‏1 أَوَاڒْ إِ د-إِفّْغنْ زِي سِيذِي غَارْ إِرْمِييَا، ؤُمِي نَاپُوخَاذْرَاصَّارْ، أَجدْجِيذْ ن بَابِيلْ، ذ مَارَّا ڒْعسْكَارْ نّسْ ذ مَارَّا ثِيڭلْذِيوِينْ ن دُّونشْثْ إِ إِدْجَانْ سَاذُو فُوسْ نّسْ ذ مَارَّا ڒڭْنُوسْ ثُوغَا تّْمنْغَانْ أَكْ-ذ ؤُرْشَالِيمْ ؤُ أَكْ-ذ مَارَّا ثِيندَّامْ نّسْ، إِ إِنَّانْ: ^▪  

‏2 ”أَمُّو إِ إِقَّارْ سِيذِي، أَربِّي ن إِسْرَائِيل: ’ؤُيُورْ ؤُشَا سِيوڒْ أَكْ-ذ صِيذْقِييَا، أَجدْجِيذْ ن يَاهُوذَا، إِنِي أَسْ: أَمُّو إِ إِقَّارْ سِيذِي، خْزَارْ، نشّْ أَذْ وْشغْ ثَانْذِينْثْ-أَ ذڭْ ؤُفُوسْ ن ؤُجدْجِيذْ ن بَابِيلْ ؤُ نتَّا أَذْ أَسْ إِقّذْ ثِيمسِّي. ^▪   ‏3 ؤُڒَا ذ شكْ س يِيخفْ نّكْ وَارْ ثْنجّْمذْ إِ ؤُفُوسْ نّسْ، مَاشَا أَذْ ثتّْوَاطّْفضْ أَذْ ثمّوْشذْ ذڭْ ؤُفُوسْ نّسْ. ثِيطّْ ذِي ثِيطّْ أَذْ ثْژَارذْ أَجدْجِيذْ ن بَابِيلْ ؤُشَا أَذْ كِيذسْ ثسِّيوْڒذْ زڭْ ؤُقمُّومْ غَارْ ؤُقمُّومْ ؤُشَا أَذْ د-ثَاوْضذْ أَڒْ بَابِيلْ.‘ “ ^▪  

‏4 ”سڒْ مَاشَا إِ وَاوَاڒْ ن سِيذِي، صِيذْقِييَا، أَجدْجِيذْ ن يَاهُوذَا، أَمُّو إِ خَاكْ إِقَّارْ سِيذِي: ’شكْ وَارْ ثتّْوَانْغذْ شَا س سِّيفْ. ‏5 أَذْ ثمّْثذْ ذِي ڒهْنَا ؤُشَا أَمْ مَامّشْ سَّارْغنْ ثِيمسِّييَاثْ إِ إِبَابَاثنْ نّكْ، إِجدْجِيذنْ ن زِيشْ نِّي ثُوغَا إِدْجَانْ قْبڒْ إِ شكْ، أَذْ سَّارْغنْ عَاوذْ ذ ثِيمسِّييَاثْ إِ شكْ ؤُشَا أَذْ خَاكْ وْثنْ أَڭجْذُورْ، أَذْ إِنِينْ: أَخْ، سِيذِي!، مَاغَارْ نشّْ سِّيوْڒغْ أَوَاڒْ-أَ، أَمُّو إِ إِقَّارْ سِيذِي.‘ “

‏6 إِسِّيوڒْ ؤُنَابِي إِرْمِييَا مَارَّا أَوَاڒنْ-أَ إِ صِيذْقِييَا، أَجدْجِيذْ ن يَاهُوذَا، ذِي ؤُرْشَالِيمْ، ‏7 ؤُمِي ثُوغَا ڒْعسْكَارْ ن ؤُجدْجِيذْ ن بَابِيلْ إِتّْمنْغَا أَكْ-ذ ؤُرْشَالِيمْ ؤُ أَكْ-ذ مَارَّا ثِيندَّامْ ن يَاهُوذَا نِّي إِقِّيمنْ، أَكْ-ذ لَاخِيشْ ذ عَازِيقَا، مَاغَارْ إِنَا ثُوغَا عَاذْ قِّيمنْ جَارْ ثْندَّامْ ن يَاهُوذَا مِينْزِي ثُوغَا أَثنْثْ ذ ثِيندَّامْ إِفَارْينْ.

