‏1 سُولِيمَانْ إِبْذَا ڒبْنِي ن ثَادَّارْثْ ن سِيذِي ذِي ؤُرْشَالِيمْ خْ وذْرَارْ ن مُورِييَا، مَانِي د-إِبَانْ سِيذِي إِ بَابَاسْ ذَاوُوذْ ؤُ مَانِي إِسّوْجذْ ذَاوُوذْ إِجّْ ن ومْشَانْ خْ ؤُنذْرَارْ ن ؤُيَاپُوسِي ؤُرْنَانْ. ‏2 نتَّا إِبْذَا ڒبْنِي ذڭْ ؤُيُورْ وِيسّْ ثْنَاينْ، ذڭْ وَاسّْ وِيسّْ ثْنَاينْ ذڭْ ؤُسڭّْوَاسْ وِيسّْ أَربْعَا ن ثْڭلْذَا نّسْ. ‏3 وَانِيثَا ذ ذْسَاسْ إِ إِسَّارْسْ سُولِيمَانْ إِ ڒبْنِي ن ثَادَّارْثْ ن أَربِّي: ثُوزّڭَّارْثْ نّسْ ذڭْ إِغَادْجنْ عْلَاحْسَابْ ڒقْيَاسْ أَمزْوَارُو، ثُوغَا-ت ستِّينْ ن إِغَادْجنْ، ذ ثِيرُو نّسْ ثُوغَا-ث عِيشْرِينْ ن إِغَادْجنْ. ‏4 أَسْقِيفْ ن وَاذَافْ، نِّي ثُوغَا إِدْجَانْ غَارْ زَّاثْ ن ثُوزّڭَّارْثْ ن ثَادَّارْثْ، ثُوغَا-ث ذَايسْ عِيشْرِينْ ن إِغَادْجنْ ؤُمِي ث عبَّارنْ غَارْ زَّاثْ ن ثِيرُو ن ثَادَّارْثْ، ؤُ ڒُوعْڒَا نّسْ ثُوغَا-ث ذَايسْ مْيَا ؤُ-عِيشْرِينْ ن إِغَادْجنْ. ثُوغَا إِذْڒَا وسْقِيفْ ن وَاذَافْ غَارْ ذَاخڒْ س وُورغْ إِصْفَانْ. ‏5 ثَادَّارْثْ ثَامقّْرَانْثْ إِڭَّا أَسْ ثَاژقَّا س ؤُكشُّوضْ ن ثْشجَّارْثْ ن ؤُمرْزِي ؤُشَا يَارْنِي خَاسْ وُورغْ إِصْفَانْ ؤُ إِزوّقْ إِ-ث س ثْشجِّيرَا ن ثِينِي ذ سّْنَاسڒْ إِزوّْقنْ. ^▫   ‏6 عَاوذْ إِزوّقْ نتَّا ثَادَّارْثْ س يِيژْرَا إِغْڒَانْ. ؤُرغْ ثُوغَا ذ ؤُرغْ زِي فَارَاوَايِيمْ. ‏7 أَمُّو إِ إِذْڒَا نتَّا ثَادَّارْثْ ذ ثْحنْيَا ذ ثْنبْذَاثِينْ ذ ڒحْيُوضْ نّسْ ذ ثوُّورَا نّسْ س وُورغْ ؤُشَا إِنْقشْ إِكِيرُوبنْ ذِي ڒحْيُوضْ. ^▫  

‏8 نتَّا إِڭَّا ؤُڒَا ذ أَخَّامْ ن وقْذَاسْ ن ؤُقدَّاسْ. ثُوزّڭَّارْثْ نّسْ ذَايسْ عِيشْرِينْ ن إِغَادْجنْ ؤُمِي ث عبَّارنْ غَارْ زَّاثْ ن ثِيرُو ن ثَادَّارْثْ. ؤُڒَا ذ ثِيرُو نّسْ ثُوغَا-ث عِيشْرِينْ ن إِغَادْجنْ. نتَّا إِذْڒَا ڒحْيُوضْ غَارْ ذَاخڒْ ن وخَّامْ س ستَّا-مْيَا ن ثَالِينْثَاثْ ن وُورغْ إِصْفَانْ. ‏9 ڒوْزنْ ن إِمسْمَارنْ إِسكّْوَا خمْسِينْ ن إِشِيقْلنْ ن وُورغْ. إِذْڒَا ؤُڒَا ذ ثِيغُورْفَاثِينْ ن سنّجْ س وُورغْ.

