ثَامسْغِيوْثْ ن ييَّارْ
32
1 أَوَاڒْ نِّي د-إِفّْغنْ زِي سِيذِي غَارْ إِرْمِييَا ذڭْ ؤُسڭّْوَاسْ وِيسّْ عشْرَا ن صِيذْقِييَا، أَجدْجِيذْ ن يَاهُوذَا. أَسڭّْوَاسْ نِّي ثُوغَا ذ أَسڭّْوَاسْ وِيسّْ ثْمنْطَاشْ ن نَاپُوخَاذْرَاصَّارْ. 2 ذڭْ وُوسَّانْ نِّي ثُوغَا ڒْعسْكَارْ ن ؤُجدْجِيذْ ن بَابِيلْ إِحصَّارْ-د ؤُرْشَالِيمْ ؤُشَا أَنَابِي إِرْمِييَا ثُوغَا إِتّْوَاحبّسْ ذِي ڒمْرَاحْ ن ڒحْبسْ نِّي ثُوغَا ذِي ثَادَّارْثْ ن ؤُجدْجِيذْ ن يَاهُوذَا. 3 مَاغَارْ ثُوغَا إِحبّسْ إِ-ث صِيذْقِييَا، أَجدْجِيذْ ن يَاهُوذَا، أَمْ ذ أَسْ إِنَّا: ”مَايمِّي ثتّْنَابّذْ، ثقَّارذْ: ’أَمُّو إِ إِقَّارْ سِيذِي: خْزَارْ، نشّْ أَذْ ڭّغْ ثَانْذِينْثْ-أَ ذڭْ ؤُفُوسْ ن ؤُجدْجِيذْ ن بَابِيلْ ؤُ نتَّا أَذْ ت ثطّفْ. 4 صِيذْقِييَا، أَجدْجِيذْ ن يَاهُوذَا، وَارْ إِنجّمْ زڭْ ؤُفُوسْ ن إِكَالْذَانِييّنْ، مَاشَا أَذْ إِمّوْشْ ذڭْ ؤُفُوسْ ن ؤُجدْجِيذْ ن بَابِيلْ. نتَّا أَذْ كِيذسْ إِسِّيوڒْ زڭْ ؤُقمُّومْ غَارْ ؤُقمُّومْ ؤُ نتَّا أَذْ ث إِژَارْ ثِيطّْ ذِي ثِيطّْ. ▪ 5 نتَّا أَذْ يَاوِي صِيذْقِييَا غَارْ بَابِيلْ ؤُ نتَّا أَذْ ذِينِّي إِقِّيمْ، أَڒْ غَارسْ إِ غَا رَاحغْ، أَمُّو إِ إِقَّارْ سِيذِي. وَاخَّا كنِّيوْ أَذْ ثمّنْغمْ أَكْ-ذ إِكَالْذَانِييّنْ، وَارْ تِّيكّْوِيضمْ شَا.‘ “ 6 إِرْمِييَا إِنَّا: ”يُوسَا-د غَارِي وَاوَاڒْ ن سِيذِي، إِنَّا:
7 ’خْزَارْ، حَانَامْ‘إِلْ، مِّيسْ ن عْزِيزِيشْ شَالُّومْ، أَذْ غَاركْ د-يَاسْ ؤُشَا أَذْ يِينِي: سغْ إِ يِيخفْ نّكْ إِيَّارْ إِنُو ذِي عَانَاثُوثْ، مَاغَارْ شكْ غَاركْ ڒْحقّْ نْ ڒفْذِييّثْ مَاحنْذْ أَذْ ث ثسْغِيذْ.‘ “ 8 خنِّي يُوسَا-د غَارِي حَانَامْ‘إِلْ، مِّيسْ ن عْزِيزِي، عْلَاحْسَابْ أَوَاڒْ ن سِيذِي، ذِي ڒمْرَاحْ ن ڒحْبسْ، إِنَّا أَيِي: ”سغْ خنِّي إِيَّارْ إِنُو ذِي عَانَاثُوثْ، ذِي ثمُّورْثْ ن بِينْيَامِينْ، مَاغَارْ شكْ غَاركْ ڒْحقّْ أَذْ ث ثْوَارْثذْ ؤُشَا غَاركْ ؤُڒَا ذ ڒْحقّْ ن ؤُسُوفغْ مَاحنْذْ أَذْ ث ثفْذِيذْ، أَذْ ث ثسْغذْ.“ ڒخْذنِّي إِ سّْنغْ إِلَّا أَوَاڒْ-أَ يُوسَا-د زِي سِيذِي. 9 أَمُّو إِ سْغِيغْ إِيَّارْ نِّي إِدْجَانْ غَارْ عَانَاثُوثْ خْ حَانَامْ‘إِلْ، مِّيسْ ن عْزِيزِي، ؤُشَا وزْنغْ أَسْ نُّوقَارْثْ: سْبعْطَاشْ ن إِشِيقْلنْ ن نُّوقَارْثْ.
