ثَاڒَاغِيثْ إِ وعْقَابْ غَارْ سِيذِي أَربِّي
3
1 ”قَّارنْ: ’خْزَارْ، إِجّْ ن ورْيَازْ إِدْجفْ إِ ثمْغَارْثْ نّسْ ؤُ نتَّاثْ ثُويُورْ أَسْ، ثذْوڒْ ذ ثَامْغَارْثْ ن إِجّْ نّغْنِي، مَا إِعدّڒْ أَذْ غَارسْ د-إِعْقبْ خنِّي؟ مَا وَارْ ثخْمِيجْ ثمُّورْثْ نِّي أَطَّاسْ؟‘ شمْ مَاشَا ثْفسْذذْ إِخفْ نّمْ أَكْ-ذ إِجّْ ن ؤُبَارُّو ن إِمدُّوكَّاڒْ، مَا خنِّي ثْزمَّارذْ أَذْ غَارِي د-ثْعقْبذْ، أَمُّو إِ إِقَّارْ سِيذِي؟ ▪ 2 سْڭعّذْ ثَامُوغْڒِي نّمْ ذِي ڒڭْعُوذِي إِ خفْ وهّْبنْ ثِيغَارْصَا، خْزَارْ، مَانِي وَارْ شمْ خَارْضنْ؟ أَقَا ثُويُورذْ أَذْ ثقِّيمذْ ذڭْ إِبْرِيذنْ مَارَّا أَمْ إِجّْ ن وعْرَابْ ذِي ڒخْڒَا. أَمُّو إِ ثسّْفسْذذْ ثَامُّورْثْ س فَارْقْ-شّْغڒْ نّمْ ذ ڒْغَارْ نّمْ. 3 س ؤُيَا إِتّْوَامْنعْ ونْژَارْ ؤُشَا وَارْ د-إِوْثِي ونْژَارْ أَجُورِي. مَاشَا شمْ ثُوغَا غَارمْ ثَانْيَارْثْ ثقْجَارْ ن ثمْغَارْثْ ن فَارْقْ-شّْغڒْ، وَارْ ثخْسذْ أَذْ ثسّضْحِيذْ. 4 مَا زِي ڒخُّو ذ ثْسَاونْثْ وَارْ ذ أَيِي ثتّْڒِيغِيذْ ’بَابَا! شكْ ذ أَمدُّوكّڒْ إِنُو زِي ثمْژِي إِنُو!؟ 5 مَا أَذْ إِقِّيمْ وغْضَابْ نّسْ إِتّْبدَّا إِ ڒبْذَا؟ مَا نتَّا أَذْ ث إِحْضَا إِ ڒبْذَا؟‘ خْزَارْ، أَمُّو إِ ثقَّارذْ، أَمْ ثتّڭّذْ مَاڒَا ثِيمسْڒَايِينْ نِّي ثِيعفَّانِينْ ؤُ ثتّْخَارّْصذْ أَقَا أَيَا إِعدّڒْ أَذْ إِتّْوَاڭّْ.“6 سِيذِي إِنَّا أَيِي ذڭْ وُوسَّانْ ن يُوشِييَا: ”مَا ثژْرِيذْ مِينْ ثڭَّا ثمْغَارْثْ إِسْرَائِيل إِكْفَارنْ؟ نتَّاثْ ثْڭعّذْ كُوڒْ أَذْرَارْ يُوعْڒَانْ ؤُشَا ثزّڒْ سَاذُو كُوڒْ ثَاشجَّارْثْ ثَازِيزَاوْثْ ؤُشَا ثڭَّا ذِينْ أَمْ ثمْغَارْثْ ن فَارْقْ-شّْغڒْ! ▫ ▪ 7 أَوَارْنِي ڒَامِي ثڭَّا أَيَا، نِّيغْ أَسْ: ’ذْوڒْ-د غَارِي!‘ ، مَاشَا نتَّاثْ وَارْ د-ثذْوِيڒْ شَا. خنِّي ثژْرِي أَيَا ؤُتْشْمَاسْ إِغدَّارنْ يَاهُوذَا. 8 ژْرِيغْ، ؤُمِي ذ أَسْ دْجْفغْ زِي سِّيبّثْ ن مَارَّا مَانْ أَيَا مِينْ زِي ثزْنَا ثمْغَارْثْ إِسْرَائِيل إِكْفَارنْ، أَقَا أَيَا وَارْ إِسّْنخْڒِيعْ ؤُتْشْمَاسْ ثَاغدَّارْثْ يَاهُوذَا، مَاشَا نتَّاثْ ثُويُورْ، ثسّفْسذْ إِخفْ نّسْ ؤُڒَا ذ نتَّاثْ س فَارْقْ-شّْغڒْ نّسْ. 9 س فَارْقْ-شّْغڒْ نّسْ إِهوْننْ، ثتّْوَاسخْمجْ ثمُّورْثْ، مَاغَارْ نتَّاثْ ثزْنَا س وژْرُو ذ ؤُكشُّوضْ.
