‏1 نتَّا إِنَّا أَيِي: ”أَ مِّيسْ ن بْنَاذمْ، مِينْ ثتّْوَاڒِيذْ ذَانِيثَا، أشّْ إِ-ث! أشّْ أَذْلِيسْ-أَ إِتّْوَانّْضنْ ؤُشَا ؤُيُورْ، سِيوڒْ أَكْ-ذ ثَادَّارْثْ ن إِسْرَائِيل.“ ^▪   ‏2 نشّْ أَرْزْمغْ أَقمُّومْ إِنُو ؤُ نتَّا إِسّشّْ أَيِي أَذْلِيسْ نِّي إِتّْوَانّْضنْ. ‏3 إِنَّا أَيِي: ”أَ مِّيسْ ن بْنَاذمْ، عْڒفْ أَعذِّيسْ نّكْ، شُّورْ ثَاكْرِيشْثْ نّكْ س وذْلِيسْ إِتّْوَانّْضنْ نِّي ذ أَشْ إِ غَا وْشغْ.“ خنِّي شِّيغْ ؤُ ثُوغَا-ث ذ أَمِيژِيذْ ذڭْ ؤُقمُّومْ إِنُو أَمْ ثَامّنْثْ. ^▪  

‏4 خنِّي إِنَّا أَيِي: ”أَ مِّيسْ ن بْنَاذمْ، ؤُيُورْ، أَذفْ غَارْ ثَادَّارْثْ ن إِسْرَائِيل ؤُشَا سِيوڒْ أَوَاڒنْ إِنُو أَكِيذْسنْ. ^▪   ‏5 مِينْزِي وَارْ د-ثتّْوَاسّكّذْ شَا غَارْ إِجّْ ن ڒْڭنْسْ س إِجّْ ن يِيڒسْ إِوْعَارْ ؤُ س إِجّْ ن وَاوَاڒْ إِقْسحْ، مَاشَا غَارْ ثَادَّارْثْ ن إِسْرَائِيل. ‏6 وَارْ إِدْجِي غَارْ ڒڭْنُوسْ أَطَّاسْ، س إِجّْ ن يِيڒسْ إِوْعَارْ نِيغْ س إِجّْ ن وَاوَاڒْ إِقْسحْ، إِ زِي وَارْ ثْزمَّارذْ أَذْ ثْفهْمذْ أَوَاڒنْ نْسنْ. مَاڒَا سكّغْ شكْ غَارْسنْ نِيثْنِي، س ثِيذتّْ أَذْ أَشْ سْڒنْ. ‏7 مَاشَا ثَادَّارْثْ ن إِسْرَائِيل وَارْ إِخْسْ أَذْ غَاركْ إِسڒْ، مِينْزِي وَارْ خْسنْ أَذْ د-سْڒنْ غَارِي، مِينْزِي مَارَّا ثَادَّارْثْ ن إِسْرَائِيل، أَقَا نِيثْنِي غَارْسنْ أَزدْجِيفْ إِقْسحْ ؤُ غَارْسنْ ؤُڒْ يزْلڭْ. ‏8 خْزَارْ، نشّْ ڭِّيغْ ؤُذمْ نّكْ إِقْسحْ أَمشْنَاوْ ؤُذْمَاونْ نْسنْ ؤُشَا ثَانْيَارْثْ نّكْ ڭِّيغْ ت ثقْسحْ أَمْ ثنْيَارِينْ نْسنْ. ^▪   ‏9 نشّْ ڭِّيغْ ثَانْيَارْثْ نّكْ أَمشْنَاوْ إِجّْ ن ذِيأَمَانْثِي، ڭِّيغْ ت ثقْسحْ خْ وژْرُو. وَارْ زَّايْسنْ تّڭّْوذْ شَا ؤُ وَارْ تّْنخْڒِيعْ شَا زڭْ وُوذْمَاونْ نْسنْ، مِينْزِي نِيثْنِي ذ إِشْثْ ن ثَادَّارْثْ إِغوّْغنْ.“ ^▪  

‏10 نتَّا إِنَّا أَيِي: ”أَ مِّيسْ ن بْنَاذمْ، حْضَا مَارَّا أَوَاڒنْ إِنُو نِّي إِ غَا سِّيوْڒغْ أَكِيذكْ ذڭْ وُوڒْ نّكْ ؤُشَا سڒْ غَارْسنْ س إِمزُّوغنْ نّكْ.

