‏1 يُوسَا-د غَارِي وَاوَاڒْ ن سِيذِي ذڭْ ؤُسڭّْوَاسْ وِيسّْ ثسْعَا، ذڭْ ؤُيُورْ وِيسّْ عشْرَا، خْ وَاسّْ وِيسّْ عشْرَا ن ؤُيُورْ، إِنَّا:

‏2 ”أَ مِّيسْ ن بْنَاذمْ، أَرِي إِ يِيخفْ نّكْ إِسمْ ن أَسّْ-أَ، إِسمْ ن أَسّْ ن يِيضَا. ذڭْ وَاسّْ-أَ نِّيثْ أَذْ إِحْصَارْ ؤُجدْجِيذْ ن بَابِيلْ ؤُرْشَالِيمْ. ‏3 سِيوڒْ إِجّْ ن ؤُمذْيَا إِ ثَادَّارْثْ إِغوّْغنْ نِّي، ؤُشَا إِنِي أَسنْ: ’أَمُّو إِ إِقَّارْ سِيذِي إِنُو، سِيذِي:

أڭّْ إِجّْ ن ثيْذُورْثْ، أڭّْ إِ-ت ؤُشَا كبّْ ذَايسْ أَمَانْ. ^▪   ‏4 أڭّْ ذَايسْ ثِيفتُّوثِينْ ن ويْسُومْ، مَارَّا ثِيفتُّوثِينْ إِشْنَانْ، ثَامصَّاضْثْ ذ ثغْرُوضْثْ، عمَّارْ إِ-ت س يخْسَانْ ذ لمْلِيحْ قَاعْ. ‏5 كْسِي لمْلِيحْ ن وُودْجِي ؤُشَا أَرّْ ؤُڒَا ذ أَكشُّوضْ سَاذُو نْسنْ. أجّْ أَذْ سهْذنْ مَارَّا مْلِيحْ أَڒَامِي عَاذْ إِخْسَانْ نّسْ أَذْ ذَايسْ تّْوَاننَّانْ.‘ “

‏6 ”س ؤُيَا، أَمُّو إِ إِقَّارْ سِيذِي إِنُو، سِيذِي:

’ؤُشْثْ خْ ثَانْذِينْثْ ن إِذَامّنْ، ثَايْذُورْثْ ثنِّي زِي ڒخْمجْ نّسْ عَاذْ ذَايسْ، ثنِّي زِي وَارْ يكِّيسْ ڒخْمجْ نّسْ! كّسْ زَّايسْ ثَافتُّوثْ أَوَارْنِي إِ ثْفتُّوثْ نّغْنِي بْڒَا أَذْ خَاسْ ثڭِّيذْ ثَاقدُّوحْثْ. ^▪   ‏7 مِينْزِي إِذَامّنْ نّسْ أَقَا ذِي ڒْوسْثْ نّسْ، ثسِّيزڒْ إِ-ثنْ خْ إِشْثْ ن ثصْضَارْثْ ثَاقشَّارْثْ. وَارْ ثنْ ثسِّيزِّيڒْ خْ ثمُّورْثْ مَاحنْذْ أَذْ ثنْ ثذِّيڒْ س ؤُشَاڒْ. ‏8 حِيمَا أَذْ إِتّْوَاسّكَّارْ وسْعَارْ، حِيمَا أَذْ يِيڒِي ونْقَامْ، ڭِّيغْ إِذَامّنْ نّسْ خْ ثصْضَارْثْ ثَاقشَّارْثْ حِيمَا وَارْ تّْوَاسْذُوڒْينْ إِذَامّنْ نّسْ.‘ “

‏9 ”س ؤُيَا، أَمُّو إِ إِقَّارْ سِيذِي إِنُو، سِيذِي: ؤُشْثْ خْ ثنْذِينْثْ ن إِذَامّنْ! ؤُڒَا ذ نشّْ أَذْ ڭّغْ أَقلِّيجْ ن ؤُكشُّوضْ إِ ؤُشعَّاڒْ ن ثْمسِّي إِمْغَارْ! ^▪  

‏10 أَرْنِي أَكشُّوضْ، أجّْ ثِيمسِّي أَذْ ثَارغْ أَطَّاسْ، شنّفْ أَيْسُومْ مْلِيحْ ؤُشَا أجّْ كُوفُّو إِسّْثخْثِيخنْ أَذْ إِحَاجْ ؤُشَا أجّْ إِخْسَانْ أَذْ شمْضنْ.

