5
1 ”ؤُيُورمْ ذِي ذْشُورَاثْ ن ؤُرْشَالِيمْ، ؤُشَا خْزَارمْ مْلِيحْ، إِڒِيمْ ثْفثْنمْ ؤُ أَرْزُومْ ذڭْ إِزُورَاجْ نّسْ، مَا أَذْ ثَافمْ إِجّنْ، مَا ذِينْ إِجّْ إِتّڭّْ ثَاسڭْذَا، إِجّنْ ونِّي يَارزُّونْ ثِيذتّْ، خنِّي نشّْ أَذْ أَسْ غْفَارغْ إِ ؤُرْشَالِيمْ. ▫ 2 نِيثْنِي قَّارنْ: ’س ثِيذتّْ أَمْ إِدَّارْ سِيذِي!‘، وَاخَّا أَمنِّي نِيثْنِي تّْجَادْجَانْ ژُورْ.“ 3 ”أَ سِيذِي، مَا وَارْ حطَّانْثْ ثِيطَّاوِينْ نّكْ خْ ثِيذتّْ؟ شكْ ثوْثِيذْ ثنْ، مَاشَا وَارْ ؤُشِينْ أَكْ-ذ ڒحْرِيقْ، شكْ ثقْضِيذْ ثنْ، مَاشَا وَارْ خْسنْ أَذْ تّْوَاربَّانْ. نِيثْنِي ڭِّينْ ثَانْيَارْثْ نْسنْ إِقسْحنْ خْ وژْرُو، نِيثْنِي ؤُڭِينْ أَذْ د-ذوْڒنْ. ▪
4 نشّْ نِّيغْ: ’أَهْ، نِيثْنِي ذ ڒْمُوسَاكِينْ، تّڭّنْ ثُوبُّوهڒْيَا، مِينْزِي نِيثْنِي وَارْ سِّيننْ أَبْرِيذْ ن سِيذِي، ثَاسڭْذَا ن أَربِّي نْسنْ. 5 نشّْ مَاشَا أَذْ ؤُيُورغْ غَارْ إِمقّْرَاننْ ؤُشَا أَذْ كِيذْسنْ سِّيوْڒغْ، مِينْزِي نِيثْنِي وَارْ سِّيننْ شَا أَبْرِيذْ ن سِيذِي، ثَاسڭْذَا ن أَربِّي نْسنْ.‘ نِيثْنِي جْمِيعْ مَاشَا أَرْژِينْ زَّايْڒثْ، قطّْسنْ إِسغْوَانْ. 6 س ؤُينِّي إِوّثْ إِ-ثنْ وَايْرَاذْ ن ثَاڭَانْثْ، إِمزّقْ إِ-ثنْ وُوشّنْ زِي ڒوْضَاثْ، إِتّْحَامَا ؤُغِيڒَاسْ ثِيندَّامْ نْسنْ. كُوڒْ إِجّْ ونِّي د غَا إِفّْغنْ زِي ثنْذِينْثْ، أَذْ ث شَارّْڭنْ، مَاغَارْ إِعذِّيينْ نْسنْ ذ أَطَّاسْ ؤُ أَحيّذْ نْسنْ إِمْغَارْ.“ ▫ ▪
7 ”مَامّشْ زمَّارغْ أَذْ أَومْ غْفَارغْ مَانْ أَيَا؟ إِحنْجِيرنْ نّكْ سمْحنْ ذَايِي ؤُشَا جُّودْجنْ غَارْ مِينْ وَارْ إِدْجِي ذ أَربِّي. ڒَامِي ثنْ سّْجِيوْنغْ، زنَّانْ نِيثْنِي، ؤُشَا سّْمُوننْ س دّْحَاسْ غَارْ وخَّامْ ن ثمْغَارْثْ ن فَارْقْ-شّْغڒْ. 8 نِيثْنِي ذ إِكِيذَارنْ إِعڒْفنْ إِتّلْعنْ. كُوڒْ إِجّْ إِسّْنحْنِيحْ غَارْ ثمْغَارْثْ ن ونّغْنِي. ▪ 9 مَا وَارْ ثتّْعِيقِيبغْ خْ مَانْ أَيَا، أَمُّو إِ إِقَّارْ سِيذِي، نِيغْ وَارْ إِتّنْثِيقِيمْ ڒعْمَارْ إِنُو زِي ڒْڭنْسْ أَمْ وَانِيثَا؟“ ▪
10 ”ڭَاعّْذمْ خْ ڒحْيُوضْ نّسْ ؤُشَا هذْممْ ثنْ، مَاشَا وَارْ ثنْ مسّْحمْ قَاعْ زِي ثمُّورْثْ. قڒْعمْ إِزْبِيرنْ نْسنْ، مَاغَارْ نِيثْنِي وَارْ دْجِينْ شَا ن سِيذِي. ▪