‏11 ؤُيُورْ، أَذفْ غَارْ إِمنْفِييّنْ، غَارْ ثَارْوَا ن ڒْڭنْسْ نّكْ ؤُشَا سِيوڒْ أَكِيذْسنْ، إِنِي أَسنْ: ’أَمُّو إِ إِقَّارْ سِيذِي إِنُو، سِيذِي!‘، مَا أَذْ سْڒنْ نِيغْ أَذْ سمْحنْ ذِي مَانْ أَيَا.“ ^▪  

‏12 خنِّي إِسّْڭعّذْ أَيِي أَرُّوحْ ؤُشَا سْڒِيغْ أَوَارْنِي أَيِي إِشْثْ ن ثْمِيجَّا ثدَّارْذِيحْ أَطَّاسْ، ثقَّارْ: ”أَذْ إِتّْوَابَاركْ ؤُعُودْجِي ن سِيذِي زڭْ ومْشَانْ ن ثْزذِّيغْثْ نّسْ!“ ^▪  

‏13 سْڒِيغْ إِ ڒْحسّْ ن وَافْرِيونْ ن إِمُودَّارنْ نِّي إِڒقّْفنْ إِجّْ إِ ونّغْنِي ؤُڒَا إِ ڒْحسّْ ن ثْجَارَّارِينْ زَّاثْ نْسنْ ؤُ إِ ڒْحسّْ ن إِجّْ ن ؤُذَارْذِيحْ إِمْغَارْ.

‏14 خنِّي إِسّْڭعّذْ أَيِي أَرُّوحْ ؤُشَا إِكْسِي أَيِي. نشّْ ؤُيُورغْ، ذ أَمَارْزَاڭْ ن ڒعْمَارْ، إِتّحْذُوذُوقْ بُوحْبڒْ إِنُو ذَايِي ؤُ أَفُوسْ ن سِيذِي ثُوغَا إِذْقڒْ خَافِي.

‏15 أَمُّو إِ د-ؤُسِيغْ غَارْ إِمنْفِييّنْ ذِي ثَالْ-أَبِيبْ، إِنِّي إِزدّْغنْ زَّاثْ إِ يغْزَارْ ن خَاپُورْ. نشّْ قِّيمغْ ذِينْ مَانِي ثُوغَا زدّْغنْ، وَاهْ قِّيمغْ ذِينْ سبْعَا ن وُوسَّانْ تّْبهْثغْ ڒَامِي ذ أَيِي ثُوغَا جَارْ أَسنْ. ^▪  

‏16 إِمْسَارْ أَوَارْنِي ڒَامِي عْذُونْ سبْعَا ن وُوسَّانْ، أَقَا يُوسَا-د غَارِي وَاوَاڒْ ن سِيذِي. إِنَّا:

‏17 ”أَ مِّيسْ ن بْنَاذمْ، نشّْ ڭِّيغْ شكْ ذ أَعسَّاسْ خْ ثَادَّارْثْ ن إِسْرَائِيل. خْمِي إِ غَا ثسْڒذْ إِ يِيجّْ ن وَاوَاڒْ زڭْ ؤُقمُّومْ إِنُو، إِتّْخصَّا شكْ أَذْ أَسنْ ثْعڒْمذْ زَّايِي. ^▪  

‏18 خْمِي إِ غَا إِنِيغْ إِ ؤُعفَّانْ ’س ثِيذتّْ أَذْ ثمّْثذْ!‘ ؤُشَا شكْ وَارْ ذ أَسْ ثعْڒِيمذْ شَا ؤُ وَارْ ثسِّيوْڒذْ حِيمَا أَذْ ثْعڒْمذْ أَعفَّانْ ذِي سِّيبّثْ ن وبْرِيذْ نّسْ أَعفَّانْ مَاحنْذْ أَذْ ث ثحْضِيذْ حِيمَا أَذْ إِقِّيمْ أَذْ إِدَّارْ، خنِّي أَذْ إِمّثْ ؤُعفَّانْ نِّي ذِي ڒْغشّْ نّسْ، مَاشَا إِذَامّنْ نّسْ أَذْ ثنْ تَّارغْ زڭْ ؤُفُوسْ نّكْ. ^▪  

‏19 مَاشَا مَاڒَا ثْعڒْمذْ إِ ؤُعفَّانْ ؤُ نتَّا وَارْ إِبعّذْ شَا زِي ثُوعفّْنَا نّسْ ؤُ زڭْ وبْرِيذْ نّسْ إِعفّْننْ، خنِّي نتَّا أَذْ إِمّثْ ذِي ڒْمُوعْصِييّثْ نّسْ، مَاشَا ڒعْمَارْ نّكْ أَذْ إِنْجمْ.

