‏1 ذڭْ ؤُمزْوَارْ ن ثْڭلْذَا ن يَاهُويَاقِيمْ، مِّيسْ ن يُوشِييَا، أَجدْجِيذْ ن يَاهُوذَا، يُوسَا-د وَاوَاڒْ-أَ غَارْ إِرْمِييَا، إِنَّا:

‏2 ”أَمُّو إِ ذ أَيِي إِنَّا سِيذِي: ’أڭّْ إِ يِيخفْ نّكْ إِسغْوَانْ ذ إِزَايْڒُوثنْ، ؤُ سَّارْسْ إِ-ثنْ خْ يِيرِي نّكْ^▪   ‏3 ؤُشَا سكّْ إِ-ثنْ إِ ؤُجدْجِيذْ ن إِذُومْ، إِ ؤُجدْجِيذْ ن مُوآبَ، إِ ؤُجدْجِيذْ ن أَيْثْ ن عَامُّونْ، إِ ؤُجدْجِيذْ ن صُورْ ؤُ إِ ؤُجدْجِيذْ ن صِيذُونْ، س ؤُفُوسْ ن إِمْسخَّارنْ إِنِّي د-يُوسِينْ غَارْ ؤُرْشَالِيمْ غَارْ صِيذْقِييَا، أَجدْجِيذْ ن يَاهُوذَا. ‏4 ؤُمُورْ أَسنْ أَذْ إِنِينْ إِ إِسِيذِيثنْ نْسنْ: أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل، أَمُّو إِ إِتّْخصَّا أَذْ ثِينِيمْ إِ إِسِيذِيثنْ نْومْ: ‏5 س جّهْذْ إِنُو أَمقّْرَانْ ذ ؤُفُوسْ إِنُو إِسّْوِيژَّاذنْ ڭِّيغْ ثَامُّورْثْ ذ بْنَاذمْ ذ ڒبْهَايمْ نِّي إِدْجَانْ خْ وُوذمْ ن ثمُّورْثْ ؤُشَا نشّْ أَذْ ثنْ وْشغْ إِ ونِّي إِسْذَاهدْجنْ ذِي ثِيطَّاوِينْ إِنُو. ^▪   ‏6 خنِّي ڒخُّو، نشّْ ڭِّيغْ مَارَّا ثِيمُّورَا أَيَا ذڭْ ؤُفُوسْ ن نَاپُوخَاذْنَاصَّارْ، أَجدْجِيذْ ن بَابِيلْ، أَمْسخَّارْ إِنُو. وْشِيغْ أَسْ ؤُڒَا ذ ڒْمَاڒْ ن ييَّارْ مَاحنْذْ أَذْ خَاسْ سخَّارنْ. ^▪   ‏7 مَارَّا ڒڭْنُوسْ أَذْ أَسْ سخَّارنْ ؤُڒَا إِ مِّيسْ ذ مِّيسْ ن مِّيسْ أَڒَامِي إِ د غَا يَاسْ ڒْحَاڒْ إِ ثمُّورْثْ نّسْ. خنِّي أَطَّاسْ ن ڒڭْنُوسْ ذ إِجدْجِيذنْ إِمقّْرَاننْ أَذْ ڭّنْ أَذْ زَّايسْ تّْوَاسخَّارنْ.

