‏1 أَمُّو إِ ثتّْوَاكمّڒْ مَارَّا ڒْخذْمثْ إِ إِڭَّا سُولِيمَانْ إِ ثَادَّارْثْ ن سِيذِي. ؤُشَا إِسِّيذفْ سُولِيمَانْ مَارَّا ڒقْشُوعْ إِقدّْسنْ ن بَابَاسْ ذَاوُوذْ: نُّوقَارْثْ ذ وُورغْ ذ ڒقْشُوعْ، ؤُشَا إِسَّارْسْ مَانْ أَيَا مَارَّا ذڭْ إِخَّامنْ ن ثْخُوبَايْ ن ثَادَّارْثْ ن أَربِّي. ‏2 خنِّي إِسّْمُونْ سُولِيمَانْ إِمقّْرَاننْ ن إِسْرَائِيل ذ مَارَّا إِزدْجِيفنْ ن ثْقبَّاڒْ، إِمقّْرَاننْ ن إِبَابَاثنْ ن أَيْثْ ن إِسْرَائِيل، ذِي ؤُرْشَالِيمْ حِيمَا أَذْ سّْڭعّْذنْ تَّاپُوثْ ن ڒْعَاهْذْ ن سِيذِي زِي ثنْذِينْثْ ن ذَاوُوذْ، ثنِّي ذ صِيهْيُونْ. ‏3 مَارَّا إِرْيَازنْ ن إِسْرَائِيل مُوننْ-د غَارْ ؤُجدْجِيذْ غَارْ ڒْعِيذْ. ثُوغَا-ت ذڭْ ؤُيُورْ وِيسّْ سبْعَا.

‏4 مَارَّا إِمقّْرَاننْ ن إِسْرَائِيل ؤُسِينْ-د ؤُشَا سّْڭعّْذنْ إِلَاوِييّنْ تَّاپُوثْ. ‏5 سّْڭعّْذنْ تَّاپُوثْ ن سِيذِي أَكْ-ذ ؤُقِيضُونْ ن ؤُمْسَاڭَارْ ؤُڒَا ذ مَارَّا ڒقْشُوعْ إِقدّْسنْ إِ ثُوغَا ذِينْ إِدْجَانْ ذڭْ ؤُقِيضُونْ. سّْڭعّْذنْ أَيَا إِكهَّاننْ ذ إِلَاوِييّنْ. ‏6 مَارَّا ثَامسْمُونْثْ ن إِسْرَائِيل، ثنِّي إِ ثُوغَا غَارسْ د-إِمُوننْ، ثُوغَا-ت أَكْ-ذ ؤُجدْجِيذْ سُولِيمَانْ زَّاثْ إِ تَّاپُوثْ. نِيثْنِي وهّْبنْ ؤُدْجِي ذ إِفُونَاسنْ ذ ثْفُونَاسِينْ نِّي بْڒَا ڒحْسَابْ ذِي سِّيبّثْ ن ؤُبَارُّو إِ ذِي إِدْجَانْ. ‏7 إِوْينْ إِكهَّاننْ تَّاپُوثْ ن ڒْعَاهْذْ ن سِيذِي غَارْ ومْشَانْ نّسْ، غَارْ وخَّامْ ن ذَاخڒْ ن زَّاوشْثْ ن ثَادَّارْثْ، ذڭْ وقْذَاسْ ن ؤُقدَّاسْ، أَڒْ سَاذُو وَافْرِيونْ ن إِكِيرُوبنْ، ^▫   ‏8 مَاغَارْ إِكِيرُوبنْ بزّْعنْ ثْنَاينْ ن وَافْرِيونْ نْسنْ خْ ومْشَانْ ن تَّاپُوثْ ؤُشَا أَمُّو إِ ذْڒِينْ إِكِيرُوبنْ تَّاپُوثْ ذ إِعُومَاذْ نّسْ إِ ثَاربُّوثْ زِي سنّجْ. ‏9 سّنِّي سّْڒحْمنْ إِعُومَاذْ ن ثَاربُّوثْ مَاحنْذْ أَذْ بَاننْثْ ثخْفَاوِينْ ن إِعُومَاذْ إِ د-إِفّْغنْ زِي تَّاپُوثْ غَارْ زَّاثْ ن وخَّامْ ن ذَاخڒْ ن زَّاوشْثْ، مَاشَا وَارْ د-تّْبِينِينْثْ زِي بَارَّا. تَّاپُوثْ أَقَا-ت ذِينْ أَڒْ أَسّْ-أَ.