10 ذِي مَارَّا أَيَا وَارْ د غَارِي ثعْقِيبْ س مَارَّا ؤُڒْ نّسْ ؤُڒَا ذ ؤُتْشْمَاسْ يَاهُوذَا ثَاغدَّارْثْ، مَاشَا ثسّْنِيعْمِيڒْ وَاهَا، أَمُّو إِ إِقَّارْ سِيذِي.“
11 س ؤُيَا إِنَّا أَيِي سِيذِي: ”ثَاوتْشْمَاثْ إِسْرَائِيل إِكْفَارنْ، أَقَا ثَارَّا إِخفْ نّسْ ثْبَانْ-د ثْسڭّذْ كْثَارْ خْ ؤُتْشْمَاسْ يَاهُوذَا ثَاغدَّارْثْ.
12 ؤُيُورْ، ڒَاغَا أَوَاڒنْ-أَ غَارْ شَّامَالْ، إِنِي: ’ذْوڒْ-د، أَ شمْ إِسْرَائِيل إِكْفَارنْ!‘ ، أَمُّو إِ إِقَّارْ سِيذِي. أَغمْپُوبْ إِنُو وَارْ إِتّْبَارْشِينْ، مَاغَارْ نشّْ شُّورغْ س ثْمخْسِيوْثْ إِشوَّارنْ، أَمُّو إِ إِقَّارْ سِيذِي. نشّْ وَارْ تِّيڒِيغْ تّْفُوڭْمغْ ڒبْذَا. ▪
13 مَاشَا نْعمْ س ڒْمُوعْصِييّثْ نّمْ، أَقَا ثْعذِّيذْ خْ سِيذِي، أَربِّي نّمْ، ؤُشَا ثفّْغذْ زڭْ وبْرِيذْ غَارْ مَارَّا إِغزْذِيسنْ غَارْ إِبَارَّانِييّنْ، سَاذُو كُوڒْ ثَاشجَّارْثْ ثَازِيزَاوْثْ، مَاشَا كنِّيوْ وَارْ ثسْڒِيمْ شَا غَارْ ثْمِيجَّا إِنُو، أَمُّو إِ إِقَّارْ سِيذِي إِنُو.“
14 ”ذوْڒمْ-د، أَ ثَارَّاوْثْ إِكْفَارنْ!، أَمُّو إِ إِقَّارْ سِيذِي، مَاغَارْ نشّْ ذوْڒغْ ذ أَرْيَازْ نْومْ، نشّْ أَذْ كنِّيوْ قبْڒغْ عَاوذْ، إِجّْ زڭْ إِشْثْ ن ثنْذِينْثْ، ؤُ ثْنَاينْ زڭْ إِجّْ ن ڒَادْجْ، ؤُ نشّْ أَذْ كنِّيوْ أَوْيغْ غَارْ صِيهْيُونْ.
15 نشّْ أَذْ أَومْ وْشغْ إِمكْسَاونْ إِ إِخْسْ وُوڒْ إِنُو، إِنِّي كنِّيوْ إِ غَا يَاروْسنْ س ثُوسّْنَا ذ ڒعْقڒْ. ▪
16 خْمِي إِ غَا ثمَّارنْيمْ ذڭْ وُوسَّانْ نِّي ؤُشَا أَذْ د-ثَاوْيمْ ڒْغِيدْجثْ ذِي ثمُّورْثْ، إِقَّارْ سِيذِي، أَذْ ثَافذْ وَارْ قَّارنْ عَاذْ ’تَّاپُوثْ ن ڒْعَاهْذْ ن سِيذِي!‘ وَارْ د أَسنْ ثتَّاڒِي غَارْ ڒْبَاڒْ، وَارْ ت تِّيذَارنْ، وَارْ ت فقّْذنْ عَاذْ ؤُشَا وَارْ ڭُّورْ أَذْ ث سنّْعنْ عَاذْ.“
17 ”ذِي ڒْوقْثْ نِّي أَذْ إِنِينْ إِ ؤُرْشَالِيمْ ’ڒْكُورْسِي ن سِيذِي!‘، ؤُشَا مَارَّا ڒڭْنُوسْ أَذْ غَارسْ د-نّْيَارْونْ ذِي طّْوعْ ن يِيسمْ ن سِيذِي، غَارْ ؤُرْشَالِيمْ، ؤُشَا وَارْ تّْغِيمِينْ ڭُّورنْ شَا عْلَاحْسَابْ ڒقْسَاحثْ ن وُوڒْ نْسنْ أَعفَّانْ.