11 ثَادَّارْثْ ن إِسْرَائِيل ذ ثَادَّارْثْ ن يَاهُوذَا مَاشَا غْذَارنْ أَيِي س وَاطَّاسْ، أَمُّو إِ إِقَّارْ سِيذِي. ▪
12 نِيثْنِي نكَّارنْ سِيذِي، قَّارنْ: ’نتَّا وَارْ ذِينْ إِدْجِي، وَارْ ذ أَنغْ إِڒقّفْ ڒْغَارْ، وَارْ نتّْوِيڒِي سِّيفْ ؤُڒَا ذ ڒَاژْ.‘
13 إِنَابِييّنْ أَذْ ذوْڒنْ أَمْ ؤُسمِّيضْ ؤُشَا وَارْ ذِينْ إِدْجِي ونِّي زَّايْسنْ إِسَّاوَاڒنْ. أَمُّو إِ ذ أَسنْ غَا إِمْسَارْ.“
14 ”س ؤُيَا إِقَّارْ سِيذِي، أَربِّي ن ڒْعسْكَارَاثْ: ’مِينْزِي كنِّيوْ ثقَّارمْ أَوَاڒْ-أَ، خْزَارْ، نشّْ أَذْ ڭّغْ أَوَاڒنْ إِنُو ذڭْ ؤُقمُّومْ نّكْ ذ ثِيمسِّي ؤُشَا ڒْڭنْسْ-أَ أَذْ ث ڭّغْ ذ أَكشُّوضْ، ؤُشَا أَذْ ثنْ ثشّْ ثْمسِّي. ▪
15 خْزَارْ، أَ ثَادَّارْثْ ن إِسْرَائِيل، نشّْ أَذْ خَاومْ سِّيوْضغْ إِجّْ ن ڒْڭنْسْ زِي ڒَاڭّْوَاجْ، أَمُّو إِ إِقَّارْ سِيذِي. أَقَا-ث ذ ڒْڭنْسْ إِوْعَارْ، ڒْڭنْسْ زڭْ وشْحَاڒْ ؤُيَا، ڒْڭنْسْ إِ زِي وَارْ ثسِّينذْ شكْ أَوَاڒْ نّسْ، ؤُ وَارْ ثْفهّْمذْ مِينْ قَّارنْ نِيثْنِي. ▪
16 أَزعْپُوڒْ نّسْ ن فْڒِيثْشَاثْ إِڭَّا أَمْ إِجّْ ن ونْضڒْ يَارزْمنْ، نِيثْنِي مَارَّا ذ أَيْثْ ن بُو-ثغْرُوضْثْ.
17 أَذْ إِشّْ ڒْڭنْسْ نِّي صَّابثْ نّمْ ذ وغْرُومْ نّمْ، أَذْ إِشّْ إِحنْجِيرنْ نّمْ ذ يسِّيمْ، أَذْ إِشّْ ؤُدْجِي نّمْ ذ إِفُونَاسنْ ذ ثْفُونَاسِينْ نّمْ، أَذْ إِشّْ ثَازَايَارْثْ نّمْ ذ وَارْثُو نّمْ، ؤُشَا س سِّيفْ أَذْ إِوّثْ ثِيندَّامْ نّمْ إِفَارْينْ مِينْ خفْ ثتّشْڒذْ.“ ▪
18 ”مَاشَا ؤُڒَا ذڭْ وُوسَّانْ نِّي، أَمُّو إِ إِقَّارْ سِيذِي، نشّْ وَارْ كنِّيوْ قطِّيغْ مَارَّا. ▪
19 مَاڒَا خنِّي كنِّيوْ ثقَّارمْ: ’مَايمِّي إِ ذ أَنغْ إِڭَّا سِيذِي، أَربِّي نّغْ، مَارَّا أَيَا؟‘، خنِّي أَذْ أَسنْ ثِينِيذْ: ’أَمْ مَامّشْ كنِّيوْ ذَايِي ثْسمْحمْ، ثتّْسخَّارمْ إِ إِربِّيثنْ إِغْرِيبنْ ذِي ثمُّورْثْ نْومْ، أَمُّو إِ غَا ثْسخَّارمْ إِ إِبَارَّانِييّنْ ذِي ثمُّورْثْ وَارْ إِدْجِي نْومْ.‘ “ ▪
