنِي. ‏6 مِينْزِي ثُوغَا أَثنْ ذِي ثْڒَاثَا ن ڒْفُوقِيثْ، مَاشَا وَارْ غَارْسنْ إِبِيلَارنْ أَمْ إِبِيلَارنْ نْ ڒمْرَاحَاثْ. س ؤُيَا ثُوغَا أَثنْ حْسَارنْ كْثَارْ خْ ينِّي ن وَادَّايْ ذ ينِّي ذِي ڒْوسْثْ أَمْ غَارْسنْ ثْخزَّارذْ زِي ثمُّورْثْ.

‏7 ڒْحِيضْ نِّي إِعْذُو بَارَّا قِيبَاتْشْ إِ يخَّامنْ، غَارْ ؤُغزْذِيسْ نِّي إِدْجَانْ غَارْ ڒمْرَاحْ ن بَارَّا زَّاثْ إِ يخَّامنْ، ثُوغَا غَارسْ ثُوزّڭَّارْثْ ن خمْسِينْ ن إِغَادْجنْ. ‏8 مِينْزِي ثُوزّڭَّارْثْ ن مَارَّا إِخَّامنْ نِّي إِدْجَانْ غَارْ ڒمْرَاحْ ن بَارَّا، ثُوغَا-ت ذِي خمْسِينْ ن إِغَادْجنْ. مَاشَا خْزَارْ، غَارْ ؤُغزْذِيسْ ن زَّاوشْثْ ثَامقّْرَانْثْ ثُوغَا-ت ذِي مْيَا ن إِغَادْجنْ. ‏9 سْوَادَّايْ ن إِخَّامنْ-أَ ثڭُّورْ ثبْرِيذْثْ مَانِيسْ د-ڭُّورنْ زِي شَّارْقْ حِيمَا أَذْ غَارْسنْ ثُويُورذْ زِي ڒمْرَاحْ ن بَارَّا.

‏10 غَارْ ڒْحِيضْ ذ أَزِيرَارْ نْ ڒمْرَاحْ نِّي إِدْجَانْ غَارْ لْجَانُوبْ، زَّاثْ إِ ڒمْرَاحْ إِتّْوَاعزْڒنْ ؤُ غَارْ ؤُغزْذِيسْ ن ڒبْنِي، ثُوغَا ذِينْ عَاوذْ إِخَّامنْ،

‏11 ؤُشَا ثَابْرِيذْثْ د-إِتّكّنْ زَّاثْسنْ ثُوغَا أَمشْنَاوْ ثنِّي ن إِخَّامنْ نِّي إِدْجَانْ غَارْ ؤُغزْذِيسْ ن شَّامَالْ، أَنشْثْ ن ثُوزّڭَّارْثْ أَنشْثْ ن ثِيرُو، ؤُ مَارَّا ؤُفُّوغنْ نّسْ ثُوغَا أَثنْ أَمشْنَاوْ صّنْعَاثْ ذ وَاذَافنْ نّسْ غَارْ ؤُغزْذِيسْ ن ڒبْنِي غَارْ شَّامَالْ.

‏12 أَمْ مَامّشْ ثُوغَا ذِينْ أَذَافنْ غَارْ ثخَّامِينْ غَارْ ؤُغزْذِيسْ ن لْجَانُوبْ، أَمنِّي إِ ذِينْ إِدْجْ ؤُڒَا ذ إِجّْ ن وَاذَافْ غَارْ بدُّو ن ثبْرِيذْثْ، ثَابْرِيذْثْ نِّي إِتّفّْغنْ غَارْ جِّيهثْ ن شَّارْقْ زِي زَّاثْ إِ ڒْحِيذْ إِسَّارنْ، مَانِي إِ غَا ثَاذْفذْ.