‏8 أَوَاڒْ نِّي د-إِفّْغنْ زِي سِيذِي غَارْ إِرْمِييَا، أَوَارْنِي مَا إِقّنْ ؤُجدْجِيذْ صِيذْقِييَا إِجّْ ن ڒْعَاهْذْ أَكْ-ذ مَارَّا ڒْڭنْسْ نِّي إِدْجَانْ ذِي ؤُرْشَالِيمْ مَاحنْذْ أَذْ إِتّْوَابَارّحْ س إِجّْ ن ؤُسَارّحْ جَارْ أَسنْ، ^▪   ‏9 مَاحنْذْ كُوڒْ  إِجّنْ أَذْ يَارْخُو إِ إِسْمغْ نّسْ ؤُ إِ ثسْمغْثْ نّسْ، إِ ؤُعِيبْرِي ؤُ إِ ثْعِيبْرشْثْ، أَڒَامِي وَارْ إِتّْغِيمِي جَارْ أَسنْ ؤُڒَا ذ إِجّنْ ونِّي إِدْجَانْ ذ إِسْمغْ غَارْ إِجّْ ن ورْيَازْ زِي يَاهُوذَا، غَارْ ؤُمَاسْ.

‏10 مَارَّا ڒْحُوكَّامْ ذ مَارَّا ڒْڭنْسْ نِّي إِقّْننْ ڒْعَاهْذْ، سْڒِينْ أَقَا كُوڒْ أَرْيَازْ أَذْ يَارْخُو إِ إِسْمغْ نّسْ ؤُ كُوڒْ أَرْيَازْ أَذْ يَارْخُو إِ ثسْمغْثْ نّسْ حِيمَا وَارْ إِتّْغِيمِي غَارْسنْ ؤُڒَا ذ إِجّْ ن إِسْمغْ. نِيثْنِي وْشِينْ أَمزُّوغْ إِ مَانْ أَيَا ؤُشَا سّكّنْ ثنْ.

‏11 مَاشَا أَوَارْنِي أَسْ بدّْڒنْ، أَرِّينْ إِسمْغَانْ ذ ثسْمغِينْ إِنِّي ؤُمِي ثُوغَا أَرْخُونْ، ڭِّينْ ثنْ س ؤُغِيڒْ عَاوذْ ذ إِمْسمْغَانْ ذ ثْسمْغِينْ.

‏12 خنِّي د-يُوسَا وَاوَاڒْ ن سِيذِي غَارْ إِرْمِييَا، إِنَّا:

‏13 ”أَمُّو إِ إِقَّارْ سِيذِي، أَربِّي ن إِسْرَائِيل: ’نشّْ ڭِّيغْ إِجّْ ن ڒْعَاهْذْ أَكْ-ذ إِبَابَاثنْ نْومْ ذڭْ وَاسّْ نِّي ذِي ثنْ د-سُّوفّْغغْ زِي مِيصْرَا، زِي ثَادَّارْثْ ن ثسْمُوغِي، نِّيغْ:

‏14 أَوَارْنِي ڒَامِي عْذُونْ سبْعَا ن إِسڭّْوُوسَا إِتّْخصَّا كُوڒْ  إِجّْ أَذْ إِسّكّْ ؤُمَاسْ أَعِيبْرَانِي نِّي ذ أَشْ إِزّنْزنْ إِخفْ نّسْ ؤُشَا ثُوغَا إِخدّمْ إِ شكْ ستَّا ن إِسڭّْوُوسَا. إِتّْخصَّا أَذْ أَسْ ثَارْخُوذْ أَذْ يُويُورْ ذِي ثْڒلِّي! مَاشَا إِبَابَاثنْ نْومْ وَارْ غَارِي د-سْڒِينْ ؤُ وَارْ ذ أَيِي وْشِينْ شَا أَمزُّوغْ. ^▪  

‏15 وَاخَّا كنِّيوْ ثْذوْڒمْ-د، ثڭِّيمْ مِينْ إِدْجَانْ نِيشَانْ ذِي ثِيطَّاوِينْ إِنُو أَمْ إِبَارّحْ كُوڒْ  إِجّْ س ؤُسَارْخُو إِ ؤُمْقَارّبْ نّسْ ؤُشَا ثڭِّيمْ إِجّْ ن ڒْعَاهْذْ زَّاثْ إِ وُوذمْ إِنُو ذِي ثَادَّارْثْ مِينْ خفْ إِتّْوَابَارّحْ إِسمْ إِنُو،