10 نشّْ وقّْعغْ خْ ثَابْرَاثْ ؤُشَا شمّْعغْ ت ؤُشَا جِّيغْ شّْهُوذْ أَذْ ت سّْمثْننْ ؤُشَا وزْنغْ نُّوقَارْثْ ذِي ڒْمِيزَانْ.
11 كْسِيغْ ثَابْرَاثْ إِتّْوَانّْضنْ ن ثْمسْغِيوْثْ نِّي ثُوغَا إِتّْوَاشمّْعنْ، إِتّْوَارِي ذَايسْ مَامّشْ إِتّْوَاڭّْ ڒْعَاقْذْ ؤُ مِينْ دْجَانْثْ لْفَارَايِيضْ، ؤُڒَا ذ ثَابْرَاثْ يَارزْمنْ
12 ؤُشَا وْشِيغْ ثَابْرَاثْ إِتّْوَانْضنْ ن ثْمسْغِيوْثْ إِ بَارُوخْ، مِّيسْ ن نِيرِي-يَاهْ، مِّيسْ ن مَاحْسِييَا، زَّاثْ إِ ثِيطَّاوِينْ ن حَانَامْ‘إِلْ، مِّيسْ ن عمِّي ؤُ زَّاثْ إِ ثِيطَّاوِينْ نْ ڒشْهُوذْ نِّي ثُوغَا إِوقّْعنْ ثَابْرَاثْ إِتّْوَانّْضنْ ن ثْمسْغِيوْثْ، أَقَا زَّاثْ إِ ثِيطَّاوِينْ ن مَارَّا وُوذَاينْ نِّي إِقِّيمنْ ذِي ڒمْرَاحْ ن ڒحْبسْ.
13 نشّْ ؤُمُورغْ بَارُوخْ زَّاثْ إِ ثِيطَّاوِينْ نْسنْ، نِّيغْ:
14 ”أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل: ’كْسِي ثِيبْرَاثِينْ-أَ، ثَابْرَاثْ إِتّْوَانّْضنْ ن ثْمسْغِيوْثْ، أَمْ ثنِّي إِشمّْعنْ أَمْ ثَابْرَاثْ يَارزْمنْ، ؤُشَا سَّارْسْ إِ-ثنْثْ ذڭْ إِشْثْ ن ڒْقشْعثْ ن ثْڒَاخْثْ، مَاحنْذْ أَذْ قِّيمنْثْ أَطَّاسْ ن وُوسَّانْ حْضَانْثْ!‘
15 مَاغَارْ أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل: ’أَذْ تّْوَاسْغنْ عَاوذْ ثُوذْرِينْ ذ إِيَّارنْ ذ إِمَارْجَاعنْ ن ؤُضِيڒْ ذِي ثمُّورْثْ-أَ.‘ “
16 أَوَارْنِي ؤُمِي ثُوغَا وْشِيغْ ثَابْرَاثْ ن ثْمسْغِيوْثْ إِ بَارُوخْ، مِّيسْ ن نِيرِي-يَاهْ، ژُّودْجغْ س ڒَادْجَاغْ غَارْ سِيذِي، نِّيغْ:
17 ”أَخْ، سِيذِي إِنُو، سِيذِي، خْزَارْ، شكْ ثڭِّيذْ إِجنْوَانْ ذ ثَامُّورْثْ س جّْهذْ نّكْ أَمقّْرَانْ ؤُ س ؤُغِيڒْ نّكْ إِسّْوِيژّْضنْ. وَارْ خَاكْ إِوْعَارْ وَالُو.
