ثَاسطَّا إِسڭّْذنْ
23
1 ”ؤُشْثْ خْ إِمكْسَاونْ إِ إِنقّنْ ؤُ زُوزَّارَانْ ؤُدْجِي ن دّْمَانِي إِنُو ن ثَاروْسَا، أَمُّو إِ إِقَّارْ سِيذِي. ▫ ▪ 2 س ؤُينِّي أَمُّو إِ إِقَّارْ سِيذِي، أَربِّي ن إِسْرَائِيل، خْ إِمكْسَاونْ نِّي يَاركّْوْسنْ ڒْڭنْسْ إِنُو: كنِّيوْ ثْزُوزَّارمْ ؤُدْجِي إِنُو ؤُشَا ثُوژّْڒمْ خَاسنْ. كنِّيوْ وَارْ ثنْ ثحْضِيمْ. خْزَارْ، نشّْ أَذْ خڒْفغْ زِي ثُوعفّْنَا ذ ثْمڭَّا نْومْ، أَمُّو إِ إِقَّارْ سِيذِي. 3 نشّْ أَذْ سّْمُونغْ مِينْ إِقِّيمنْ ن وُودْجِي إِنُو زِي مَارَّا ثِيمُّورَا، مَانِي خَاسنْ ؤُژّْڒغْ. نشّْ أَذْ ثنْ أَرّغْ غَارْ ڒْكُورِيثْ نْسنْ، أَذْ أَرْونْثْ، أَذْ مَّارْنِينْثْ. 4 نشّْ أَذْ أَسنْثْ ڭّغْ إِمكْسَاونْ نِّي ثنْثْ إِ غَا يَاروْسنْ. نِيثْنِي وَارْ تّڭّْوْذنْثْ عَاذْ ؤُ وَارْ تّْنخْڒِيعنْثْ ؤُ وَارْ تّْوذِّيرِينْثْ، أَمُّو إِ إِقَّارْ سِيذِي.“ ▪ 5 ”خْزَارْ، أَذْ د-أَسنْ وُوسَّانْ، أَمُّو إِ إِقَّارْ سِيذِي، أَقَا نشّْ أَذْ سّكَّارغْ إِ ذَاوُوذْ إِجّْ ن ؤُغدُّو ن ثْسڭْذَا. نتَّا أَذْ إِحْكمْ أَمْ ؤُجدْجِيذْ، أَذْ إِفْڒحْ ؤُشَا أَذْ إِڭّْ ڒْحقّْ ذ ثْسڭْذَا ذِي ثمُّورْثْ. ▪ 6 ذڭْ وُوسَّانْ نّسْ أَذْ إِتّْوَاسّنْجمْ يَاهُوذَا ؤُشَا إِسْرَائِيل أَذْ إِزْذغْ ذِي ڒَامَانْ. وَا أَذْ يِيڒِي ذ إِسمْ إِ زِي ذ أَسْ إِ غَا ڒَاغَانْ: سِيذِي، ثَاسڭْذَا نّغْ.“ ▪
7 ”س ؤُينِّي، خْزَارْ، أَذْ د-أَسنْ وُوسَّانْ، أَمُّو إِ إِقَّارْ سِيذِي، وَارْ قَّارنْ عَاذْ: ’س ثِيذتّْ أَمْ إِدَّارْ سِيذِي نِّي د-إِسُّوفّْغنْ أَيْثْ ن إِسْرَائِيل زِي مِيصْرَا!‘، ▪ 8 مَاشَا: ’س ثِيذتّْ أَمْ إِدَّارْ سِيذِي نِّي د-إِسْڭعّْذنْ زَّارِيعثْ ن ثَادَّارْثْ ن إِسْرَائِيل، ونِّي ثنْ د-يَارِّينْ زِي ثمُّورْثْ ن شَّامَالْ ؤُ زِي مَارَّا ثِيمُّورَا مَانِيسْ خَاسنْ ؤُژّْڒغْ. نِيثْنِي أَذْ زذْغنْ ذِي ثمُّورْثْ نْسنْ.‘ “
خْ إِنَابِييّنْ
9 خْ إِنَابِييّنْ. ”ؤُڒْ إِنُو إِتّْوَارْژْ ذِي ذَاخڒْ إِنُو، مَارَّا إِخْسَانْ إِنُو تَّارْجِيجِينْ. نشّْ ذوْڒغْ أَمْ إِجّْ ن ؤُمسْشُورْ، أَمْ ورْيَازْ نِّي يَارْنِي بِينُو، زِي سِّيبّثْ ن سِيذِي، ؤُ زِي سِّيبّثْ ن وَاوَاڒنْ نّسْ إِقدّْسنْ.