‏10 ثُوغَا وَارْ إِدْجِي شَا ذِي تَّاپُوثْ، مْغِيرْ ثْنَاينْ ن ثڒْوِيحِينْ إِ ذَايسْ إِسَّارْسْ مُوسَا غَارْ هُورِيبْ، ڒَامِي إِڭَّا سِيذِي إِجّْ ن ڒْعَاهْذْ أَكْ-ذ أَيْثْ ن إِسْرَائِيل ؤُمِي د-فّْغنْ زِي مِيصْرَا.

‏11 ؤُشَا إِمْسَارْ أَڒَامِي د-فّْغنْ إِكهَّاننْ زڭْ ؤُقدَّاسْ، — مَاغَارْ مَارَّا إِكهَّاننْ نِّي ثُوغَا زمَّارنْ أَذْ أَفنْ، ثُوغَا سّْقدّْسنْ إِخفْ نْسنْ بْڒَا مَا أَذْ وْشنْ ثَايْنِيثْ إِ ثرْبِيعِينْ نْسنْ — ،

‏12 ؤُشَا ؤُڒَا ذ إِلَاوِييّنْ ذ إِمذْيَازنْ، مَارَّا إِنِّي ثنْ ثُوغَا غَارْ أَسَافْ، هَايْمَانْ ذ يَاذُوثُونْ، إِحنْجِيرنْ نْسنْ ذ أَيْثْمَاثْسنْ، يَارْضنْ ڒقْطنْ أَزْذَاذْ، ؤُ بدّنْ س ثَادْجُونِينْ ن وُوزَّاڒْ ذ لْهَارْبَاثْ ذ ڒْڭَامْبْرِييَاثْ غَارْ ؤُغزْذِيسْ ن شَّارْقْ ن ؤُعَالْطَارْ ؤُ ثُوغَا أَكِيذْسنْ عْڒَاحَاڒْ مْيَا ؤُ-عِيشْرِينْ ن إِكهَّاننْ نِّي إِتّْصُوضنْ ذِي ڒْغَايْطَاثْ،

‏13 إِوَا، ؤُمِي صُوضنْ أَمْ إِجّْ ن ورْيَازْ ذِي ڒْغَايْطَا، غنّْجنْ ؤُ ڭِّينْ أَذْ إِتّْوَاسڒْ ڒْحسّْ ذ إِجّنْ أَمْ سّمْغَارَانْ ؤُ تّْقَاذَانْ سِيذِي، أَڒَامِي سّْڭعّْذنْ س ڒْغَايْثَاثْ ذ ثَادْجُونِينْ ن وُوزَّاڒْ ذ دُّوزَانَاثْ ن لّْغَا نّغْنِي دْجْوَارُو نْسنْ غَارْ ؤُجنَّا أَمْ سّمْغَارَانْ سِيذِي أَقَا نتَّا إِصْبحْ ؤُ ثَامخْسِيوْثْ نّسْ إِشوَّارنْ إِ ڒبْذَا إِ ثدْجْ، إِوَا خنِّي إِمْسَارْ أَقَا ثَادَّارْثْ، ثَادَّارْثْ ن سِيذِي، ثتّْوَاشُّورْ س ؤُسيْنُو.

‏14 وَارْ زمَّارنْ إِكهَّاننْ أَذْ قِّيمنْ بدّنْ حِيمَا أَذْ سخَّارنْ ذِي سِّيبّثْ ن ؤُسيْنُو، مِينْزِي أَعُودْجِي ن سِيذِي ثُوغَا إِشُّورْ ثَادَّارْثْ ن أَربِّي.