‏1 ؤُشَا إِنَّا ؤُجدْجِيذْ ذَاوُوذْ إِ مَارَّا أَڭْرَاوْ ن ڒْڭنْسْ: ”مِّي سُولِيمَانْ ذ أَينِّي ونِّي إِفَارْزْ إِ-ث أَربِّي. نتَّا عَاذْ ذ أَمژْيَانْ ذ أَرخْفنْ ؤُشَا ڒْخذْمثْ ذ ثَامقّْرَانْثْ، مَاغَارْ وَارْ إِدْجِي ڒقْصَارْ إِ يِيجّْ ن بْنَاذمْ مَاشَا إِ سِيذِي أَربِّي. ‏2 س مَارَّا ثِيزمَّارْ إِنُو سّْوجْذغْ إِ ثَادَّارْثْ ن أَربِّي إِنُو ؤُرغْ إِ ڒقْشُوعْ ن وُورغْ، نُّوقَارْثْ إِ ڒقْشُوعْ ن نُّوقَارْثْ، نّْحَاسْ إِ ڒقْشُوعْ ن نّْحَاسْ، ؤُزَّاڒْ إِ ڒقْشُوعْ ن وُوزَّاڒْ، أَكشُّوضْ إِ ڒقْشُوعْ ن ؤُكشُّوضْ، ذ إِژْرَا ن ’بِيرِيلْ‘ ذ إِژْڒَا إِ غَا تّْوَاڭّنْ ذِي ثْشُويَارْ، ذ إِژْرَا إِبَارْشَاننْ يَارقّنْ ؤُڒَا ذ إِژْرَا إِتّْوَاسْقَارقْشنْ، ؤُڒَا عَاذْ عْڒَامْ كُوڒْ إِژْرَا إِغْڒَانْ، ؤُشَا خنِّي أَطَّاسْ ن إِژْرَا ن ڒْمَارْمُورْ ذ أَشمْڒَاڒْ. ‏3 زِي ثَايْرِي إِنُو إِ ثَادَّارْثْ ن أَربِّي إِنُو، أَذْ أَرْزْفغْ زڭْ وَاڭْڒَا إِنُو عَاذْ ؤُرغْ ذ نُّوقَارْثْ، ثِيوَا إِ مِينْ سّْوجْذغْ إِ ثَادَّارْثْ ن زَّاوشْثْ إِقدّْسنْ، ‏4 عَاذْ ثڒْثْ-أَڒَافْ ن ثَالِينْثَاثْ ن وُورغْ زڭْ وُورغْ ن ؤُفِيرْ ذ سبْعَا-أَڒَافْ ثَالِينْثَاثْ ن نُّوقَارْثْ إِصْفَانْ مَاحنْذْ أَذْ زَّايْسنْ حنّْشنْ ڒحْيُوضْ ن إِخَّامنْ. ‏5 ؤُرغْ إِ ڒقْشُوعْ ن وُورغْ ذ نُّوقَارْثْ إِ ڒقْشُوعْ ن نُّوقَارْثْ، إِ مَارَّا ڒْخذْمثْ إِ غَا ثتّْوَاڭّْ س ؤُفُوسْ ن إِحْرَايْفِييّنْ. مَانْ ونْ خنِّي إِخْسنْ أَسّْ-أَ أَذْ إِشُّورْ أَفُوسْ نّسْ س ثوْهِيبِينْ إِ سِيذِي؟“

