‏1 ”أَخْ، مَاعْلِيكْ قَاعْ شكْ ذ ؤُمَا،

ونِّي إِطّضنْ ذِي ثْبِيبِّيشِينْ ن يمَّا.

مَاڒَا ؤُفِيغْ شكْ ذِي بَارَّا، أَذْ شكْ سُّوذْمغْ،

بْڒَا مَا ذ أَيِي سّحْقَارَانْ.

‏2 إِڒِي أَذْ شكْ نذْهغْ، أَذْ شكْ أَوْيغْ غَارْ ثَادَّارْثْ ن يمَّا،

شكْ أَذْ أَيِي ثسّْڒمْذذْ ذِينْ.

أَذْ أَشْ وْشغْ بِينُو إِتّْفُوحنْ س ڒعْثُوڒْ أَذْ ثسْوذْ،

أَژمِّي ن ثْشجَّارْثْ إِنُو ن وَارمَّانْ.

‏3 أَزڒْمَاضْ نّسْ أَقَا-ث سَاذُو ؤُزدْجِيفْ إِنُو،

ؤُشَا أَفُوسِي نّسْ إِذَارّعْ أَيِي-د.

‏4 نشّْ أَذْ كنِّينْثْ أَرّغْ تّْجَّادْجَانْثْ، أَ يسِّيسْ ن ؤُرْشَالِيمْ:

مَايمِّي إِ غَا ثْهوْڒنْثْ ثَايْرِي

نِيغْ أَذْ ت-إِ-د-ثسّكَّارنْثْ،

قْبڒْ مَا ثتّخْسْ نتَّاثْ.“

‏5 ”مِينْ ثعْنَا نِّي ذِينْ إِتّْڭعَّاذنْ زِي ڒخْڒَا،

ثتّْعمّذْ خْ لِّيفْ نّسْ؟“

”سَاذُو ثْشجَّارْثْ ن تّفَّاحْثْ أَرّغْ مژْرِي نّمْ،

مَانِي شمْ د-ثجَّا يمَّامْ س ڒحْرِيقْ ن ثَارْوَا،

مَانِي شمْ د-ثجَّا ثنِّي شمْ د-يُورْونْ.“

‏6 ”سَارْسْ أَيِي أَمْ طَّابعْ خْ وُوڒْ نّكْ،

أَمْ طَّابعْ خْ ؤُغِيڒْ نّكْ،

مَاغَارْ ثَايْرِي ثجْهذْ أَمْ ڒْموْثْ،

ثُوسْمِي ثقْسحْ أَمْ ڒَاخَارْثْ.

ثِيفطُّوثِينْ نّسْ ذ ثِيفطُّوثِينْ ن ثْمسِّي، أَقَا أَثنْثْ أَمْ ؤُشعَّاڒْ ن سِيذِي.

‏7 أَطَّاسْ ن وَامَانْ وَارْ زمَّارنْ أَذْ سّْخسْينْ ثَايْرِي،

ؤُڒَا ذ إِغزْرَانْ وَارْ ت تِّيوْينْ.

وَاخَّا إِوْشَا إِجّنْ إِ ثَايْرِي مَارَّا أَڭْڒَا ن ثَادَّارْثْ نّسْ،

أَذْ ث سّحْقَارنْ ذ أَسحْقَارْ.“

‏8 ”نشِّينْ غَارْنغْ إِشْثْ ن ؤُتْشْمَاثْنغْ ثَامژْيَانْثْ،

عَاذْ وَارْ ذ أَسْ د-فِّيغنْ إِذْمَارنْ.

مِينْ إِ غَا نڭّْ إِ ؤُتْشْمَاثْنغْ،

ذڭْ وَاسّْ إِ ذِي خَاسْ إِ غَا سِّيوْڒنْ؟“

‏9 ”مَاڒَا نتَّاثْ ذ ڒْحِيضْ،

أَذْ خَاسْ نسّْبدّْ أَشْبَارْ أَمْ إِشْثْ ن ثمْرِيسْثْ ن نُّوقَارْثْ.

مَاڒَا نتَّاثْ ذ ثَاوَّارْثْ،

أَذْ ت نقّنْ س ثْفڒْوِينْ ن ؤُكشُّوضْ ن ثنْڭلْثْ.“

‏10 ”نشّْ ذ ڒْحِيضْ ؤُ إِذْمَارنْ إِنُو أَمشْنَاوْ لْپُورْجَاثْ.

خنِّي ذوْڒغْ نشّْ ذِي ثِيطَّاوِينْ نّسْ أَمْ ثنِّي يُوفِينْ ڒحْنَا.“

‏11 ”سُولِيمَانْ ثُوغَا غَارسْ إِجّْ ن ؤُمَارْجُوعْ ن ؤُضِيڒْ ذِي بَاعْلْ-هَامُونْ.

إِوْشَا أَمَارْجُوعْ نِّي إِ إِعسَّاسنْ.

إِ ڒْغِيدْجثْ نّسْ قَاعْ إِجّْ يِيوِي-د أَڒفْ ن ڒوْزنْ ن نُّوقَارْثْ.

‏12 أَحْوِيشْ ن ؤُضِيڒْ  إِنُو، أَقَا-ث زَّاثْ إِ ثِيطَّاوِينْ إِنُو.

أَڒفْ ن ڒوْزنْ ن نُّوقَارْثْ أَقَا أَثنْ إِ شكْ، أَ سُولِيمَانْ،

ؤُ أَڒْفَاينْ إِ إِعسَّاسنْ ن ڒْغِيدْجثْ زَّايسْ.“

‏13 ”أَ شمْ ثنِّي إِزدّْغنْ ذڭْ إِحْوِيشنْ،

إِعْشِيرنْ نّمْ تّسْڒَانْ س إِمزُّوغنْ إِ ثْمِيجَّا نّمْ،

قَّارنْ: ’أجّْ أَيِي أَذْ ت سْڒغْ!“

‏14 ”ذغْيَا، أَ لِّيفْ إِنُو،

إِڒِي أَمْ إِغَايْضْ ن وزْغَارْ،

نِيغْ أَمْ ؤُمژْيَانْ ن ؤُذَاذنْ،

خْ إِذُورَارْ إِشُّورنْ س ڒعْشُوبْ إِتّْفُوحنْ.“