‏8 ڒْڭنْسْ ذ ثْڭلْذِيثْ إِ وَارْ إِخْسْ أَذْ أَسْ إِسخَّارْ إِ نَاپُوخَاذْنَاصَّارْ، أَجدْجِيذْ ن بَابِيلْ، ؤُشَا وَارْ إِخْسْ أَذْ إِسّهْوَا إِڒِي نّسْ سْوَادَّايْ إِ ؤُزَايْڒُو ن ؤُجدْجِيذْ ن بَابِيلْ، أَقَا نشّْ أَذْ خڒْفغْ زِي ڒْڭنْسْ نِّي س سِّيفْ ذ ڒَاژْ ذ طَّاعُونْ، أَمُّو إِ إِقَّارْ سِيذِي، أَڒْ ثنْ إِ غَا قْضِيغْ س ؤُفُوسْ نّسْ. ‏9 كنِّيوْ خنِّي، وَارْ ثسْڒِيمْ إِ إِنَابِييّنْ نْومْ ذ إِڭزَّاننْ نْومْ ذ أَيْثْ ن بُو-ثِيرْجَا نْومْ ذ إِبرْڭَاڭنْ نْومْ ذ إِسحَّارنْ نْومْ نِّي غَارْومْ إِسَّاوَاڒنْ، قَّارنْ: كنِّيوْ وَارْ ثْسخَّارَامْ شَا إِ ؤُجدْجِيذْ ن بَابِيلْ!،

‏10 مَاغَارْ نِيثْنِي تّْنبَّانْ س إِخَارِّيقنْ مَاحنْذْ أَذْ كنِّيوْ سِّيڭّْوجنْ خْ ثمُّورْثْ نْومْ مَاحنْذْ نشّْ أَذْ خَاونْ أَژّْڒغْ ؤُشَا كنِّيوْ أَذْ ثتّْوَاهلّْكمْ.

‏11 ڒْڭنْسْ نِّي مَاشَا إِ غَا إِسَّاضَارنْ إِڒِي نّسْ سْوَادَّايْ إِ ؤُزَايْڒُو ن ؤُجدْجِيذْ ن بَابِيلْ ؤُشَا أَذْ أَسْ ثْسخَّارْ، أَقَا ڒْڭنْسْ نِّي أَذْ ث جّغْ أَذْ إِقِّيمْ ذِي ثمُّورْثْ نّسْ، ؤُشَا إِزمَّارْ أَذْ ت إِشَارْزْ ؤُ أَذْ ذَايسْ إِزْذغْ، أَمُّو إِ إِقَّارْ سِيذِي.‘ “

‏12 خنِّي سِّيوْڒغْ غَارْ صِيذْقِييَا، أَجدْجِيذْ ن يَاهُوذَا، عْلَاحْسَابْ مَارَّا أَوَاڒنْ-أَ، نِّيغْ: ”ڭّمْ إِڒَاونْ نْومْ سْوَادَّايْ إِ ؤُزَايْڒُو ن ؤُجدْجِيذْ ن بَابِيلْ ؤُ سخَّارمْ أَسْ ؤُ إِ ڒْڭنْسْ نّسْ، خنِّي أَذْ ثقِّيممْ ثدَّارمْ.

‏13 مَايمِّي إِ غَا تّْوَانْغمْ، شكْ ذ ڒْڭنْسْ نّكْ، س سِّيفْ ذ ڒَاژْ ذ طَّاعُونْ، أَمْ مَامّشْ إِسِّيوڒْ سِيذِي خْ ڒْڭنْسْ إِ وَارْ إِخْسنْ أَذْ إِسخَّارْ إِ ؤُجدْجِيذْ ن بَابِيلْ.

‏14 وَارْ تّسْڒِيمْ إِ وَاوَاڒنْ ن إِنَابِييّنْ، إِنِّي غَارْومْ إِسَّاوَاڒنْ، قَّارنْ: ’كنِّيوْ وَارْ تّْسخَّارمْ شَا إِ ؤُجدْجِيذْ ن بَابِيلْ!‘، مَاغَارْ نِيثْنِي تّْنبَّانْ أَومْ س إِخَارِّيقنْ، ^▪  

‏15 مِينْزِي نشّْ وَارْ ثنْ د-سّكّغْ، أَمُّو إِ إِقَّارْ سِيذِي، ؤُ نِيثْنِي تّْنبَّانْ س إِخَارِّيقنْ س يِيسمْ إِنُو مَاحنْذْ أَذْ خَاسنْ أَژّْڒغْ ؤُ كنِّيوْ أَذْ ثتّْوَاهلّْكمْ، كنِّيوْ ذ إِنَابِييّنْ نِّي ذ أَومْ إِتّْنَابّنْ،“

