‏1 خنِّي يُوسَا-د أَرُّوحْ ن أَربِّي خْ عَازَارْيَا، مِّيسْ ن عُوذِيذْ. ‏2 نتَّا يُويُورْ إِبدّْ زَّاثْ إِ أَسَا، إِنَّا أَسْ: ”سڒْ-د غَارِي، أَسَا، ذ مَارَّا أَيْثْ ن يَاهُوذَا ذ بِينْيَامِينْ! سِيذِي أَقَا-ث أَكِيذْومْ ؤُ كنِّيوْ أَكِيذسْ. مَاڒَا ثَارزُّومْ خَاسْ، نتَّا أَذْ كنِّيوْ يَارّْ أَذْ ث ثَافمْ، مَاشَا مَاڒَا كنِّيوْ ثْحيّْذمْ خَاسْ، أَذْ خَاومْ إِحيّذْ ؤُڒَا ذ نتَّا. ‏3 أَطَّاسْ ن وُوسَّانْ إِ إِقِّيمْ إِسْرَائِيل بْڒَا أَربِّي ن ثِيذتّْ ؤُ بْڒَا إِجّْ ن ؤُكهَّانْ إِسّْغَارَانْ ؤُ بْڒَا شَّارِيعَا. ‏4 مَاڒَا ذوْڒنْ-د نِيثْنِي غَارْ سِيذِي، أَربِّي ن إِسْرَائِيل، ذِي ڒحْصَارثْ ؤُ أَرْزُونْ خَاسْ، إِجَّا إِ-ثنْ أَذْ ث أَفنْ. ‏5 ذڭْ وُوسَّانْ نِّي وَارْ ذِينْ ثُوغِي ڒهْنَا إِ ونِّي د-إِفّْغنْ ؤُ إِ ونِّي يَارڭّْوْحنْ، مَاغَارْ أَقَا ذِينْ أَطَّاسْ ن ڒحْوڒْ جَارْ مَارَّا إِمزْذَاغْ ن ثمُّورَا. ‏6 إِجّْ ن ڒْڭنْسْ إِتّْوَاعْفسْ زڭْ إِجّْ ن ڒْڭنْسْ نّغْنِي ؤُ إِشْثْ ن ثنْذِينْثْ زڭْ إِشْثْ ن ثنْذِينْثْ نّغْنِيثْ، مَاغَارْ أَربِّي إِسِّيڭّْوذْ إِ-ثنْ س كُوڒْ ڒحْصَاڒثْ. ‏7 كنِّيوْ مَاشَا إِڒِيمْ ذ إِرْيَازنْ، وَارْ تّجِّيمْ أَذْ أَرْخُونْ إِفَاسّنْ نْومْ، مَاغَارْ أَقَا ذِينْ ڒْمُونثْ إِ ڒْخذْمثْ نْومْ.“ ‏8 ؤُمِي أَسَا إِسْڒَا أَوَاڒنْ-أَ ذ نُّوپُووَا ن ؤُنَابِي عُوذِيذْ، إِسّجْهذْ إِخفْ نّسْ ؤُشَا إِسّْبعّذْ نّْعَاوَاثْ ن صَّانَامْ زِي مَارَّا ثَامُّورْثْ ن يَاهُوذَا ذ بِينْيَامِينْ ؤُ زِي مَارَّا ثِيندَّامْ نِّي ثُوغَا إِطّفْ خْ إِذُورَارْ ن إِفْرَايِيمْ ؤُشَا إِعْذڒْ ؤُعَالْطَارْ ن سِيذِي، ونِّي إِدْجَانْ زَّاثْ إِ وسْقِيفْ ن وَاذَافْ إِ زَّاوشْثْ ن سِيذِي. ‏9 إِسّْمُونْ مَارَّا يَاهُوذَا ذ بِينْيَامِينْ، ؤُڒَا ذ إِبَارَّانِييّنْ زڭْ إِفْرَايِيمْ، زِي مَانَاسَّا ؤُ زِي شِيمْعُونْ. مَاغَارْ أَطَّاسْ زِي إِسْرَائِيل عْذُونْ غَارسْ، ؤُمِي نِيثْنِي ژْرِينْ، أَقَا سِيذِي، أَربِّي نّسْ، ثُوغَا-ث أَكِيذسْ.