‏13 خنِّي إِنَّا أَيِي: ”إِخَّامنْ نِّي إِدْجَانْ غَارْ شَّامَالْ ؤُ إِخَّامنْ نِّي إِدْجَانْ غَارْ لْجَانُوبْ، إِنِّي إِدْجَانْ غَارْ زَّاثْ ن ڒمْرَاحْ إِتّْوَاعزْڒنْ، أَقَا أَثنْ ذ إِخَّامنْ إِقدّْسنْ مَانِي إِكهَّاننْ، إِنِّي إِ غَا د-إِقَارّْبنْ غَارْ سِيذِي، أَذْ شّنْ ثِيوْهِيبِينْ إِقدّْسنْ أَطَّاسْ. ذِينْ إِتّْخصَّا أَذْ سَارْسنْ ثِيوْهِيبِينْ إِقدّْسنْ أَطَّاسْ: ثَاوْهِيبْثْ ن ڒْغِيدْجثْ ذ ثوْهِيبْثْ ن دّنْبْ ذ ثوْهِيبْثْ ن ؤُمَارْوَاسْ، مِينْزِي أَمْشَانْ إِقدّسْ قَاعْ.

‏14 خْمِي إِ غَا ؤُذْفنْ إِكهَّاننْ، وَارْ إِعدّڒْ أَذْ ؤُيُورنْ زِي زَّاوشْثْ إِقدّْسنْ غَارْ ڒمْرَاحْ ن بَارَّا. أَذْ سَّارْسنْ أَرُّوضْ نْسنْ ن ثْسخَّارْثْ، مَاغَارْ وَانِيثَا ذ أَمْقدّسْ. أَذْ أَرْضنْ أَرُّوضْ نّغْنِي ؤُشَا خنِّي أَذْ د-قَارّْبنْ غَارْ ڒمْرَاحْ نِّي إِدْجَانْ إِ ڒْڭنْسْ.“

‏15 ؤُمِي إِكمّڒْ نتَّا ڒعْبَارْ ن مِينْ إِدْجَانْ ذَاخڒْ ن ثَادَّارْثْ، إِسُّوفُّوغْ أَيِي-د زڭْ وبْرِيذْ ن ثوَّارْثْ نِّي إِخزَّارنْ غَارْ شَّارْقْ ؤُشَا إِكْسِي ڒعْبَارْ زَّايسْ ذڭْ ونّضْ ن ڒبْنِي ن زَّاوشْثْ ثَامقّْرَانْثْ مَارَّا.

‏16 إِعْبَارْ أَغزْذِيسْ ن شَّارْقْ س ؤُغَانِيمْ ن ڒعْبَارْ: خمْسَا-مْيَا ن إِغُونَامْ س ؤُغَانِيمْ ن ڒعْبَارْ ذڭْ ونّضْ.

‏17 إِعْبَارْ أَغزْذِيسْ ن شَّامَالْ، خمْسَا-مْيَا ن إِغُونَامْ س ؤُغَانِيمْ ن ڒعْبَارْ ذڭْ ونّضْ.

‏18 إِعْبَارْ أَغزْذِيسْ ن لْجَانُوبْ، خمْسَا-مْيَا ن إِغُونَامْ س ؤُغَانِيمْ ن ڒعْبَارْ.

‏19 إِنُوقَّارْ غَارْ ؤُغزْذِيسْ ن لْغَارْبْ ؤُشَا إِعْبَارْ خمْسَا-مْيَا ن إِغُونَامْ س ؤُغَانِيمْ ن ڒعْبَارْ. ‏20 نتَّا إِعْبَارْ ڒبْنِي ن زَّاوشْثْ ثَامقّْرَانْثْ غَارْ أَربْعَا ن ثْغمُّورَا نّسْ. ثُوغَا غَارسْ ذڭْ ونّضْ نّسْ إِجّْ ن ڒْحِيضْ س إِشْثْ ن ثُوزّڭَّارْثْ ن خمْسَا-مْيَا ن إِغَادْجنْ ذ إِشْثْ ن ثِيرُو ن خمْسَا-مْيَا ن إِغَادْجنْ مَاحنْذْ أَذْ إِفَارْزْ جَارْ مِينْ إِدْجَانْ إِقدّْسنْ ذ مِينْ وَارْ إِدْجِينْ إِقدّْسنْ.