‏20 مَاڒَا أَمْسڭّذْ إِبعّذْ خْ ثْسڭْذَا نّسْ ؤُشَا إِڭَّا ڒْمُوعْصِييّثْ خْمِي إِ غَا سَّارْسغْ إِشْثْ ن ثخْشفْثْ زَّاثسْ أَڒَامِي إِ غَا إِخْضَا، خنِّي أَذْ إِمّثْ. مِينْزِي شكْ وَارْ ذ أَسْ ثعْڒِيمذْ، أَذْ إِمّثْ ذِي دّنْبْ نّسْ ؤُشَا ثِيمڭَّا إِسڭّْذنْ إِ يڭَّا وَارْ ذَايْسنْثْ إِذَارنْ عَاذْ. مَاشَا إِذَامّنْ نّسْ أَذْ ثنْ تَّارغْ زڭْ إِفَاسّنْ نّكْ. ^▪   ‏21 مَاشَا مَاڒَا ثْعڒْمذْ إِ ؤُمْسڭّذْ، حِيمَا وَارْ إِخطِّي ؤُمْسڭّذْ ؤُ نتَّا وَارْ إِخْضِي، خنِّي أَذْ إِقِّيمْ إِدَّارْ س ثِيذتّْ، مِينْزِي ثُوغَا إِتّْوَاعْڒمْ ؤُ شكْ ثْفكّذْ ڒعْمَارْ نّكْ.“

‏22 يُوسَا-د ذِينْ ؤُفُوسْ ن سِيذِي خَافِي ؤُشَا إِنَّا أَيِي: ”كَّارْ، فّغْ غَارْ ڒوْضَا ن ثغْزُورْثْ، أَذْ كِيذكْ سِّيوْڒغْ ذِينِّي.“ ‏23 كَّارغْ ؤُشَا فّْغغْ غَارْ ڒوْضَا ن ثغْزُورْثْ، خْزَارْ، أَعُودْجِي ن سِيذِي ثُوغَا إِتّْبدَّا ذِينِّي أَمشْنَاوْ أَعُودْجِي إِ ژْرِيغْ غَارْ يغْزَارْ ن خَاپُورْ ؤُشَا وْضِيغْ خْ ؤُغمْپُوبْ إِنُو غَارْ ثمُّورْثْ. ^▪  

‏24 خنِّي يُوذفْ ذَايِي أَرُّوحْ ؤُشَا إِسّكَّارْ أَيِي خْ إِضَارنْ إِنُو ؤُشَا إِسِّيوڒْ أَكِيذِي. نتَّا إِنَّا أَيِي: ”ؤُيُورْ، بلّعْ إِخفْ نّكْ ذَاخڒْ ذِي ثَادَّارْثْ نّكْ. ^▫  ▪   ‏25 ؤُ شكْ، أَ مِّيسْ ن بْنَاذمْ، خْزَارْ، نِيثْنِي خْسنْ أَذْ أَشْ ڭّنْ إِسغْوَانْ ؤُ أَذْ شكْ شَارْفنْ زَّايْسنْ. وَارْ تّفّغْ شَا حِيمَا أَذْ ثَاذْفذْ جَارْ أَسنْ. ‏26 أَذْ سّْڒسْقغْ إِڒسْ نّكْ غَارْ وَانغْ نّكْ. أَذْ ثْذوْڒذْ ذ أَزِينُونْ ؤُشَا وَارْ ثتِّيڒِيذْ ذ أَرْيَازْ جَارْ أَسنْ ونِّي ثنْ إِ غَا إِوبّْخنْ، مِينْزِي نِيثْنِي ذ إِشْثْ ن ثَادَّارْثْ ثْغوّغْ. ^▪   ‏27 مَاشَا نشّْ، خْمِي كِيكْ إِ غَا سِّيوْڒغْ، أَذْ أَرْزْمغْ أَقمُّومْ نّكْ ؤُشَا أَذْ أَسنْ ثِينِيذْ: ’أَمُّو إِ إِقَّارْ سِيذِي إِنُو، سِيذِي! وِي إِتّسْڒَانْ، أَذْ إِسڒْ، ؤُشَا وِي إِسمّْحنْ ذِي مَانْ أَيَا، وَاخَّا أَذْ ذَايسْ إِسْمحْ!‘، مِينْزِي نِيثْنِي ذ إِشْثْ ن ثَادَّارْثْ ثْغوّغْ.“ ^▪