20 ”بَارّْحمْ أَيَا إِ ثَادَّارْثْ ن يَاعْقُوبْ ؤُشَا جّمْ أَذْ ث سْڒنْ ذِي يَاهُوذَا، إِنِي: 21 ’سْڒمْ إِ وَايَا، أَ شكْ ڒْڭنْسْ أَپُوهَاڒِي ؤُ نهْڒَا وُوڒْ! كنِّيوْ غَارْونْ ثِيطَّاوِينْ، مَاشَا وَارْ تّْوِيڒِينْ، إِمزُّوغنْ، مَاشَا وَارْ تّسْڒِينْ. ▪ 22 مَا وَارْ ذ أَيِي تّڭّْوذمْ، أَمُّو إِ إِقَّارْ سِيذِي. مَا وَارْ ثتّخْسمْ ثتَّارْجِيجِيمْ زَّاثْ إِ وُوذمْ إِنُو، إِ نشّْ ونِّي إِڭِّينْ إِ ڒبْحَارْ إِجْذِي ذ ويْمِيرْ، ذ إِشْثْ ن ثوْصيّثْ إِ ڒبْذَا ثنِّي وَارْ زمَّارنْ أَذْ عْذُونْ ڒمْوَاجْ. أَقَا تّنْهزَّانْ، مَاشَا وَاخَّا أَمنِّي وَارْ زمَّارنْ، تّْهَاجَانْ، مَاشَا وَاخَّا أَمنِّي وَارْ ت عدُّونْ.‘ ▪ 23 مَاشَا ڒْڭنْسْ-أَ غَارسْ ؤُڒْ إِحيّْذنْ ذ إِغوّْغنْ. نِيثْنِي حيّْذنْ خْ وبْرِيذْ ؤُشَا فّْغنْ. 24 نِيثْنِي وَارْ قَّارنْ ذڭْ يِيخفْ نْسنْ: ’أجّْ أَنغْ أَذْ نڭّْوذْ سِيذِي، أَربِّي نّغْ نِّي إِتِّيشنْ أَنْژَارْ ذِي ڒْوقْثْ نّسْ، أَمُّو أَنْژَارْ ن زِيشْ ؤُڒَا ذ أَنْژَارْ ن ڒخْمِيمْ، ونِّي إِحطَّانْ سِيمَانَاثْ إِتّْوَاڭّنْ ن ثْميْرَا إِ نشِّينْ.‘ ▪ 25 ڒْمُوعْصِييَّاثْ نْومْ منْعنْثْ مَانْ أَيَا ؤُ دّْنُوبْ نْومْ طّْفنْ خَاومْ مِينْ إِشْنَانْ.
26 وَاهْ، أَقَا ؤُفِينْ إِعفَّاننْ ذِي ڒْڭنْسْ إِنُو. نِيثْنِي تّْحَامَانْ أَمْ إِيمَّارنْ ن يجْضَاضْ. سّْبدَّانْ ثَاخْشفْثْ إِنقّنْ، أَرْزُونْ أَذْ طّْفنْ إِوْذَانْ. 27 أَمْ ڒقْفزْ إِشُّورْ س إِجْضَاضْ، أَمُّو ثُوذْرِينْ نْسنْ شُّورنْثْ س ڒْغشّْ. زڭْ ؤُيَا ذوْڒنْ نِيثْنِي ذ إِمقّْرَاننْ ذ أَيْثْ ن بُو-وَاڭْڒَا. 28 أَقَا نِيثْنِي ؤُفّنْ س ثَاذُونْثْ، أَقَا أَثنْ ذ إِحْرَايْمِييّنْ، س ثْمڭَّا نْسنْ سّْعدُّونْ نِيثْنِي ثِيمڭَّا ثِيعفَّانِينْ أَطَّاسْ. وَارْ حكّْمنْ س ڒْحقّْ ذِي دّعْوثْ، ؤُڒَا ذِي دّعْوثْ ن ؤُيُوجِيڒْ، وَاخَّا أَمنِّي نِيثْنِي فڒْحنْ. عَاوذْ وَارْ شِّيثنْ خْ ثسْغَارْثْ ن إِمزْڒَاضْ. ▪ 29 مَا وَارْ تّْعِيقِيبغْ خْ مَانْ أَيَا، أَمُّو إِ إِقَّارْ سِيذِي، نِيغْ مَا وَارْ إِخدْجفْ ڒعْمَارْ إِنُو زِي ڒْڭنْسْ أَمْ وَانِيثَا؟“ ▪
30 ”مِينْ إِتّنخْڒَاعنْ ؤُ مِينْ إِدْجَانْ ذ نّْعِي أَقَا إِمْسَارْ ذِي ثمُّورْثْ. 31 إِنَابِييّنْ تّْنبَّانْ س إِخَارِّيقنْ ؤُشَا إِكهَّاننْ تّْصدْجْضنْ سَاذُو ؤُفُوسْ نْسنْ، ؤُشَا ڒْڭنْسْ إِنُو إِتّخْسْ إِ-ث أَمُّو. مِينْ إِ غَا ثڭّمْ خْمِي د غَا يَاوضْ قطُّو؟“ ▪