10 مَاغَارْ ثَامُّورْثْ ثشُّورْ س ينِّي إِزنَّانْ، مَاغَارْ ثَامُّورْثْ ثشْضنْ زِي سِّيبّثْ ن نّعْڒثْ، دّْمَانِي ن هدُّو ؤُژْغنْثْ. مَانِي خْسنْ أَذْ أَوْضنْ أَقَا-ث ذ أَعفَّانْ، ؤُڒَا ذ جّهْذْ نْسنْ وَارْ إِدْجِي شَا نِيشَانْ. ▪
11 مَاغَارْ أَمْ ؤُنَابِي أَمْ ؤُكهَّانْ تّْوَافسْذنْ، عَاذْ ذِي ثَادَّارْثْ إِنُو تَّافغْ ثُوعفّْنَا نْسنْ، أَمُّو إِ إِقَّارْ سِيذِي. ▪
12 س ؤُينِّي أَذْ د-أَسنْ إِذْوڒْ وبْرِيذْ نْسنْ أَمْ إِجّْ نْ ڒوْضَا إِتّحْرُودْجُوضْ ذِي ثَادْجسْثْ. أَذْ تّْوَاعَارّْننْ ؤُ نِيثْنِي أَذْ زَّايسْ د-وْضَانْ، مَاغَارْ أَذْ خَاسنْ د-سّهْوِيغْ إِشْثْ ن ثشْثِي ثَاعفَّانْثْ ذڭْ ؤُسڭّْوَاسْ إِ زَّايْسنْ إِ غَا خڒْفغْ، أَمُّو إِ إِقَّارْ سِيذِي.“ ▪
13 ”أَقَا نشّْ ژْرِيغْ ثُوبُّوهڒْيَا غَارْ إِنَابِييّنْ ن سَامَارْيَا: نِيثْنِي ثُوغَا تّْنَابّنْ س بَاعْلْ ؤُشَا تّْغَارَّانْ ڒْڭنْسْ إِنُو.
14 غَارْ إِنَابِييّنْ ن ؤُرْشَالِيمْ مَاشَا ژْرِيغْ نّْعِي: نِيثْنِي زنَّانْ ؤُشَا ؤُيُورنْ أَمْ سّْخَارِّيقنْ ؤُشَا سّْجهْذنْ إِفَاسّنْ ن إِعفَّاننْ أَڒَامِي ؤُڒَا ذ إِجّْ وَارْ د-إِعْقبْ زڭْ وبْرِيذْ نّسْ أَعفَّانْ. مَامّشْ تّْوَاڒِيغْ نشّْ مَارَّا إِذْسنْ أَمْ سَاذُومْ، ؤُشَا إِمزْذَاغْ ن ؤُرْشَالِيمْ إِ نشّْ أَمْ عَامُورَّا. ▪
15 س ؤُينِّي، أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل: خْزَارْ، نشّْ أَذْ وْشغْ شِّيحْ ذ مَاشَّا إِ ڒْڭنْسْ-أَ ؤُڒَا ذ أَمَانْ ن أَرّْهَاجْ مَاحنْذْ أَذْ ثنْ سْونْ، مِينْزِي زڭْ إِنَابِييّنْ ذِي ؤُرْشَالِيمْ إِفّغْ-د ؤُغسّبْ ن شَّارِيعَا غَارْ مَارَّا ثَامُّورْثْ. ▪
16 أَمُّو إِ إِقَّارْ سِيذِي ن ڒْعسْكَارَاثْ: وَارْ تّسْڒِيمْ شَا إِ وَاوَاڒنْ ن إِنَابِييّنْ نِّي ذ أَومْ إِتّْنبَّانْ. نِيثْنِي سَّاوَاڒنْ بَاطڒْ. نِيثْنِي سَّاوَاڒنْ إِشْثْ ن ثْمژْرِيوْثْ ن وُوڒْ ن يِيخفْ نْسنْ إِ وَارْ إِدْجِينْ ذ ثَامژْرِيوْثْ زڭْ ؤُقمُّومْ ن سِيذِي.
