‏1 يُوسَا-د غَارِي وَاوَاڒْ ن سِيذِي، إِنَّا:

‏2 ”أَ مِّيسْ ن بْنَاذمْ، أڭّْ ؤُذمْ نّكْ غَارْ لْجَانُوبْ. أجّْ أَوَاڒنْ نّكْ أَذْ ؤُذُومنْ جِّيهثْ ن لْجَانُوبْ. نَابّْ ضِيدّْ إِ وزْغَارْ ن ييَّارْ ذِي ثمُّورْثْ ن لْجَانُوبْ. ^▫   ‏3 إِنِي إِ وزْغَارْ ن ثمُّورْثْ ن لْجَانُوبْ:

’سڒْ إِ وَاوَاڒْ ن سِيذِي: أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَذْ سَّارْغغْ ذَايمْ إِشْثْ ن ثْمسِّي، ثنِّي إِ غَا إِشّنْ كُوڒْ ثَاشجَّارْثْ ثَازِيزَاوْثْ ؤُ كُوڒْ ثَاشجَّارْثْ يُوژْغنْ. أَشعَّاڒْ ن ڒْعَاپُوقْ وَارْ إِتّْوَاخسِّي ؤُ س ؤُيَا أَذْ تّْوَاشمْضنْ مَارَّا إِغمْبَابْ زِي لْجَانُوبْ أَڒْ شَّامَالْ، ^▪   ‏4 ؤُشَا مَارَّا إِوْذَانْ ذ ڒْمَاڒْ أَذْ ژَترنْ أَقَا نشّْ، سِيذِي، ذ ونِّي إِسَّارْغنْ ثِيمسِّي. وَارْ ثتّْوَاخسِّي شَا.‘ “ ^▫  

‏5 نِّيغْ نشّْ: ”أَ، سِيذِي إِنُو، سِيذِي، عَاذْ نِيثْنِي قَّارنْ خَافِي: ’مَا وَارْ إِسِّيوڒْ نتَّا س ثْحُوجَا ن ثْوَافِيثْ وَاهَا؟‘ “

‏6 يُوسَا-د غَارِي وَاوَاڒْ ن سِيذِي، إِنَّا:

‏7 ”أَ مِّيسْ ن بْنَاذمْ، أڭّْ ؤُذمْ نّكْ غَارْ ؤُرْشَالِيمْ ؤُشَا أجّْ أَوَاڒنْ نّكْ أَذْ ؤُذُومنْ ضِيدّْ إِ ثْزَاوِييِّينْ إِقدّْسنْ ؤُشَا نَابّْ ضِيدّْ إِ ثمُّورْثْ ن إِسْرَائِيل ‏8 ؤُشَا إِنِي إِ ثمُّورْثْ ن إِسْرَائِيل ’أَمُّو إِ إِقَّارْ سِيذِي إِنُو، سِيذِي:

خْزَارْ، أَقَا غَاركْ، ؤُشَا نشّْ أَذْ د-جبْذغْ سِّيفْ إِنُو زڭْ ؤُفُورُّو ن وغْڒَافْ نّسْ ؤُشَا أَذْ قضْعغْ أَمْ ؤُمْسڭّذْ أَمْ ؤُعفَّانْ. ‏9 مِينْزِي أَذْ قضْعغْ أَمْ ؤُمْسڭّذْ أَمْ ؤُعفَّانْ، س ؤُيَا أَذْ د-إِفّغْ سِّيفْ إِنُو زڭْ ؤُفُورُّو ن وغْڒَافْ نّسْ، ضِيدّْ إِ مَارَّا إِنِّي غَارْسنْ أَرِّيمثْ ن ويْسُومْ، زِي لْجَانُوبْ أَڒْ شَّامَالْ،

‏10 ؤُشَا مَارَّا إِنِّي غَارْسنْ أَرِّيمثْ ن ويْسُومْ أَذْ سّْننْ، بلِّي نشّْ، سِيذِي، جبْذغْ سِّيفْ إِنُو زڭْ ؤُفُورُّو ن وغْڒَافْ. عمَّارْصْ وَارْ غَارسْ د-إِذِّيكّْوِيڒْ.‘ “

‏11 ”مَاشَا شكْ، أَ مِّيسْ ن بْنَاذمْ، سْغُونْفَا، سْغُونْفَا زَّاثْ إِ ثِيطَّاوِينْ نْسنْ س ثجْعِينَّاثِينْ تّْوَارْژنْثْ ذ ثَارْزُوڭِي.

