‏1 أَوَارْنِي ڒَامِي كمّْڒنْ س مَانْ أَيَا مَارَّا، فّْغنْ-د مَارَّا أَيْثْ ن إِسْرَائِيل نِّي ثُوغَا ذِينْ إِدْجَانْ غَارْ ثْندَّامْ ن يَاهُوذَا ؤُ أَرْژِينْ إِمَايْضُوثنْ إِقدّْسنْ ؤُشَا هذْمنْ ثِيربِّينْ ن شْوَارْثِي ؤُشَا كّْسنْ ڒڭْعُوذِي ذ إِعَالْطَارنْ زِي مَارَّا يَاهُوذَا ذ بِينْيَامِينْ، ؤُ أَمُّو إِ ڭِّينْ ذِي إِفْرَايِيمْ ذ مَانَاسَّا أَڒَامِي ت كمّْڒنْ. أَوَارْنِي إِ ؤُيَا عقْبنْ مَارَّا أَيْثْ ن إِسْرَائِيل، كُوڒْ إِجّْ غَارْ وَاڭْڒَا نّسْ، مَارَّا نِيثْنِي غَارْ ثْندَّامْ نْسنْ.

‏2 حِيزْقِييَا إِسّْبدّْ ثَارْبِيعِينْ ن إِكهَّاننْ ذ إِلَاوِييّنْ، عْلَاحْصَابْ ثِيرْبِيعِينْ نْسنْ، كُوڒْ إِجّْ عْلَاحْسَابْ ثَاسخَّارْثْ نّسْ، إِكهَّاننْ ذ إِلَاوِييّنْ إِ ثْغَارْصْثْ ن وشْمَاضْ ؤُ إِ ثْغَارْصَا ن ؤُقَاذِي، حِيمَا أَذْ سخَّارنْ ؤُ أَذْ قَاذَانْ ؤُ أَذْ سّْعُودْجَانْ ذِي ثوُّورَا ن ڒمْرَاڭحْ ن ڒْعسْكَارْ ن سِيذِي.

‏3 نتَّا إِوْشَا ؤُڒَا ذ ثَاسْغَارْثْ ن ؤُجدْجِيذْ زڭْ وَاڭْڒَا نّسْ إِ ثْغَارْصَا ن وشْمَاضْ، إِ ثْغَارْصَا ن وشْمَاضْ غَارْ ثُوفُّوثْ ؤُ غَارْ ثْمذِّيثْ، ؤُڒَا ذ ثِيغَارْصَا ن وشْمَاضْ إِ وُوسَّانْ ن سّبْثْ ؤُ إِ ؤُيُورنْ إِمَايْنُوثنْ ؤُ إِ ڒعْيُوذَاثْ إِتّْوَاڭّنْ، أَمْ مَامّشْ إِتّْوَارِي ذِي شَّارِيعَا ن سِيذِي. ‏4 نتَّا إِنَّا إِ ڒْڭنْسْ، إِ إِمزْذَاغْ ن ؤُرْشَالِيمْ، أَذْ وهّْبنْ ثَاسْغَارْثْ ن إِكهَّاننْ ذ إِلَاوِييّنْ، حِيمَا إِنَا زمَّارنْ أَذْ إِڒِينْ جهْذنْ ذِي ثْغُورِي ن شَّارِيعَا ن سِيذِي. ‏5 ؤُمِي د-إِفّغْ وَاوَاڒْ نِّي، إِوْينْ-د أَيْثْ ن إِسْرَائِيل س ؤُفيّضْ زڭْ ؤُسُوفّغْ أَمزْوَارُو ن إِمنْذِي، ن بِينُو ن جْذِيذْ ذ زّشْثْ ذ ثَامّنْثْ ؤُ زِي مَارَّا ڒْغِيدْجثْ ن ييَّارْ. إِوْينْ ؤُڒَا ذ ڒعْشُورْ زِي مَارَّا س ؤُفيّضْ. ‏6 ثَارْوَا ن إِسْرَائِيل ذ يَاهُوذَا، إِنِّي إِزذْغنْ ذِي ثْندَّامْ ن يَاهُوذَا، إِوْينْ ؤُڒَا ذ ڒعْشُورْ زڭْ إِفُونَاسنْ ؤُ زڭْ وُودْجِي ؤُڒَا ذ ڒعْشُورْ ن ثوْهِيبِينْ إِقدّْسنْ نِّي ثُوغَا سّْقدّْسنْ إِ سِيذِي، أَربِّي نْسنْ، ؤُشَا ڭِّينْ ثنْ ذ إِسّْبدّْ إِ-ثنْ س ؤُستّفْ. ‏7 ذڭْ ؤُيُورْ وِيسّْ ثْڒَاثَا بْذَانْ نِيثْنِي أَذْ سَّارْسنْ إِسْبذِّيثنْ زِي ثِيسِي س ؤُستّفْ ؤُ ذڭْ ؤُيُورْ وِيسّْ سبْعَا كمّْڒنْ ت. ‏8 ؤُمِي حِيزْقِييَا ذ ڒْحُوكَّامْ ؤُسِينْ-د ؤُ ژْرِينْ إِسْبذِّيثنْ نِّي، بَارْكنْ سِيذِي ذ ڒْڭنْسْ نّسْ إِسْرَائِيل. ‏9 إِسّقْسَا حِيزْقِييَا إِكهَّاننْ ذ إِلَاوِييّنْ خْ إِسْبذِّيثنْ نِّي.