17 ڒبْذَا قَّارنْ إِ ينِّي ذ أَيِي إِسّحْقَارَانْ: سِيذِي إِنَّا إِ-ث، أَذْ غَارْونْ يِيڒِي ڒهْنَا! ؤُ إِ كُوڒْ إِجّْ ونِّي إِڭُّورنْ ذِي ڒقْسَاحثْ ن وُوڒْ نّسْ، قَّارنْ: وَارْ د خَاومْ إِتّمْسَارْ ؤُڒَا ذ إِجّْ ن ڒْغَارْ! ▪
18 مَاغَارْ مَانْ ونْ إِقِّيمنْ إِبدّْ ذِي ڒْحڒْقثْ ن إِمْشَاوَارنْ ن سِيذِي ؤُشَا إِژْرَا أَوَاڒْ نّسْ ؤُ إِسْڒَا أَسْ؟ وِي إِسّْحسّنْ إِ وَاوَاڒْ نّسْ ؤُشَا إِسْڒَا غَارسْ؟
19 خْزَارْ، ثَاحَارْيَاضْثْ ن سِيذِي، إِفّغْ-د زَّايسْ وسْعَارْ، أَمْ إِشْثْ ن ثْحَارْيَاضْثْ ثزّبْزِيبْ نِّي د غَا إِهْوَانْ خْ ؤُزدْجِيفْ ن إِعفَّاننْ. ▪ 20 أَغْضَابْ ن سِيذِي وَارْ د-إِذِّيكّْوِيڒْ شَا أَڒْ غَا يِيڒِينْ إِخَارِّيصنْ ن وُوڒْ نّسْ. ذڭْ ؤُنڭَّارْ ن وُوسَّانْ أَذْ أَسْ ثْفهْممْ س ڒفْهَامثْ ثكْمڒْ. 21 نشّْ وَارْ د-سّكِّيغْ شَا إِنَابِييّنْ نِّي، وَاخَّا أَمنِّي ڭُّورنْ نِيثْنِي. نشّْ وَارْ غَارْسنْ سِّيوْڒغْ شَا، وَاخَّا أَمنِّي بْذَانْ أَذْ نبَّانْ زڭْ يِيخفْ نْسنْ. ▪ 22 مْڒِي قِّيمنْ نِيثْنِي بدّنْ ذِي ڒْهڒْقثْ ن إِمْشَاوَارنْ إِنُو، إِڒِي أَرِّينْ ڒْڭنْسْ إِنُو أَذْ إِسڒْ إِ وَاوَاڒنْ إِنُو ؤُ إِڒِي أَرِّينْ ثنْ أَذْ د-ذوْڒنْ زڭْ وبْرِيذْ نْسنْ أَعفَّانْ ؤُ زِي ڒْغَارْ ن ثْمڭَّا نْسنْ.“
23 ”مَا نشّْ ذ إِجّْ ن أَربِّي زِي ڒَاذَاسْ، أَمُّو إِ إِقَّارْ سِيذِي، وَارْ إِدْجِي إِجّْ ن أَربِّي زِي ڒَاڭّْوَاجْ؟ 24 مَا إِزمَّارْ شَا ن يِيجّنْ أَذْ إِنُّوفَّارْ ذڭْ إِمُوشَانْ إِنُّوفَّارنْ، أَڒَامِي نشّْ وَارْ ث ژَترّغْ، إِقَّارْ سِيذِي. مَا وَارْ إِدْجِي ذ نشّْ ونِّي إِشُّورنْ أَجنَّا ذ ثمُّورْثْ؟، إِقَّارْ سِيذِي. ▪ 25 نشّْ سْڒِيغْ مِينْ قَّارنْ إِنَابِييّنْ نِّي إِتّْنبَّانْ أَمْ سّْخَارِّيقنْ ذڭْ يِيسمْ إِنُو، قَّارنْ: ’ثُوغَا غَارِي إِشْثْ ن ثِيرْجَا، إِشْثْ ن ثِيرْجَا!