‏1 إِمزْذَاغْ ن ؤُرْشَالِيمْ ڭِّينْ أَحَازْيَا، مِّيسْ أَمَاژُوژْ، ذ أَجدْجِيذْ ذڭْ ومْشَانْ نّسْ، مَاغَارْ مَارَّا أَيْثْمَاسْ إِمقّْرَاننْ ثُوغَا تّْوَانْغنْ زڭْ إِشْثْ ن بَانْذِييَّا إِ ثُوغَا د-ثُوذفْ أَكْ-ذ وعْرَابنْ غَارْ ڒْمَارْڭⱨ ن ڒْعسْكَارْ. أَمُّو إِ إِذْوڒْ أَحَازْيَا، مِّيسْ ن يَاهُورَامْ، ذ أَجدْجِيذْ ن يَاهُوذَا. ‏2 أَخَازْيَا ثُوغَا غَارسْ ثْنَاينْ ؤُ-ربْعِينْ ن إِسڭّْوُوسَا، ؤُمِي إِذْوڒْ ذ أَجدْجِيذْ. نتَّا إِحْكمْ إِجّْ ن ؤُسڭّْوَاسْ ذِي ؤُرْشَالِيمْ. يمَّاسْ قَّارنْ أَسْ عَاثَالْيَا، يدْجِيسْ ن عُومْرِي. ‏3 نتَّا يُويُورْ ذڭْ إِبْرِيذنْ ن ثَادَّارْثْ ن أَخَابْ، مَاغَارْ يمَّاسْ ذ ثَامْشَاوَارْثْ نّسْ ذِي مَارَّا ثُوعفّْنَا إِ إِڭَّا. ‏4 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، أَمشْنَاوْ ثَادَّارْثْ ن أَخَابْ، مَاغَارْ أَوَارْنِي إِ ڒْموْثْ ن بَابَاسْ ثُوغَا إِنِّي ن ثَادَّارْثْ ن أَخَابْ ذ إِمْشَاوَارنْ نّسْ أَڒَامِي إِكَّا خْ ؤُزدْجِيفْ.

‏5 نتَّا إِضْفَارْ شّْوَارْ نْسنْ ؤُشَا إِفّغْ أَكْ-ذ يُورَامْ، مِّيسْ ن أَخَابْ، أَجدْجِيذْ ن إِسْرَائِيل، إِ ؤُمنْغِي أَكْ-ذ حَازَايِيلْ، أَجدْجِيذْ ن أَرَامْ، غَارْ رَامُوثْ ذِي جِيلْعَاذْ ؤُشَا إِرَامِييّنْ غڒْبنْ خْ يُورَامْ. ‏6 خنِّي يَارڭّْوحْ مَاحنْذْ أَذْ يَارْزُو ذِي يَازْرَاعِيلْ أَڭنْفُو زڭْ إِيزِّيمنْ نِّي إِ ذ أَسْ ثُوغَا ڭِّينْ أَيْثْ ن أَرَامْ ؤُمِي إِمْنغْ ذِي رَامُوثْ أَكْ-ذ ؤُجدْجِيذْ نْسنْ، حَازَايِيلْ، أَجدْجِيذْ ن أَرَامْ. إِهْوَا-د عَازَارْيَا، مِّيسْ ن يُورَامْ، أَجدْجِيذْ ن يَاهُوذَا، غَارْ ذِينْ، حِيمَا أَذْ إِسِّيجّْ خْ يُورَامْ، مِّيسْ ن أَخَابْ، ذِي يَازْرَاعِيلْ، ؤُمِي ثُوغَا إِهْڒشْ. ‏7 أَردّدْجْ ن أَحَازْيَا ثُوغَا زِي أَربِّي ؤُمِي د-يُوسَا غَارْ يُورَامْ. ؤُمِي د-يِيوضْ ذِينْ، إِفّغْ أَكْ-ذ يُورَامْ خْ يَاهُو، مِّيسْ ن نِيمْشِي، ونِّي إِ ثُوغَا إِذْهنْ سِيذِي مَاحنْذْ أَذْ إِقْضَا خْ ثَادَّارْثْ ن أَخَابْ. ‏8 ؤُمِي إِقْضَا يَاهُو خْ ڒْحُوكْمْ ن ثَادَّارْثْ ن أَخَابْ، إِمْسَارْ، أَقَا يُوفَا ڒْحُوكَّامْ ن يَاهُوذَا ذ إِحنْجِيرنْ ن أَيْثْمَاسْ ن أَحَازْيَا، إِنِّي إِ ثُوغَا إِتّْسخَّارنْ إِ أَحَازْيَا، ؤُشَا إِنْغَا إِ-ثنْ. ‏9 خنِّي يَارْزُو خْ أَحَازْيَا. نِيثْنِي طّْفنْ ث أَمْ ثُوغَا إِنُّوفَّارْ ذِي سَامَارْيَا ؤُشَا إِوْينْ ث غَارْ يَاهُو. نْغِينْ ث ؤُ نضْڒنْ ث، مِينْزِي نَّانْ: ”نتَّا ذ مِّيسْ ن يَاهُوشَافَاطْ، ونِّي يَارزُّونْ خْ سِيذِي س مَارَّا ؤُڒْ نّسْ.“ أَمُّو وَارْ إِقِّيمْ إِ ثَادَّارْثْ ن أَحَازْيَا ؤُڒَا ذ إِجّْ ن ونِّي ذِي إِدْجْ جّهْذْ حِيمَا أَذْ إِحْكمْ أَمْ ؤُجدْجِيذْ.

‏10 ؤُمِي عَاثَالْيَا، يمَّاسْ ن أَحَازْيَا ثژْرَا، أَقَا مِّيسْ إِمُّوثْ، ثكَّارْ، ثثحَّا مَارَّا ثَارْوَا ن ؤُجدْجِيذْ ن ثَادَّارْثْ ن يَاهُوذَا. ^▫  

‏11 مَاشَا يَاهُوشَابْعَاثْ، يدْجِيسْ ن ؤُجدْجِيذْ، ثكْسِي يُووَاشْ، مِّيسْ ن أَحَازْيَا، ؤُشَا ثخْضفْ إِ-ث زِي جَارْ إِهنْجِيرنْ ن ؤُجدْجِيذْ نِّي إِتّْوَانْغنْ ؤُشَا ثسِّيذفْ إِ-ث أَكْ-ذ ثنِّي ث إِسُّوضُوضنْ ذڭْ إِجّْ ن وخَّامْ ن يِيضصْ. أَمُّو إِ ثڭَّا يَاهُوشَابْعَاثْ، يدْجِيسْ ن ؤُجدْجِيذْ يَاهُورَامْ، ثَامْغَارْثْ ن ؤُكهَّانْ يَاهُويَاذَاعْ — مَاغَارْ نتَّاثْ ذ ؤُتْشْمَاسْ ن أَحَازْيَا — ثسّْنُوفَّارْ إِ-ث إِ عَاثَالْيَا ؤُ ثَانِيثَا وَارْ ث ثنْغِي شَا.

‏12 ستَّا ن إِسڭّْوُوسَا إِقِّيمْ إِنُّوفَّارْ غَارْسنْ ذِي ثَادَّارْثْ ن أَربِّي ؤُ ثُوغَا عَاثَالْيَا ثْحكّمْ خْ ثمُّورْثْ.