‏11 أَرّْ خنِّي ثَايْذُورْثْ إِخْوَانْ عَاوذْ خْ ڒفْحمْ نّسْ حِيمَا أَذْ إِسهذْ ؤُ أَذْ إِشْمضْ دّْرَا نّسْ ن نّْحَاسْ ؤُشَا أَذْ ثفْسِي زَّايسْ ثخْمُوجِي إِ ذَايسْ إِدْجَانْ، ؤُ خنِّي أَذْ إِتّْوَاقْضِي ڒخْمجْ.

‏12 مَارَّا أَمَارّثْ أَقَا-ث ذِي بَاطڒْ. ڒخْمجْ نّسْ إِفيّْضنْ وَارْ د-إِفِّيغْ زَّايسْ. أَرّْ ڒخْمجْ نِّي ذِي ثْمسِّي!

‏13 ذِي ثخْمُوجِي نّمْ ثدْجِي ڒفْضِيحثْ نّمْ مِينْزِي نشّْ ثُوغَا خْسغْ أَذْ شمْ سِّيزذْڭغْ ؤُشَا خنِّي وَارْ ثتّْوَاسِيزْذِيڭذْ. س ؤُيَا وَارْ ثتّْوَاسِيزْذِيڭذْ أَڒْ خَامْ إِ غَا سِّيوْضغْ أَغْضَابْ إِنُو إِتّحْذُوذُوقنْ.

‏14 نشّْ، سِيذِي، سِّيوْڒغْ. أَذْ إِفّغْ ؤُ نشّْ أَذْ ث ڭّغْ. وَارْ سمْحغْ ذڭْ إِمرْوُوسَا ؤُ وَارْ زِّيدْجْزغْ ؤُ وَارْ نْذِيمغْ. أَذْ خَامْ حكْمنْ إِبْرِيذنْ نّمْ ذ ثْمڭَّا نّمْ، أَمُّو إِ إِقَّارْ سِيذِي إِنُو، سِيذِي.“ ^▪  

‏15 يُوسَا-د غَارِي وَاوَاڒْ ن سِيذِي، إِنَّا:

‏16 ”أَ مِّيسْ ن بْنَاذمْ، خْزَارْ، س إِشْثْ ن ثشْثِي نشّْ أَذْ كسّغْ مژْرِي نّكْ زَّاثْ إِ ثِيطَّاوِينْ نّكْ. شكْ مَاشَا وَارْ ثتّْرُوذْ ؤُ وَارْ تّجِّي أَذْ ؤُزّْڒنْ إِمطَّاونْ نّكْ.

‏17 سْغُويّْ ذڭْ ؤُهدّنْ، وَارْ شطّنْ خْ ؤُمتِّينْ. قّنْ أَرژّثْ نّكْ خَاكْ ؤُشَا أڭّْ ثِيسِيڒَا نّكْ ذڭْ إِضَارنْ نّكْ، ؤُ وَارْ تّْڒحَّافْ أَشْڒَاغمْ نّكْ ذ ثْمَارْثْ نّكْ نِيغْ أَذْ ثشّذْ أَغْرُومْ نِّي د غَا يَاوْينْ إِوْذَانْ إِ وشْضَانْ.“

‏18 غَارْ ثُوفُّوثْ سِّيوْڒغْ إِ ڒْڭنْسْ ؤُ غَارْ ثْمذِّيثْ ثمُّوثْ ثْمطُّوثْ إِنُو ؤُ ذِي ثْوشَّا ڭِّيغْ أَمْ مَامّشْ إِ ذ أَيِي إِتّْوَاوصَّا.