‏6 خَاسْ ؤُشَا إِوْينْ إِمقّْرَاننْ ن ثُوذْرِينْ ن إِبَابَاثنْ ذ إِمقّْرَاننْ ن ثْقبَّاڒْ ن إِسْرَائِيل ذ ڒْقبْطَانَاثْ خْ وَاڒفْ ذ ڒْقبْطَانَاثْ خْ مْيَا ثِيوْهِيبِينْ نْسنْ س ڒْخَاضَارْ، جْمِيعْ أَكْ-ذ إِمقّْرَاننْ خْ ڒْخذْمثْ ن ؤُجدْجِيذْ. ‏7 نِيثْنِي أَرْزْفنْ إِ ثْسخَّارْثْ ن ثَادَّارْثْ ن أَربِّي خمْسَا-أَڒَافْ ن ثَالِينْثْ ن وُورغْ ذ عشْرَا-أَڒَافْ ن ذْرَاخْمَاثْ ذ عشْرَا-أَڒَافْ ن ثَالِينْثَاثْ ن نُّوقَارْثْ ذ ثْمنْطَاشْ-أَڒفْ ن ثَالِينْثَاثْ ن نّْحَاسْ ذ مْيَاثْ-أَڒفْ ن ثَالِينْثَاثْ ن وُوزَّاڒْ. ‏8 ونِّي غَارْ ؤُفِينْ إِژْرَا إِغْڒَانْ، إِوْشَا إِ-ثنْ إِ وخَّامْ ن ثْخُوبَايْ ن ثَادَّارْثْ ن سِيذِي ونِّي ثُوغَا سَاذُو ؤُفُوسْ ن يَاحِييِيلْ، أَجَارْشُونِي. ‏9 إِفَارْحْ ڒْڭنْسْ س ثوْهِيبِينْ نْسنْ إِ إِمّوْشنْ س ڒْخَاضَارْ، مَاغَارْ نِيثْنِي وْشِينْ زڭْ وُوڒْ إِمُونْ قَاعْ س ڒْخَاضَارْ إِ سِيذِي ؤُشَا إِفَارْحْ ؤُجدْجِيذْ ذَاوُوذْ ڒفْرَاحثْ ذ ثَامقّْرَانْثْ أَطَّاسْ.

‏10 ذَاوُوذْ إِبَاركْ سِيذِي زَّاثْ إِ ثِيطَّاوِينْ ن مَارَّا أَڭْرَاوْ ن ڒْڭنْسْ، إِنَّا:

”أَذْ ثتّْوَابَارْكذْ شكْ، أَ سِيذِي، أَربِّي ن بَابَاثْنغْ إِسْرَائِيل،

زِي ڒبْذَا أَڒْ ڒبْذَا!

‏11 إِ شكْ، أَ سِيذِي، ڒمْغَارثْ ذ صُّولْطَا ذ ڒْعزّْ ذ شَّانْ ذ لْعَاضَامَا،

مِينْزِي مَارَّا مِينْ إِدْجَانْ ذڭْ ؤُجنَّا ؤُ خْ ثمُّورْثْ أَقَا-ث نّكْ.

زَّايكْ، أَ سِيذِي، إِ ثدْجْ ثَاڭلْذِيثْ

شكْ ذ ونِّي إِسّْڭعّْذنْ إِخفْ نّكْ ذ أَزدْجِيفْ ثِيوَا مَارَّا.

‏12 أَڭْڒَا ذ شَّانْ زَّاثْ إِ وُوذمْ نّكْ

ؤُ شكْ ثْصدْجْضذْ خْ مَارَّا مِينْ إِدْجَانْ.

أَقَا-ث جّهْذْ ذ صُّولْطَا ذڭْ ؤُفُوسْ نّكْ،

أَقَا-ث ذڭْ ؤُفُوسْ نّكْ حِيمَا أَذْ ثوْشذْ ڒمْغَارثْ ذ جّهْذْ إِ مَارَّا.

‏13 خنِّي ڒخُّو، أَربِّي نّغْ، نشِّينْ نتّْقَاذَا شكْ

ؤُ نتّْصبّحْ ذڭْ يِيسمْ ن ڒْعزّْ نّكْ.

‏14 مَاغَارْ مِينْ عْنِيغْ نشّْ ذ مِينْ إِعْنَا ڒْڭنْسْ إِنُو،

أَقَا نشِّينْ غَارْنغْ ثِيزمَّارْ أَذْ نوْشْ أَمُّو س ڒْخَاضَارْ؟

زَّايكْ د-إِتَّاسْ مَارَّا،

ؤُ مِينْ إِ ذ أَشْ نوْشَا، نوْشَا إِ-ث زڭْ ؤُفُوسْ نّكْ.

