‏1 كْسِينْ ڒْڭنْسْ ن ثمُّورْثْ يَاهُويَاحَازْ، مِّيسْ ن يُوشِييَا، ؤُشَا ڭِّينْ ث ذ أَجدْجِيذْ ذِي ؤُرْشَالِيمْ ذڭْ ومْشَانْ ن بَابَاسْ. ‏2 يَاهُويَاحَازْ ثُوغَا غَارسْ ثْڒَاثَا ؤُ-عِيشْرِينْ ن إِسڭّْوُوسَا، ؤُمِي إِذْوڒْ ذ أَجدْجِيذْ. نتَّا إِحْكمْ ثْڒَاثَا ن إِيُورنْ ذِي ؤُرْشَالِيمْ. ‏3 أَجدْجِيذْ ن مِيصْرَا إِكّسْ إِ-ث ذ أَجدْجِيذْ زِي ؤُرْشَالِيمْ ؤُشَا إِڭَّا إِ ثمُّورْثْ إِجّْ ن مُولْثَا ن مْيَا ن ثَالِينْثَاثْ ن نُّوقَارْثْ ذ إِشْثْ ن ثَالِينْثْ ن وُورغْ. ‏4 أَجدْجِيذْ ن مِيصْرَا إِڭَّا ؤُمَاسْ أَلْيَاقِيمْ ذ أَجدْجِيذْ خْ يَاهُوذَا ذ ؤُرْشَالِيمْ. نتَّا إِبدّڒْ إِسمْ نّسْ غَارْ يَاهُويَاقِيمْ. مَاشَا ؤُمَاسْ يَاهُويَاحَازْ إِطّفْ إِ-ث نَاخُو ؤُشَا يِيوْيِي إِ-ث غَارْ مِيصْرَا.

‏5 يَاهُويَاقِيمْ ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ حِيطَاشْ ن إِسڭّْوُوسَا ذِي ؤُرْشَالِيمْ. نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، أَربِّي نّسْ. ‏6 نَاپُوخَاذْنَاصَّارْ، أَجدْجِيذْ ن بَابِيلْ، إِفّغْ إِ ؤُمنْغِي أَكِيذسْ ؤُشَا إِشَارْفْ إِ-ث س ثْنَاينْ ن سّْنَاسڒْ ن نُّوقَارْثْ حِيمَا أَذْ ث يَاوِي غَارْ بَابِيلْ. ‏7 يِيوِي نَاپُوخَاذْنَاصَّارْ ؤُڒَا ذ إِجّْ ن وزْينْ ن ڒقْشُوعْ زِي ثَادَّارْثْ ن سِيذِي غَارْ بَابِيلْ ؤُشَا إِسَّارْسْ إِ-ثنْ ذِي زَّاوشْثْ نّسْ ذِي بَابِيلْ. ‏8 إِمزْرُوينْ إِقِّيمنْ ن يَاهُويَاقِيمْ ذ جّْعَايفْ إِ إِڭَّا ؤُ مِينْ غَارسْ إِتّْوَافنْ، خْزَارْ، مَارَّا أَيَا إِتّْوَازمّمْ ذڭْ وذْلِيسْ ن إِجدْجِيذنْ ن إِسْرَائِيل ذ يَاهُوذَا. مِّيسْ يَاهُويَاكِينْ إِذْوڒْ ذ أَجدْجِيذْ ذڭْ ومْشَانْ نّسْ.

‏9 يَاهُويَاكِينْ ثُوغَا غَارسْ ثْمنْطَاشْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ ثْڒَاثَا ن إِيُورنْ ذ عشْرَا ن وُوسَّانْ ذِي ؤُرْشَالِيمْ. نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي.

‏10 غَارْ ؤُبدّڒْ ن ؤُسڭّْوَاسْ إِجَّا ؤُجدْجِيذْ نَاپُوخَاذْنَاصَّارْ أَذْ ث يَاوِي غَارْ بَابِيلْ س ڒقْشُوعْ إِغْڒَانْ زِي ثَادَّارْثْ ن سِيذِي. نتَّا إِڭَّا ؤُمَاسْ صِيذْقِييَا ذ أَجدْجِيذْ ن يَاهُوذَا ذ ؤُرْشَالِيمْ.

‏11 صِيذْقِييَا ثُوغَا غَارسْ وَاحِيثْ ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ حِيطَاشْ ن إِسڭّْوُوسَا ذِي ؤُرْشَالِيمْ.

‏12 إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، أَربِّي نّسْ، وَارْ إِسّْوَاضعْ إِخفْ نّسْ زَّاثْ إِ وُوذمْ ن ؤُنَابِي إِرْمِييَا ونِّي إِسِّيوْڒنْ خْ ڒُومُورْ ن سِيذِي.

‏13 ؤُڒَا ذ نتَّا إِغوّغْ خْ ؤُجدْجِيذْ نَاپُوخَاذْنَاصَّارْ، ونِّي ث إِجِّينْ أَذْ إِجَّادْجْ غَارْ أَربِّي. نتَّا إِسّمْحضْ إِرِي نّسْ ؤُشَا إِسّقْسحْ ؤُڒْ نّسْ مَاحنْذْ وَارْ د-إِذِّيكّْوِيڒْ غَارْ سِيذِي، أَربِّي ن إِسْرَائِيل.

‏14 ؤُ مَارَّا إِمقّْرَاننْ ن إِكهَّاننْ ؤُڒَا ذ ڒْڭنْسْ رُوحنْ أَڭّْوجنْ أَطَّاسْ ذِي ڒغْذَارْ نْسنْ، ڭِّينْ أَمْ مَامّشْ مَارَّا جّْعَايفْ ن ڒڭْنُوسْ. نِيثْنِي سّْخمْجنْ ثَادَّارْثْ ن سِيذِي ثنِّي ثُوغَا إِسّْقدّسْ ذِي ؤُرْشَالِيمْ.