‏12 أَذْ إِمْسَارْ خْمِي ذ أَشْ إِ غَا إِنِينْ: ’مَاغَارْ ثسّْغُونْفِيذْ أَمُّو؟‘، أَقَا شكْ أَذْ ثِينِيذْ: ’زِي سِّيبّثْ ن مِينْ سْڒِيغْ، مَاغَارْ أَذْ د-يَاسْ ؤُشَا كُوڒْ ؤُڒْ أَذْ إِفْسِي ؤُ مَارَّا إِفَاسّنْ أَذْ هيّْفنْ ؤُ مَارَّا بُوحْبڒْ أَذْ يَارْخُو ؤُ مَارَّا إِفَادّنْ أَذْ أَرْذْبنْ أَمْ وَامَانْ. خْزَارْ، أَذْ د-يَاسْ ؤُشَا أَذْ يِيڒِي، أَمُّو إِ إِقَّارْ سِيذِي إِنُو، سِيذِي.‘ “ ^▪  

‏13 يُوسَا-د غَارِي وَاوَاڒْ ن سِيذِي، إِنَّا:

‏14 ”أَ مِّيسْ ن بْنَاذمْ، نَابّْ ؤُشَا إِنِي: ’أَمُّو إِ إِقَّارْ سِيذِي إِنُو، سِيذِي!‘ إِنِي:

’سِّيفْ، سِّيفْ، أَقَا إِتّْوَاسقْضعْ

ؤُ إِتّْوَاسُويْذَا.

‏15 إِتّْوَاسّقْضعْ مَاحنْذْ أَذْ إِغَارْصْ ثِيغَارْصَا،

إِتّْوَاسُويْذَا مَاحنْذْ أَذْ إِللّشْ.

نِيغْ إِتّْخصَّا إِ نشِّينْ أَذْ نْفَارّحْ، أَذْ نِينِي:

أَزدْجَاضْ ن مِّي إِسّحْقَارْ كُوڒْ أَكشُّوضْ نّغْنِي. ^▫  

‏16 إِمّوْشْ مَاحنْذْ أَذْ إِتّْوَاسُويْذَا،

مَاحنْذْ أَذْ ث طّْفنْ ذڭْ ؤُفُوسْ.

سِّيفْ إِتّْوَاقْضعْ ؤُ إِتّْوَاسُويْذَا

مَاحنْذْ أَذْ إِتّْوَاڭّْ ذڭْ ؤُفُوسْ ن ؤُمنْغِيوْ.

‏17 سْغُويّْ ؤُشَا ثْرُوذْ، أَ مِّيسْ ن بْنَاذمْ،

مَاغَارْ أَذْ يِيڒِي خْ ڒْڭنْسْ إِنُو،

أَذْ يِيڒِي خْ مَارَّا ڒْحُوكَّامْ ن إِسْرَائِيل.

أَقَا مّوْشنْ إِ سِّيفْ مُوننْ أَكْ-ذ ڒْڭنْسْ.

خنِّي وّثْ خْ ثْمصَّاضْثْ نّكْ. ^▪  

‏18 مِينْزِي سِّيفْ إِتّْوَاقدْجبْ.

ؤُشَا مَانَا، مَاڒَا سِّيفْ نِّي إِسّحْقَارنْ مَارَّا أَكشُّوضْ،

وَارْ د-إِتِّيسْ شَا؟‘،

أَمُّو إِ إِقَّارْ سِيذِي إِنُو، سِيذِي.“ ^▪  

‏19 ”شكْ، أَ مِّيسْ ن بْنَاذمْ، نَابّْ، ؤُشَا وّثْ إِفَاسّنْ إِجّْ ذڭْ ونّغْنِي، مَاغَارْ سِّيفْ أَذْ إِوّثْ ثْنَاينْ، وَاهْ، ثْڒَاثَا ن إِمُورنْ. أَقَا-ث ذ سِّيفْ ن يِينِّي إِتّْوَانْغنْ، سِّيفْ ن ؤُمقّْرَانْ نِّي إِتّْوَانغْ، ونِّي غَارْسنْ إِتَّاذْفنْ، ‏20 حِيمَا خنِّي ؤُڒْ أَذْ إِفْسِي ؤُشَا أَذْ مَّارنْينْثْ ثْعنْكْرِيفِينْ. ڒقْضعْ ن سِّيفْ ڭِّيغْ ث خْ مَارَّا ثِيوُّورَا نْسنْ. أَيْ، أَقَا إِوْجذْ مَاحنْذْ أَذْ إِللّشْ، أَقَا إِتّْوَاجبّْ-د زڭْ ؤُفُورُّو ن وغْڒَافْ مَاحنْذْ أَذْ إِغَارْصْ. ^▪   ‏21 سْمُونْ جّهْذْ نّكْ، قسّْ غَارْ يفُّوسِي، بدّْ، قسّْ غَارْ ؤُزڒْمَاضْ، أَرّْ ڒقْضعْ نّكْ مَانِي مَا ثخْسذْ. ‏22 ؤُڒَا ذ نشّْ أَذْ وْثغْ إِفَاسّنْ إِنُو إِجّْ ذڭْ ونّغْنِي، ؤُشَا أَذْ سَّاريّْحغْ أَسْعَارْ إِنُو. نشّْ، سِيذِي، أَقَا سِّيوْڒغْ.“