‏10 ذڭْ وخَّامْ ن وقْذَاسْ ن ؤُقدَّاسْ إِڭَّا ثْنَاينْ ن إِكِيرُوبنْ، أَمْ ڒْخذْمثْ ن ونْقَاشْ، ؤُ إِڒحّفْ إِ-ثنْ س وُورغْ.

‏11 أَفْرِيونْ ن إِكِيرُوبنْ جْمِيعْ عبَّارنْ عِيشْرِينْ ن إِغَادْجنْ ذِي ثُوزّڭَّارْثْ. أَفْرِيوْ أَمزْوَارُو إِعبَّارْ خمْسَا ن إِغَادْجنْ ن ثُوزّڭَّارْثْ ؤُ إِتَّاكّْوَاضْ ڒْحِيضْ ن ثَادَّارْثْ. أَفْرِيوْ نّغْنِي ن خمْسَا ن إِغَادْجنْ إِتَّاكّْوَاضْ أَفْرِيوْ ن ؤُكِيرُوبْ نّغْنِي.

‏12 أَفْرِيوْ ن ؤُكِيرُوبْ نّغْنِي إِعبَّارْ ؤُڒَا ذ خمْسَا ن إِغَادْجنْ ؤُشَا إِتَّاكّْوَاضْ ڒْحِيضْ ن ثَادَّارْثْ. أَفْرِيوْ نّغْنِي ن خمْسَا ن إِغَادْجنْ إِڒقّفْ أَفْرِيوْ ن ؤُكِيرُوبْ نّغْنِي.

‏13 أَفْرِيونْ ن إِكِيرُوبنْ-أَ تّْوَابزّْعنْ عِيشْرِينْ ن إِغَادْجنْ ؤُ نِيثْنِي بدّنْ خْ إِضَارنْ نْسنْ ذ إِغمْبَابْ نْسنْ سّوْشنْ غَارْ ذَاخڒْ.

‏14 نتَّا إِڭَّا ؤُڒَا ذ أَڒحَّافْ س ڒقْطنْ أَذحْمِي ذ أَرْجُووَانِي ذ أَزڭّْوَاغْ يُودْجْغنْ ؤُ سْ ڒقْطنْ أَزْذَاذْ ؤُشَا إِڭَّا خَاسْ إِكِيرُوبنْ.

‏15 غَارْ زَّاثْ ن ثَادَّارْثْ إِڭَّا نتَّا ثْنَاينْ ن إِبِيلَارنْ س إِشْثْ ن ثُوزُوڭَّارْثْ ن خمْسَا ؤُ-ثْڒَاثِينْ ن إِغَادْجنْ. تَّاجّْ خْ ثْقِيشَّاثْ نّسْ ثُوغَا-ث خمْسَا ن إِغَادْجنْ.

‏16 نتَّا إِڭَّا ؤُڒَا ذ سّْنَاسڒْ إِزوّْقنْ أَمْ ثِينِّي ذڭْ وخَّامْ ن ذَاخڒْ ن زَّاوشْثْ ؤُشَا إِڭَّا إِ-ثنْثْ خْ ثْقِيشَّاثِينْ ن إِبِيلَارنْ. إِڭَّا ؤُڒَا ذ مْيَا ن إِرمَّامنْ ؤُشَا إِشدّْ إِ-ثنْ غَارْ سّْنَاسڒْ إِزوّْقنْ.

‏17 نتَّا إِسّْبدّْ إِبِيلَارنْ غَارْ زَّاثْ ن زَّاوشْثْ ثَامقّْرَانْثْ، إِجّنْ خْ يفُّوسْ ؤُ إِجّنْ خْ ؤُزڒْمَاضْ. ونِّي غَارْ يفُّوسْ إِڭَّا أَسْ يَاخِينْ ؤُ ونِّي خْ ؤُزڒْمَاضْ إِڭَّا أَسْ بُوعَازْ.