‏1 إِنَا ذ أَوَاڒنْ ن ثبْرَاثْ إِ د-إِسّكّْ ؤُنَابِي إِرْمِييَا زِي ؤُرْشَالِيمْ إِ مِينْ إِقِّيمنْ ن إِمْغَارنْ ن ڒْڭنْسْ جَارْ إِمنْفِييّنْ، إِ إِكهَّاننْ ذ إِنَابِييّنْ ؤُ إِ مَارَّا ڒْڭنْسْ نِّي ثُوغَا إِنْذهْ نَاپُوخَاذْنَاصَّارْ زِي ؤُرْشَالِيمْ غَارْ بَابِيلْ، ‏2 أَوَارْنِي إِ ؤُمِي إِفّغْ ؤُجدْجِيذْ يَاكُونْيَا ذ يمَّا أَسْ ن ؤُجدْجِيذْ، ڒَا إِمْسخَّارنْ إِشنْعنْ، ڒَا ڒْحُوكَّامْ ن يَاهُوذَا ذ ؤُرْشَالِيمْ، ڒَا ڒمْعُودْجَامْ ؤُڒَا ذ إِمْزِيڒنْ زِي ؤُرْشَالِيمْ. ^▪   ‏3 نتَّا إِسّكّْ ثَابْرَاثْ-أَ س ؤُفُوسْ ن أَلْعَاسَا، مِّيسْ ن شَافَانْ، ذ جَامَارْيَا، مِّيسْ ن حِيلْقِييَا، إِنِّي إِسّكّْ صِيذْقِييَا، أَجدْجِيذْ ن يَاهُوذَا، غَارْ بَابِيلْ غَارْ نَاپُوخَاذْنَاصَّارْ، أَجدْجِيذْ ن بَابِيلْ، ثَابْرَاثْ ثنَّا:

‏4 ”أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل، إِ مَارَّا إِمنْفِييّنْ نِّي د-إِوْيغْ زِي ؤُرْشَالِيمْ غَارْ بَابِيلْ:

‏5 سْڭعّْذمْ ثُوذْرِينْ ؤُشَا زذْغمْ ذَايْسنْثْ، ژُّومْ إِحْوِيشنْ ؤُشَا شّمْ ڒْغِيدْجثْ نْسنْ، ‏6 أَوْيمْ ثِيمْغَارِينْ ؤُشَا جّمْ-د إِحنْجِيرنْ ذ ثْحنْجِيرِينْ، أَوْيمْ إِ إِحنْجِيرنْ نْومْ ثِيمْغَارِينْ ؤُشَا وْشمْ ثْحنْجِيرِينْ نْومْ إِ يرْيَازنْ، مَاحنْذْ أَذْ ؤُرْونْثْ إِحنْجِيرنْ ذ ثْحنْجِيرِينْ. كنِّيوْ أَذْ ذِينِّي ثمَّارْنِيمْ، وَارْ إِدْجِي أَذْ ثْذوْڒمْ أَذْ ثْنقْسمْ، ‏7 أَرْزُومْ ڒهْنَا إِ ثنْذِينْثْ مَانِي كنِّيوْ إِ غَا نذْهغْ ؤُ تَّارمْ إِ مَانْ أَيَا إِ سِيذِي، مَاغَارْ ذِي ڒهْنَا نّسْ إِ إِدْجْ ڒهْنَا نْومْ.

‏8 مَاغَارْ أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل: وَارْ تّجِّيمْ أَذْ كنِّيوْ شمْثنْ إِنَابِييّنْ ذ إِڭزَّاننْ نِّي إِدْجَانْ ذِي ڒْوسْثْ نْومْ ؤُ وَارْ تّسْڒَامْ شَا غَارْ أَيْثْ ن بُو-ثِيرْجَا إِ كنِّيوْ إِتّجَّانْ أَذْ ثَارْجَامْ، ^▪   ‏9 مَاغَارْ نِيثْنِي تّْنبَّانْ إِخَارِّيقنْ س يِيسمْ إِنُو. نشّْ وَارْ ثنْ د-سكّغْ شَا، أَمُّو إِ إِقَّارْ سِيذِي.