‏16 سِّيوْڒغْ ؤُڒَا أَكْ-ذ إِكهَّاننْ ؤُ أَكْ-ذ مَارَّا ڒْڭنْسْ، نِّيغْ: ”أَمُّو إِ إِقَّارْ سِيذِي: ’وَارْ ثسْڒِيمْ غَارْ وَاوَاڒنْ ن إِنَابِييّنْ نْومْ إِ إِقَّارنْ: خْزَارْ، ڒقْشُوعْ زِي ثَادَّارْثْ ن سِيذِي أَذْ تّْوَارّنْ ذغْيَا زِي بَابِيلْ!، مَاغَارْ نِيثْنِي تّْنبَّانْ إِ كنِّيوْ س إِخَارِّيقنْ. ^▪  

‏17 وَارْ غَارْسنْ تّسْڒَامْ شَا، مَاشَا سخَّارمْ إِ ؤُجدْجِيذْ ن بَابِيلْ، خنِّي أَذْ ثقِّيممْ ثدَّارمْ. مَايمِّي إِ غَا ثذْوڒْ ثنْذِينْثْ-أَ ذ إِشْثْ نْ ڒْخِيرْبثْ؟

‏18 مْڒِي نِيثْنِي ذ إِنَابِييّنْ، ؤُ أَوَاڒْ ن سِيذِي إِدْجْ س ثِيذتّْ غَارْسنْ، أجّْ إِ-ثنْ أَذْ تَّارنْ إِ سِيذِي ن ڒْعسْكَارَاثْ، أَقَا ڒقْشُوعْ إِ إِقِّيمنْ عَاذْ ذِي ثَادَّارْثْ ن سِيذِي ؤُ ذِي ثَادَّارْثْ ن ؤُجدْجِيذْ ن يَاهُوذَا ذِي ؤُرْشَالِيمْ وَارْ تّْرِيحنْ غَارْ بَابِيلْ.

‏19 مَاغَارْ أَمُّو إِ إِقَّارْ سِيذِي ن ڒْعسْكَارَاثْ خْ إِبِيلَارنْ، خْ ڒبْحَارْ ن نّْحَاسْ، خْ ثْكَارُّوثِينْ ؤُ خْ مَارَّا ڒقْشُوعْ نّغْنِي إِ إِقِّيمنْ ذِي ثنْذِينْثْ-أَ، ‏20 إِنِّي وَارْ كِيذسْ إِكْسِي نَاپُوخَاذْنَاصَّارْ، أَجدْجِيذْ ن بَابِيلْ، ؤُمِي إِنْذهْ يَاكُونْيَا، مِّيسْ ن يَاهُويَاقِيمْ، أَجدْجِيذْ ن يَاهُوذَا، زِي ؤُرْشَالِيمْ غَارْ بَابِيلْ أَكْ-ذ مَارَّا ثَارْوَا ن ثَاصِيڒثْ ن يَاهُوذَا ذ ؤُرْشَالِيمْ، ^▪   ‏21 وَاهْ، أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل، خْ ڒقْشُوعْ إِ إِقِّيمنْ ذِي ثَادَّارْثْ ن سِيذِي ؤُ ذِي ثَادَّارْثْ ن ؤُجدْجِيذْ ن يَاهُوذَا ؤُ ذِي ؤُرْشَالِيمْ: ‏22 غَارْ بَابِيلْ أَذْ مّكْسِينْ ؤُ أَذْ قِّيمنْ ذِينِّي غَارسْ أَڒْ أَسّْ إِ غَارْسنْ د غَا أَرْزْفغْ، أَمُّو إِ إِقَّارْ سِيذِي. خنِّي أَذْ ثنْ سُّوفّْغغْ ؤُ أَذْ ثنْ د-أَرّغْ غَارْ ومْشَانْ-أَ.‘ “ ^▪