18 شكْ ذ ونِّي إِڭِّينْ ثَامخْسِيوْثْ إِشوَّارنْ إِ ڒُوڒُوفْ ؤُشَا ثْخدْجْصذْ ڒْمُوعْصِييّثْ ن إِبَابَاثنْ ذڭْ وحْسِينْ ن إِحنْجِيرنْ نْسنْ أَوَارْنِي أَسنْ، أَ شكْ أَربِّي ذ أَمقّْرَانْ ذ أَجبَّارْ، ونِّي ؤُمِي قَّارنْ: سِيذِي ن ڒْعسْكَارَاثْ. ▪
19 شكْ ذ أَمقّْرَانْ ن شّْوَارْ ؤُ ثجْهذْ ذِي ثْمڭَّا، مَاغَارْ ثِيطَّاوِينْ نّكْ تّْعسّنْثْ خْ مَارَّا إِبْرِيذنْ ن ثَارْوَا ن بْنَاذمْ، حِيمَا أَذْ ثْخدْجْصضْ كُوڒْ إِجّْ عْلَاحْسَابْ إِبْرِيذنْ نّسْ ؤُ عْلَاحْسَابْ ڒْغِيدْجثْ ن ثْمڭَّا نّسْ.▪ 20 شكْ ثڭِّيذْ ڒعْڒَامَاثْ ذ لْمُوجِيزَاثْ ذِي مِيصْرَا، أَڒْ أَسّْ-أَ، أَمْ ذڭْ إِسْرَائِيل أَمْ ذڭْ إِوْذَانْ نّغْنِي. ثڭِّيذْ إِجّْ ن يِيسمْ إِ يِيخفْ نّكْ، أَمْ مَامّشْ إِ ثدْجْ أَسّْ-أَ. 21 شكْ ثسُّوفّْغذْ-د ڒْڭنْسْ نّكْ إِسْرَائِيل زِي ثمُّورْثْ ن مِيصْرَا، س ڒعْڒَامَاثْ ذ لْمُوعْجِيزَاثْ، س إِجّْ ن ؤُفُوسْ إِجهْذنْ ذ إِجّْ ن ؤُغِيڒْ إِسّْوِيژّْضنْ، ؤُمِي ثسّكَّارذْ إِشْثْ ن ثڭّْوُوذِي ثَامقّْرَانْثْ جَارْ ڒڭْنُوسْ.▪ 22 شكْ ثوْشِيذْ أَسنْ ثَامُّورْثْ-أَ، ثنِّي ثجِّيدْجذْ إِ إِبَابَاثنْ نْسنْ مَاحنْذْ أَذْ أَسنْ ت ثوْشذْ، إِشْثْ ن ثمُّورْثْ إِفيّْضنْ س ؤُغِي ذ ثَامّنْثْ. 23 نِيثْنِي ؤُذْفنْ-د غَارسْ ؤُشَا طّْفنْ ت ذ ثَاسْغَارْثْ، مَاشَا نِيثْنِي وَارْ سْڒِينْ إِ ثْمِيجَّا نّكْ ؤُ وَارْ ؤُيُورنْ ذڭْ وبْرِيذْ ن شَّارِيعَا نّكْ ؤُ وَارْ ڭِّينْ عْلَاحْصَابْ مَارَّا مِينْزِي ثنْ ثْوصِّيذْ. س ؤُيَا إِ ثنْ إِڒْقفْ مَارَّا ڒْغَارْ-أَ. 24 خْزَارْ، إِشْبَارنْ إِ ڒحْصَارثْ! نِيثْنِي إِوْضنْ-د أَڒْ ثَانْذِينْثْ مَاحنْذْ أَذْ ت طّْفنْ، ؤُشَا ثَانْذِينْثْ ثمّوْشْ ذڭْ ؤُفُوسْ ن إِكَالْذَانِييّنْ نِّي أَكِيذسْ إِتّْمنْغَانْ، زِي سِّيبّثْ ن سِّيفْ ذ ڒَاژْ ذ طَّاعُونْ. مِينْ ثسِّيوْڒذْ أَقَا يِيوضْ-د. خْزَارْ، ثتّْوَارِيذْ ث سِيمَانْثْ نّكْ. 25 وَاخَّا أَمنِّي ثنِّيذْ أَيِي، أَ سِيذِي إِنُو، سِيذِي: سغْ إِ يِيخفْ نّكْ إِيَّارْ نِّي س نُّوقَارْثْ ؤُشَا أجّْ ڒشْهُوذْ أَذْ ت سّْمثْننْ. مَاشَا ثَانْذِينْثْ ثمّوْشْ ذڭْ ؤُفُوسْ ن إِكَالْذَانِييّنْ.“
26 خنِّي يُوسَا-د وَاوَاڒْ ن سِيذِي غَارْ إِرْمِييَا، إِنَّا:
27 ”خْزَارْ، نشّْ ذ سِيذِي، أَربِّي ن مَارَّا نِّي غَارْسنْ أَرِّيمثْ ن ويْسُومْ. مَا إِوْعَارْ خَافِي شَا؟‘ ▪ 28 س ؤُينِّي، أَمُّو إِ إِقَّارْ سِيذِي: ’نشّْ أَذْ ڭّغْ ثَانْذِينْثْ-أَ ذڭْ ؤُفُوسْ ن إِكَالْذَانِييّنْ ؤُ ذڭْ ؤُفُوسْ ن نَاپُوخَاذْرَاصَّارْ، أَجدْجِيذْ ن بَابِيلْ، ؤُ نتَّا أَذْ ت إِطّفْ. 29 إِكَالْذَانِييّنْ، إِنِّي إِتّْمنْغَانْ أَكْ-ذ ثنْذِينْثْ-أَ، أَذْ غَارسْ د-أَذْفنْ، أَذْ قدّنْ ثَانْذِينْثْ س ثْمسِّي ؤُشَا أَذْ ت سّْشمْضنْ أَكْ-ذ ثُوذْرِينْ نِّي خْ ثْزغْوِينْ نْسنْثْ إِ زِي قدّْمنْ ثِيوْهِيبِينْ ن ڒبْخُورْ إِ بَاعْلْ ؤُشَا سيّْبنْ ثِيوْهِيبِينْ ن ؤُسيّبْ إِ إِربِّيثنْ نّغْنِي حِيمَا أَذْ أَيِي سْعَارنْ. ▪ 30 مَاغَارْ أَيْثْ ن إِسْرَائِيل ذ أَيْثْ ن يَاهُوذَا زِي ثمْژِي نْسنْ تّڭّنْ مْغِيرْ مِينْ إِدْجَانْ ذ أَعفَّانْ ذِي ثِيطَّاوِينْ إِنُو. أَيْثْ ن إِسْرَائِيل سْعَارنْ أَيِي س ڒْخذْمثْ ن إِفَاسّنْ نْسنْ!‘، إِقَّارْ سِيذِي. 31 ’مَاغَارْ ثَانْذِينْثْ ثُوغَا ت إِ نشّْ ذ سِّيبّثْ ن وغْضَابْ ذ وسْعَارْ زڭْ وَاسّْ نِّي ذِي ثتّْوَابْنَا أَڒْ أَسّْ-أَ، أَڒَامِي ت غَا نْضَارغْ خْ وُوذمْ إِنُو 32 زِي سِّيبّثْ ن مَارَّا ڒْغَارْ ن أَيْثْ ن إِسْرَائِيل ذ أَيْثْ ن يَاهُوذَا ؤُمِي ذ أَيِي سْعَارنْ، نِيثْنِي ذ إِجدْجِيذنْ نْسنْ ذ ڒْحُوكَّامْ نْسنْ ذ إِكهَّاننْ نْسنْ ذ إِنَابِييّنْ نْسنْ ذ إِرْيَازنْ ن يَاهُوذَا ذ إِمزْذَاغْ ن ؤُرْشَالِيمْ. 33 نِيثْنِي وْشِينْ أَيِي-د س وعْرُورْ، وَارْ إِدْجِي س ؤُغمْپُوبْ، وَاخَّا نشّْ سّْڒمْذغْ ثنْ، عَاذْ زڭْ ؤُمزْوَارُو سّْغَارغْ ثنْ، نِيثْنِي مَاشَا وَارْ خْسنْ أَذْ سْڒنْ مَاحنْذْ أَذْ طّْفنْ تَّارْبِييّثْ. ▪ 34 نِيثْنِي سّْبدّنْ نّْعَاوَاثْ نْسنْ ن صَّانَامْ ذِي ثَادَّارْثْ إِ خفْ إِتّْوَابَارّحْ إِسمْ إِنُو مَاحنْذْ أَذْ ت سّْخمْجنْ. 35 نِيثْنِي سّْبدّنْ ڒڭْعُوذِي ن بَاعْلْ مَانِي إِ ذ أَسْ تّْوهّْبنْ دّْبَايحْ نْسنْ ذِي ثغْزُورْثْ ن مِّيسْ ن هِينُّومْ مَاحنْذْ أَذْ سّعْذُونْ إِحنْجِيرنْ نْسنْ ذ ثْحنْجِيرِينْ نْسنْثْ إِ مُولَاكْ ذِي ثْمسِّي، مِينْ وَارْ ذ أَسنْ ؤُمُورغْ عمَّارْصْ ؤُ مِينْ وَارْ ذ أَيِي د-إِدَّارنْ ذِي ڒْبَاڒْ إِنُو، أَقَا أَذْ ڭّنْ نّْعِي أَمْ وَا أَڒَامِي عَارْننْ يَاهُوذَا غَارْ دّْنُوبْ.‘ “ ▪