‘ 26 غَارسْ أَڒْ مڒْمِي عَاذْ أَذْ إِڒِينْثْ ثِيرْجَا ذڭْ وُوڒْ ن إِنَابِييّنْ نِّي إِتّْنبَّانْ أَمْ سّْخَارِّيقنْ؟ نِيثْنِي ذ إِنَابِييّنْ ن وشْمَاطْ ن وُوڒْ ن يِيخفْ نْسنْ، 27 إِنِّي يَارزُّونْ أَذْ أَرّنْ ڒْڭنْسْ إِنُو أَذْ إِتُّو إِسمْ إِنُو س ثِيرْجَا نْسنْ نِّي تّْهَاجَانْ إِجّْ إِ ونّغْنِي، أَمشْنَاوْ إِبَابَاثنْ نْسنْ تُّونْ إِسمْ إِنُو س بَاعْلْ. ▪ 28 أَنَابِي نِّي غَارسْ إِشْثْ ن ثِيرْجَا، أجّْ إِ-ث أَذْ ت إِحَاجَا، ؤُ أَنَابِي نِّي غَارْ إِدْجْ وَاوَاڒْ إِنُو، أجّْ إِ-ث أَذْ إِسِّيوڒْ أَوَاڒْ إِنُو س ثِيذتّْ. مَاغَارْ مِينْ د-يِيوْينْ ڒُومْ غَارْ إِمنْذِي، إِقَّارْ سِيذِي. 29 مَا وَارْ إِدْجِي وَاوَاڒْ إِنُو أَمْ ثْمسِّي، إِقَّارْ سِيذِي، ؤُشَا أَمْ إِجّْ ن وفْضِيسْ إِ إِڒبّْزنْ ثَاصْضَارْثْ؟ 30 س ؤُينِّي، خْزَارْ، نشّْ أَذْ ڒقْفغْ إِنَابِييّنْ نِّي، أَمُّو إِ إِقَّارْ سِيذِي، إِنِّي إِتَّاشَارنْ أَوَاڒنْ إِنُو إِجّْ ن ونّغْنِي. ▪ 31 خْزَارْ، نشّْ أَذْ ڒقْفغْ إِنَابِييّنْ نِّي، إِقَّارْ سِيذِي، إِنِّي إِسّْخدَّامنْ إِڒسْ نْسنْ ؤُ زَّايسْ إِ سَّاوَاڒنْ: ’نتَّا إِقَّارْ ...!‘ 32 خْزَارْ، نشّْ أَذْ ڒقْفغْ إِنِّي إِتّْنبَّانْ س ثِيرْجَا إِخَارِّيقنْ، أَمُّو إِ إِقَّارْ سِيذِي. نِيثْنِي تّْحَاجَانْ ثِيرْجَا نِّي ؤُ أَمُّو إِ تّْغَارَّانْ ڒْڭنْسْ إِنُو زڭْ إِخَارِّيقنْ نْسنْ ذ ڒْهَارْذْ نْسنْ إِبطّْڒنْ. نشّْ مَاشَا وَارْ ثنْ د-سّكّغْ ؤُ وَارْ ذ أَسنْ وْشِيغْ أَوَاڒْ. نِيثْنِي وَارْ دْجِينْ ذ نّْفعْ إِ ڒْڭنْسْ، أَمُّو إِ إِقَّارْ سِيذِي.“ ▪
