8
1 ”ذِي ڒْوقْثْ نِّي، أَمُّو إِ إِقَّارْ سِيذِي، أَذْ سُّوفّْغنْ إِخْسَانْ ن إِجدْجِيذنْ ن يَاهُوذَا، إِخْسَانْ ن ڒْحُوكَّامْ نْسنْ، إِخْسَانْ ن إِكهَّاننْ نْسنْ، إِخْسَانْ ن إِنَابِييّنْ نْسنْ ذ يخْسَانْ ن إِمزْذَاغْ ن ؤُرْشَالِيمْ زڭْ إِمضْڒَانْ نْسنْ. 2 أَذْ بزّْعنْ إِخْسَانْ إِ ثْفُوشْثْ ذ ثْزِيرِي ؤُ إِ مَارَّا إِثْرَانْ ن ؤُجنَّا، إِنِّي ثُوغَا تّخْسنْ، إِنِّي ؤُمِي ثُوغَا تّْسخَّارنْ، إِنِّي ثُوغَا إِضفَّارَانْ ذ ينِّي ثُوغَا زَّايْسنْ أَرزُّونْ شّْوَارْ ذ ينِّي ؤُمِي ثُوغَا تَّاضَارنْ. وَارْ ثنْ د-يَارّْونْ، وَارْ ثنْ نطّْڒنْ، مَاشَا أَذْ إِڒِينْ ذ ڒغْبَارْ خْ وُوذمْ ن ثمُّورْثْ. ▪ 3 نِيثْنِي أَذْ خْسنْ ڒْموْثْ خْ ثُوذَارْثْ جَارْ مَارَّا إِنِّي إِقِّيمنْ زڭْ ينِّي إِتّْوَاسْنجْمنْ ن ثقْبِيتْشْ ن ڒْڭنْسْ-أَ ثَاعفَّانْثْ، ذِي مَارَّا إِمُوشَانْ مَانِي دْجَانْ إِنِّي إِتّْوَاسْنجْمنْ، مَانِي خَاسنْ ؤُژّْڒغْ نشّْ، أَمُّو إِ إِقَّارْ سِيذِي نْ ڒْعسْكَارَاثْ.“ 4 ”إِنِي أَسنْ: ’أَمُّو إِ إِقَّارْ سِيذِي: مَا أَذْ وْضَانْ أَڒْ غَا قِّيمنْ وَارْ تّكَّارَانْ عَاذْ؟ مَا أَذْ خَافِي حيّْذنْ ؤُ وَارْ د-تّْعِيقِّيبنْ؟ 5 مَايمِّي إِحيّذْ ڒْڭنْسْ-أَ، ؤُرْشَالِيمْ ثَانِيثَا، ڒبْذَا زَّايِي؟ نِيثْنِي شبَّارنْ ذڭْ وشْمَاثْ، ؤُڭِينْ أَذْ غَارِي د-ذوْڒنْ. 6 نشّْ سّْحسّغْ، سْڒِيغْ: مِينْ سَّاوَاڒنْ وَارْ إِدْجِي أَمنِّي، ؤُڒَا ذ إِجّنْ وَارْ إِنْذِيمْ خْ ڒْغَارْ نّسْ، أَذْ يِينِي: مِينْ ڭِّيغْ؟ كُوڒْ إِجّْ إِقِّيمْ إِتَّازّڒْ أَمْ ؤُيِيسْ إِتَّازّْڒنْ غَارْ ؤُمنْغِي. 7 ؤُڒَا ذ أَبلَّارْجْ ذڭْ ؤُجنَّا إِسّنْ إِكُوذنْ إِتّْوَاڭّنْ نّسْ. ثَاجْلِيلّحْثْ ذ ثْفَاڒْدْجسْثْ نِّي إِطَّاونْ ذڭْ ونّضْ، حْضَانْثْ ڒْمِيجَاڒْ ن وُوفُّوغْ نْسنْثْ، ڒْڭنْسْ إِنُو مَاشَا وَارْ إِسِّينْ ڒْحُوكْمْ ن سِيذِي. ▪
8 مَامّشْ ثقَّارمْ: نشِّينْ ذ إِمِيغِيسنْ ذ شَّارِيعَا ن سِيذِي أَقَا-ت أَكِيذْنغْ! س ثِيذتّْ، خْزَارْ، ڒقْڒمْ ن إِخَارِّيقنْ ن إِمَارِيرنْ إِڭَّا شَّارِيعَا ذ أَخَارِّيقْ. 9 إِمِيغِيسنْ تّْسضْحَانْ، تّڭّْوذنْ ؤُشَا تّْوَاحبّْسنْ. خْزَارْ، نْضَارنْ أَوَاڒْ ن سِيذِي، خنِّي مَامّشْ إِ ثدْجْ ثِيغِيثْ إِ غَارْسنْ؟“
10 ”س ؤُينِّي أَذْ وْشغْ ثِيمْغَارِينْ نْسنْ إِ إِنّغْنِي، إِيَّارنْ نْسنْ إِ ينِّي إِ غَا إِحوّْسنْ ثَامُّورْثْ، مَاغَارْ زڭْ ؤُمژْيَانْ أَڒْ أَمقّْرَانْ أَرزُّونْ مَارَّا نِيثْنِي ثِيزِي نْسنْ، ؤُشَا زڭْ ؤُنَابِي أَڒْ أَكهَّانْ مَارَّا ثْشمّثْ. ▪
11 ثَارژِّيثْ ن ڒْڭنْسْ إِنُو خْسنْ أَذْ ت سّْڭنْفَانْ س ڒهْونْ، قَّارنْ: ’ڒهْنَا، ڒهْنَا!‘، مَاشَا وَارْ ذِينْ إِدْجِي ڒهْنَا.