‏23 يُوسَا-د غَارِي وَاوَاڒْ ن سِيذِي، إِنَّا:

‏24 ”شكْ، أَ مِّيسْ ن بْنَاذمْ، أڭّْ ثْنَاينْ ن إِبْرِيذنْ زِي مَانِي د غَا يَاسْ سِّيفْ ن ؤُجدْجِيذْ ن بَابِيلْ. زڭْ إِشْثْ ن ثمُّورْثْ أَذْ فّْغنْ نِيثْنِي س ثْنَاينْ إِذْسنْ. نْقشْ إِجّْ ن ؤُشِييَّارْ غَارْ ؤُبطُّو ن وبْرِيذْ، نْقشْ إِ-ث غَارْ ؤُبطُّو ن وبْرِيذْ غَارْ ثنْذِينْثْ. ‏25 أَذْ ثْنيّْشذْ أَبْرِيذْ س مَانِيسْ د غَا يَاسْ سِّيفْ غَارْ رَابَّا ن أَيْثْ ن عَامُّونْ، ؤُ غَارْ يَاهُوذَا أَڒْ ذَاخڒْ ذِي ثنْذِينْثْ إِتّْوَاسْجهْذنْ: ؤُرْشَالِيمْ. ‏26 مِينْزِي أَجدْجِيذْ ن بَابِيلْ أَذْ إِبدّْ غَارْ مَانِي فَارْقنْ إِبْرِيذنْ، غَارْ ؤُبدُّو ن ثْنَاينْ ن إِبْرِيذنْ نِّي مَاحنْذْ أَذْ إِعزّمْ. أَذْ إِزّرْزْ فْڒِيثْشَاثْ ن ڒْقوْصْ، أَذْ إِسّقْسَا ڒخْيَاڒَاثْ نْ صَّانَامْ، أَذْ إِخْزَارْ ثْسَا. ‏27 ذڭْ ؤُفُوسْ نّسْ يفُّوسِي يُوسَا-د ؤُڭزّنْ ’ؤُرْشَالِيمْ!‘، مَاحنْذْ أَذْ ذِينْ يڭّْ إِشَارِّييّنْ ن وذْهَامْ، مَاحنْذْ أَذْ يَارْزمْ أَقمُّومْ نّسْ س إِغُويَّانْ ن ونْغِي، مَاحنْذْ أَذْ إِسّْڭعّذْ ثْمِيجَّا نّسْ س إِغُويَّانْ ن ؤُمنْغِي، مَاحنْذْ أَذْ إِڭّْ إِشَارِّييّنْ ن وذْهَامْ ضِيدّْ إِ ثوُّورَا، مَاحنْذْ أَذْ يڭّْ أَشْبَارْ، مَاحنْذْ أَذْ إِڭّْ لْبَارَاجَاثْ. ^▪   ‏28 مَانْ أَيَا أَذْ غَارْسنْ يِيڒِي أَمْ ؤُڭزّنْ إِغشّنْ، مَاغَارْ نِيثْنِي أَقَا غَارْسنْ ثِيجَادْجَاثِينْ إِمثْننْ، مَاشَا نتَّا أَذْ إِعْقڒْ خْ ڒْمُوعْصِييّثْ نْسنْ مَاحنْذْ أَذْ تّْوَاطّْفنْ نِيثْنِي.“