‏15 مَاغَارْ نشِّينْ مْغِيرْ ذ إِبَارَّانِييّنْ ذ إِمعْزَابْ زَّاثْ إِ وُوذمْ نّكْ،

أَمْ ڒجْذُوذْ نّغْ.

ؤُسَّانْ نّغْ خْ ثمُّورْثْ أَمشْنَاوْ ثِيڒِي،

ؤُ ڒَايَاسْ وَارْ ذِينْ إِدْجِي.

‏16 أَ سِيذِي، أَربِّي نّغْ، زڭْ ؤُفُوسْ نّكْ يُوسَا-د مَارَّا أَفيّضْ-أَ إِ نسّوْجذْ،

حِيمَا أَذْ نبْنَا إِشْثْ ن ثَادَّارْثْ إِ شكْ،

إِ يِيسمْ نّكْ ذ أَمْقدّسْ.

مَارَّا أَيَا ذ نّكْ.

‏17 نشّْ سّْنغْ، أَ أَربِّي إِنُو، أَقَا شكْ ثْقدْجْبذْ ؤُڒْ

ؤُ أَقَا إِتّعْجِيبْ أَشْ ؤُسڭّمْ.

نشّْ، ذِي ڒصْفَايثْ ن وُوڒْ إِنُو، وْشِيغْ مَارَّا أَيَا س ڒْخَاضَارْ،

ؤُ ڒخُّو أَقَا ؤُڒَا ذ ڒْڭنْسْ نّكْ إِ ذَا إِدْجَانْ،

- إِوَا ژْرِيغْ ث س ڒفْرَاحثْ - ،

إِوْشَا أَشْ ثِيوْهِيبِينْ س ڒْخَاضَارْ.

‏18 أَ سِيذِي، أَربِّي ن ڒجْذُوذْ نّغْ، ن إِبْرَاهِيمْ ذ إِسْحَاقْ ذ إِسْرَائِيل،

حْضَا خنِّي إِ ڒبْذَا

أَقَا أَيَا أَذْ يجّْ طَّابعْ خْ إِخَارِيصّنْ ذڭْ وُوڒْ ن ڒْڭنْسْ نّكْ

ؤُ نْذهْ ؤُڒْ نْسنْ غَاركْ!

‏19 أوْشْ ؤُڒَا إِ مِّي سُولِيمَانْ إِجّْ ن وُوڒْ إِمُونْ قَاعْ،

مَاحنْذْ أَذْ إِحْضَا ڒُومُورَاثْ نّكْ ذ شّْهَاذثْ نّكْ ذ ثِيوصَّا نّكْ،

ؤُ مَاحنْذْ أَذْ يڭّْ مَارَّا ؤُ مَاحنْذْ أَذْ إِبْنَا ڒقْصَارْ-أَ ن زَّاوشْثْ ثَامقّْرَانْثْ