12 مَا أَذْ سّضْحَانْ نِيثْنِي، مِينْزِي تّڭّنْ جّْعِيفشْثْ؟ نِيثْنِي وَارْ تّْسضْحِينْ شَا، ڒحْيَا وَارْ ث سِّيننْ. س ؤُينِّي أَذْ وْضَانْ جَارْ إِنِّي إِوطَّانْ ذِي ڒْوقْثْ مڒْمِي زَّايْسنْ إِ غَا خڒْفغْ أَذْ نّْقَارْضنْ، أَمُّو إِ إِقَّارْ سِيذِي.“
13 ”نشّْ أَذْ ثنْ ڒقْضغْ قَاعْ، أَمُّو إِ إِقَّارْ سِيذِي. وَارْ إِقِّيمْ عَاذْ ؤُضِيڒْ غَارْ ثْزَايَارْثْ ؤُ وَارْ ثقِّيمْ عَاذْ ثَازَارْثْ غَارْ ثْشجَّارْثْ ن وَارْثُو، عَاذْ ثِيفْرَايْ وْضَانْثْ. نشّْ أَذْ غَارْسنْ أَوْيغْ إِنِّي خَاسنْ إِ غَا إِعفْسنْ.“▪
14 ”مَايمِّي ذَا نقِّيمْ؟ سْمُونمْ إِخفْ نْومْ، أجّْ أَنغْ أَذْ نَاذفْ غَارْ ثْندَّامْ إِفَارْينْ ؤُشَا أَذْ ذِينْ نسْقَارْ. أَقَا سِيذِي، أَربِّي نّغْ، يَارَّا أَنغْ أَذْ نسْقَارْ ؤُشَا إِوْشَا أَنغْ أَمَانْ إِسْمُومنْ مَاغَارْ نخْضَا خْ سِيذِي. ▪
15 نسِّيتِّيمْ ذِي ڒهْنَا، مَاشَا وَارْ ذِينْ مِينْ إِصبْحنْ، ذِي ڒْوقْثْ ن ؤُسْڭنْفِي، مَاشَا خْزَارْ، مْغِيرْ أَسْنخْڒِيعْ. ▪
16 زِي ذَانْ إِتّْوَاسڒْ ؤُسَاحَارْثْ ن ييْسَانْ نّسْ، زڭْ وسْنحْنحْ ن ييْسَانْ نّسْ ثنْهزَّا مَارَّا ثَامُّورْثْ. نِيثْنِي أَذْ د-أَسنْ أَذْ شّنْ ثَامُّورْثْ ذ ڒْغِيدْجثْ نّسْ، ثَانْذِينْثْ س إِمزْذَاغْ نّسْ. ▪
17 مَاغَارْ خْزَارْ، نشّْ أَذْ سّكّغْ جَارْ أَومْ إِفِيغْرَانْ، إِفِيغْرَانْ ن أَرّْهَاجْ، أَكِيذْسنْ وَارْ إِنفّعْ ؤُعزّمْ. إِنَا أَذْ كنِّيوْ زعْفنْ، أَمُّو إِ إِقَّارْ سِيذِي.“ ▪
ڒحْڒِيقْ ذڭْ وُوڒْ ن إِرْمِييَا
18 ”أَمْحَاذْ إِنُو أَقَا إِذْوڒْ ذ أَشْضَانْ، ؤُڒْ إِنُو يُوحڒْ ذڭْ إِخفْ إِنُو.
19 خْزَارْ، ڒْحسّْ ن إِغُويَّانْ ن يدْجِيسْ ن ڒْڭنْسْ إِنُو زِي ثمُّورْثْ ثِيڭّْوجْ: ’مَا سِيذِي وَارْ إِدْجِي ذِي صِيهْيُونْ، مَا وَارْ ذَايسْ إِدْجِي ؤُجدْجِيذْ نّسْ؟‘ “
”مَايمِّي إِ ذ أَيِي سْعَارنْ س ڒخْيَاڒَاثْ نْسنْ إِنقْشنْ، س لْ-أَصْنَامْ نْسنْ إِفنَّانْ ن إِبَارَّانِييّنْ؟“
20 ”ثعْذُو ثْميْرَا، إِفّغْ ؤُنبْذُو، ؤُ نشِّينْ عَاذْ وَارْ ننْجِيمْ.“
21 ”نشّْ تّْوَارْژِيغْ زِي سِّيبّثْ ن ثَارژِّيثْ ن يسِّيسْ ن ڒْڭنْسْ إِنُو. نشّْ أَرْضغْ أَرُّوضْ ذ أَبَارْشَانْ، إِشبَّارْ ذَايِي ؤُنخْڒِيعْ. ▫ 22 مَا وَارْ ذِينْ إِدْجِي بَالْسَامْ ذِي جِيلْعَاذْ؟ مَا وَارْ ذِينِّي إِدْجِي ؤُمسْڭنْفُو؟ مَايمِّي وَارْ إِنِّيضْ ؤُيزِّيمْ ن يدْجِيسْ ن ڒْڭنْسْ إِنُو؟ ▪ 23 أَخْ، مْڒِي أَزدْجِيفْ إِنُو مَاشَا ذ أَمَانْ، ثِيطّْ إِنُو ذ ڒْعُونْصَارْ ن إِمطَّاونْ، خنِّي أَزِيڒْ ذ دْجِيڒثْ إِڒِي رُوغْ خْ ينِّي إِتّْوَانْغنْ ن يدْجِيسْ ن ڒْڭنْسْ إِنُو.“ ▪