33 ”خْمِي شكْ إِ غَا إِسّقْسَا إِجّْ ن ڒْڭنْسْ نِيغْ إِجّْ ن ؤُنَابِي نِيغْ إِجّْ ن ؤُكهَّانْ، أَذْ يِينِي: ’مِينْ إِعْنَا خنِّي ڒْحُوكْمْ إِسَّاڭّْوَاذنْ ن سِيذِي؟‘، خنِّي شكْ أَذْ أَسنْ ثِينِيذْ: ’مِينْ إِعْنَا خنِّي ڒْحُوكْمْ إِسَّاڭّْوَاذنْ؟‘ ’أَذْ كنِّيوْ نْضَارغْ جّغْ!‘، أَمُّو إِ إِقَّارْ سِيذِي. 34 أَنَابِي ذ ؤُكهَّانْ ذ ڒْڭنْسْ نِّي إِقَّارنْ: ’ڒْحُوكْمْ إِسَّاڭّْوَاذنْ ن سِيذِي!؟‘، أَرْيَازْ نِّي ذ ثَادَّارْثْ نِّي أَذْ زَّايسْ خڒْفغْ. 35 أَمُّو إِتّْخصَّا أَذْ ثِينِيمْ، كُوڒْ إِجّْ إِ ؤُمْقَارّبْ نّسْ ؤُ كُوڒْ إِجّْ إِ ؤُمَاسْ: ’مَامّشْ خَاكْ د-يَارَّا سِيذِي؟‘، ؤُ: ’مِينْ إِنَّا سِيذِي؟‘ 36 وَارْ ثِيذَارمْ عَاذْ ڒْحُوكْمْ إِسَّاڭّْوَاذنْ ن سِيذِي، مَاغَارْ ڒْحُوكْمْ إِسَّاڭّْوَاذنْ ن سِيذِي أَذْ يِيڒِي مِينْ غَا يِينِي كُوڒْ إِجّْ: أَقَا كنِّيوْ ثسّْفَارْغمْ أَوَاڒنْ ن أَربِّي إِدَّارنْ، سِيذِي ن ڒْعسْكَارَاثْ، أَربِّي نّغْ.
37 أَمُّو إِ غَا ثِينِيذْ إِ ؤُنَابِي: ’مَامّشْ خَاكْ د-يَارَّا سِيذِي؟، نِيغْ: ’مِينْ إِنَّا سِيذِي؟‘ 38 مَاشَا ؤُمِي ثقَّارمْ كنِّيوْ: ’ڒْحُوكْمْ إِسَّاڭّْوَاذنْ ن سِيذِي!؟‘، أَمُّو إِ إِقَّارْ سِيذِي، ؤُمِي كنِّيوْ ثقَّارمْ أَوَاڒْ-أَ ’ڒْحُوكْمْ إِسَّاڭّْوَاذنْ ن سِيذِي!؟‘، وَاخَّا نشّْ سّكّغْ-د غَارْومْ إِجّنْ حِيمَا أَذْ أَومْ يِينِي: ’كنِّيوْ وَارْ ثقَّارمْ شَا: ڒْحُوكْمْ إِسَّاڭّْوَاذنْ ن سِيذِي!؟‘، 39 س ؤُينِّي، خْزَارْ، نشّْ أَذْ كنِّيوْ تُّوغْ قَاعْ ؤُ نشّْ أَذْ كنِّيوْ نْضَارغْ زِي زَّاثْ إِ وُوذمْ إِنُو أَكْ-ذ ثنْذِينْثْ نْومْ نِّي ذ أَومْ وْشِيغْ إِ كنِّيوْ ؤُڒَا إِ إِبَابَاثنْ نْومْ. 40 نشّْ أَذْ خَاومْ د-سّهْوِيغْ ڒْحڭْرَا إِ ڒبْذَا ذ ڒفْضِيحثْ إِ ڒبْذَا نِّي وَارْ إِتّْوَاتُّونْ عمَّارْصْ.“ ▪