‏10 عَازَارْيَا، أَكهَّانْ أَمقّْرَانْ زِي ثَادَّارْثْ ن صَاذُوقْ يَارَّا-د خَاسْ، إِنَّا: ”زڭْ وَامِي د-نكَّارْ أَذْ نَاوِي ثَاوْهِيبْثْ ن ؤُسْڭعّذْ غَارْ ثَادَّارْثْ ن سِيذِي، أَقَا غَارْنغْ مِينْ غَا نشّْ أَڒْ ثْيَاوَانْثْ ؤُشَا عَاذْ إِقِّيمْ أَطَّاسْ إِشطّْ، مَاغَارْ سِيذِي إِبَاركْ ڒْڭنْسْ نّسْ، أَڒَامِي إِقِّيمْ ڒْقدّْ-أَ ن وَاطَّاسْ إِشطّْ.“

‏11 خنِّي إِنَّا حِيزْقِييَا، أَذْ سّْوجْذنْ إِخَّامنْ ن ثَادَّارْثْ ن سِيذِي، ؤُ نِيثْنِي سّْوجْذنْ ثنْ.

‏12 نِيثْنِي سِّيذْفنْ ثَاوْهِيبْثْ ن ؤُسْڭعّذْ ذ ڒعْشُورْ ذ ثوْهِيبِينْ إِقدّْسنْ ذِينْ س ڒْمَانثْ. كُونَانْيَا، أَلَاوِي، أَمحْذَايْ، ذ ؤُمَاسْ شِيمْعِي، ونِّي ذ وِيسّْ ثْنَاينْ، ثُوغَا أَثنْ خْ مَانْ أَيَا مَارَّا.

‏13 يَاحِييِيلْ، عَازَازْيَا، نَاحَاثْ، عَاسَايِيلْ، يَارِيمُوثْ، يُوزَابَاذْ، إِلِييِيلْ، يِيسْمَاخْيَا، مَاحَاثْ، بَانَايَا ثُوغَا أَثنْ ذ إِوقَّافنْ سَاذُو ؤُفُوسْ ن كُونَانْيَا ذ شِيمْعِي، ؤُمَاسْ، خْ ڒُومُورْ ن ؤُجدْجِيذْ حِيزْقِييَا ؤُ ن عَازَارْيَا، أَمقّْرَانْ ن ثَادَّارْثْ ن أَربِّي.

‏14 قُورِي، مِّيسْ ن يِيمْنَا، أَلَاوِي، أَعسَّاسْ ن ثوَّارْثْ غَارْ ؤُغزْذِيسْ ن شَّارْقْ، ثُوغَا إِتّْوَاڭّْ خْ ثوْهِيبِينْ ن ڒْخَاضَارْ ن أَربِّي، حِيمَا أَذْ إِبْضَا ثَاوْهِيبْثْ ن ؤُسْڭعّذْ ن سِيذِي ذ ثوْهِيبِينْ إِقدّْسنْ قَاعْ.