‏15 سِيذِي، أَربِّي ن إِبَابَاثنْ نْسنْ إِسّكّْ-د غَارْسنْ إِنهَّارنْ س ؤُفُوسْ ن إِرقَّاسنْ نّسْ، ڒخُّو نِيغْ ڒخْمِينْ، مَاغَارْ نتَّا ثُوغَا إِزِّيدْجِيزْ أَسْ ڒْڭنْسْ نّسْ ذ ثْزذِّيغْثْ نّسْ.

‏16 مَاشَا نِيثْنِي سْثهْزَانْ زڭْ إِرقَّاسنْ ن أَربِّي ؤُ سّحْقَارنْ أَوَاڒنْ نّسْ. نِيثْنِي ڭِّينْ ثَاضْصَا خْ إِنَابِييّنْ نّسْ، أَڒَامِي إِسْعَارْ سِيذِي خْ ڒْڭنْسْ نّسْ ؤُ وَارْ إِقِّيمْ عَاذْ ؤُسْڭنْفُو.

‏17 نتَّا إِڭَّا أَجدْجِيذْ ن إِكَالْذَانِييّنْ أَذْ غَارْسنْ د-إِفّغْ، ونِّي إِنْغِينْ إِحُوذْرِييّنْ نْسنْ س سِّيفْ ذِي ثَادَّارْثْ ن زَّاوشْثْ نْسنْ إِقدّْسنْ. نتَّا وَارْ إِسّْعِيزّْ خْ إِحُوذْرِييّنْ نِيغْ خْ ثعْزَارِييِّينْ ؤُڒَا خْ إِوسُّورَا ذ إِمشَّايْپُوثنْ. أَربِّي إِوْشَا إِ-ثنْ مَارَّا ذڭْ ؤُفُوسْ نّسْ.

‏18 مَارَّا ڒقْشُوعْ ن ثَادَّارْثْ ن أَربِّي، ڒقْشُوعْ إِمقّْرَاننْ ذ إِمژْيَاننْ، ؤُڒَا ذ ثْخُوبَايْ ن ثَادَّارْثْ ن سِيذِي ذ ثْخُوبَايْ ن ؤُجدْجِيذْ ذ ڒْحُوكَّامْ نّسْ، أَقَا مَارَّا أَيَا يِيوْيِي إِ-ث غَارْ بَابِيلْ.

‏19 نِيثْنِي سّْشمْضنْ ثَادَّارْثْ ن أَربِّي، هذْمنْ ڒْحِيضْ ن ؤُرْشَالِيمْ ؤُشَا قّْذنْ مَارَّا ڒقْصُورْ نّسْ س ثْمسِّي ؤُ أَردّْدْجنْ مَارَّا ڒقْشُوعْ إِغْڒَانْ أَطَّاسْ زَّايسْ. ‏20 وِي إِقِّيمنْ زِي سِّيفْ إِنْذهْ إِ-ثنْ غَارْ لْمنْفَا غَارْ بَابِيلْ ؤُشَا ذوْڒنْ نِيثْنِي ذ إِمْسخَّارنْ إِ نتَّا ؤُ إِ إِحنْجِيرنْ نّسْ أَڒْ ڒحْكَامثْ ن ثْڭلْذِيثْ ن لْفُورْسْ، ‏21 - حِيمَا أَذْ إِتّْوَاسقْفڒْ وَاوَاڒْ ن سِيذِي إِ إِسِّيوڒْ س ؤُقمُّومْ ن إِرْمِييَا - ، أَڒَامِي ثكْسِي ثَامُّورْثْ إِسڭّْوُوسَا نّسْ ن سّبْثْ. مَارَّا ؤُسَّانْ ن وَاردّدْجْ ثُوغَا ثَامُّورْثْ ثَاريّحْ، غَارسْ أَڒَامِي ثْكمّڒْ سبْعِينْ ن إِسڭّْوُوسَا. ^▪  

‏22 مَاشَا ذڭْ ؤُسڭّْوَاسْ أَمزْوَارُو ن ؤُجدْجِيذْ كُورَاشْ، أَجدْجِيذْ ن لْفُورْسْ، - حِيمَا أَذْ إِتّْوَاكمّڒْ وَاوَاڒْ ن سِيذِي س ؤُقمُّومْ ن إِرْمِييَا - ، إِسّكَّارْ-د سِيذِي بُوحْبڒْ ن كُورَاشْ، أَجدْجِيذْ ن لْفُورْسْ، ؤُشَا إِجَّا وَانِيثَا أَذْ د-إِفّغْ إِجّْ ن ؤُبَارّحْ ذِي مَارَّا ثَاڭلْذِيثْ نّسْ، ؤُڒَا ذِي ثِيرَا، مَاحنْذْ أَذْ يِينِي: ‏23 ”أَمُّو إِ إِقَّارْ كُورَاشْ، أَجدْجِيذْ ن لْفُورْسْ: ’سِيذِي، أَربِّي ن إِجنْوَانْ، إِوْشَا أَيِي مَارَّا ثِيڭلْذِيوِينْ ن ثمُّورْثْ ؤُشَا نتَّا إِڭَّا خَافِي أَذْ بْنِيغْ إِشْثْ ن ثَادَّارْثْ إِ نتَّا ذِي ؤُرْشَالِيمْ ذِي يَاهُوذَا. قَاعْ مَانْ ونْ زَّايْومْ زِي مَارَّا ڒْڭنْسْ نّسْ، أَذْ يِيڒِي سِيذِي، أَربِّي نّسْ، أَكِيذسْ ؤُ إِجَّا إِ-ث أَذْ إِڭعّذْ!‘ “