‏19 إِنَّا أَيِي ڒْڭنْسْ: ”مَا وَارْ ثخْسذْ أَذْ أَنغْ ثسّشْنذْ مِينْ عْنَانْثْ ثْمسْڒَايِينْ-أَ، مَايمِّي إِ ثڭّذْ أَمُّو؟“ ‏20 نشّْ نِّيغْ أَسنْ: ”يُوسَا-د غَارِي وَاوَاڒْ ن سِيذِي، إِنَّا:

‏21 إِنِي إِ ثَادَّارْثْ ن إِسْرَائِيل: ’أَمُّو إِ إِقَّارْ سِيذِي إِنُو، سِيذِي! خْزَارْ، نشّْ أَذْ سّْعِيدْجْثغْ زَّاوشْثْ إِنُو إِقدّْسنْ ثنِّي ذ أَعُودْجِي ن جّهْذْ نْومْ ذ ؤُمژْرِي ن ثِيطَّاوِينْ نْومْ ذ ڒهْزُوطْ إِ ڒعْمَارْ نْومْ، ؤُڒَا ذ إِحنْجِيرنْ نْومْ ذ يسِّيثْومْ نِّي ثجِّيمْ ذِينْ أَذْ وْضَانْ س سِّيفْ. ‏22 خنِّي أَذْ ثڭّمْ أَمْ مَامّشْ ڭِّيغْ نشّْ. وَارْ ثتّْڒحَّافمْ أَشْڒَاغمْ ذ ثْمَارْثْ، ؤُشَا أَغْرُومْ إِ د-يِيوْينْ إِرْيَازنْ، وَارْ ث ثتّتّمْ. ‏23 أَرژَّاثْ نْومْ أَذْ إِڒِينْثْ خْ إِزدْجِيفنْ نْومْ ؤُ ثِيسِيڒَا نْومْ ذڭْ إِضَارنْ نْومْ. وَارْ ثْشطّْنمْ ؤُ وَارْ ثتّْرُومْ. أَذْ ثحَّامْ ذِي ڒْمُوعْصِييّثْ نْومْ ؤُشَا أَذْ ثقْذِيذْسمْ إِجّنْ أَكْ-ذ ونّغْنِي. ^▪   ‏24 أَمُّو إِ غَا يِيڒِي حِيزْقِييَالْ ذ ڒعْڒَامثْ ن ڒعْجبْ إِ كنِّيوْ. أَذْ ثڭّمْ نِيشَانْ أَمْ مَامّشْ إِڭَّا نتَّا. خْمِي د غَا يَاسْ دّڭَّا، أَذْ ثسّْنمْ، بلِّي نشّْ سِيذِي، ذ سِيذِي.‘ “ ^▪  

‏25 ”ؤُشَا شكْ، أَ مِّيسْ ن بْنَاذمْ، ذڭْ وَاسّْ إِ زَّايْسنْ إِ غَا كسّغْ لْپُورْجْ نْسنْ، ڒفْرَاحثْ خْ ثلْوِيزْثْ نْسنْ، ؤُڒَا ذ مژْرِي ن ثِيطَّاوِينْ نْسنْ ذ إِحنْجِيرنْ ذ ثْحنْجِيرِينْ نْسنْ نِّي يَاربُّونْ نِيثْنِي ذڭْ وُوڒْ، ‏26 أَقَا ذڭْ وَاسّْ نِّي سِيمَانْثْ نّسْ أَذْ غَاركْ د-يَاسْ إِجّنْ ونِّي يَاروْڒنْ مَاحنْذْ أَذْ يڭّْ ثْنَاينْ ن إِمزُّوغنْ نّكْ أَذْ سْڒنْ ؤُيَا. ‏27 ذڭْ وَاسّْ نِّي أَذْ يَارْزمْ ؤُقمُّومْ نّكْ أَكْ-ذ ؤُقمُّومْ ن ونِّي يَاروْڒنْ ؤُشَا أَذْ ثسِّيوْڒذْ، وَارْ ثتِّيڒِيذْ عَاذْ ذ أَيْنَاوْ. شكْ أَذْ أَسنْ ثِيڒِيذْ ذ ڒعْڒَامثْ نْ ڒعْجبْ ؤُشَا نِيثْنِي أَذْ سّْننْ بلِّي نشّْ ذ سِيذِي.“