‏15 عَاذَانْ، مِينْيَامِينْ، يشُوعَا، شْمَاعْيَا، أَمَارْيَا ذ شَاكُونْيَا بدّنْ غَارْ ؤُغزْذِيسْ نّسْ عْلَاحْصَابْ ثَارْبِيعِينْ نْسنْ حِيمَا أَذْ وزّْعنْ ذِي ثْندَّامْ ن إِكهَّاننْ إِ أَيْثْمَاثْسنْ، أَمْ إِ إِمقّْرَاننْ أَمْ إِ إِمژْيَاننْ،

‏16 مَاشَا وَارْ إِدْجِي إِ ينِّي إِتّْوَازمّمنْ ذِي لِيسْثَا ن جَّاذِيرَا ن يرْيَازنْ إِ غَارْ إِدْجْ ثْڒَاثَا ن إِسڭّْوُوسَا سنّجْ، أَقَا مَارَّا إِنِّي د-يُوسِينْ غَارْ ثَادَّارْثْ ن سِيذِي إِ ڒْخذْمثْ ن كُوڒْ أَسّْ إِ وَاسّْ نِّي، إِ ڒْخذْمثْ نْسنْ ذِي ثْسخَّارْثْ، عْلَاحْسَابْ ثَارْبِيعِينْ نْسنْ.

‏17 أَزمّنْ ذِي لِيسْثَا ن جَّاذِيرَا ن إِكهَّاننْ ثُوغَا-ث عْلَاحْصَابْ ثَادَّارْثْ ن إِبَابَاثنْ نْسنْ، مَاشَا ن إِلَاوِييّنْ زِي عِيشْرِينْ ن إِسڭّْوُوسَا سنّجْ، عْلَاحْسَابْ ثَاسخَّارْثْ نْسنْ، عْلَاحْسَابْ ثِيرْبِيعِينْ نْسنْ.

‏18 نِيثْنِي وزّْعنْ إِ ينِّي إِتّْوَازمّمنْ ذِي لِيسْثَا ن جَّاذِيرَا أَكْ-ذ مَارَّا ثَارْوَا نْسنْ ذ ثمْغَارِينْ نْسنْ ذ إِحنْجِيرنْ نْسنْ ذ ثْحنْجِيرِينْ نْسنْ زِي مَارَّا أَڭْرَاوْ ن ڒْڭنْسْ، مَاغَارْ نِيثْنِي ثُوغَا سّْقدّْسنْ إِخفْ نْسنْ س ثِيذتّْ إِ ثوْهِيبِينْ إِقدّْسنْ.

‏19 جَارْ إِحنْجِيرنْ ن هَارُونْ، إِكهَّاننْ، ذڭْ إِيَّارنْ ن دّْمَانِي ن ثْندَّامْ نْسنْ، ذِي كُوڒْ ثَانْذِينْثْ، ثُوغَا ذِينْ إِرْيَازنْ نِّي إِتّْوَازمّمنْ س إِسْمَاونْ نْسنْ حِيمَا أَذْ وْشنْ ثَاسْغَارْثْ إِ مَارَّا أَوْثمْ جَارْ إِكهَّاننْ ؤُ إِ مَارَّا إِنِّي إِتّْوَازمّمنْ ذِي لِيسْثَا ن جَّاذِيرَا جَارْ إِلَاوِييّنْ.

‏20 أَمُّو إِ إِڭَّا حِيزْقِييَا ذِي مَارَّا يَاهُوذَا. نتَّا إِڭَّا مِينْ إِدْجَانْ نِيشَانْ زَّاثْ إِ وُوذمْ ن سِيذِي، أَربِّي نّسْ. ‏21 مَارَّا ڒْخذْمثْ إِ إِبْذَا ذِي طّْوعْ ن ثْسخَّارْثْ ن ثَادَّارْثْ ن أَربِّي ؤُ ذِي طّْوعْ ن شَّارِيعَا ذ ثوْصيّثْ حِيمَا أَذْ يَارْزُو أَمُّو أَربِّي، إِڭَّا إِ-ت س مَارَّا ؤُڒْ نّسْ ؤُشَا إِفْڒحْ.