‏10 مِينْزِي أَمُّو إِ إِقَّارْ سِيذِي: خْمِي إِ غَا قفْڒنْ سبْعِينْ ن إِسڭّْوُوسَا إِ بَابِيلْ، خنِّي أَذْ غَارْومْ د-أَرْزْفغْ ؤُشَا أَذْ أَومْ كمّْڒغْ أَوَاڒْ إِنُو أَصبْحَانْ ؤُمِي كنِّيوْ د-أَرِّيغْ غَارْ ثمُّورْثْ-أَ. ^▪  

‏11 مَاغَارْ نشّْ سّْنغْ مَانْ إِخَارِّيصنْ إِ غَارِي خَاومْ، أَمُّو إِ إِقَّارْ سِيذِي: إِخَارِّيصنْ ن ڒهْنَا، وَارْ إِدْجِي ن ڒْغَارْ، حِيمَا أَذْ أَومْ وْشغْ إِمَارْ ذ ؤُسِيثمْ.

‏12 خنِّي كنِّيوْ أَذْ أَيِي د-ثْڒَاغَامْ ؤُشَا أَذْ د-ثُويُورمْ أَذْ غَارِي د-ثژَّادْجمْ ؤُ نشّْ أَذْ غَارْومْ سْڒغْ. ^▪  

‏13 أَذْ خَافِي ثَارْزُومْ ؤُشَا أَذْ أَيِي ثَافمْ مَاڒَا كنِّيوْ ثَارْزُومْ خَافِي س وُوڒْ نْومْ إِشُّورْ.

‏14 أَذْ زَّايْومْ تّْوَافغْ، أَمُّو إِ إِقَّارْ سِيذِي، ؤُشَا أَذْ سّنْقڒْبغْ ثَامحْبَاسْثْ نْومْ ؤُشَا أَذْ كنِّيوْ سّْمُونغْ زِي مَارَّا ڒڭْنُوسْ ؤُ زِي مَارَّا إِمُوشَانْ مَانِي خَاومْ ؤُژّْڒغْ، أَمُّو إِ إِقَّارْ سِيذِي، ؤُ نشّْ أَذْ كنِّيوْ د-أَرّغْ غَارْ ومْشَانْ إِ زِي كنِّيوْ نذْهغْ ذِي لْمنْفَا. ^▪  

‏15 مِينْزِي ثنَّامْ: ’سِيذِي إِسّْنكَّارْ أَنغْ-د إِنَابِييّنْ ذِي بَابِيلْ!‘،

‏16 خْ ؤُيَا، أَمُّو إِ إِقَّارْ سِيذِي خْ ؤُجدْجِيذْ، ونِّي إِقِّيمنْ خْ ڒْعَارْشْ ن ذَاوُوذْ، ؤُ خْ مَارَّا ڒْڭنْسْ إِ إِزدّْغنْ ذِي ثنْذِينْثْ-أَ، أَيْثْمَاثْومْ إِنِّي وَارْ أَكِيذْومْ يُويُورنْ ذِي لْمنْفَا،

‏17 أَمُّو إِ إِقَّارْ سِيذِي ن ڒْعسْكَارَاثْ: خْزَارْ، نشّْ أَذْ سّكّغْ جَارْ أَسنْ سِّيفْ ذ ڒَاژْ ذ طَّاعُونْ ؤُشَا أَذْ ثنْ جّغْ أَمْ ثَازَارْثْ إِخْسَارنْ، ثنِّي وَارْ إِحْڒِينْ مَاحنْذْ أَذْ زَّايسْ شّنْ. ^▪  