18 ذڭْ وُوسَّانْ نِّي أَذْ ثُويُورْ ثَادَّارْثْ ن يَاهُوذَا غَارْ ثَادَّارْثْ ن إِسْرَائِيل ؤُشَا نِيثنْثِي أَذْ فّْغنْثْ مُوننْثْ زِي ثمُّورْثْ ن شَّامَالْ غَارْ ثمُّورْثْ نِّي وْشِيغْ ذ ثَاسْغَارْثْ إِ إِبَابَاثنْ نْومْ.“
19 ”نشّْ ثُوغَا نِّيغْ: ’مَامّشْ زمَّارغْ أَذْ كنِّيوْ أَرّغْ ذ إِحنْجِيرنْ إِنُو ؤُشَا أَذْ أَومْ وْشغْ ثَامُّورْثْ إِعِيزّنْ، ثَاسْغَارْثْ نِّي إِدْجَانْ ذ ثَالْوِيزْثْ ن ڒْعسْكَارَاثْ ن ڒڭْنُوسْ؟‘ نشّْ نِّيغْ: ’كنِّيوْ أَذْ غَارِي ڒَاغَانْ: بَابَا! ؤُشَا وَارْ خَافِي ثتّْحيِّيذمْ عَاذْ‘. 20 س ثِيذتّْ، أَمْ ثمْغَارْثْ ثغْذَارْ أَمدُّوكّڒْ نّسْ، أَمُّو ؤُڒَا ذ كنِّيوْ ثِيغْذَارمْ أَيِي، أَ ثَادَّارْثْ ن إِسْرَائِيل، أَمُّو إِ إِقَّارْ سِيذِي.“
21 إِتّْوَاسڒْ إِجّْ ن ڒْحسّْ خْ ثوْرِيرِينْ إِقشَّارنْ، أَنِيخْسسْ ذ ثُوثْرَا ن أَيْثْ ن إِسْرَائِيل، مِينْزِي نِيثْنِي ؤُيُورنْ إِبْرِيذنْ فَارْغنْ ؤُشَا سِيذِي، أَربِّي نْسنْ، تُّونْ ث.
22 ”ذوْڒمْ-د، أَ ثَارَّاوْثْ إِكْفَارنْ!“، نشّْ خْسغْ أَذْ سّْڭنْفِيغْ أَكْفَارْ نْومْ.
”خْزَارْ، أَقَا أَنغْ ذَا، نشِّينْ نُوسَا-د غَاركْ، مَاغَارْ شكْ ذ سِيذِي، أَربِّي نّغْ!“
23 ”نِيشَانْ، خْ وَالُو إِ إِتّْرَاجَا بْنَاذمْ زِي ڒڭْعُوذِي ن ثوْهِيبِينْ ذ دْجْغَارغْ خْ إِذُورَارْ. ذ ثِيذتّْ، ذِي سِيذِي، أَربِّي نّغْ، أَقَا إِدْجْ ؤُسنْجمْ ن إِسْرَائِيل. ▪ 24 ڒفْضِيحثْ ثشَّا ڒْخذْمثْ ن إِبَابَاثنْ نّغْ، زِي ثمْژِي نّغْ: ؤُدْجِي نْسنْ ذ إِفُونَاسنْ ذ ثْفُونَاسِينْ نْسنْ، إِحنْجِيرنْ نْسنْ ذ ثْحنْجِيرِينْ نْسنْ. 25 نشِّينْ نزّڒْ ذِي ڒفْضِيحثْ نّغْ ؤُشَا ڒحْيَا نّغْ ثذْڒَا أَنغْ، مَاغَارْ نشِّينْ نخْضَا أَكْ-ذ سِيذِي، أَربِّي نّغْ، نشِّينْ ذ إِبَابَاثنْ نّغْ، زِي ثمْژِي نّغْ غَارسْ أَڒْ إِضَا. نشِّينْ وَارْ نسْڒِي شَا غَارْ ثْمِيجَّا ن سِيذِي، أَربِّي نّغْ.“