‏10 نِيثْنِي مُوننْ ذِي ؤُرْشَالِيمْ ذڭْ ؤُيُورْ وِيسّْ ثْڒَاثَا، ذڭْ ؤُسڭّْوَاسْ وِيسّْ خمّسْطَاشْ ن ثْڭلْذَا ن أَسَا.

‏11 ذڭْ وَاسّْ نِّي وهّْبنْ نِيثْنِي سبْعَا-مْيَا ن إِفُونَاسنْ ذ ثْفُونَاسِينْ ذ سبْعَا أَڒَافْ ن وُودْجِي ذ ثْغَارْصْثْ إِ سِيذِي زِي ثْكشَّاضْثْ إِ كِيذْسنْ إِوْينْ.

‏12 نِيثْنِي ؤُذْفنْ غَارْ إِجّْ ن ڒْعَاهْذْ أَكْ-ذ سِيذِي مَاحنْذْ أَذْ أَرْزُونْ سِيذِي، أَربِّي ن إِبَابَاثنْ نْسنْ، س مَارَّا ؤُڒْ نْسنْ ؤُ س مَارَّا ڒعْمَارْ نْسنْ.

‏13 مَارَّا ونِّي وَارْ يَارزُّونْ خْ سِيذِي، أَربِّي ن إِسْرَائِيل، إِتّْخصَّا أَذْ إِتّْوَانغْ، أَمْ ؤُمژْيَانْ أَمْ ؤُمقّْرَانْ، أَمْ ورْيَازْ أَمْ ثمْغَارْثْ.

‏14 نِيثْنِي جُّودْجنْ إِ سِيذِي س ثْمِيجَّا ثجْهذْ، سَاذُو ؤُصُوضِي س ڒْغَايْطَاثْ ذ وَاشَّاونْ ن إِشَارِّي.

‏15 مَارَّا يَاهُوذَا ثْفَارْحْ خْ ثْجَادْجِيثْ مَاغَارْ نِيثْنِي ثُوغَا ڭِّينْ ت س مَارَّا ؤُڒْ نْسنْ ؤُمِي نِيثْنِي أَرْزُونْ خَاسْ س مَارَّا أَرْضَا نْسنْ ؤُ نتَّا إِجَّا إِ-ثنْ أَذْ ث أَفنْ ؤُشَا سِيذِي إِوْشَا أَسنْ ڒْهُوذْنثْ زِي مَارَّا إِغزْذِيسنْ نْسنْ.

‏16 إِسّْحيّذْ أَسَا ؤُڒَا ذ حنَّاسْ مَاعْكَا زِي جّهْذْ نّسْ، مَاغَارْ نتَّاثْ ثُوغَا ثڭَّا إِشْثْ ن جّْعِيفشْثْ ن ڒخْيَاڒْ إِ ثْربِّيثْ ن شْوَارْثِي. أَسَا إِشقَّارْ جّْعِيفشْثْ نّسْ، إِڒْبزْ إِ-ت ؤُشَا إِسّْشمْضْ إِ-ت غَارْ ثغْزَارْثْ ن قِيذْرُونْ. ^▪  

‏17 وَاخَّا وَارْ تّْوَاحيّْذنْثْ ڒڭْعُوذِي، مَاشَا ؤُڒْ ن أَسَا ثُوغَا إِشْضَارْ نِيشَانْ إِ سِيذِي، مَارَّا ؤُسَّانْ ن ثُوذَارْثْ نّسْ. ^▪  

‏18 ثِيوْهِيبِينْ إِقدّْسنْ ن بَابَاسْ ذ مِينْ ثُوغَا إِسّْقدّسْ نتَّا س يِيخفْ نّسْ يِيوْيِي-ث ذِي ثَادَّارْثْ ن أَربِّي ؤُڒَا ذ ثِيوْهِيبِينْ نّسْ إِقدّْسنْ: نُّوقَارْثْ ذ وُورغْ ذ ڒقْشُوعْ نّغْنِي. ^▪  

‏19 وَارْ ذِينْ إِقِّيمْ عَاذْ ؤُمنْغِي أَڒْ أَسڭّْوَاسْ وِيسّْ خمْسَا ؤُ-ثْڒَاثِينْ ن ثْڭلْذَا ن أَسَا.