‏29 ”س ؤُيَا، أَمُّو إِ إِقَّارْ سِيذِي إِنُو سِيذِي: مِينْزِي ثسّعْقِيڒمْ خْ ڒْمُوعْصِييّثْ نْومْ ؤُمِي إِعذِّيينْ نْومْ تّْبَاننْ نِيشَانْ، خْمِي تّْوَاژَارّنْ دّْنُوبْ نْومْ س مَارَّا مِينْ ثتّڭّمْ، وَاهْ مِينْزِي ثْسّعْقِيڒمْ خْ ڒْمُوعْصِييّثْ نْومْ، س ؤُيَا أَذْ كنِّيوْ طّْفنْ س ؤُفُوسْ. ‏30 ؤُ شكْ، أَعفَّانْ إِيزّْمنْ إِ ڒْموْثْ، شكْ، أَ أَجدْجِيذْ ن إِسْرَائِيل، ونِّي أَسّْ نّسْ أَذْ د-يَاسْ ذِي ڒْوقْثْ ن ڒحْسَابْ أَنڭَّارُو ن ڒْمُوعْصِييّثْ، ‏31 أَمُّو إِ إِقَّارْ سِيذِي إِنُو، سِيذِي: كّسْ أَرژّثْ نِّي، كّسْ تَّاجْ نِّي. أَمُّو وَارْ إِتِّيڒِي عَاذْ. مِينْ إِسّهْوَانْ، أَذْ إِتّْوَاسُوعْڒَا، ؤُ مِينْ إِسُّوعْڒَانْ، أَذْ د-إِتّْوَاسهْوَا. ‏32 أَذْ أَرّغْ أَيَا ذ ڒْخَارْبثْ، ذ ڒْخَارْبثْ، وَاهْ أَذْ ث أَرّغْ ذ ڒْخَارْبثْ. ؤُشَا ؤُڒَا ذ وَا مَارَّا، وَارْ إِتِّيڒِي عَاذْ أَڒْ د غَا يَاسْ ونِّي غَارْ إِدْجَانْ ڒْحقّْ ؤُشَا نشّْ أَذْ أَسْ ث وْشغْ.“

‏33 ”ؤُ شكْ، أَ مِّيسْ ن بْنَاذمْ، نَابّْ ؤُشَا إِنِي: ’أَمُّو إِ إِقَّارْ سِيذِي إِنُو، سِيذِي، خْ أَيْثْ نْ عَامُّونْ ؤُ خْ ؤُسحْقَارْ نْسنْ، إِنِي: سِّيفْ، سِّيفْ إِتّْوَاجبْذْ-د، إِتّْوَاسُويْذَا مَاحنْذْ أَذْ يشّْ، مَاحنْذْ أَذْ إِللّشْ، ‏34 - وَاخَّا نِيثْنِي تّْوَاڒَانْ إِشْثْ ن ثْمژْرِيوْثْ وَارْ إِدْجِينْ، وَاخَّا نِيثْنِي تّْڭزّْننْ إِجّْ ن ؤُڭزّنْ إِسّْخَارِّيقنْ - ، أَقَا سِّيفْ إِتّْوَاجبْذْ-د مَاحنْذْ أَذْ شكْ يَارّْ غَارْ إِرَاونْ ن إِعفَّاننْ إِتّْوَاسْنُوقّْبنْ نِّي زِي د-يُوسَا وَاسّْ نْسنْ ذِي ڒْوقْثْ ن ڒحْسَابْ أَنڭَّارُو ن ڒْمُوعْصِييّثْ. ‏35 أَرّْ سِّيفْ غَارْ ؤُفُورُّو ن وغْڒَافْ نّسْ. ذڭْ ومْشَانْ مَانِي د-ثتّْوَاخڒْقذْ، ذِي ثمُّورْثْ ن لْ-أَصلْ نّكْ أَذْ شمْ حكْمغْ. ‏36 أَذْ خَامْ زدْجْعغْ وسْخضْ إِنُو، س ثْمسِّي ن ؤُذُوقّزْ ن ؤُفُوڭمْ إِنُو أَذْ خَامْ صُوضغْ ؤُشَا أَذْ شمْ ڭّغْ ذڭْ ؤُفُوسْ ن أَيْثْ ن بُو-غزُّو نِّي إِسّْننْ أَذْ ذدْجنْ. ‏37 أَذْ ثِيڒِيذْ ذ مَاشَّا إِ ثْمسِّي، إِذَامّنْ نّكْ أَذْ ثنْ سِّيزّْڒنْ ذِي ڒْوسْثْ ن ثمُّورْثْ. وَارْ ثتِّيڒِي قَاعْ ڒِيذَارثْ ذَايكْ، مَاغَارْ نشّْ، سِيذِي، أَقَا سِّيوْڒغْ.‘ “