‏18 نشّْ أَذْ ثنْ ضْفَارغْ س سِّيفْ ذ ڒَاژْ ذ طَّاعُونْ ؤُ نشّْ أَذْ ثنْ أَرّغْ أَذْ تّْوَاعَارّْننْ سَّا ذ سَّا س ؤُفُوسْ ن مَارَّا ثِيڭلْذِيوِينْ ن دُّونشْثْ، أَذْ إِڒِينْ إِ نّعْڒثْ ذ ڒْعُورّثْ ذ ثْسضْحَاشْ ؤُڒَا إِ ڒْحڭْرَا جَارْ مَارَّا ڒڭْنُوسْ مَانِي ثنْ إِ غَا سُّوفّْغغْ. ^▪  

‏19 مِينْزِي نِيثْنِي وَارْ سْڒِينْ غَارْ وَاوَاڒنْ إِنُو، أَمُّو إِ إِقَّارْ سِيذِي، ؤُمِي غَارْسنْ د-سّكّغْ إِمْسخَّارنْ إِنُو، إِنَابِييّنْ. عَاذْ زڭْ ؤُمزْوَارُو سّكّغْ ثنْ، مَاشَا كنِّيوْ وَارْ ثسْڒِيمْ شَا، أَمُّو إِ إِقَّارْ سِيذِي.

‏20 كنِّيوْ مَاشَا، سْڒمْ إِ وَاوَاڒْ ن سِيذِي، مَارَّا كنِّيوْ إِنِّي إِتّْوَانذْهنْ ذِي ثْمحْبَاسْثْ، إِنِّي سّكّغْ زِي ؤُرْشَالِيمْ غَارْ بَابِيلْ.

‏21 أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل، خْ أَخَابْ، مِّيسْ ن قُولَايَا، ؤُ خْ صِيذْقِييَا، مِّيسْ ن مَاعَاسِييَا، إِنِّي ذ أَومْ إِتّْنبَّانْ ذڭْ يِيسمْ إِنُو س إِخَارِّيقنْ: خْزَارْ، نشّْ أَذْ ثنْ ڭّغْ ذڭْ ؤُفُوسْ ن نَاپُوخَاذْرَاصَّارْ، أَجدْجِيذْ ن بَابِيلْ، ؤُ نتَّا أَذْ ثنْ إِنغْ زَّاثْ إِ ثِيطَّاوِينْ نْومْ. ‏22 مَارَّا أَيْثْ ن لْمنْفَا زِي يَاهُوذَا نِّي إِدْجَانْ ذِي بَابِيلْ أَذْ زَّايْسنْ كّْسنْ إِشْثْ ن نّعْڒثْ، أَذْ إِنِينْ: ’سِيذِي أَذْ شكْ يڭّْ أَمشْنَاوْ صِيذْقِييَا ذ أَحَابْ، إِنِّي إِسّشْمضْ ؤُجدْجِيذْ ن بَابِيلْ س ثْمسِّي!‘، ‏23 مِينْزِي نِيثْنِي ڭِّينْ إِشْثْ ن ثُوبُّوهڒْيَا ذِي إِسْرَائِيل، زْنَانْ أَكْ-ذ ثمْغَارِينْ ن وِي ثنْ يُوذْسنْ ؤُ بَارّْحنْ س يِيسمْ إِنُو أَوَاڒنْ ن إِخَارِّيقنْ إِ ثُوغَا وَارْ ذ أَسنْ نِّيغْ. نشّْ ذ ونِّي إِسّْننْ ؤُ ونِّي إِشهْذنْ خْ مَانْ أَيَا، أَمُّو إِ إِقَّارْ سِيذِي.“

‏24 إِ شْمَاعْيَا زِي نَاحْلَامْ، إِتّْخصَّا أَذْ كِيذسْ ثسِّيوْڒذْ أَذْ أَسْ ثِينِيذْ أَمُّو:

‏25 ”أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل، إِقَّارْ ’مِينْزِي س إِسمْ نّكْ إِ-د-ثسّكّذْ ثِيبْرَاثِينْ إِ مَارَّا ڒْڭنْسْ ذِي ؤُرْشَالِيمْ ؤُ إِ ؤُكهَّانْ صَافَانْيَا، مِّيسْ ن مَاعَاسِييَا، ؤُ إِ مَارَّا إِكهَّاننْ، يُورَا ذَايْسنْ: ^▫  

‏26 سِيذِي إِڭَّا شكْ ذ أَكهَّانْ ذڭْ ومْشَانْ ن ؤُكهَّانْ يَاهُويَاذَاعْ مَاحنْذْ أَذْ ذِينْ إِڒِينْ إِمحْذَاينْ ذِي ثَادَّارْثْ ن سِيذِي خْ كُوڒْ إِجّْ ؤُپُوهَاڒِي نِّي إِتّڭّنْ إِخفْ نّسْ ذ أَنَابِي. أَذْ ث ثقّْنذْ خْ ؤُكشُّوضْ ذ ڒْڭِيذْ خْ يِيرِي نّسْ. ^▪   ‏27 خنِّي ڒخُّو، مَايمِّي وَارْ ثْعَاقْبذْ إِرْمِييَا زِي عَانَاثُوثْ، ونِّي خَاومْ إِتَّارَّانْ إِخفْ نّسْ ذ أَنَابِي؟ ‏28 مَاغَارْ س ؤُينِّي إِسّكّْ-د إِشْثْ ن ثبْرَاثْ إِ نشِّينْ غَارْ بَابِيلْ مَانِي إِقَّارْ: أَطَّاسْ إِ غَا إِقِّيمنْ! سْبدّمْ ثُوذْرِينْ ؤُ زذْغمْ ذَايْسنْثْ، ژُّومْ إِحْوِيشنْ ؤُ أَذْ ثَاوْيمْ ڒِيقِّي إِ ڒْغِيدْجثْ نْسنْ!

‏29 ثُوغَا إِقَّارْ ؤُكهَّانْ صَافَانْيَا ثَابْرَاثْ-أَ ذڭْ إِمزُّوغنْ ن ؤُنَابِي إِرْمِييَا.

‏30 خنِّي يُوسَا-د وَاوَاڒْ ن سِيذِي غَارْ إِرْمِييَا، إِنَّا:

‏31 ”سْقَاذْ أَرقَّاسْ-أَ إِ مَارَّا إِمنْفِييّنْ مَاحنْذْ أَذْ ثِينِيذْ: ’أَمُّو إِ إِقَّارْ سِيذِي خْ شِيمْعِييَا زِي نَاحْلَامْ: مِينْزِي شْمَاعْيَا ثُوغَا إِتّْنَابّْ أَومْ، وَاخَّا نشّْ وَارْ ث-إِ-د سّكّغْ، ؤُشَا يَارَّا كنِّيوْ أَذْ ثتِّيقّمْ ذڭْ إِخَارِّيقنْ، ^▪   ‏32 س ؤُينِّي أَمُّو إِ إِقَّارْ سِيذِي: خْزَارْ، نشّْ أَذْ خڒْفغْ إِ شْمَاعْيَا زِي نَاحْلَامْ، ؤُ زِي ثَارْوَا نّسْ. ؤُڒَا ذ إِجّنْ زڭْ إِنِّي نّسْ وَارْ إِتّْغِيمِي إِزْذغْ ذِي ڒْوسْثْ ن ڒْڭنْسْ-أَ ؤُ نتَّا وَارْ إِژَارّْ ڒْخِيرْ إِ غَا ڭّغْ إِ ڒْڭنْسْ إِنُو، أَمُّو إِ إِقَّارْ سِيذِي، مِينْزِي س ڒْهَارْذْ نّسْ إِڭَّا أَذْ حيّْذنْ خْ سِيذِي.‘ “ ^▪