‏16 كنِّيوْ مَاشَا ثنّْقڒْبمْ عَاوذْ ؤُشَا ثسّْعِيدْجْثمْ إِسمْ إِنُو. كُوڒْ  إِجّْ يَارَّا-د إِسْمغْ نّسْ ؤُ كُوڒْ  إِجّْ يَارَّا-د ثِيسْمغْثْ نّسْ نِّي ؤُمِي ثُوغَا ثَارْخُومْ مَاحنْذْ أَذْ ؤُيُورنْ نِيثْنِي مَانِي خْسنْ، ؤُشَا كنِّيوْ ثحْصَارمْ ثنْ عَاوذْ مَاحنْذْ أَذْ أَومْ إِڒِينْ ذ إِمْسمْغَانْ ذ ثْسمْغِينْ.‘ “

‏17 ”س ؤُينِّي، أَمُّو إِ إِقَّارْ سِيذِي: ’كنِّيوْ وَارْ غَارِي د-ثسْڒِيمْ مَاحنْذْ كُوڒْ إِجّْ أَذْ إِبَارّحْ س ؤُسَارْخُو إِ ؤُمَاسْ ؤُ كُوڒْ إِجّْ إِ ؤُمْقَارّبْ نّسْ. خْزَارْ، أَمُّو نشّْ أَذْ أَومْ بَارّْحغْ س ؤُسَارْخُو، أَمُّو إِ إِقَّارْ سِيذِي، مَاحنْذْ أَذْ كنِّيوْ سلّْمغْ إِ سِّيفْ، إِ طَّاعُونْ ؤُ إِ ڒَاژْ. نشّْ أَذْ كنِّيوْ ڭّغْ ذ إِجّْ ن ؤُمذْيَا ن ؤُسِيڭّْوذْ إِ مَارَّا ثِيڭلْذِيوِينْ ن دُّونشْثْ. ^▪  

‏18 نشّْ أَذْ أَرّغْ إِرْيَازنْ نِّي إِعْذُونْ خْ ڒْعَاهْذْ إِنُو، إِنِّي وَارْ إِطِّيفنْ ذڭْ وَاوَاڒنْ ن ڒْعَاهْذْ نِّي ڭِّينْ زَّاثْ إِ وُوذمْ إِنُو، أَمْ ؤُينْذُوزْ نِّي بْضَانْ خْ ثْنَاينْ ذ ونِّي جَارْ إِزيْنَاثْ نّسْ شُوقّنْ:

‏19 ڒْحُوكَّامْ ن يَاهُوذَا ذ ڒْحُوكَّامْ ن ؤُرْشَالِيمْ، إِمْسخَّارنْ إِشنْعنْ، إِكهَّاننْ ذ مَارَّا ڒْڭنْسْ ن ثمُّورْثْ، إِنِّي إِشُوقّنْ مَارَّا جَارْ إِزِييْنَاثْ ن ؤُينْذُوزْ. ‏20 نشّْ أَذْ ثنْ وْشغْ ذڭْ ؤُفُوسْ ن ڒْعذْيَانْ نْسنْ ؤُ ذڭْ ؤُفُوسْ ن يِينِّي يَارزُّونْ أَذْ ثنْ نْغنْ ؤُشَا ڒْخشْبَاثْ نْسنْ أَذْ إِڒِينْثْ ذ مَاشَّا إِ إِجْضَاضْ ن ؤُجنَّا ؤُ إِ ڒْمَاڒْ ن ثمُّورْثْ. ^▫  ▪   ‏21 ؤُڒَا ذ صِيذْقِييَا، أَجدْجِيذْ ن يَاهُوذَا، ذ ڒْحُوكَّامْ نّسْ أَذْ ثنْ ڭّغْ ذڭْ ؤُفُوسْ ن ڒْعذْيَانْ نْسنْ، ذڭْ ؤُفُوسْ ن يِينِّي يَارزُّونْ ثُوذَارْثْ نْسنْ، ذڭْ ؤُفُوسْ ن ڒْعسْكَارْ ن ؤُجدْجِيذْ ن بَابِيلْ نِّي خَاومْ إِفّْغنْ ڒخُّو. ^▪   ‏22 خْزَارْ، نشّْ أَذْ ؤُمُورغْ، أَمُّو إِ إِقَّارْ سِيذِي، ؤُ نشّْ أَذْ ثنْ د-أَرّغْ غَارْ ثنْذِينْثْ-أَ ؤُ نِيثْنِي أَذْ كِيذسْ مّنْغنْ، أَذْ ت طّْفنْ ؤُشَا أَذْ أَسْ قّْذنْ ثِيمسِّي. نشّْ أَذْ أَرّغْ ثِيندَّامْ ن يَاهُوذَا ذ ڒْخَارْبثْ وَارْ ذَايسْ إِتّْغِيمِي ؤُڒَا ذ إِجّْ ن ؤُمزْذُوغْ عَاذْ.‘ “