إِ خْ سّْوجْذغْ نشّْ.“

‏20 خنِّي إِنَّا ذَاوُوذْ إِ مَارَّا أَڭْرَاوْ ن ڒْڭنْسْ: ”سْعُودْجمْ سِيذِي، أَربِّي نْومْ!“ خنِّي إِسّْعُودْجْ مَارَّا أَڭْرَاوْ ن ڒْڭنْسْ سِيذِي، أَربِّي ن ڒجْذُوذْ نْسنْ. نِيثْنِي ؤُضَارنْ أَزدْجِيفْ ؤُشَا قُّونْجْڒنْ إِ سِيذِي ؤُ إِ ؤُجدْجِيذْ. ‏21 ثِيوشَّا نّسْ إِوْينْ نِيثْنِي ثِيغَارْصَا إِ سِيذِي. نِيثْنِي إِوْينْ أَڒفْ ن إِينْذُوزنْ ذ أَڒفْ ن إِشَارِّييّنْ ذ أَڒفْ ن إِزْمَارنْ أَكْ-ذ مَارَّا ثِيوْهِيبِينْ ن ؤُسيّبْ ذ ثْغَارْصَا ن وشْمَاضْ إِ سِيذِي ؤُ خنِّي أَطَّاسْ ن ثْغَارْصَا إِ مَارَّا إِسْرَائِيل. ‏22 ذڭْ وَاسّْ نِّي شِّينْ ؤُ سْوِينْ نِيثْنِي س ڒفْرَاحثْ ثَامقّْرَانْثْ زَّاثْ إِ وُوذمْ ن سِيذِي ؤُ ڭِّينْ سُولِيمَانْ، مِّيسْ ن ذَاوُوذْ، ذ أَجدْجِيذْ إِ ثْوَاڒَا وِيسّْ ثْنَاينْ ؤُ ذهْننْ ث ذ أَمْڭوّذْ زَّاثْ إِ سِيذِي، ؤُ صَاذُوقْ ذهْننْ ث ذ أَكهَّانْ. ‏23 سُولِيمَانْ إِقِّيمْ خْ ڒْعَارْشْ ن سِيذِي أَمْ ؤُجدْجِيذْ ذڭْ ومْشَانْ ن بَابَاسْ ذَاوُوذْ. نتَّا إِفْڒحْ ؤُ مَارَّا إِسْرَائِيل إِسْڒَا أَسْ. ‏24 مَارَّا ڒْحُوكَّامْ ذ أَيْثْ ن بُو-ثغْرُوضْثْ ؤُڒَا ذ مَارَّا إِحنْجِيرنْ ن ؤُجدْجِيذْ ذَاوُوذْ، وْثِينْ ذڭْ أَفُوسْ أَذْ قِّيمنْ سَاذُو أَفُوسْ ن ؤُجدْجِيذْ سُولِيمَانْ. ‏25 يَارَّا سِيذِي سُولِيمَانْ أَذْ إِذْوڒْ ذ أَمقّْرَانْ أَڒْ طَّارْفْ زَّاثْ إِ ثِيطَّاوِينْ ن إِسْرَائِيل. نتَّا إِوْشَا أَسْ أَوقَّارْ إِڭلّْذنْ إِ ثُوغَا وَارْ إِدْجِي ؤُڒَا غَارْ إِجّْ ن ؤُجدْجِيذْ خْ إِسْرَائِيل قْبڒْ نّسْ.

‏26 أَمُّو إِ إِحْكمْ ذَاوُوذْ، مِّيسْ ن يَاسَّا، خْ مَارَّا إِسْرَائِيل. ‏27 ؤُسَّانْ نِّي ثُوغَا إِحْكمْ خْ إِسْرَائِيل، أَقَا أَثنْ أَربْعِينْ ن إِسڭّْوُوسَا. نتَّا إِحْكمْ ذِي حَابْرُونْ سبْعَا ن إِسڭّْوُوسَا ؤُ ذِي ؤُرْشَالِيمْ ثْڒَاثَا ؤُ-ثْڒَاثِينْ ن إِسڭّْوُوسَا. ‏28 نتَّا إِمُّوثْ ؤُمِي إِشَابْ مْلِيحْ، إِجِّيونْ ؤُسَّانْ، أَڭْڒَا ذ ؤُعُودْجِي. مِّيسْ سُولِيمَانْ إِذْوڒْ ذ أَجدْجِيذْ ذڭْ ومْشَانْ نّسْ. ‏29 إِمزْرُوينْ ن ؤُجدْجِيذْ ذَاوُوذْ، إِمزْوُورَا ذ إِنڭُّورَا، أَقَا تّْوَازمّمنْ ذڭْ وذْلِيسْ ن إِمزْرُوينْ ن ؤُمْوَاڒَاوْ شَامْوِيلْ ؤُ ذڭْ وذْلِيسْ ن إِمزْرُوينْ ن ؤُنَابِي نَاثَانْ ؤُ ذڭْ وذْلِيسْ ن إِمزْرُوينْ ن ؤُمْوَاڒَاوْ جَاذْ، ‏30 س مَارَّا مِينْ يُورَانْ خْ ثْڭلْذِيثْ نّسْ ؤُ خْ صُّولْطَا نّسْ ؤُ خْ إِكُوذنْ إِ خَاسْ د-إِكِّينْ ؤُڒَا خْ إِسْرَائِيل ؤُ خْ مَارَّا ثِيڭلْذِيوِينْ ن ثمُّورَا.