36 ”خنِّي ڒخُّو، أَمُّو إِ إِقَّارْ سِيذِي، أَربِّي ن إِسْرَائِيل، خْ ثنْذِينْثْ-أَ إِ خْ ثقَّارمْ: ’أَقَا ثمّوْشْ ذڭْ ؤُفُوسْ ن ؤُجدْجِيذْ ن بَابِيلْ، س سِّيفْ، س ڒَاژْ ؤُ س طَّاعُونْ!‘ ... 37 خْزَارْ، نشّْ أَذْ ثنْ سّْمُونغْ زِي مَارَّا ثِيمُّورَا مَانِي خَاسنْ ؤُژّْڒغْ ذڭْ وغْضَابْ إِنُو ؤُ ذڭْ وسْعَارْ إِنُو ؤُ ذڭْ ؤُذُوقّزْ ن وغْضَابْ إِنُو، ؤُ نشّْ أَذْ ثنْ أَرّغْ غَارْ ومْشَانْ-أَ ؤُ أَذْ ثنْ سّْزذْغغْ ذِي ڒَامَانْ. ▪ 38 نِيثْنِي أَذْ إِڒِينْ ذ ڒْڭنْسْ إِنُو ؤُ نشّْ أَذْ إِڒِيغْ ذ أَربِّي نْسنْ. ▪ 39 نشّْ أَذْ أَسنْ وْشغْ ؤُڒْ ذ إِجّْ ؤُڒَا ذ وبْرِيذْ ذ إِجّْ حِيمَا أَذْ أَيِي ڭّْوذنْ مَارَّا ؤُسَّانْ إِ ثِيزِي نْسنْ ؤُ إِ ثِيزِي ن إِحنْجِيرنْ نْسنْ أَوَارْنِي أَسنْ. 40 نشّْ أَكِيذْسنْ ڭّغْ إِجّْ ن ڒْعَاهْذْ إِتّْذُومَانْ، أَقَا وَارْ تّْحيِّيذغْ زِي أَوَارْنِي أَسنْ، حِيمَا أَذْ أَسنْ ڭّغْ مِينْ إِصبْحنْ، ؤُ نشّْ أَذْ أَسنْ سَّارْسغْ ثِيڭّْوُوذِي زَّايِي ذڭْ وُوڒْ نْسنْ مَاحنْذْ وَارْ خَافِي تّْحيِّيذنْ عَاذْ. 41 نشّْ أَذْ زَّايْسنْ فَارْحغْ مَاحنْذْ أَذْ ذَايْسنْ تّْهِيلِّيغْ ؤُ زِي ڒْمَانثْ إِنُو أَذْ ثنْ ژُّوغْ ذِي ثمُّورْثْ-أَ س مَارَّا ؤُڒْ إِنُو ؤُ س مَارَّا ڒعْمَارْ إِنُو.‘ “ ▪
42 ”مَاغَارْ أَمُّو إِ إِقَّارْ سِيذِي: ’أَمْ مَامّشْ إِ د إِوْيغْ خْ ڒْڭنْسْ-أَ ثُوعفّْنَا أَيَا ثَامقّْرَانْثْ، أَمُّو إِ خَاسنْ إِ غَا سِّيوْضغْ مَارَّا ثَاصبْحَانْثْ إِ خَاسنْ نِّيغْ. 43 أَذْ سْغنْ عَاوذْ إِيَّارنْ ذِي ثمُّورْثْ-أَ إِ خفْ ثقَّارمْ كنِّيوْ: ’أَقَا-ت ذ ڒخْڒَا، نْهْڒَا بْنَاذمْ ذ ڒْمَارْ، ثمّوْشْ ذڭْ ؤُفُوسْ ن إِكَالْذَانِييّنْ.‘ 44 أَذْ سْغنْ عَاوذْ إِيَّارنْ س تّْمنْيَاثْ ن نُّوقَارْثْ، أَذْ وقّْعنْ ؤُ أَذْ شمّْعنْ ثِيبْرَاثِينْ ن ثْمسْغِيوْثْ، أَذْ أَوْينْ ڒشْهُوذْ حِيمَا نِيثْنِي أَذْ سّْمثْننْ ثَامسْغِيوْثْ ذِي ثمُّورْثْ ن بِينْيَامِينْ، ذِي جّْوَايهْ ن ؤُرْشَالِيمْ، ذِي ثْندَّامْ ن يَاهُوذَا، ذِي ثْندَّامْ ن ثمُّورْثْ ن إِذُورَارْ، ذِي ثْندَّامْ ن ثمُّورْثْ إِوَاطَانْ ؤُ ذِي ثْندَّامْ ن ثمُّورْثْ ن لْجَانُوبْ، مَاغَارْ نشّْ أَذْ سّنْقڒْبغْ ثَامحْبَاسْثْ نْسنْ، أَمُّو إِ إِقَّارْ سِيذِي.‘ “